ငဝ်ႈၵမ်ႇၽႃႇ 18
18
ၵတီႉၸဝ်ႈႁႂ်ႈၸႃႇရႃႇမီးလုၵ်ႈၸၢႆး
1လွင်ႈဢၼ်ထႃႇဝရႃႉၽြႃးပေႃႇမႃးတီႈမၼ်းၵႃႈၼႂ်းပႃႇတူၼ်ႈမႆႉၼိမ်မမ်ႇရေႇၼၼ်ႉၸမ်ႉ၊ ၶိင်ႇမိူဝ်ႈဢၼ်လႅတ်ႇမႆႈၼၼ်ႉဢႃႇပြႃႇႁၢမ်ႇ ၼင်ႈယူႇၵႃႈတီႈႁူးၽၵ်းတူမူဝ်းၵႃႇယူႇသေလႄႈ၊- 2မုင်ႈတူၺ်းလႄႈႁၼ် ၵူၼ်းသၢမ်ၵေႃႉၸုၵ်းယူႇၵႃႈတီႈၽၢႆႇၼႃႈမၼ်းသေယဝ်ႉ၊ ၼင်ႇႁိုဝ်တၵ်းလႆႈႁပ်ႉႁူဝ်တၢင်းၶဝ်ၼၼ်ႉၸိုင် လႅၼ်ႈဢွၵ်ႇသေၵႃႈၼႂ်းၽၵ်းတူမူဝ်းၵႃႇၵႂႃႇလႄႈ ၶုပ်ႉမူပ်ႇၵႃႈတီႈလိၼ်သေလႄႈဝႃႈ၊- 3ၸဝ်ႈၵဝ်ၶႃႈ။ ပေႃးၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင်၊ ယႃႇပေပူၼ်ႉၵႂႃႇသေၵႃႈတီႈၵဝ်ၶႃႈၼႆႉသေၵမ်း။- 4ႁႂ်ႈလႆႈဢဝ်ၼမ်ႉမႃးသေဢိတ်းၼိုင်ႈသေၵမ်း။ သုၵ်ႈတိၼ်သေယဝ်ႉ၊ ၼွၼ်းယူႇၵႃႈတႂ်ႈတူၼ်ႈမႆႉၼႆႉသေၵမ်း။- 5ၵဝ်ၶႃႈတၵ်းဢဝ်ၶဝ်ႈမုၼ်းသေဢိတ်းၼိုင်ႈ မႃးၶႃႈဢေႃႈ။ မိူဝ်ႈဢၼ်ႁိူဝ်ႉႁၢႆယဝ်ႉၸင်ႇၵႂႃႇသေၵမ်း။ လွင်ႈၼင်ႇႁိုဝ် ၵဝ်ၶႃႈတၵ်းလႆႈၶၢမ်ႇၵျေးၸူးၸဝ်ႈႁဝ်းၸိူဝ်ႉၼင်ႇၼႆၸိုင်၊ ၸဝ်ႈႁဝ်းႁွတ်ႈမႃးတီႈဢၼ်ၵဝ်ၶႃႈမီးၼႆႉၶႃႈယဝ်ႉ၊ ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈဝႃႈ၊ ႁဵတ်းၸွမ်းၵႃႈၼင်ႇဢၼ်မႂ်းလၢတ်ႈၼႆၼၼ်ႉသေၵမ်းတႃႉ၊ ဝႃႈၼင်ႇၼႆဢေႃႈ။- 6ဢႃႇပြႃႇႁၢမ်ႇၵေႃႈႁိပ်ႈၼႅတ်ႈၶဝ်ႈၵႃႈၼႂ်းမူဝ်းၵႃႇၵႃႈတီႈဢၼ်ၸႃႇရႃႇမီးၼၼ်ႉသေလႄႈလၢတ်ႈဝႃႈ၊ ဢဝ်ၽွင်ၶဝ်ႈမုၼ်းၵျုင်ႇသေသၢမ်ၸလႄႇၼိုင်ႈ ၶၼ်ၶၼ်ၽႂ်းၽႂ်းလႄႈ ၼူတ်ႈသေၵမ်း။ ႁဵတ်းၶဝ်ႈမုၼ်းၼိုင်ႈသေၵမ်း၊ ဝႃႈၼင်ႇၼႆဢေႃႈ။- 7ၵမ်းၼၼ်ႉ ဢႃႇပြႃႇႁၢမ်ႇသမ်ႉလႅၼ်ႈၵႂႃႇၵႃႈတီႈၽုင်ဝူဝ်းလႄႈဢဝ်ဝူဝ်းဢွၼ်ႇဢၼ်ၼိူဝ်ႉပီးလီၼုမ်ႇလီၼၼ်ႉမႃးလႄႈ ဢၢပ်ႇပၼ်တီႈၵူၼ်းဢွၼ်ႇႁႂ်ႈမႄးႁဵတ်းမႄးႁႅၼ်း ၶၼ်ၶၼ်ဝႆးဝႆးဢေႃႈ။- 8လိုၼ်းၼၼ်ႉ မၼ်းဢဝ်ၼမ်ႉၼူမ်းတင်းၼမ်ႉၼူမ်းဢၼ်ၵၢမ်ႈ ဢိၵ်ႇတင်းဝူဝ်းဢွၼ်ႇဢၼ်မႄးႁဵတ်းမႄးႁႅၼ်းဝႆႉၼၼ်ႉလႄႈ သႂ်ႇတမ်းပၼ်ၵႃႈတီႈၽၢႆႇၼႃႈၶဝ်ၼၼ်ႉသေယဝ်ႉ၊ ၸုၵ်းယူႇၵႃႈတီႈႁိမ်းၶဝ် ၵႃႈတႂ်ႈႁူမ်ႈမႆႉၼၼ်ႉလႄႈ ၶဝ်ၵေႃႈၵိၼ်ဢေႃႈ။
9ၶဝ်ၼၼ်ႉထၢမ်တီႈမၼ်းလႄႈဝႃႈ၊ မေးမႂ်းၸႃႇရႃႇမီးၵႃႈလႂ်၊ ဝႃႈၼင်ႇၼႆသေယဝ်ႉ၊ မၼ်းၵေႃႈလၢတ်ႈလႄႈဝႃႈ၊ မီးယူႇၵႃႈၼႂ်းမူဝ်းၵႃႇၶႃႈဢေႃႈ၊ ဝႃႈၼင်ႇၼႆဢေႃႈ။- 10ပႃးၼိုင်ႈလၢတ်ႈလႄႈဝႃႈ၊ မိူဝ်ႈဢၼ်ထိုင်ၶိင်ႇဢၼ်ၵိူတ်ႇလဵင်ႉလုၵ်ႈၼၼ်ႉၸိုင် ၵဝ်တၵ်းၶိုၼ်းမႃးၵႃႈတီႈမႂ်း ဢမၢၼ်ႇၶၼ်ပဵၼ်လူးၵွၼ်ႇဢေႃႈ။ မိူဝ်ႈၶိင်ႇၼၼ်ႉ မေးမႂ်းၸႃႇရႃႇ တၵ်းလႆႈလုၵ်ႈၸၢႆးဢေႃႈ၊ ဝႃႈၼင်ႇၼႆဢေႃႈ။ ၸႃႇရႃႇမီးယူႇၵႃႈတီႈႁိမ်းႁူးၽၵ်းတူ ဢၼ်မီးၽၢႆႇလင်ၵေႃႉဢၼ်ဝႃႈၸိူဝ်ႉၼင်ႇၼၼ်ၼၼ်ႉလႄႈ လႆႈငိၼ်းၵႂၢမ်းၼၼ်ႉဢေႃႈ။- 11မိူဝ်ႈၼၼ်ႉဢႃႇပြႃႇႁၢမ်ႇ တင်းၸႃႇရႃႇ ဢသၢၵ်ႈၵႄႇထူၼ်ႈၼႃႇလူင်လၢင်ယဝ်ႉ။ ၸႃႇရႃႇၵေႃႈၵႃႈၼင်ႇဢူႉတူႉၶိူင်ႈဢၼ်မႄႈယိင်းပဵၼ်ယူႇသေႇသေႇၼၼ်ႉ ဢမ်ႇပဵၼ်ယဝ်ႉ။- 12ၵွပ်ႈႁွႆးၼႆႉလႄႈၸႃႇရႃႇတဵတ်ႇတဵတ်ႇယုမ်ႉၶူဝ်သေလႄႈဝႃႈ၊ ၵဝ်ထဝ်ႈယဝ်ႉ။ ၸဝ်ႈၵဝ်ႇၵေႃႈထဝ်ႈယဝ်ႉ၊ ပိူဝ်ႈၼႆလႄႈ ၵဝ်တၵ်းမီးတၢင်းမူၼ်ႈတၢင်းပျေႃႇလူးၵွၼ်ႇႁိုဝ်ၼေႃႊ၊ ဝႃႈၼင်ႇၼႆဢေႃႈ။- 13ထႃႇဝရႃႉၽြႃးလၢတ်ႈတီႈဢႃႇပြႃႇႁၢမ်ႇလႄႈဝႃႈ၊ ႁဵတ်းသင်လႄႈမေးမႂ်းၸႃႇရႃႇယုမ်ႉၶူဝ်သေလႄႈဝႃႈ၊ ၵဝ်ၼႆႉထဝ်ႈယဝ်ႉလႄႈတၵ်းၵိူတ်ႇလဵင်ႉလုၵ်ႈၸၢႆးႁိုဝ်ၼေႃႊ၊ ဝႃႈၸိူဝ်ႉၼင်ႇၼႆၼင်ႇႁိုဝ်။- 14လွင်ႈတၢင်းဢၼ်ထႃႇဝရႃႉၽြႃးဢမ်ႇတၢတ်ႈၼိူင်ႇလႆႈၼၼ်ႉ မီးသေၸိူဝ်ႉသေပိူင်ႁိုဝ်။ မိူဝ်ႈဢၼ်ထိုင်ၶိင်ႇဢၼ်မၵ်းၶၢၼ်းဝႆႉၼၼ်ႉ၊ ၵဝ်တၵ်းၶိုၼ်းမႃးၵႃႈတီႈမႂ်းလႄႈ ၸႃႇရႃႇတၵ်းလႆႈလုၵ်ႈၸၢႆးဢေႃႈ၊ ဝႃႈၼင်ႇၼႆဢေႃႈ။- 15ၸႃႇရႃႇၵေႃႈ၊ ၵူဝ်ႁႄလႄႈထဵင်ဝႃႈ၊ ၶႃႈၸဝ်ႈဢမ်ႇယုမ်ႉဢမ်ႇၶူဝ်ၶႃႈ၊ ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ၊ မႂ်းယုမ်ႉၶူဝ်ယဝ်ႉ၊ ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇတွင်းပၢၼ်ႇပုၼ်ႈဝဵင်းသေႃးတုမ်ႇ
16ၵူၼ်းၸိူဝ်းၼၼ်ႉ လုၵ်ႉသေၵႃႈတီႈၼၼ်ႈလႄႈဝၢႆႇၼႃႈတေႃႇဝဵင်းသေႃးတုမ်ႇယူႇသေလႄႈၵႂႃႇဢေႃႈ။ ဢႃႇပြႃႇႁၢမ်ႇၵေႃႈၸွမ်းၵႂႃႇႁႂ်ႈလႆႈသူင်ႇၶဝ်ဢေႃႈ။- 17ထႃႇဝရႃႉၽြႃးၵေႃႈဝႃႈ၊ လွင်ႈဢၼ်ၵဝ်တၵ်းႁဵတ်းၸိုင်၊ ယင်းဢမ်ႇမွၵ်ႇဢမ်ႇလၢတ်ႈတီႈဢႃႇပြႃႇႁၢမ်ႇလႄႈ တၵ်းလႆႈသိူင်ႇဝႆႉဢမ်ဝႆႉႁိုဝ်။- 18ဢႃႇပြႃႇႁၢမ်ႇၼႆႉတၵ်းပဵၼ်မဵဝ်းၵူၼ်းဢၼ်ယႂ်ႇမျၢတ်ႈၼႃႇလႄႈ ပျေႉၸုမ်ႇတင်းတၼ်းၶူဝ်းဢေႃႈ။ ၵႃႈၼႂ်းမၼ်းၼႆႉၵူၼ်းမဵဝ်းတင်းသဵင်ႈတင်းလူင် တၵ်းလႆႈၶၢမ်ႇတၢင်းလီမင်ႇၵလႃႇဢေႃႈ။- 19လွင်ႈမၼ်းၸမ်ႉ ၵဝ်ႁူႉလွင်ႈဢၼ်မၼ်း တၵ်းပိင်းၺၢပ်ႈဝႆႉတီႈလုၵ်ႈလၢင်းမၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းလိုၼ်းမၼ်း ႁႂ်ႈၶဝ်လႆႈၸွမ်းသဵၼ်ႈတၢင်းတြႃးထႃႇဝရႃႉၽြႃးသေလႄႈ ၵမ်ၵျၢင်ႉဢၼ်ၸိုဝ်ႈဢၼ်ၸႂ်ႈဢၼ်သိုဝ်ႈဢၼ်တေႃႇၼၼ်ႉဢေႃႈ။ ၵွပ်ႈႁွႆးၼႆႉ ထႃႇဝရႃႉၽြႃးတၵ်းမီးဢၶႂၢင်ႉဢၼ်လႆႈႁဵတ်းတီႈဢႃႇပြႃႇႁၢမ်ႇၸွမ်းၵႃႈၼင်ႇဢၼ်ၵတီႉၸဝ်ႈမီးၼၼ်ႉဢေႃႈ၊ ဝႃႈၼင်ႇၼႆဢေႃႈ။- 20ၵမ်းၼၼ်ႉ ထႃႇဝရႃႉၽြႃးလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်သဵင်ဢၼ် ဝဵင်းသေႃးတုမ်ႇဢိၵ်ႇတင်းဝဵင်းၵေႃးမေႃးရႃႉ ႁွင်ႉသႅၼ်ႇၼၼ်ႉ ယႂ်ႇၼႃႇလႄႈ ဢပႅတ်ႈၼၵ်းၼႃႇၼၼ်ႉ၊- 21တေႃႈလဵဝ်ၼႆႉၵဝ်တၵ်းလူင်းၵႂႃႇလႄႈ လူတူၺ်းလွင်ႈဢၼ်ၶဝ်ႁဵတ်းၸွမ်းၼင်ႇတၢင်းဢၼ် ႁွင်ႉသႅၼ်ႇဢၼ်လႆႈႁွတ်ႈမႃးၽၢႆႇၼႃႈၵဝ်ယဝ်ႉၼၼ်ႉ ၸႂ်ႈႁိုဝ်။ ဢမ်ႇၸႂ်ႈႁိုဝ်ၼၼ်ႉဢေႃႈ။ ပေႃးဢမ်ႇႁဵတ်းၸိုင် ၵဝ်တၵ်းလႆႈႁူႉလွင်ႈဢၼ်ၶဝ်ဢမ်ႇႁဵတ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။- 22ၵူၼ်းၸိူဝ်းၼၼ်ႉဝၢႆႇၼႃႈၶဝ်သေၵႃႈတီႈၼၼ်ႈလႄႈ ၵႂႃႇၸူးၵႃႈတီႈဝဵင်းသေႃးတုမ်ႇဢေႃႈ။ ဢႃႇပြႃႇႁၢမ်ႇၸမ်ႉ၊ ယင်းၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။
23မိူဝ်ႈၼၼ်ႉဢႃႇပြႃႇႁၢမ်ႇသုတ်ႉၸမ်သေလႄႈလဝ်ႊဝႃႈ၊ ၸဝ်ႈႁဝ်းတၵ်းယႃႉပႅတ်ႈၶဝ်ၸိူဝ်းဢၼ်သိုဝ်ႈတေႃႇၼၼ်ႉ ပႃးလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈႁိုဝ်။- 24ပေႃးမီးၵူၼ်းသိုဝ်ႈတေႃႇႁႃႈသိပ်းၵႃႈတီႈဝဵင်းၼၼ်ႉၸိုင်၊ တၵ်းယႃႉပႅတ်ႈတီႈၶႃႈႁိုဝ်။ ယင်းဢမ်ႇသေလၢႆဝဵင်းၼၼ်ႉ ၵွပ်ႈပိူဝ်ႈၵူၼ်းႁႃႈသိပ်းဢၼ်ပႃးၵႃႈၼႂ်းဝဵင်းၼၼ်ႉလႄႈ တၵ်းယႃႉပႅတ်ႈတီႈၶႃႈႁိုဝ်။- 25ႁႂ်ႈလွင်ႈတၢင်းဢၼ်ႁဵတ်းၸိူဝ်ႉၼင်ႇၼၼ်လႄႈ ဢဝ်ၶဝ်ၸိူဝ်းဢၼ်သိုဝ်ႈတေႃႇတၢႆပႃးလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉ၊ ႁႂ်ႈၶဝ်ၸိူဝ်းဢၼ်သိုဝ်ႈတေႃႇလႆႈၶၢမ်ႇၸိူဝ်ႉၼင်ႇ ၶဝ်ၸိူဝ်းဢၼ်ဢမ်ႇတြႃးၼၼ်ႉ ၵႆၵၼ်တင်းၸဝ်ႈႁဝ်းသေၵမ်းလူၺ်ႈတီႈၶႃႈ၊ ႁႂ်ႈလွင်ႈတၢင်းဢၼ်ႁဵတ်းၸိူဝ်ႉၼင်ႇၼၼ် ၵႆၵၼ်တင်းၸဝ်ႈႁဝ်းသေၵမ်းလူၺ်ႈတီႈၶႃႈ၊ ၸဝ်ႈဢၼ်ၸီႇယၢင်ႇလိၼ်မိူင်းတင်းသဵင်ႈတင်းလူင် တၵ်းႁဵတ်းၸွမ်းၼင်ႇတြႃးဢမ်ႇၸႂ်ႈတီႈၶႃႈႁိုဝ်။ ဝႃႈၼင်ႇၼႆဢေႃႈ။- 26ထႃႇဝရႃႉၽြႃးၵေႃႈလၢတ်ႈလႄႈဝႃႈ၊ ပေႃးၵဝ်ထူပ်းႁၼ်ၵူၼ်းသိုဝ်ႈတေႃႇႁႃႈသိပ်းၵႃႈၼႂ်းဝဵင်းသေႃးတုမ်ႇၼၼ်ႉၸိုင်၊ ၵဝ်တၵ်းသေလၢႆတီႈၼၼ်ႈတင်းသဵင်ႈတင်းလူင် ၵွပ်ႈပိူဝ်ႈၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။- 27ဢႃႇပြႃႇႁၢမ်ႇၵေႃႈၶိုၼ်းလဝ်ႊလၢတ်ႈလႄႈဝႃႈ၊ တေႃႈလဵဝ်ၼႆႉၶႃႈၸဝ်ႈဢၼ်ပဵၼ်မုၼ်ႈလိၼ်တင်းတဝ်ႈၵူၺ်းၼႆႉ ၵျူဝ်းၸႃးလူၺ်ႈလွင်ႈဢၼ်တၵ်းလဝ်ႊလၢတ်ႈတီႈၸဝ်ႈၽြႃးတီႈၶႃႈဢေႃႈ။- 28ၼႂ်းၶဝ်ၸိူဝ်းဢၼ်သိုဝ်ႈတေႃႇႁႃႈသိပ်းၼၼ်ႉ ပေႃးယွမ်းၵႂႃႇႁႃႈၵေႃႉၸိုင်၊ ၵွပ်ႈပိူဝ်ႈဢၼ်ယွမ်းၵႂႃႇႁႃႈၵေႃႉၼၼ်ႉလႄႈ၊ ၸဝ်ႈႁဝ်းတၵ်းယႃႉဝဵင်းၼၼ်ႉတင်းသဵင်ႈတင်းလူင်ပႅတ်ႈတီႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ပေႃးၵဝ်ထူပ်းႁၼ် သီႇသိပ်းပၢႆႁႃႈၵေႃႉ ၵႃႈၼႂ်းဝဵင်းၼၼ်ႉၸိုင်၊ ၵဝ်တၵ်းဢမ်ႇယႃႉပႅတ်ႈၵူၺ်ႉ၊ ဝႃႈၼင်ႇၼႆဢေႃႈ။- 29ၵမ်းၼၼ်ႉ မၼ်းသမ်ႉၶိုၼ်းလဝ်ႊလၢတ်ႈတီႈမၼ်းၸဝ်ႈလႄႈဝႃႈ၊ ၸၢင်ႈၶႄးထူပ်းႁၼ်သီႇသိပ်းၵႃႈတီႈဝဵင်းၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈလၢတ်ႈလႄႈဝႃႈ၊ ၵွပ်ႈပိူဝ်ႈသီႇသိပ်းၼၼ်ႉလႄႈ၊ ၵဝ်ယင်းဢမ်ႇႁဵတ်းလႄႈတၵ်းယူႇဢေႃႈ၊ ဝႃႈၼင်ႇၼႆဢေႃႈ။- 30ၵမ်းၼၼ်ႉ မၼ်းသမ်ႉၶိုၼ်းလဝ်ႊလၢတ်ႈလႄႈဝႃႈ၊ ဢူဝ်းၸဝ်ႈၽြႃး၊ ယႃႇပေမီးၸႂ်သေၵမ်းတီႈၶႃႈ၊ ႁႂ်ႈၶႃႈၸဝ်ႈလႆႈလဝ်ႊလၢတ်ႈသေၵမ်းတီႈၶႃႈ၊ ၸၢင်ႈၶႄးထူပ်းႁၼ်သၢမ်သိပ်းၵႃႈတီႈဝဵင်းၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈၵေႃႈဝႃႈ၊ ပေႃးထူပ်းႁၼ်သၢမ်သိပ်းၵႃႈတီႈဝဵင်းၼၼ်ႉၸိုင်၊ ၵဝ်ယင်းဢမ်ႇႁဵတ်းလႄႈတၵ်းယူႇဢေႃႈ၊ ဝႃႈၼင်ႇၼႆဢေႃႈ။- 31ၵမ်းၼၼ်ႉ မၼ်းသမ်ႉၶိုၼ်းလဝ်ႊလၢတ်ႈလႄႈဝႃႈ၊ တေႃႈလဵဝ်ၼႆႉ ၶႃႈၸဝ်ႈၵျူဝ်းၸႃးလူၺ်ႈလွင်ႈဢၼ်တၵ်းလဝ်ႊလၢတ်ႈတီႈထႃႇဝရႃႉၽြႃးတီႈၶႃႈဢေႃႈ၊ ၸၢင်ႈၶႄးထူပ်းႁၼ်သၢဝ်းၼိုင်ႈ ၵႃႈတီႈဝဵင်းၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် မၼ်းၸဝ်ႈၵေႃႈလၢတ်ႈလႄႈဝႃႈ၊ ၵွပ်ႈပိူဝ်ႈသၢဝ်းၼိုင်ႈၼၼ်ႉလႄႈ၊ ၵဝ်ယင်းဢမ်ႇယႃႉပႅတ်ႈလႄႈတၵ်းယူႇဢေႃႈ၊ ဝႃႈၼင်ႇၼႆဢေႃႈ။- 32မၼ်းသမ်ႉၶိုၼ်းလဝ်ႊလၢတ်ႈလႄႈဝႃႈ၊ ဢူဝ်းၸဝ်ႈၽြႃးတီႈၶႃႈ၊ ယႃႇပေမီးၸႂ်သေၵမ်းတီႈၶႃႈ၊ ႁႂ်ႈၶႃႈၸဝ်ႈလႆႈလဝ်ႊလၢတ်ႈထႅင်ႈပွၵ်ႈၼိုင်ႈၼႆႉၵူၺ်းသေၵမ်းတီႈၶႃႈ၊ ၸၢင်ႈၶႄးထူပ်းႁၼ်သိပ်းၼိုင်ႈၵႃႈတီႈဝဵင်းၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈလၢတ်ႈလႄႈဝႃႈ၊ ၵွပ်ႈပိူဝ်ႈသိပ်းၼိုင်ႈၼၼ်ႉလႄႈ၊ ၵဝ်ယင်းဢမ်ႇယႃႉပႅတ်ႈလႄႈတၵ်းယူႇဢေႃႈ၊ ဝႃႈၼင်ႇၼႆဢေႃႈ။- 33ထႃႇဝရႃႉၽြႃးၵေႃႈ လွင်ႈတၢင်းဢၼ်တၵ်ႉလၢတ်ႈၵၼ်တင်းဢႃႇပြႃႇႁၢမ်ႇၼၼ်ႉယဝ်ႉတူဝ်ႈယဝ်ႉၸင်ႇၵႂႃႇသေဢေႃႈ။ ဢႃႇပြႃႇႁၢမ်ႇၵေႃႈၶိုၼ်းမိူဝ်းၵႂႃႇၸူးၵႃႈတီႈတီႈယူႇမၼ်းသေဢေႃႈ။
Currently Selected:
ငဝ်ႈၵမ်ႇၽႃႇ 18: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
