ငဝ်ႈၵမ်ႇၽႃႇ 21

လွင်ႈတၢင်းဢၼ်ဢီႉၸၢၵ်ႈၵိူတ်ႇလဵင်ႉမႃး

1ထႃႇဝရႃႉၽြႃးၼၼ်ႉ မႃးလူမႃးတူၺ်းၸႃႇရႃႇၵႃႈၼင်ႇဢၼ် မၼ်းၸဝ်ႈဝႃႈဝႆႉမိူဝ်ႈၼၼ်ႉလႄႈ ႁဵတ်းတီႈမၼ်းၸွမ်းၵႃႈၼင်ႇဢၼ်ၵတီႉၸဝ်ႈမီးၼၼ်ႉဢေႃႈ။- 2ၸႃႇရႃႇပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးတီႈဢႃႇပြႃႇႁၢမ်ႇၼႂ်းမိူဝ်ႈဢၼ်ဢသၢၵ်ႈမၼ်းယႂ်ႇၼႃႇၼၼ်ႉ ၼႂ်းၶိင်ႇဢၼ် ၽြႃးပဵၼ်ၸဝ်ႈဢဝ်တင်းဢမိင်ႉၸဝ်ႈၶၢၼ်းဝႆႉၼၼ်ႉဢေႃႈ။- 3ဢႃႇပြႃႇႁၢမ်ႇၵေႃႈႁွင်ႉႁဵၵ်ႈၸိုဝ်ႈလုၵ်ႈၸၢႆးမၼ်းဢၼ်ဝႃႈ လုၵ်ႈၸၢႆးဢၼ်ၸႃႇရႃႇၵိူတ်ႇလဵင်ႉမႃးၼၼ်ႉဢီႉၸၢၵ်ႈဢေႃႈ။- 4ၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉ၊ ဢႃႇပြႃႇႁၢမ်ႇပၼ်မင်ႇၵလႃႇတၢင်းဢၼ်ထိူဝ်ႁိမ်းတီႈဢီႉၸၢၵ်ႈ မိူဝ်ႈဢၼ်မၼ်းလႆႈပႅတ်ႇဝၼ်းၼၼ်ႉဢေႃႈ။- 5မိူဝ်ႈဢၼ်မီးလုၵ်ႈၸၢႆးဢီႉၸၢၵ်ႈၼၼ်ႉ၊ ဢသၢၵ်ႈဢႃႇပြႃႇႁၢမ်ႇလႆႈပၢၵ်ႇပီႊဢေႃႈ။- 6ၸႃႇရႃႇၵေႃႈလၢတ်ႈလႄႈဝႃႈ၊ ၽြႃးပဵၼ်ၸဝ်ႈပၼ်ဢၶႂၢင်ႉဢၼ်ၵဝ်လႆႈယုမ်ႉလႆႈၶူဝ်ယဝ်ႉ။ ၶဝ်ၸိူဝ်းဢၼ်ငိၼ်းသတၢင်းသဵင်ၶၢဝ်ႇၼၼ်ႉၵေႃႈ၊ တၵ်းယုမ်ႉၶူဝ်လူၺ်ႈၵၼ်တင်းၵဝ်ဢေႃႈ၊ ဝႃႈၼင်ႇၼႆဢေႃႈ။- 7မၼ်းသမ်ႉလၢတ်ႈလႄႈဝႃႈ၊ ၽူႈလႂ်ယၢမ်ႈတွၼ်ႉလႆႈလၢတ်ႈဝႆႉတီႈဢႃႇပြႃႇႁၢမ်ႇလႄႈဝႃႈ၊ ၸႃႇရႃႇတၵ်းပၼ်လုၵ်ႈၵိၼ်ၼူမ်းဢေႃႈ၊ ဝႃႈၼင်ႇၼႆၼၼ်ႉ။ မိူဝ်ႈဢၼ်ဢသၢၵ်ႈမၼ်းယႂ်ႇယဝ်ႉၼၼ်ႉၸိုင်၊ ၵဝ်လႆႈၵိူတ်ႇလဵင်ႉလုၵ်ႈၸၢႆးတီႈမၼ်းယဝ်ႉ၊ ဝႃႈၼင်ႇၼႆဢေႃႈ။- 8လုၵ်ႈဢွၼ်ႇၼၼ်ႉယႂ်ႇမႃးလႄႈၽၢတ်ႇၼူမ်းဢေႃႈ။ ဝၼ်းဢၼ်ၽၢတ်ႇၼူမ်းၼၼ်ႉဢႃႇပြႃႇႁၢမ်ႇႁဵတ်းပွႆးလူင်ဢေႃႈ။

တၢင်းဢၼ်လိုပ်ႈႁႃႇၵရႃႉတင်းဢီႉသမေႇလႃႉဢွၵ်ႇ

9 ၸႃႇရႃႇႁၼ်လုၵ်ႈၸၢႆး ဢၼ်ဢႃႇပြႃႇႁၢမ်ႇလႆႈတီႈႁႃႇၵရႃႉၵူၼ်းဢေႇၵိပ်ႉတူႉၼၼ်ႉ ႁဵတ်းပျၢၵ်ႈၶူဝ်ၼၼ်ႉသေယဝ်ႉ၊- 10လၢတ်ႈတီႈဢႃႇပြႃႇႁၢမ်ႇလႄႈဝႃႈ၊ ႁေႃႈမႄႈယိင်းၶႃႈၼႆႉ ဢိၵ်ႇတင်းလုၵ်ႈၸၢႆးမၼ်းဢွၵ်ႇပႅတ်ႈသေၵမ်းတႃႉ။ လုၵ်ႈၸၢႆးမႄႈယိင်းၶႃႈၼႆႉ ဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆးၵဝ်ၶႃႈဢီႉၸၢၵ်ႈၵူၺ်ႉ၊ ဝႃႈၼင်ႇၼႆဢေႃႈ။- 11ဢႃႇပြႃႇႁၢမ်ႇၵေႃႈ ၵွပ်ႈပိူဝ်ႈဢၼ်ပဵၼ်လုၵ်ႈၸၢႆးမၼ်းလႄႈ ထၢင်ႇပဵၼ်ဢမူႉဢၼ်ယၢပ်ႇၼႃႇဢေႃႈ။- 12ၵူၺ်းၵႃႈ ၽြႃးပဵၼ်ၸဝ်ႈလၢတ်ႈတီႈဢႃႇပြႃႇႁၢမ်ႇလႄႈဝႃႈ၊ ၵွပ်ႈပိူဝ်ႈလုၵ်ႈၸၢႆးဢွၼ်ႇတင်းမႄႈယိင်းၶႃႈမႂ်းၼၼ်ႉလႄႈ ယႃႇပေထၢင်ႇဢမူႉၼႆႉပဵၼ်ဢၼ်ယၢပ်ႇၼႃႇ။ ၸွမ်းၵႃႈၼင်ႇဢၼ်ၸႃႇရႃႇလၢတ်ႈၵူႈၸိူဝ်ႉၵူႈပိူင်ၼၼ်ႉလႄႈ ထွမ်ႇဢဝ်ၵႂၢမ်းမၼ်းတႃႉ။ လွင်ႈမၼ်းၸမ်ႉ ၸိူဝ်ႉၶိူဝ်းမႂ်းတၵ်းတႄႇၼႂ်းဢီႉၸၢၵ်ႈၵူၺ်းဢေႃႈ။- 13ၵွပ်ႈပိူဝ်ႈဢၼ်လုၵ်ႈၸၢႆးမႄႈယိင်းၶႃႈၼၼ်ႉ ပဵၼ်ၸိူဝ်ႉၶိူဝ်းမႂ်းလႄႈ၊ မၼ်းၵေႃႈၵဝ်တၵ်းႁႂ်ႈပဵၼ်မဵဝ်းၵူၼ်းဢေႃႈ၊ ဝႃႈၼင်ႇၼႆဢေႃႈ။

14 ဢႃႇပြႃႇႁၢမ်ႇလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ဢဝ်ၶဝ်ႈမုၼ်းတင်းၼမ်ႉတဝ်ႈ တၢင်ႇသႂ်ႇပၼ်ၵႃႈၼိူဝ်ႁူဝ်မႃႇႁႃႇၵရႃႉသေယဝ်ႉ၊ ဢဝ်လုၵ်ႈဢွၼ်ႇဢၢပ်ႈပၼ်လႄႈ ပွႆႇမႄႈယိင်းၶႃႈၼၼ်ႉၵႂႃႇသေဢေႃႈ။ မၼ်းၵေႃႈဢွၵ်ႇၵႂႃႇသေလႄႈ လႄႇၵႂႃႇလႄႇမႃးယူႇၵႃႈၼႂ်းထိူၼ်ႇပေႇရသေႇၽႃႉၼၼ်ႉဢေႃႈ။- 15မိူဝ်ႈဢၼ်ၼမ်ႉၼၼ်ႉ သဵင်ႈယဝ်ႉၼၼ်ႉၸိုင်၊ မၼ်းဢဝ်လုၵ်ႈဢွၼ်ႇၼၼ်ႉသႂ်ႇဝႆႉၵႃႈတႂ်ႈယုမ်းမႆႉသေယဝ်ႉ၊- 16ၵႂႃႇလႄႈၼင်ႈယူႇၵူၺ်းမၼ်းၵႃႈတီႈႁၢမ်ႉၵႆၵႆသေၸူဝ်ႈယိုဝ်းၵၢင်ႇၼိုင်ႈဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၵဝ်ဢမ်ႇၶႂ်ႈႁၼ်လုၵ်ႈဢွၼ်ႇတၢႆ၊ ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းၼင်ႈယူႇၵူၺ်းမၼ်းၼၼ်ႉၸိုင်၊ မၼ်းၵိဝ်သဵင်လႄႈႁွင်ႉႁႆႈဢေႃႈ။

17ၽြႃးပဵၼ်ၸဝ်ႈငိၼ်းသဵင်လုၵ်ႈၸၢႆးဢွၼ်ႇၼၼ်ႉလႄႈ၊ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ ယူႇၵႃႈၼိူဝ်ၵၢင်ႁၢဝ်မွၵ်ႇလၢတ်ႈတီႈႁႃႇၵရႃႉၼၼ်ႉလႄႈဝႃႈ၊ ႁႃႇၵရႃႉဢိူၺ်း၊ မႂ်းပဵၼ်ၵႃႈသင်။ ယႃႇပေမႆႈၸႂ်။ ၽြႃးပဵၼ်ၸဝ်ႈငိၼ်းသဵင်လုၵ်ႈၸၢႆးဢွၼ်ႇ ၵႃႈၼႂ်းတီႈဢၼ်မၼ်း မီးၼၼ်ႉယဝ်ႉ။- 18လုၵ်ႉတႃႉ။ ယုၵ်ႉယွင်ႈလုၵ်ႈၸၢႆးဢွၼ်ႇလႄႈ ဢဝ်မိုဝ်းယိပ်းၵမ်ဝႆႉတႃႉ။ ၵဝ်တၵ်းႁႂ်ႈမၼ်းပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ၊ ဝႃႈၼင်ႇၼႆဢေႃႈ။- 19မိူဝ်ႈၼၼ်ႉ ၽြႃးပဵၼ်ၸဝ်ႈၽုၺ်ႇမၢၵ်ႇတႃႁႃႇၵရႃႉသေယဝ်ႉ၊ မၼ်းႁၼ်ၼမ်ႉမေႃႇလႄႈ ၵႂႃႇထႅမ်ႁႂ်ႈၼမ်ႉတဵမ်ၼမ်ႉတဝ်ႈသေယဝ်ႉ၊ ပၼ်လုၵ်ႈၸၢႆးဢွၼ်ႇၼၼ်ႉ ၵိၼ်ၼမ်ႉဢေႃႈ။- 20ၽြႃးပဵၼ်ၸဝ်ႈမီးယူႇၽၢႆႇလုၵ်ႈၸၢႆးဢွၼ်ႇၼၼ်ႉဢေႃႈ။ မၼ်းယႂ်ႇမႃးလႄႈယူႇၵႃႈၼႂ်းထိူၼ်ႇယူႇသေလႄႈ ပဵၼ်မေႃၵၢင်ႇဢေႃႈ။- 21မၼ်းၵႂႃႇယူႇၵႃႈၼႂ်းထိူၼ်ႇ ပႃႇရၼ်ႇလႄႈ မႄႈမၼ်းၵေႃႈဢဝ်မႄႈယိင်းၵႃႈၼႂ်းမိူင်းဢေႇၵိပ်ႉတူႉၵေႃႉၼိုင်ႈမႃးလႄႈ ပၼ်မၼ်းႁဵတ်းမေးဢေႃႈ။

ဢႃႇပြႃႇႁၢမ်ႇတင်းဢၽီႉမလႅၵ်ႉဝႆႉၵတီႉတီႈၵၼ်

22မိူဝ်ႈၼၼ်ႉၶုၼ်ဢၽီႉမလႅၵ်ႉ ဢိၵ်ႇတင်းၵႄႇႁူဝ်သိုၵ်း မၼ်းၽီႉၵေႃးလႃႉၸိူဝ်းၼၼ်ႉလၢတ်ႈတီႈဢႃႇပြႃႇႁၢမ်ႇလႄႈဝႃႈ၊ ၽြႃးပဵၼ်ၸဝ်ႈမီးယူႇၽၢႆႇမႂ်း ၼႂ်းလွင်ႈတၢင်းဢၼ်မႂ်းႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။- 23ၵွပ်ႈႁွႆးၼႆႉလႄႈ၊ မႂ်းယင်းဢမ်ႇပႅတ်ႉဢမ်ႇလႅၼ်ၵဝ် ဢိၵ်ႇတင်းလုၵ်ႈၸၢႆးၵဝ်၊ လၢၼ်ၸၢႆးၵဝ်လႄႈ၊ တၵ်းႁဵတ်းၵျေးၸူးတီႈၵဝ်တင်းမိူင်းၵဝ် ဢၼ်မႂ်းသွၼ်ႈပိုင်ႈယူႇၼႆႉ ၸွမ်းၵႃႈၼင်ႇဢၼ်ၵဝ်လႆႈႁဵတ်းၵျေးၸူးတီႈမႂ်းယဝ်ႉၼၼ်ႉ၊ ဝႃႈၼႆ၊ တိူင်ႇၽြႃးပဵၼ်ၸဝ်ႈတီႈၵဝ်တႃႉ၊ ဝႃႈၼင်ႇၼႆဢေႃႈ။- 24ဢႃႇပြႃႇႁၢမ်ႇၵေႃႈၶိုၼ်းလၢတ်ႈလႄႈဝႃႈ၊ ၵဝ်တၵ်းတိူင်ႇဝႃႈ ၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဢေႃႈ။- 25ဢႃႇပြႃႇႁၢမ်ႇတၢင်ႇဢပႅတ်ႈၵႃႈၼိူဝ်ၶုၼ်ဢၽီႉမလႅၵ်ႉ ၵွပ်ႈပိူဝ်ႈလွင်ႈၼမ်ႉမေႃႇ ဢၼ်ၶႃႈၶုၼ်ဢၽီႉမလႅၵ်ႉတင်းလၢႆ ႁဵတ်းပႄႉႁဵတ်းၼႅင်ႇႁိမ်ဢဝ်ၼၼ်ႉဢေႃႈ။- 26ၶုၼ်ဢၽီႉမလႅၵ်ႉၵေႃႈလၢတ်ႈလႄႈဝႃႈ၊ ၵဝ်ဢမ်ႇႁူႉလွင်ႈဢၼ်ၽူႈလႂ်ႁဵတ်းဢမူႉၼႆႉၼၼ်ႉ။ မႂ်းဢမ်ႇမွၵ်ႇဢမ်ႇလၢတ်ႈတီႈၵဝ်။ ၵဝ်ၵေႃႈ ဢမ်ႇလႆႈငိၼ်းတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊ ဝႃႈၼင်ႇၼႆဢေႃႈ။- 27ဢႃႇပြႃႇႁၢမ်ႇဢဝ်သူဝ်းလႂ်၊ ဝူဝ်းလႂ်သေယဝ်ႉ၊ ပၼ်တီႈၶုၼ်ဢၽီႉမလႅၵ်ႉလႄႈ သွင်ၶႃၼၼ်ႉ ႁဵတ်းပတီႉၺိၺ်ႇလူၺ်ႈၵၼ်ဢေႃႈ။- 28ဢႃႇပြႃႇႁၢမ်ႇၽႄဢဝ်သူဝ်းမႄႈဢွၼ်ၸဵတ်းတူဝ် ဢွၵ်ႇသေၵႃႈၼႂ်းၽုင်သူဝ်းဝႆႉၶေႃၶေႃဢေႃႈ။- 29ၶုၼ်ဢၽီႉမလႅၵ်ႉၵေႃႈထၢမ်တီႈဢႃႇပြႃႇႁၢမ်ႇလႄႈဝႃႈ၊ သူဝ်းမႄႈဢွၼ်ၸဵတ်းတူဝ် ဢၼ်ၽႄဢွၵ်ႇဝႆႉၶေႃၶေႃၼႆႉ ပဵၼ်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 30မၼ်းၵေႃႈလၢတ်ႈလႄႈဝႃႈ၊ မႂ်းတၵ်းလႆႈၶၢမ်ႇဢဝ်တုင်းဢဝ်သူဝ်းမႄႈဢွၼ်ၸဵတ်းတူဝ်ၼႆႉၵႃႈၼႂ်းမိုဝ်းၵဝ် ႁႂ်ႈၶဝ်လႆႈပဵၼ်သၢၵ်ႈသေႇၽၢႆႇၵဝ် လွင်ႈဢၼ်ၵဝ် ၶုတ်းၼမ်ႉမေႃႇၼႆႉယဝ်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။- 31ပိူဝ်ႈၼႆၸင်ႇ ၵွပ်ႈပိူဝ်ႈဢၼ်သွင်ၶႃတိူင်ႇဝႃႈၵႃႈၼႂ်းတီႈၼၼ်ႈလႄႈ၊ မၼ်းႁွင်ႉႁဵၵ်ႈၸိုဝ်ႈတီႈၼၼ်ႈ ပေႇရသေႇၽႃႉဢေႃႈ။- 32ၼင်ႇၼၼ်လႄႈ ၶဝ်ႁဵတ်းပတီႉၺိၺ်ႇၵႃႈတီႈ ပေႇရသေႇၽႃႉဢေႃႈ။ ၶုၼ်ဢၽီႉမလႅၵ်ႉဢိၵ်ႇတင်း ၵႄႇႁူဝ်သိုၵ်းမၼ်း ၽီႉၵေႃးလႃႉၸိူဝ်းၼၼ်ႉ လုၵ်ႉလႄႈၶိုၼ်းမိူဝ်းၵႂႃႇၵႃႈတီႈမိူင်းၽီႉလိတ်ႉတီႉသေဢေႃႈ။

33 ဢႃႇပြႃႇႁၢမ်ႇ ၽုၵ်ႇတူၼ်ႈမၢၵ်ႇၵႅင်း ၵႃႈတီႈပေႇရသေႇၽႃႉၼၼ်ႉလႄႈ ႁဵတ်းပထၼႃႇတီႈၼႃႇမႃႉၸိုဝ်ႈသဵင်ထႃႇဝရႃႉၽြႃး ဢၼ်ဝႃႈၽြႃးပဵၼ်ၸဝ်ႈ ဢၼ်တႄႇယူႇသေႇသေႇၼၼ်ႉၵႃႈတီႈၼၼ်ႈဢေႃႈ။- 34ဢႃႇပြႃႇႁၢမ်ႇသွၼ်ႈပိုင်ႈယူႇၵႃႈတီႈၼႂ်းမိူင်းၽီႉလိတ်ႉတီႉႁိုင်ၼႃႇလူင်လၢင်ဢေႃႈ။

Currently Selected:

ငဝ်ႈၵမ်ႇၽႃႇ 21: CBMS

Highlight

Copy