မၢတ်ႈထႄႇ 2

မႃႇၵူႉပိင်ႇၺႃႇသီႉၽၢႆႇတၢင်းမိူင်းဝၼ်းဢွၵ်ႇ

(တူၺ်း၊ မီႉ 5:2)

1ၼႂ်းၸူဝ်ႈပၢၼ်ၶုၼ်ႁေႃၶမ်း ႁေႇရူတ်ႈၼၼ်ႉ၊ ယေႇသူႉၶၢမ်ႇတၢင်းဢၼ်ၵိူတ်ႇလဵင်ႉ ၵႃႈတီႈၼႂ်းဝဵင်းပႅတ်ႉလႁႅမ်ႇ မိူင်းယူႉတႃႉယဝ်ႉၸင်ႇ၊ မႃႇၵူႉပိင်ႇၺႃႇသီႉၶဝ် လုၵ်ႉသေၵႃႈတီႈမိူင်းတၢင်းဝၼ်းဢွၵ်ႇ ႁွတ်ႈမႃးၵႃႈတီႈဝဵင်းယေႇရူႉသလႅမ်ႇလႄႈ တွင်ႈထၢမ်ဝႃႈ၊- 2ၶုၼ်ႁေႃၶမ်းယူႉတႃႉ ဢၼ်ၵိူတ်ႇလဵင်ႉမႃးၼၼ်ႉ မီးၵႃႈတီႈလႂ်ၶႃႈ။ ပိူဝ်ႈဢၼ်ႁဝ်းၶႃႈလႆႈႁၼ် လၢဝ်မၼ်းၸဝ်ႈ ၵႃႈတီႈမိူင်းတၢင်းဝၼ်းဢွၵ်ႇပုၼ်ႉလႄႈ ႁဝ်းၶႃႈႁွတ်ႈမႃးႁႂ်ႈလႆႈဝႆႈပုၵ်ႈၸေႃႇ တီႈမၼ်းၸဝ်ႈၶႃႈဢေႃႈ၊ ဝႃႈၼင်ႇၼႆဢေႃႈ။- 3မိူဝ်ႈဢၼ်ငိၼ်းၵႂၢမ်းၸိူဝ်ႉၼင်ႇၼႆၼၼ်ႉၸိုင်၊ ၶုၼ်ႁေႃၶမ်းႁေႇရူတ်ႈ ဢိၵ်ႇတင်းၵူၼ်းဝဵင်းယေႇရူႉသလႅမ်ႇ တင်းသဵင်ႈတင်းလူင် ယၢပ်ႇၸႂ်ယုင်ႈၸႂ်လႄႈ၊- 4ႁႂ်ႈယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းထုတ်ႇၵျၢမ်းၵႃႈမီးတင်းသဵင်ႈတင်းလူင် ၸူႉၵၼ်တုမ်ၵၼ်သေယဝ်ႉ၊ တွင်ႈထၢမ်လႄႈဝႃႈ၊ ၸဝ်ႈၶရိၸ်ႈၸိုင် တၵ်းၵိူတ်ႇလဵင်ႉမႃးၵႃႈတီႈလႂ်၊ ဝႃႈၼင်ႇၼႆဢေႃႈ။- 5ၶဝ်ၸိူဝ်းၼၼ်ႉၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ တၵ်းၵိူတ်ႇလဵင်ႉမႃး ၵႃႈတီႈၼႂ်းဝဵင်းပႅတ်ႉလႁႅမ်ႇ မိူင်းယူႉတႃႉ တီႈၶႃႈဢေႃႈ။ ဢၼ်ပရေႃးၽႅတ်ႈတႅမ်ႈဝႆႉၸမ်ႉ၊- 6ဝဵင်းပႅတ်ႉလႁႅမ်ႇမိူင်းယူႉတႃႉဢိူၺ်း၊ မႂ်းၼႆႉပဵၼ်ဝဵင်းလဵၵ်ႉဝဵင်းၼွႆႉ ၼႂ်းၶဝ်ၸိူဝ်းဢၼ်လႆႈဢုပ်ႉပိူင်ႇမိူင်းယူႉတႃႉၼၼ်ႉဢမ်ႇၸႂ်ႈ။ လွင်ႈမၼ်းၸမ်ႉ ၸဝ်ႈဢၼ်လႆႈဢုပ်ႉပိူင်ႇမုၵ်ႉၸိူဝ်းၵူၼ်းၵဝ် မဵဝ်းဢီႉသရေႇလႃႉၼၼ်ႉ တၵ်းပေႃႇမႃးၵႃႈၼႂ်းမႂ်းဢေႃႈ၊ ဝႃႈၼင်ႇၼႆဢေႃႈ။

7မိူဝ်ႈၼၼ်ႉ ၶုၼ်ႁေႃၶမ်းႁေႇရူတ်ႈ ႁွင်ႉဢဝ်မႃႇၵူႉပိင်ႇၺႃႇသီႉၸိူဝ်းၼၼ်ႉမႃးတဵတ်ႇတဵတ်ႇလႄႈ ထၢမ်တူၺ်းလွင်ႈၶိင်ႇၵႃႇလႃႉဢၼ်လၢဝ်ပေႃႇမႃးၼၼ်ႉ သေႇၶျႃႇလီငၢမ်းယဝ်ႉၸင်ႇ၊- 8ပွႆႇၸႂ်ႉၶဝ်ၵႂႃႇၵႃႈတီႈဝဵင်းပႅတ်ႉလႁႅမ်ႇပုၼ်ႉလႄႈ သင်ႇလၢတ်ႈဝႃႈ၊ သူၵႂႃႇလႄႈ ၵျူဝ်းၸႃးႁႃလုၵ်ႈဢွၼ်ႇၼၼ်ႉသေၵမ်းတႃႉ။ ပေႃးထူပ်းႁၼ်ယဝ်ႉ၊ ၼင်ႇႁိုဝ်ၵဝ်တၵ်းလႆႈဝႆႈပုၵ်ႈၸေႃႇ တီႈမၼ်းၸိုင် ၶိုၼ်းမႃးလၢတ်ႈတီႈၵဝ်သေၵမ်းတႃႉ၊ ဝႃႈၼင်ႇၼႆဢေႃႈ။- 9ၶဝ်ၸိူဝ်းၼၼ်ႉ ထွမ်ႇဢဝ်ၵႂၢမ်းၶုၼ်ႁေႃၶမ်းသေယဝ်ႉ၊ ဢွၵ်ႇၵႂႃႇဢေႃႈ။ လၢဝ်ဢၼ်ၶဝ်လႆႈႁၼ်ၼႂ်းမိူင်းတၢင်းဝၼ်းဢွၵ်ႇၼၼ်ႉ ၵႂႃႇပႃႈၼႃႈၶဝ်သေလႄႈ ၵိုတ်းၼိမ်ယူႇၵႃႈတီႈၼိူဝ်တီႈဢၼ် လုၵ်ႈဢွၼ်ႇမီးၼၼ်ႉဢေႃႈ။- 10ၶဝ်ၸိူဝ်းၼၼ်ႉ မိူဝ်ႈဢၼ်ႁၼ်လၢဝ်ၼၼ်ႉၸိုင် သိူဝ်းၸူမ်းၼႃႇလူင်လၢင်လႄႈ၊- 11ၶဝ်ႈၵႂႃႇၵႃႈၼႂ်းႁိူၼ်းလႄႈ ထူပ်းႁၼ်လုၵ်ႈဢွၼ်ႇတင်းမႄႈၸဝ်ႈမႃႇရီႉသေယဝ်ႉ၊ ၶုပ်ႉမူပ်ႇဝႆႈလႄႈ ဢဝ်ၽၼ်ႇတႃႇ ဢုၵ်ႉၸႃႇၶဝ်ဢွၵ်ႇယဝ်ႉၸင်ႇ၊ ဢဝ်ၶမ်း ဢိၵ်ႇတင်း လေႃႇပၢၼ်ႇ တင်းမူႉရၼ်ႇ ၵၢပ်ႈပုၵ်ႈၸေႃႇဢေႃႈ။- 12လိုၼ်းၼၼ်ႉ လွင်ႈၼင်ႇႁိုဝ်တၵ်းဢမ်ႇလႆႈၶိုၼ်းမိူဝ်းၸူးၵႃႈတီႈၶုၼ်ႁေႃၶမ်း ႁေႇရူတ်ႈၸိုင်၊ ၶဝ်လႆႈပျႃႇတိၵ်ႈၸဝ်ႈ ၼႂ်းတၢင်းဢၼ်ၼွၼ်းၽၼ်လႄႈ ၶိုၼ်းမိူဝ်းၵႂႃႇၵႃႈတီႈမိူင်းၶဝ်ပုၼ်ႉ သဵၼ်ႈတၢင်းတၢင်ႇသဵၼ်ႈသေဢေႃႈ။

ပၢႆႈၵႂႃႇယူႇတီႈမိူင်းဢေႇၵိပ်ႉတူႉ

13ဝၢႆးသေၶဝ်ၸိူဝ်းၼၼ်ႉမိူဝ်းၵႂႃႇယဝ်ႉ၊ တမၢၼ်ႇၵၢင်ႁၢဝ်ထႃႇဝရႃႉၽြႃး ပေႃႇမႃးတီႈယူဝ်းသႅပ်ႈ ၼႂ်းတၢင်းဢၼ်ၼွၼ်းၽၼ်လႄႈဝႃႈ၊ လုၵ်ႉတႃႉ။ ဢဝ်လုၵ်ႈဢွၼ်ႇတင်းမႄႈၸဝ်ႈ ပၢႆႈၵႂႃႇၵႃႈတီႈမိူင်း ဢေႇၵိပ်ႉတူႉပုၼ်ႉလႄႈ ယူႇၵႃႈတီႈၼၼ်ႈ တေႃႇထိုင်ႁွတ်ႈၸူဝ်ႈဢၼ်ၵဝ်ဢမ်ႇပႆႇၶိုၼ်းလၢတ်ႈတီႈမႂ်းၼၼ်ႉတႃႉ။ ၶုၼ်ႁေႃၶမ်း ႁေႇရူတ်ႈတၵ်းႁႃလုၵ်ႈဢွၼ်ႇၼႆႉ ႁႂ်ႈလႆႈဢဝ်တၢႆဢေႃႈ၊ ဝႃႈၼင်ႇၼႆဢေႃႈ။- 14မိူဝ်ႈၼၼ်ႉ ယူဝ်းသႅပ်ႈလုၵ်ႉလႄႈ ဢဝ်လုၵ်ႈဢွၼ်ႇတင်းမႄႈၸဝ်ႈ ၶိင်ႇၵၢင်ၶိုၼ်း ပၢႆႈၵႂႃႇၵႃႈတီႈမိူင်း ဢေႇၵိပ်ႉတူႉပုၼ်ႉသေယဝ်ႉ၊ ယူႇၵႃႈတီႈၼၼ်ႈ တေႃႇထိုင်ႁွတ်ႈၶုၼ်ႁေႇရူတ်ႈ ထၼ်ႈပေႃးတၢႆၼၼ်ႉဢေႃႈ။- 15လွင်ႈတၢင်းၼႆႉၸမ်ႉ၊ ၼင်ႇႁိုဝ်ပျႃႇတိၵ်ႈ ဢၼ်ၽြႃးပဵၼ်ၸဝ်ႈဢဝ်တင်း ပရေႃးၽႅတ်ႈလၢတ်ႈဝႆႉလႄႈဝႃႈ၊ ၵဝ်ႁွင်ႉဢဝ်လုၵ်ႈၸၢႆးၵဝ် ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉမႃးယဝ်ႉ၊ ဝႃႈၼင်ႇၼႆၼၼ်ႉ တၵ်းပျေႉၸုမ်ႇၸိုင်၊ ၸင်ႇပဵၼ်ဢေႃႈ။

လွင်ႈဢၼ်ဢဝ်တၢႆလုၵ်ႈဢွၼ်ႇလဵၵ်ႉလႂ်

16ၶုၼ်ႁေႃၶမ်းႁေႇရူတ်ႈၼၼ်ႉ မိူဝ်ႈဢၼ်ႁူႉလွင်ႈဢၼ် မႃႇၵူႉပိင်ႇၺႃႇသီႉၸိူဝ်းၼၼ်ႉ ပႅတ်ႉလႅၼ်ၼၼ်ႉၸိုင် ၸႂ်မႆႈၶႆႈၸႃႉၼႃႇလူင်လၢင်လႄႈ ထွၵ်ႈလူၺ်ႈၶိင်ႇၵႃႇလႃႉ လၢဝ်ဢၼ်လႆႈထၢမ်ဝႆႉၵႃႈတီႈမႃႇၵူႉပိင်ႇၺႃႇသီႉၶဝ် သေႇၶျႃႇလီငၢမ်းၼၼ်ႉယဝ်ႉၸင်ႇ၊ ပွႆႇၸႂ်ႉၵူၼ်းၵႂႃႇလႄႈ ဢဝ်ၽူႈၸၢႆးဢွၼ်ႇ ဢၼ်ဢသၢၵ်ႈလႆႈသွင်ပီႊလူင်းလုမ်ႈ#2:16 လူင်းလုမ်ႈ - ၶႂ်ႈဝႃႈ လူင်းတႂ်ႈ တင်းသဵင်ႈတင်းလူင်ၼၼ်ႉတၢႆ ၸႃႉၸဵမ်ၼႂ်းဝဵင်းပႅတ်ႉလႁႅမ်ႇ ဝၢၼ်ႈၼွၵ်ႈၼႃးပၢင်ႇ တင်းသဵင်ႈတင်းလူင်ဢေႃႈ။- 17ၵႂၢမ်းဢၼ်ပရေႃးၽႅတ်ႈယေႇရမီႉ ႁေႃးဝႆႉၼၼ်ႉၸိုင် ပျေႉၸုမ်ႇမိူဝ်ႈၼၼ်ႉဢေႃႈ။- 18ၵႂၢမ်းၼၼ်ႉၸမ်ႉ၊ ၵႃႈၼႂ်းတီႈရႃႇမႃႉ လႆႈငိၼ်းသဵင်ပွင်ႉသဵင်ၶၢင်း သဵင်ႁွင်ႉသဵင်ႁႆႈလႄႈ ရႃႇၶေႇလႃႉ ပိူဝ်ႈဢၼ်လုၵ်ႈလၢင်းတူဝ်ၸဝ်ႈၵဝ်ႇတင်းလၢႆဢမ်ႇမီးလႄႈ ႁႆႈယူႇဢမ်ႇပေႇၸႂ်လႆႈ၊ ဝႃႈၼင်ႇၼႆဢေႃႈ။

လုၵ်ႉတီႈမိူင်းဢေႇၵိပ်ႉတူႉပွၵ်ႈမႃးၶိုၼ်း

19ဝၢႆးသေၶုၼ်ႁေႃၶမ်းႁေႇရူတ်ႈၼၼ်ႉတၢႆယဝ်ႉ၊ တမၢၼ်ႇၵၢင်ႁၢဝ် ထႃႇဝရႃႉၽြႃးသမ်ႉ ပေႃႇမႃးၵႃႈတီႈယူဝ်းသႅပ်ႈ ၼႂ်းတၢင်းဢၼ် ၼွၼ်းၽၼ် ၵႃႈတီႈမိူင်း ဢေႇၵိပ်ႉတူႉ ပုၼ်ႉလႄႈဝႃႈ၊- 20လုၵ်ႉတႃႉ၊ ဢဝ်လုၵ်ႈဢွၼ်ႇတင်းမႄႈၸဝ်ႈ မိူဝ်ႈၵႂႃႇၵႃႈတီႈမိူင်း ဢီႉသရေႇလႃႉပုၼ်ႉတႃႉ။ ၶဝ်ၸိူဝ်းဢၼ်ႁႃႁႂ်ႈလႆႈဢဝ်လုၵ်ႈဢွၼ်ႇတၢႆတင်းလၢႆၼၼ်ႉ တၢႆယဝ်ႉ၊ ဝႃႈၼင်ႇၼႆဢေႃႈ။- 21မိူဝ်ႈၼၼ်ႉ ယူဝ်းသႅပ်ႈလုၵ်ႉလႄႈ ဢဝ်လုၵ်ႈဢွၼ်ႇတင်း မႄႈၸဝ်ႈသေယဝ်ႉ၊ မိူဝ်းၵႂႃႇၵႃႈတီႈမိူင်း ဢီႉသရေႇလႃႉဢေႃႈ။- 22မိူဝ်ႈဢၼ်ငိၼ်းလွင်ႈဢၼ် ဢႃႇၶေႇလႃႉလႆႈဢရႃႇပေႃႈမၼ်းၸဝ်ႈ ၶုၼ်ႁေႃၶမ်းႁေႇရူတ်ႈ ၵႃႈတီႈမိူင်းယူႉတႃႉၼၼ်ႉၸိုင်၊ ဢမ်ႇႁတ်းၵႂႃႇႁွတ်ႈၵႃႈတီႈပုၼ်ႉလႄႈ သမ်ႉလႆႈပျႃႇတိၵ်ႈၸဝ်ႈ ၼႂ်းတၢင်းဢၼ်ၼွၼ်းၽၼ်ယဝ်ႉၸင်ႇ၊ ငႅၵ်းၵႂႃႇၵႃႈတီႈမိူင်းၵႃႇလီႉလႄးပုၼ်ႉလႄႈ၊- 23ႁွတ်ႈထိုင်သေယဝ်ႉ၊ ယူႇၵႃႈၼႂ်းဝဵင်းဢၼ်ႁွင်ႉႁဵၵ်ႈၸိုဝ်ႈ ၼႃႇၸရႅတ်ႈၼၼ်ႉဢေႃႈ။ ဢၼ်ပရေႃးၽႅတ်ႈတင်းလၢႆလၢတ်ႈဝႆႉလႄႈဝႃႈ၊ ၸဝ်ႈၶရိၸ်ႈၸိုင် တၵ်းလႆႈႁွင်ႉႁဵၵ်ႈၵူၼ်းၼႃႇၸရႅတ်ႈဢေႃႈ၊ ဝႃႈၼင်ႇၼႆၼၼ်ႉ ပျေႉၸုမ်ႇယဝ်ႉဢေႃႈ။

Currently Selected:

မၢတ်ႈထႄႇ 2: CBMS

Highlight

Copy