ငဝ်ႈၵမ်ႇၽႃႇ 22

ဢႃႇပြႃႇႁၢမ်ႇဢဝ်ဢီႉၸၢၵ်ႈသၢၵ်ႈလူႇ

1ဝၢႆးၼၼ်ႉ ၽြႃးပဵၼ်ၸဝ်ႈၸၢမ်းတူၺ်းဢႃႇပြႃႇႁၢမ်ႇလႄႈ ႁွင်ႉဢႃႇပြႃႇႁၢမ်ႇလႄႈဝႃႈ၊ ဢႃႇပြႃႇႁၢမ်ႇဢိူၺ်း၊ ဝႃႈၼင်ႇၼႆလႄႈ ဢႃႇပြႃႇႁၢမ်ႇၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈမီးယူႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ။- 2မၼ်းၸဝ်ႈလၢတ်ႈလႄႈဝႃႈ၊ မႂ်းဢဝ်လုၵ်ႈၸၢႆးမႂ်းဢၼ်မႂ်းမီးၵေႃႉလဵဝ်ၵူၺ်း၊ ဢီႉၸၢၵ်ႈဢၼ်မႂ်းႁၵ်ႉၼႃႇၼၼ်ႉသေလႄႈ ၵႂႃႇၵႃႈတီႈမိူင်းမေႃးရီႉပုၼ်ႉတႃႉ။ ဢဝ်မၼ်းႁဵတ်းယိတ်ႈဢၼ်တုတ်ႇၽႆးလႄႈ ပုၵ်ႈၸေႃႇၵႃႈၼိူဝ်လွႆဢၼ်ၵဝ်တၵ်းၼႄပၼ်ၼၼ်ႉတႃႉ၊ ဝႃႈၼင်ႇၼႆဢေႃႈ။

3 ဢႃႇပြႃႇႁၢမ်ႇၵေႃႈလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ႁၢင်ႈၵွပ်းလီႈမၼ်းသေယဝ်ႉ၊ ႁွင်ႉဢဝ်ၵူၼ်းၸႂ်ႉၵူၼ်းသွႆမၼ်းသွင်ၵေႃႉ ဢိၵ်ႇတင်းလုၵ်ႈၸၢႆးမၼ်းဢီႉၸၢၵ်ႈၼၼ်ႉသေလႄႈ ၽႃႇၽိုၼ်းပုၼ်ႈဢၼ်တၵ်းတုတ်ႇယိတ်ႈယဝ်ႉၸင်ႇ လုၵ်ႉၵႂႃႇၸူးၵႃႈတီႈဢၼ် ၽြႃးပဵၼ်ၸဝ်ႈမီးဢမိင်ႉဝႆႉၼၼ်ႉဢေႃႈ။- 4ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉၸိုင်၊ ဢႃႇပြႃႇႁၢမ်ႇမုင်ႈတူၺ်းလႄႈယူႇတီႈဢၼ်ၵႆ ႁၼ်တီႈၼၼ်ႈသေယဝ်ႉ၊- 5ဢႃႇပြႃႇႁၢမ်ႇလၢတ်ႈတီႈၵူၼ်းၸႂ်ႉၵူၼ်းသွႆမၼ်းသွင်ၵေႃႉၼၼ်ႉလႄႈဝႃႈ၊ သူယူႇထႃႈၵႃႈတီႈၼႆႈဢိၵ်ႇလူၺ်ႈၵၼ်တင်းလီႈၼႆႉတႃႉ။ ၵဝ်ဢိၵ်ႇတင်းလုၵ်ႈၸၢႆးဢွၼ်ႇၼႆႉတၵ်းၵႂႃႇၵႃႈတီႈပုၼ်ႉလႄႈ ႁဵတ်းတၢင်းဢၼ်ၵူဝ်းၵႂၢႆႇသေယဝ်ႉ၊ တၵ်းၶိုၼ်းမႃးၵႃႈတီႈသူဢေႃႈ၊ ဝႃႈၼင်ႇၼႆဢေႃႈ။- 6မိူဝ်ႈၼၼ်ႉဢႃႇပြႃႇႁၢမ်ႇဢဝ်ၽိုၼ်းပုၼ်ႈဢၼ်တၵ်းတုတ်ႇယိတ်ႈၼၼ်ႉသေလႄႈ တၢင်ႇသႂ်ႇၵႃႈၼိူဝ်လုၵ်ႈၸၢႆးမၼ်းဢီႉၸၢၵ်ႈသေယဝ်ႉ၊ ဢဝ်မိုဝ်းမၼ်းယိပ်းၵမ်ၽႆး တင်းမိတ်ႈယူႇသေလႄႈ၊ သွင်ၶႃၼၼ်ႉ ၵႂႃႇလူၺ်ႈၵၼ်ဢေႃႈ။- 7ၵမ်းၼၼ်ႉ ဢီႉၸၢၵ်ႈႁွင်ႉဢႃႇပြႃႇႁၢမ်ႇလႄႈဝႃႈ၊ ပေႃႈဢိူၺ်း၊ ဝႃႈၼင်ႇၼႆသေယဝ်ႉ၊ ဢႃႇပြႃႇႁၢမ်ႇၵေႃႈဢိူဝ်လႄႈဝႃႈ၊ လုၵ်ႈၸၢႆးၵဝ်ဢိူၺ်း၊ ၵဝ်မီးယူႇဢေႃႈ၊ ဝႃႈၼင်ႇၼႆဢေႃႈ။ ဢီႉၸၢၵ်ႈၵေႃႈဝႃႈ၊ တူၺ်းလူး၊ ၽႆးတင်းၽိုၼ်းၸိုင်ပႃးမႃးဢေႃႈ။ သူဝ်းဢွၼ်ႇပုၼ်ႈဢၼ်တၵ်းတုတ်ႇယိတ်ႈၸမ်ႉ၊ မီးၵႃႈလႂ်၊ မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊- 8ဢႃႇပြႃႇႁၢမ်ႇလၢတ်ႈလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ သူဝ်းဢွၼ်ႇပုၼ်ႈယိတ်ႈဢၼ်တၵ်းတုတ်ႇၽႆးၸိုင် ၽြႃးပဵၼ်ၸဝ်ႈတၵ်းမႄးႁႅၼ်းဝႆႉပုၼ်ႈမၼ်းၸဝ်ႈဢေႃႈ၊ ဝႃႈၼင်ႇၼႆဢေႃႈ။ၼင်ႇၼၼ်လႄႈ သွင်ၶႃၼၼ်ႉ ၵႂႃႇလူၺ်ႈၵၼ်လႄႈ၊- 9ႁွတ်ႈထိုင်ၵႃႈတီႈဢၼ်ၽြႃးပဵၼ်ၸဝ်ႈ မီးဢမိင်ႉဝႆႉၼၼ်ႉသေယဝ်ႉ၊ ဢႃႇပြႃႇႁၢမ်ႇတႄႇႁဵတ်းယိတ်ႈပလၢင်ႇ ၵႃႈတီႈၼၼ်ႈလႄႈ ဢဝ်ၽိုၼ်းသိူဝ်ႇဝႆႉယဝ်ႉၸင်ႇ မတ်ႉၽုၵ်ႇလုၵ်ႈၸၢႆးမၼ်းဢီႉၸၢၵ်ႈလႄႈ တၢင်ႇသႂ်ႇၵႃႈၼိူဝ်ၽိုၼ်းဢၼ်မီးၵႃႈၼိူဝ်ယိတ်ႈပလၢင်ႇၼၼ်ႉဢေႃႈ။- 10မၼ်းယိုၼ်ႈမိုဝ်းသေလႄႈ ယိပ်းၵမ်ဢဝ်မိတ်ႈ ႁႂ်ႈလႆႈဢဝ်လုၵ်ႈၸၢႆးမၼ်းတၢႆဢေႃႈ။

11မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးယူႇၵႃႈၼိူဝ်ၵၢင်ႁၢဝ်ႁွင်ႉလႄႈဝႃႈ၊ ဢႃႇပြႃႇႁၢမ်ႇဢိူၺ်း၊ ဢႃႇပြႃႇႁၢမ်ႇဢိူၺ်း၊ ဝႃႈၼင်ႇၼႆဢေႃႈ။ ဢႃႇပြႃႇႁၢမ်ႇလဝ်ႊလၢတ်ႈလႄႈဝႃႈ၊ ၵဝ်ၶႃႈမီးယူႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊- 12မၼ်းၸဝ်ႈလၢတ်ႈလႄႈဝႃႈ၊ ယႃႇပေတိူဝ်ႉပေထုၵ်ႇလုၵ်ႈၸၢႆးဢွၼ်ႇၼၼ်ႉ။ ယႃႇပေႁဵတ်းၵႃႈသင်တီႈမၼ်းလႃးလႃး။ တေႃႈလဵဝ်ၼႆႉၵဝ်ႁူႉလွင်ႈဢၼ်မႂ်းၵူဝ်ယမ်ၽြႃးပဵၼ်ၸဝ်ႈၼၼ်ႉဢေႃႈ။ လွင်ႈမၼ်းၸမ်ႉ မႂ်းဢမ်ႇတွပ်ႇဢမ်ႇထဵင် တၢင်းဢၼ်ၵဝ်ယွၼ်းဢဝ်လုၵ်ႈၸၢႆးမႂ်းဢၼ်မီးၵေႃႉလဵဝ်ၵူၺ်းတီႈမႂ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။- 13မိူဝ်ႈၼၼ်ႉဢႃႇပြႃႇႁၢမ်ႇမုင်ႈတူၺ်းလႄႈ၊ ႁၼ်သူဝ်းပေႃႈ ဢၼ်ၶဝ်ၶမ်ယူႇၵႃႈၼႂ်းယုမ်းမႆႉၵႃႈတီႈၽၢႆႇလင်မၼ်းၼၼ်ႉ တူဝ်ၼိုင်ႈဢေႃႈ။ ဢႃႇပြႃႇႁၢမ်ႇၵႂႃႇတီႉဢဝ်သူဝ်းပေႃႈၼၼ်ႉသေလႄႈ ႁဵတ်းယိတ်ႈပုၼ်ႈဢၼ်တၵ်းတုတ်ႇၽႆး တၢင်တူဝ်လုၵ်ႈၸၢႆးမၼ်းလႄႈ ပုၵ်ႈၸေႃႇဢေႃႈ။- 14တီႈၼၼ်ႈၸိုင် ဢႃႇပြႃႇႁၢမ်ႇႁွင်ႉႁဵၵ်ႈၸိုဝ်ႈ ယေႇႁေႃးဝႃႇယီႉရေႇဢေႃႈ။ မႅၼ်ႈၼင်ႇဢၼ်ဝႃႈၼၼ်ႉလႄႈ ၶဝ်ယၢမ်ႈၵႆႉဝႃႈ၊ မၼ်းၸဝ်ႈတၵ်းမႄးႁႅၼ်းဝႆႉၵႃႈၼိူဝ်လွႆထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

15ဝၢႆးၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးသမ်ႉယူႇၵႃႈၼိူဝ်ၵၢင်ႁၢဝ်ႁွင်ႉတီႈဢႃႇပြႃႇႁၢမ်ႇလႄႈဝႃႈ၊- 16ၵဝ်တိူင်ႇတူဝ်ၸဝ်ႈၵဝ်ႇလႄႈဝႃႈ၊ ၵွပ်ႈပိူဝ်ႈဢၼ်မႂ်းႁဵတ်းလွင်ႈတၢင်းၼႆႉလႄႈ ဢမ်ႇတွပ်ႇဢမ်ႇထဵင်လွင်ႈလုၵ်ႈၸၢႆးမႂ်းဢၼ်မီးတီႈမႂ်းၵေႃႉလဵဝ်ၵူၺ်းၼၼ်ႉ တီႈၵဝ်ၼၼ်ႉလႄႈ၊- 17ၵဝ်တၵ်းပၼ်တၢင်းလီတီႈမႂ်းသေႇသေႇဢေႃႈ။ ၸိူဝ်ႉၶိူဝ်းမႂ်းၵေႃႈၵဝ်တၵ်းႁႂ်ႈယႂ်ႇၽႄႈၼမ်ၵိုၼ်းမႃးယူႇသေႇသေႇမိူၼ်ၸိူဝ်ႉၼင်ႇလၢဝ်ၵၢင်ႁၢဝ် ဢိၵ်ႇတင်းမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇၼၼ်ႉဢေႃႈ။ ၸိူဝ်ႉၶိူဝ်းမႂ်း တၵ်းလႆႈဢုပ်ႉပိူင်ႇၽၵ်းတူဝဵင်းရၢၼ်ႇသူႇမၼ်းတင်းလၢႆဢေႃႈ။- 18ၵႃႈၼႂ်းၸိူဝ်ႉၶိူဝ်းမႂ်းၼႆႉၵူၼ်းမဵဝ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းလီမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။- 19မိူဝ်ႈၼၼ်ႉဢႃႇပြႃႇႁၢမ်ႇၶိုၼ်းမႃးၸူးၵႃႈတီႈဢၼ် ၵူၼ်းၸႂ်ႉၵူၼ်းသွႆမၼ်းၸိူဝ်းၼၼ်ႉမီးၼၼ်ႉလႄႈ၊ ၶဝ်ဢွၼ်ၵၼ်လုၵ်ႉလႄႈၵႂႃႇလူၺ်ႈၵၼ်ၸူးၵႃႈတီႈပေႇရသေႇၽႃႉဢေႃႈ။ ဢႃႇပြႃႇႁၢမ်ႇယူႇၵႃႈတီႈပေႇရသေႇၽႃႉၼၼ်ႉဢေႃႈ။

ၸိူဝ်ႉၶိူဝ်းလုၵ်ႈလၢၼ်ၼႃႇၶေႃႇ

20ဝၢႆးၼၼ်ႉၵႂၢမ်းသတၢင်းသဵင်ၶၢဝ်ႇဢၼ် ဢႃႇပြႃႇႁၢမ်ႇလႆႈငိၼ်းၸမ်ႉ၊ မီႉလၶႃႇၵိူတ်ႇလဵင်ႉလုၵ်ႈလဵင်ႉလၢင်းတီႈပီႈၸၢႆးမႂ်းၼႃႇၶေႃႇၼၼ်ႉယဝ်ႉ။- 21လုၵ်ႈၸၢႆးၵေႃႉယႂ်ႇဢူႉၸႃႉ၊ ၼွင်ႉၸၢႆးမၼ်းပူႉၸႃႉ၊ ၵေႇမူၺ်ႇလႃႉဢၼ်ပဵၼ်ပေႃႈဢႃႇရမ်ႇ၊- 22ၶႄးသႅတ်ႉ၊ႁႃႇၸေႃႇ၊ပီႉလတႃႇသႃႉ၊ယီႉတလပ်ႉ၊ပေႇသူၺ်ႇလႃႉ၊- 23ဢၼ်ဝႃႈလုၵ်ႈၸၢႆးပႅတ်ႇၵေႃႉၼႆႉၸိုင်၊ မီႉလၶႃႇၵိူတ်ႇလဵင်ႉတီႈၼႃႇၶေႃႇ ပီႈၸၢႆးဢႃႇပြႃႇႁၢမ်ႇၼၼ်ႉဢေႃႈ။ ပေႇသူၺ်ႇလႃႉၸမ်ႉ၊ ပဵၼ်ပေႃႈရေႇပႅၵ်ႉၵႃႉဢေႃႈ။- 24မေးၼွႆႉၼႃႇၶေႃႇဢၼ်လႆႈၸိုဝ်ႈရူႉမႃႉၼၼ်ႉၵေႃႈၵိူတ်ႇလဵင်ႉလုၵ်ႈၸၢႆးတေးၽႃႉ၊ၵႃႇႁမ်ႇ၊တႁႃႇသႃႉ၊မႃႇၶႃႇၸိူဝ်းၼၼ်ႉဢေႃႈ။

Currently Selected:

ငဝ်ႈၵမ်ႇၽႃႇ 22: CBMS

Highlight

Copy