မၢတ်ႈထႄႇ 1

လွင်ႈၸိူဝ်ႉၶိူဝ်းပူႇပေႃႈၸဝ်ႈယေႇသူႉၶရိၸ်ႈ

(တူၺ်း၊ လူႉ 3:23-38)

1ၸရၢင်းၸိူဝ်ႉၶိူဝ်း ၸဝ်ႈယေႇသူႉၶရိၸ်ႈ ဢၼ်သိုပ်ႇလူင်းမႃး ၵႃႈတီႈဢႃႇပြႃႇႁၢမ်ႇ တင်းတႃႇဝိတ်ႈၼၼ်ႉၸမ်ႉ၊- 2ဢႃႇပြႃႇႁၢမ်ႇ မီးလုၵ်ႈ ဢီႉၸၢၵ်ႈ။ ဢီႉၸၢၵ်ႈမီးလုၵ်ႈ ယႃႇၵုပ်ႈ။ ယႃႇၵုပ်ႈ မီးလုၵ်ႈ ၸႃႉၸဵမ်ယူႉတႃႉတင်းပီႈၼွင်ႉမၼ်းတင်းလၢႆ။- 3ယူႉတႃႉမီးလုၵ်ႈ ၽေးရိတ်ႉတင်းၸႃႇရႃႉ ဢၼ်လႆႈၵႃႈတီႈမေးမၼ်းတႃႇမႃႇ။ ၽေးရိတ်ႉ မီးလုၵ်ႈ ႁေႇၸရုၼ်ႇ။ ႁေႇၸရုၼ်ႇမီးလုၵ်ႈဢႃႇရမ်ႇ။- 4ဢႃႇရမ်ႇမီးလုၵ်ႈ ဢမီႉၼတပ်ႉ။ ဢမီႉၼတပ်ႉမီးလုၵ်ႈ ၼႃႇသုၼ်ႇ။ ၼႃႇသုၼ်ႇမီးလုၵ်ႈ သႃႇလမုၼ်ႇ။- 5သႃႇလမုၼ်ႇမီးလုၵ်ႈ ပေႃးၸႃႉဢၼ်လႆႈၵႃႈတီႈမေးမၼ်းရႃႇၶပ်ႉ။ ပေႃးၸႃႉ မီးလုၵ်ႈဢူဝ်းပိတ်ႉ ဢၼ်လႆႈၵႃႈတီႈမေးမၼ်းရူႉထႃႉ။ ဢူဝ်းပိတ်ႉမီးလုၵ်ႈ ယေႇသႄး။ ယေႇသႄးမီးလုၵ်ႈ ၶုၼ်လူင်တႃႇဝိတ်ႈ။

6ၶုၼ်လူင် တႃႇဝိတ်ႈမီးလုၵ်ႈ သေႃးလမုၼ်ႇ ဢၼ်လႆႈၵႃႈတီႈၵေႃႉဢၼ် ယၢမ်ႈပဵၼ်မေးဢူႉရီႉယႃႉယဝ်ႉၼၼ်ႉ။- 7သေႃးလမုၼ်ႇမီးလုၵ်ႈရူဝ်းပုမ်ႇ။ ရူဝ်းပုမ်ႇမီးလုၵ်ႈ ဢၽီႉယႃႉ။ ဢၽီႉယႃႉမီးလုၵ်ႈ ဢႃႇသႃႉ။- 8ဢႃႇသႃႉမီးလုၵ်ႈ ယူဝ်းသၽတ်ႉ။ ယူဝ်းသၽတ်ႉမီးလုၵ်ႈ ယူဝ်းရမ်ႇ။ ယူဝ်းရမ်ႇမီးလုၵ်ႈ ဢူဝ်းၸီႉယႃႉ။- 9ဢူဝ်းၸီႉယႃႉမီးလုၵ်ႈ ယူဝ်းထမ်ႇ။ ယူဝ်းထမ်ႇမီးလုၵ်ႈ ဢႃႇၶတ်ႉ။ ဢႃႇၶတ်ႉမီးလုၵ်ႈ ႁေႇၸၵီႉယႃႉ။ 10ႁေႇၸၵီႉယႃႉ မီးလုၵ်ႈ မၼႃႇသေႇ။ မၼႃႇသေႇမီးလုၵ်ႈ ဢႃႇမုၼ်ႇ။ ဢႃႇမုၼ်ႇမီးလုၵ်ႈ ယူဝ်းသီႉယႃႉ။- 11ၼႂ်းမိူဝ်ႈဢၼ်ၸမ်တၵ်းၶၢႆႉၵႂႃႇ ၵႃႈတီႈဝဵင်းပႃႇပူႉလုၼ်ႇပုၼ်ႉၸိုင်၊ ယူဝ်းသီႉယႃႉမီးလုၵ်ႈ ၸႃႉၸဵမ်ယေႇၶေႃးၼီႉယႃႉ တင်းပီႈၼွင်ႉမၼ်းတင်းလၢႆ။

12ဝၢႆးသေၶၢႆႉၵႂႃႇၵႃႈတီႈဝဵင်းပႃႇပူႉလုၼ်ႇပုၼ်ႉယဝ်ႉၼၼ်ႉ၊ ယေႇၶေႃးၼီႉယႃႉ မီးလုၵ်ႈ သႃလႃႉသေးလႃႉ။ သႃလႃႉသေးလႃႉမီးလုၵ်ႈ ၸေႇရူႉပႃႉပေႇလႃႉ။- 13ၸေႇရူႉပႃႉပေႇလႃႉမီးလုၵ်ႈ ဢပျုတ်ႉ။ ဢပျုတ်ႉမီးလုၵ်ႈ ဢေးလျႃႇၵိမ်ႇ။ ဢေးလျႃႇၵိမ်ႇမီးလုၵ်ႈဢႃၸေႃႇ။- 14ဢႃၸေႃႇမီးလုၵ်ႈ ၸႃႇတုတ်ႉ။ ၸႃႇတုတ်ႉမီးလုၵ်ႈဢၶိမ်ႇ။ ဢၶိမ်ႇမီးလုၵ်ႈ ဢေးလျုတ်ႉ။- 15ဢေးလျုတ်ႉမီးလုၵ်ႈ ဢေးလႃႇၸႃႇ။ ဢေးလႃႇၸႃႇမီးလုၵ်ႈ မတ်ႉထၼ်ႇ။ မတ်ႉထၼ်ႇမီးလုၵ်ႈ ယႃႇၵုပ်ႈ။- 16ယႃႇၵုပ်ႈမီးလုၵ်ႈ ယူဝ်းသႅပ်ႈ ဢၼ်ပဵၼ်ၽူဝ်မႃႇရီႉဢေႃႈ။ ၵႃႈတီႈမႃႇရီႉၼၼ်ႉ ၵိူတ်ႇလဵင်ႉမႃး ယေႇသူႉဢၼ်လႆႈႁွင်ႉႁဵၵ်ႈၸိုဝ်ႈၶရိၸ်ႈဢေႃႈ။- 17ပိူဝ်ႈဢၼ်ပဵၼ်ၼင်ႇၼႆလႄႈ ၸိူဝ်ႉၶိူဝ်းသိုပ်ႇသိုပ်ႇတၢမ်းတၢမ်း တင်းသဵင်ႈတင်းလူင်ၸမ်ႉ၊ ၸႃႉၸဵမ်ဢႃႇပြႃႇႁၢမ်ႇတေႃႇထိုင်ႁွတ်ႈ တႃႇဝိတ်ႈပဵၼ် သိပ်းသီႇသိုပ်ႇဢေႃႈ။ ၸႃႉၸဵမ်တႃႇဝိတ်ႈတေႃႇထိုင်ႁွတ်ႈ ၶၢႆႉၵႂႃႇၵႃႈတီႈဝဵင်းပႃႇပူႉလုၼ်ႇပုၼ်ႉ ပဵၼ်သိပ်းသီႇသိုပ်ႇဢေႃႈ။ ၸႃႉၸဵမ်ၶၢႆႉၵႂႃႇၵႃႈတီႈဝဵင်းပႃႇပူႉလုၼ်ႇပုၼ်ႉယဝ်ႉ တေႃႇထိုင်ႁွတ်ႈ ၸဝ်ႈၶရိၸ်ႈ ပဵၼ်သိပ်းသီႇသိုပ်ႇဢေႃႈ။

လွင်ႈၸဝ်ႈယေႇသူႉၶရိၸ်ႈၵိူတ်ႇလဵင်ႉ

(တူၺ်း၊ လူႉ 2:1-7)

18လွင်ႈတၢင်းဢၼ် ၸဝ်ႈယေႇသူႉၶၢမ်ႇတၢင်းဢၼ်ၵိူတ်ႇလဵင်ႉၸမ်ႉ၊ မႄႈၸဝ်ႈမႃႇရီႉၼၼ်ႉ မၢႆၵၼ်ဝႆႉတင်းယူဝ်းသႅပ်ႈလႄႈ ၸူဝ်ႈဢၼ်ဢမ်ႇပႆႇတိူဝ်ႉပႆႇထုၵ်ႇၼၼ်ႉ ၵွပ်ႈပိူဝ်ႈဝီႉၺိၺ်ႇဢၼ်မူတ်းၸၢင်ႇၸဝ်ႈလႄႈ ပႃးပတိၵ်ႉသၼ်ႇထေႇၼႂ်းတွင်ႉဢေႃႈ။- 19ၽူဝ်မၼ်း ယူဝ်းသႅပ်ႈၼၼ်ႉ ပဵၼ်ၵူၼ်းဢၼ်လီလႄႈ ပိူဝ်ႈဢၼ်ဢမ်ႇၶႂ်ႈႁႂ်ႈသရေႇမႃႇရီႉလူႉလႄႈ မီးၸႂ်ဢၼ်ၶႂ်ႈတဵတ်ႇတဵတ်ႇပႅတ်ႈဝႆႉဢေႃႈ။- 20မိူဝ်ႈဢၼ်မၼ်းၵျၢမ်ႇပွင်ၸိူဝ်ႉၼင်ႇၼႆယူႇၼၼ်ႉၸိုင်၊ တမၢၼ်ႇၵၢင်ႁၢဝ်ထႃႇဝရႃႉၽြႃး ပေႃႇမႃးတီႈမၼ်းၼႂ်းတၢင်းဢၼ်ၼွၼ်းၽၼ်လႄႈဝႃႈ၊ ယူဝ်းသႅပ်ႈလုၵ်ႈတႃႇဝိတ်ႈဢိူၺ်း ယႃႇပေၵူဝ်လွင်ႈဢၼ် တၵ်းသိမ်းဢဝ်မေးမႂ်းမႃႇရီႉၼၼ်ႉ။ ဢၼ်တႄႇပတိၵ်ႉသၼ်ႇထေႇၼႂ်းမၼ်းၼၼ်ႉ ပဵၼ်ၵွပ်ႈပိူဝ်ႈဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။- 21မၼ်းၼၼ်ႉ တၵ်းၵိူတ်ႇလဵင်ႉမႃးလုၵ်ႈၸၢႆးဢေႃႈ။ လုၵ်ႈၼၼ်ႉၸိုင် ပိူဝ်ႈဢၼ်ပဵၼ်ၵေႃႉဢၼ် တၵ်းၵႄႇၶျွတ်ႈဢဝ်ၵူၼ်းမဵဝ်းတူဝ်ၸဝ်ႈၵဝ်ႇတင်းလၢႆၵႃႈၼႂ်းဢပႅတ်ႈလႄႈ တၵ်းလႆႈႁွင်ႉႁဵၵ်ႈၸိုဝ်ႈ ယေႇသူႉဢေႃႈ၊ ဝႃႈၼင်ႇၼႆဢေႃႈ။

22လွင်ႈတၢင်းၸိူဝ်းၼႆႉၸမ်ႉ၊ ၼင်ႇႁိုဝ်ပျႃႇတိၵ်ႈဢၼ်ၽြႃးပဵၼ်ၸဝ်ႈ ဢဝ်တင်းပရေႃးၽႅတ်ႈလၢတ်ႈဝႆႉၼၼ်ႉ တၵ်းပျေႉၸုမ်ႇၸိုင်၊ ၸင်ႇပဵၼ်ဢေႃႈ။- 23ပျႃႇတိၵ်ႈၸဝ်ႈၼၼ်ႉၸမ်ႉ၊ တူၺ်းလူး၊ ၵၼ်ႇၺႃႇလုၵ်ႈယိင်းသၢဝ်တၵ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉမႃးလုၵ်ႈၸၢႆးဢေႃႈ။ လုၵ်ႈၸၢႆးၼၼ်ႉၸိုင် တၵ်းလႆႈႁွင်ႉႁဵၵ်ႈၸိုဝ်ႈ ဢေႇမႃႇၼူၺ်ႇလႃႉဢေႃႈ၊ ဝႃႈၼႆ မီးမႃးၼင်ႇၼႆဢေႃႈ။ ဢၼ်ဝႃႈ ဢေႇမႃႇၼူၺ်ႇလႃႉၸမ်ႉ၊ ၶႂ်ႈဝႃႈ ၽြႃးပဵၼ်ၸဝ်ႈ ဢၼ်မီးယူႇလူၺ်ႈၵၼ်တင်းႁဝ်းဢေႃႈ။

24 ယူဝ်းသႅပ်ႈၼၼ်ႉ တိုၼ်ႇမႃးၵႃႈတီႈတၢင်းဢၼ်ၼွၼ်းလပ်းၼၼ်ႉသေယဝ်ႉ၊ ႁဵတ်းၸွမ်းၸိူဝ်ႉၼင်ႇဢၼ် တမၢၼ်ႇၵၢင်ႁၢဝ်ထႃႇဝရႃႉၽြႃး သင်ႇလၢတ်ႈဝႆႉၼၼ်ႉလႄႈ ၸင်ႇသိမ်းဢဝ်မေးၸဝ်ႈၵဝ်ႇဢေႃႈ။- 25ၼႂ်းဝႃႈၼၼ်သေၵေႃႈ ၸူဝ်ႈဢၼ်ဢမ်ႇပႆႇၵိူတ်ႇလဵင်ႉမႃးလုၵ်ႈႁူဝ်သၢဝ်ၼၼ်ႉၸိုင် ယင်းဢမ်ႇတိူဝ်ႉဢမ်ႇထုၵ်ႇလႄႈယူႇဢေႃႈ။ လုၵ်ႈၸၢႆးၼၼ်ႉၵေႃႈ ႁွင်ႉႁဵၵ်ႈၸိုဝ်ႈယေႇသူႉဢေႃႈ။

Currently Selected:

မၢတ်ႈထႄႇ 1: CBMS

Highlight

Copy