ငဝ်ႈၵမ်ႇၽႃႇ 19
19
တူႉၸရိူၵ်ႈဢပႅတ်ႈၵူၼ်းဝဵင်းသေႃးတုမ်ႇ
1တမၢၼ်ႇၵၢင်ႁၢဝ်သွင်ပႃးၼၼ်ႉၶိင်ႇႁူဝ်ၶမ်ႈႁွတ်ႈထိုင်ၵႃႈတီႈဝဵင်းသေႃးတုမ်ႇဢေႃႈ။ လေႃးတႃႉၼင်ႈယူႇၵႃႈၼႂ်းႁူးၽၵ်းတူဝဵင်းယူႇလႄႈ ႁၼ်ၶဝ်သေယဝ်ႉ၊ လုၵ်ႉႁႂ်ႈလႆႈႁပ်ႉႁူဝ်တၢင်းၶဝ်လႄႈၶုပ်ႉမူပ်ႇၵႃႈၼိူဝ်လိၼ်ယူႇသေလႄႈဝႃႈ၊- 2တူၺ်းၶႃႈလူး၊ ၸဝ်ႈၵဝ်ၶႃႈၶဝ်ဢိူၺ်း၊ ၶႅၼ်းတေႃႈၶဝ်ႈၵႃႈတီႈၼႂ်းႁိူၼ်းၶႃႈၸဝ်ႈသေလႄႈ ယူႇတင်းၶိုၼ်းသေၵမ်းတီႈၶႃႈ၊ သုၵ်ႈတိၼ် သေၵမ်းတီႈၶႃႈ၊ ၶိင်ႇၵၢင်ၼႂ်ၸဝ်ႉၸဝ်ႉၸင်ႇ လုၵ်ႉလႄႈၵႂႃႇသေၵမ်းတီႈၶႃႈ၊ ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလၢတ်ႈလႄႈဝႃႈ၊ ႁဝ်းဢမ်ႇၶဝ်ႈယဝ်ႉ၊ ႁဝ်းတၵ်းယူႇၵႃႈတီႈၵၢင်တၢင်းၼႆႉတင်းၶိုၼ်းဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊- 3ပိူဝ်ႈဢၼ်မၼ်းတွင်းပၢၼ်ႇၸူဝ်းဢဝ်ၶဝ်ၼႃႇလူင်လၢင်လႄႈ ၶဝ်ၵႂႃႇၸူးၵႃႈတီႈဢၼ်မၼ်းယူႇၼၼ်ႉလႄႈ ၶဝ်ႈၵႃႈၼႂ်းႁိူၼ်းမၼ်းဢေႃႈ။ မၼ်းၵေႃႈႁဵတ်းပွႆးပုၼ်ႈၶဝ်လႄႈ ၼိုင်ႈၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈသေယဝ်ႉ၊ ၶဝ်ဢွၼ်ၵၼ်ၵိၼ်ဢေႃႈ။
4ၸူဝ်ႈဢၼ်ၶဝ်ဢမ်ႇပႆႇၼွၼ်းၼၼ်ႉၸိုင်၊ ၵူၼ်းၸၢႆးဝဵင်းသေႃးတုမ်ႇလဵၵ်ႉလဵၵ်ႉယႂ်ႇယႂ်ႇ ဢၼ်လုၵ်ႉသေၵူႈတီႈၵူႈလႅၼ်မႃးတင်းသဵင်ႈတင်းလူင်ၼၼ်ႉ ဢွၼ်ၵၼ်ဝႅင်းႁွပ်ႈႁိူၼ်းသေလႄႈ၊- 5သႅၼ်ႇႁွင်ႉတီႈလေႃးတႃႉလႄႈဝႃႈ၊ ၵူၼ်းဢၼ်မႃးၶဝ်ႈၵႃႈၼႂ်းႁိူၼ်းမႂ်းၶမ်ႈၼႆႉၸိူဝ်းၼၼ်ႉမီးၵႃႈလႂ်။ ပိူဝ်ႈဢၼ်ႁဝ်းၶႂ်ႈသိူၵ်ႈသမ်ႇၵၼ်တင်းၶဝ်လႄႈ ဢဝ်ၶဝ်ဢွၵ်ႇမႃးၸူးၵႃႈတီႈႁဝ်းတႃႉ၊ ဝႃႈၼင်ႇၼႆဢေႃႈ။
6 လေႃးတႃႉၵေႃႈဢွၵ်ႇၵႃႈၼွၵ်ႈၽၵ်းတူၸူးတီႈၶဝ်လႄႈ ဢိုတ်းၽၵ်းတူၽၢႆႇတၢင်းလင်မၼ်းသေယဝ်ႉ၊- 7လၢတ်ႈလႄႈဝႃႈ၊ ပီႈၼွင်ႉၶဝ်ဢိူၺ်း၊ ၶႅၼ်းတေႃႈယႃႇပေႁဵတ်းဢမူႉဢႃႉထမ်ႇမႃႉထၢၼ်ႇၼႆႉသေၵမ်း။- 8ၵဝ်ၶႃႈမီးလုၵ်ႈယိင်းသွင်ၵေႃႉ ဢၼ်ဢမ်ႇပႆႇသိူၵ်ႈသမ်ႇၵၼ်တင်းၵူၼ်းၸၢႆးဢေႃႈ။ ၶႅၼ်းတေႃႈပၼ်ဢၶႂၢင်ႉ ႁႂ်ႈလႆႈဢဝ်ဢွၵ်ႇပၼ်တီႈသူသေၵမ်း။ ၶႂ်ႈႁဵတ်းၸိူဝ်ႉၼင်ႇႁိုဝ်တီႈၶဝ်ၵေႃႈႁဵတ်းသေၵမ်းတႃႉ။ တီႈၵူၼ်းၸိူဝ်းၼႆႉၸိုင် ယႃႇပေႁဵတ်းၵႃႈသင်သေၵမ်း။ လွင်ႈမၼ်းၸမ်ႉ ၶဝ်ၼႆႉ ၶဝ်ႈသွၼ်ႈပိုင်ႈၵႃႈတႂ်ႈမုင်းႁိူၼ်းၵဝ်ၶႃႈဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊- 9ၶဝ်ၼၼ်ႉလၢတ်ႈလႄႈဝႃႈ၊ သုတ်ႉဝႄႈတႃႉ၊ ဝႃႈၼင်ႇၼႆဢေႃႈ။ ၵမ်းၼၼ်ႉ ၶဝ်သမ်ႉလၢတ်ႈလႄႈဝႃႈ၊ ဢၢႆႈၼႆႉမႃးႁႂ်ႈလႆႈသွၼ်ႈပိုင်ႈယူႇၵူၺ်းဢေႃႈ။ မၼ်းတၵ်းလႆႈႁဵတ်းၵေႃႉဢၼ်ၸီႇယၢင်ႇတြႃးၵႃႈၼိူဝ်ႁဝ်းႁိုဝ်။ တေႃႈလဵဝ်ၼႆႉ ႁဝ်းတၵ်းႁဵတ်းဢမူႉဢၼ်ႁုၵ်းဢၼ်ႁၢႆႉတီႈမႂ်း ၼႃႇသေဢမူႉဢၼ်ႁဵတ်းတီႈၶဝ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ၽိုတ်ႉဢီးလေႃးတႃႉၼႃႇလူင်လၢင်လႄႈ သုတ်ႉၸမ်မႃး ႁႂ်ႈလႆႈဢဝ်ၽၵ်းတူတႅၵ်ႇလႅဝ်ပႅတ်ႈဢေႃႈ။- 10မိူဝ်ႈၼၼ်ႉတမၢၼ်ႇၵၢင်ႁၢဝ်ၸိူဝ်းၼၼ်ႉ ယိုၼ်ႈမိုဝ်းဢွၵ်ႇၵႃႈၼွၵ်ႈလႄႈ တိုတ်ႉၸၼ်ဢဝ်လေႃးတႃႉသႂၢင်းသႂ်ႇၵႃႈၼႂ်းႁိူၼ်း တီႈဢၼ်ၶဝ်မီးၼၼ်ႉသေယဝ်ႉ၊ ဢိုတ်းၽၵ်းတူသေဢေႃႈ။- 11ၶဝ်ၼၼ်ႉပၼ်တၢမ်ႇလႄႈႁႂ်ႈၶဝ်ၸိူဝ်းဢၼ်မီးတီႈၼႃႈၽၵ်းတူႁိူၼ်းၸဵမ်လဵၵ်ႉၸဵမ်ယႂ်ႇၼၼ်ႉ တႃမွတ်ႇထၼ်ႈပေႃးႁႂ်ႈၶဝ်လႆႈလႄႇႁႃၽၵ်းတူ ထိုင်ႁွတ်ႈတၢင်းဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင်ဢေႃႈ။
လေႃးတႃႉဢွၵ်ႇပၢႆႈသေဝဵင်းသေႃးတုမ်ႇ
12တမၢၼ်ႇၵၢင်ႁၢဝ်ၸိူဝ်းၼၼ်ႉၵေႃႈ လၢတ်ႈတီႈလေႃးတႃႉလႄႈဝႃႈ၊ ၵႃႈတီႈၼႆႈမီးၶဝ်ၸိူဝ်းဢၼ် ၸၢပ်ႈသႅင်ႇၵၼ်တင်းမႂ်းၼၼ်ႉလူးၵွၼ်ႇႁိုဝ်။ ဢဝ်လုၵ်ႈၶူၺ်လႂ်၊ လုၵ်ႈၸၢႆးလႂ်၊ လုၵ်ႈယိင်းလႂ်၊ ဢိၵ်ႇတင်းၵႃႈဢၼ်မီး ၵႃႈတီႈမႂ်းၵႃႈၼႂ်းဝဵင်းၼႆႉၸိူဝ်းၼၼ်ႉ ဢွၵ်ႇသေၵႃႈတီႈၼႆႈၵႂႃႇတႃႉ။- 13ႁဝ်းတၵ်းလႆႈယႃႉတီႈၼႆႈပႅတ်ႈဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈသဵင်တၢင်းဢၼ်ၵူၼ်းၵႃႈတီႈၼႆႈ ဢွၼ်ၵၼ်ႁွင်ႉသႅၼ်ႇၼၼ်ႉယႂ်ႇၼႃႇလူင်လၢင် ၵႃႈတီႈၽၢႆႇၼႃႈထႃႇဝရႃႉၽြႃးလႄႈ၊ ထႃႇဝရႃႉၽြႃးပွႆႇၸႂ်ႉႁဝ်းမႃး ႁႂ်ႈလႆႈယႃႉဝဵင်းၼႆႉပႅတ်ႈယဝ်ႉ၊ ဝႃႈၼင်ႇၼႆဢေႃႈ။- 14လေႃးတႃႉဢွၵ်ႇသေလႄႈမွၵ်ႇလၢတ်ႈတီႈလုၵ်ႈၶူၺ်မၼ်း ဢၼ်မၢႆၵၼ်တင်းလုၵ်ႈယိင်းမၼ်းဝႆႉၸိူဝ်းၼၼ်ႉလႄႈဝႃႈ၊ လုၵ်ႉတႃႉ။ ဢွၵ်ႇသေၵႃႈၼႂ်းတီႈၼႆႈၵႂႃႇတႃႉ။ ထႃႇဝရႃႉၽြႃးတၵ်းယႃႉဝဵင်းၼႆႉပႅတ်ႈဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊ လုၵ်ႈၶူၺ်မၼ်းၸိူဝ်းၼၼ်ႉ ထၢင်ႇမၼ်းမိူၼ်ၸိူဝ်ႉၼင်ႇၵေႃႉဢၼ်ယဝ်ႉယွၵ်ႇလဵၼ်ႈၼၼ်ႉယူႇဢေႃႈ။
15မိူဝ်ႈဢၼ်မိူင်းလႅင်းမႃးၸိုင်၊ တမၢၼ်ႇၵၢင်ႁၢဝ်ၸိူဝ်းၼၼ်ႉ တိုၵ်းယူင်းႁႂ်ႈလေႃးတႃႉႁဵတ်းၶၼ်ၶၼ်ၽႂ်းၽႂ်းလႄႈဝႃႈ၊ မႂ်းလုၵ်ႉလႄႈ ဢဝ်မေးမႂ်း ဢိၵ်ႇတင်းလုၵ်ႈယိင်းမႂ်းသွင်ၵေႃႉဢၼ်မီးယူႇၵႃႈတီႈၼႆႈၸိူဝ်းၼႆႉဢွၵ်ႇၵႂႃႇတႃႉ။ ပေႃးဢမ်ႇၼၼ် မႂ်းတၵ်းႁွတ်ႈထိုင်တၢင်းဢၼ်သုမ်းဢၼ်ၸွမ်းၵႃႈၼႂ်းဢပႅတ်ႈဝဵင်းၼႆႉဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊- 16မၼ်းႁဵတ်းၵွႆႈႁဵတ်းထိူင်းယူႇလႄႈ ပိူဝ်ႈဢၼ်ထႃႇဝရႃႉၽြႃးဢဵတ်းလူလႄႈ တမၢၼ်ႇၵၢင်ႁၢဝ်ၸိူဝ်းၼၼ်ႉ တိုတ်ႉၸၼ်ဢဝ်မိုဝ်းမၼ်း ဢိၵ်ႇတင်းမိုဝ်းမေးမၼ်း တင်းမိုဝ်းလုၵ်ႈယိင်းမၼ်းသွင်ၵေႃႉၼၼ်ႉ ဢွၵ်ႇသေလႄႈဝႆႉၵႃႈတီႈၼွၵ်ႈဝဵင်းဢေႃႈ။
17မိူဝ်ႈဢၼ်ၶဝ်ၼၼ်ႉ ဢဝ်ၶဝ်ဢွၵ်ႇၵႃႈၼွၵ်ႈယဝ်ႉၼၼ်ႉၸိုင် မၼ်းၸဝ်ႈလၢတ်ႈလႄႈဝႃႈ၊ လႅၼ်ႈပၢႆႈလွတ်ႈၽေးၵႂႃႇႁႂ်ႈဢသၢၵ်ႈမႂ်းလႆႈၵတ်းယဵၼ်ၶျၢမ်းသႃႇတႃႉ။ ယႃႇပေဝၢႆႇတူၺ်းၶိုၼ်းတၢင်းလင်။ ယႃႇပေယူႇၵႃႈၼႂ်းပၢင်ႇပဵင်းၼႆႉလႃးလႃး။ လႅၼ်ႈပၢႆႈၵႂႃႇၵႃႈၼိူဝ်လွႆတႃႉ။ ပေႃးဢမ်ႇၼၼ် မႂ်းတၵ်းသုမ်းတၵ်းၸွမ်းဢေႃႈ၊ ဝႃႈၼင်ႇၼႆဢေႃႈ။- 18လေႃးတႃႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈၵဝ်ၶႃႈဢိူၺ်း၊ ယႃႇပေဝႃႈၸိူဝ်ႉၼင်ႇၼၼ်သေၵမ်းတီႈၶႃႈ။- 19တေႃႈလဵဝ်ၼႆႉ ၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈယဝ်ႉ။ ၸဝ်ႈႁဝ်းႁႂ်ႈၵျေးၸူးၵရူႉၼႃႇ ဢၼ်ၸဝ်ႈႁဝ်းၼႄႁဵတ်းၼႂ်းလွင်ႈဢၼ် ႁႂ်ႈဢသၢၵ်ႈၶႃႈၸဝ်ႈလႆႈၵတ်းယဵၼ်ၶျၢမ်းသႃႇၼႆႉယႂ်ႇၼမ်ၼႃႇတီႈၶႃႈဢေႃႈ။ ၶႃႈၸဝ်ႈဢမ်ႇလႅၼ်ႈပၢႆႈလွတ်ႈၽေးၵႂႃႇၸူးၵႃႈတီႈလွႆပုၼ်ႉလႆႈတီႈၶႃႈ၊ ၵူဝ်ၽေးသေၸိူဝ်ႉသေပိူင် တၵ်းႁွတ်ႈထိုင်ၵႃႈၼိူဝ်ၶႃႈၸဝ်ႈလႄႈ တၢႆတီႈၶႃႈဢေႃႈ။- 20တူၺ်းတီႈၶႃႈလူး၊ ဝဵင်းၼၼ်ႉၸမ်လႄႈ ပၢႆႈၵႂႃႇၸူးငၢႆႈတီႈၶႃႈဢေႃႈ။ ဝဵင်းဢၼ်လဵၵ်ႉဢၼ်ဢွၼ်ႇၵေႃႈပဵၼ်တီႈၶႃႈဢေႃႈ။ ႁႂ်ႈလႆႈလႅၼ်ႈပၢႆႈလွတ်ႈၽေးၵႂႃႇၸူးၵႃႈတီႈၼၼ်ႈသေၵမ်းတီႈၶႃႈ၊ ဝဵင်းၼၼ်ႉပဵၼ်ဝဵင်းဢၼ်လဵၵ်ႉဢၼ်ဢွၼ်ႇ ဢမ်ႇၸႂ်ႈတီႈၶႃႈႁိုဝ်။ သင်ပၢႆႈၵႂႃႇၸိူဝ်ႉၼင်ႇၼၼ်ၸိုင် ဢသၢၵ်ႈၶႃႈၸဝ်ႈတၵ်းလႆႈၵတ်းယဵၼ်ၶျၢမ်းသႃႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 21မၼ်းၸဝ်ႈၵေႃႈလၢတ်ႈလႄႈဝႃႈ၊ တူၺ်းလူး၊ ၼႂ်းတီႈႁဵင်းၼႆႉၵေႃႈ ၵဝ်လႆႈထွမ်ႇဢဝ်ၵႂၢမ်းမႂ်းလႄႈ တၵ်းဢမ်ႇယႃႉဝဵင်းဢၼ်မႂ်းတွင်းပၢၼ်ႇၼၼ်ႉပႅတ်ႈၵူၺ်ႉ။- 22ႁဵတ်းၶၼ်ၶၼ်ၽႂ်းၽႂ်းလႄႈ လႅၼ်ႈပၢႆႈလွတ်ႈၽေးၵႂႃႇၸူးၵႃႈတီႈဝဵင်းၼၼ်ႉတႃႉ။ ၸူဝ်ႈဢၼ်မႂ်းဢမ်ႇပႆႇလႆႈႁွတ်ႈထိုင်ၵႃႈတီႈဝဵင်းၼၼ်ႉၸိုင် ၵဝ်ဢမ်ႇႁဵတ်းၵႃႈသင်သေၸိူဝ်ႉသေပိူင်လႆႈၵူၺ်ႉ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ဝဵင်းၼၼ်ႉၸိုင် ႁွင်ႉႁဵၵ်ႈၸိုဝ်ႈဝဵင်းၸေႃးရႃႉဢေႃႈ။
ဝဵင်းသေႃးတုမ်ႇတင်းၵေႃးမေႃးရႃႉလူႉလႅဝ်
23မိူဝ်ႈဢၼ်လေႃးတႃႉၶဝ်ႈႁွတ်ႈၵႃႈၼႂ်းဝဵင်းၸေႃးရႃႉၼၼ်ႉပဵၼ်ၶိင်ႇဢၼ်ၵၢင်ဝၼ်းဢွၵ်ႇၵႃႈၼိူဝ်လိၼ်မိူင်းဢေႃႈ။
24မိူဝ်ႈၼၼ်ႉ ထႃႇဝရႃႉၽြႃးႁႂ်ႈၽူၼ်ဢၼ်ပဵၼ်ၽႆးတင်းၵၢၼ်ႉ လုၵ်ႉသေၵႃႈတီႈမၼ်းၸဝ်ႈၵႃႈၼိူဝ်ၵၢင်ႁၢဝ်ပုၼ်ႉ တူၵ်းလူင်းသႂ်ႇၵႃႈၼိူဝ်ဝဵင်းသေႃးတုမ်ႇတင်းဝဵင်းၵေႃးမေႃးရႃႉဢေႃႈ။- 25မၼ်းၸဝ်ႈၶႂမ်ႈပိၼ်ႈဝဵင်းၸိူဝ်းၼၼ်ႉ၊ ပၢင်ႇပဵင်းၼၼ်ႉတင်းသဵင်ႈတင်းလူင်၊ ၵူၼ်းဝဵင်းတင်းသဵင်ႈတင်းလူင်၊ ၵႃႈဢၼ်ဢွၵ်ႇၵႃႈၼိူဝ်လိၼ်ၸိူဝ်းၼၼ်ႉပႅတ်ႈဢေႃႈ။- 26မေးမၼ်းၸမ်ႉ ဝၢႆႇတူၺ်းၶိုၼ်းတၢင်းလင်လႄႈ ပဵၼ်သဝ်ၵိူဝ်ၵႂႃႇသေဢေႃႈ။
27ၶိင်ႇၵၢင်ၼႂ်ၸဝ်ႉၸဝ်ႉ ဢႃႇပြႃႇႁၢမ်ႇလုၵ်ႉလႄႈ ၵႂႃႇၸူးတီႈဢၼ်မၼ်းၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉသေယဝ်ႉ၊- 28မုင်ႈတူၺ်းၸႃႉၸဵမ်ဝဵင်းသေႃးတုမ်ႇလႄႈဝဵင်းၵေႃးမေႃးရႃႉ ဢိၵ်ႇတင်းၵႃႈဢၼ်ပဵၼ် ပၢင်ႇပဵင်းၵူႈတီႈၵူႈလႅၼ်ၸိူဝ်းၼၼ်ႉလႄႈ ႁၼ်ဢၢႆၵႂၼ်းမိူင်းၼၼ်ႉ ၶိုၼ်ႈယူႇမိူၼ်ၸိူဝ်ႉၼင်ႇဢၢႆၵႂၼ်းမုၵ်ႉၽႆးဢေႃႈ။- 29ၼင်ႇၼၼ်လႄႈ မိူဝ်ႈဢၼ်ၽြႃးပဵၼ်ၸဝ်ႈယႃႉဝဵင်းဢၼ်မီးၵႃႈၼႂ်းပၢင်ႇပဵင်းၸိူဝ်းၼၼ်ႉပႅတ်ႈၼၼ်ႉ၊ ၽြႃးပဵၼ်ၸဝ်ႈၶုၵ်းၸႂ်လႆႈၶႆႈၸႂ်ထူပ်းဢႃႇပြႃႇႁၢမ်ႇလႄႈ ၼႂ်းမိူဝ်ႈဢၼ်ၶႂမ်ႈပိၼ်ႈဝဵင်းဢၼ်လေႃးတႃႉယူႇၸိူဝ်းၼၼ်ႉပႅတ်ႈၼၼ်ႉၸိုင် မၼ်းၸဝ်ႈပွႆႇလေႃးတႃႉလွတ်ႈၵႃႈၼႂ်းတၢင်းဢၼ် ၶႂမ်ႈပိၼ်ႈပႅတ်ႈၼၼ်ႉဢေႃႈ။
ငဝ်ႈၸႃႇတီႉၵူၼ်းမဵဝ်းမေႃႇၽႃႉတင်းၵူၼ်းမဵဝ်းဢမ်ႇမုၼ်ႇ
30 လေႃးတႃႉသမ်ႉဢွၵ်ႇသေၵႃႈၼႂ်းဝဵင်းၸေႃးရႃႉၼၼ်ႉလႄႈ ယူႇၵႃႈၼိူဝ်လွႆလူၺ်ႈၵၼ်တင်းလုၵ်ႈယိင်းမၼ်းသွင်ၵေႃႉၼၼ်ႉဢေႃႈ။ မၼ်းဢမ်ႇႁတ်းယူႇၵႃႈၼႂ်းဝဵင်းၸေႃးရႃႉလႄႈ ယူႇၵႃႈၼႂ်းထမ်ႈလူၺ်ႈၵၼ်တင်းလုၵ်ႈယိင်းမၼ်းသွင်ၵေႃႉၼၼ်ႉဢေႃႈ။- 31လုၵ်ႈယိင်းၵေႃႉယႂ်ႇလၢတ်ႈတီႈၼွင်ႉယိင်းမၼ်းလႄႈဝႃႈ၊ ပေႃႈႁဝ်းၼႆႉထဝ်ႈယဝ်ႉ။ ၵႃႈၼိူဝ်လိၼ်မိူင်းၼႆႉၽူႈၸၢႆး ဢၼ်တၵ်းလႆႈၶဝ်ႈၸူးတီႈႁဝ်း ၸွမ်းၼင်ႇၽႃႇသႃႇၵူၼ်းၵႃႈၼိူဝ်လိၼ်မိူင်းတင်းသဵင်ႈတင်းလူင်ၼၼ်ႉ ဢမ်ႇမီးသေၵေႃႉသေၵူၼ်း။- 32မႃးဢိူၺ်း၊ တိုၵ်းၼမ်ႉၸပိတ်ႈတီႈပေႃႈႁႃးတႃႉႁႃး၊ ၼွၼ်းလူၺ်ႈၵၼ်တင်းမၼ်းႁႂ်ႈၸိူဝ်ႉၶိူဝ်းပေႃႈႁႃး လႆႈသိုပ်ႇၵႂႃႇတႃႉႁႃး၊ ဝႃႈၼင်ႇၼႆဢေႃႈ။- 33ၼႂ်းၶိုၼ်းၼၼ်ႉ၊ သွင်ၶႃတိုၵ်းၼမ်ႉၸပိတ်ႈတီႈပေႃႈသွင်ၶႃသေယဝ်ႉ၊ လုၵ်ႈယိင်းၵေႃႉယႂ်ႇၶဝ်ႈၸူးလႄႈၼွၼ်းလူၺ်ႈၵၼ်တင်းပေႃႈမၼ်းဢေႃႈ။ ပေႃႈမၼ်းဢမ်ႇႁူႉလွင်ႈဢၼ်မၼ်းၼွၼ်းဢိၵ်ႇတင်းလွင်ႈဢၼ်မၼ်းလုၵ်ႉၼၼ်ႉ။- 34ၼႂ်းဝၼ်းမိူဝ်ႈၽုၵ်ႈ ၵေႃႉယႂ်ႇၼၼ်ႉလၢတ်ႈတီႈၼွင်ႉယိင်းမၼ်းလႄႈဝႃႈ၊ မိူဝ်ႈၶမ်ႈဝႃးၵဝ်လႆႈၼွၼ်းလူၺ်ႈၵၼ်တင်းပေႃႈၵဝ်ယဝ်ႉ။ ၶမ်ႈၼႆႉသမ်ႉတိုၵ်းၼမ်ႉၸပိတ်ႈတီႈမၼ်းထႅင်ႈတႃႉႁႃး။ မႂ်းၶဝ်ႈၸူးလႄႈၼွၼ်းလူၺ်ႈၵၼ်တင်းမၼ်း ႁႂ်ႈၸိူဝ်ႉၶိူဝ်းမၼ်းလႆႈသိုပ်ႇၵႂႃႇတႃႉ၊ ဝႃႈၼင်ႇၼႆဢေႃႈ။- 35ၼႂ်းၶိုၼ်းၼၼ်ႉၵေႃႈ သွင်ၶႃသမ်ႉတိုၵ်းၼမ်ႉၸပိတ်ႈတီႈပေႃႈသွင်ၶႃသေယဝ်ႉ လုၵ်ႈယိင်းၵေႃႉလဵၵ်ႉၶဝ်ႈၸူးလႄႈၼွၼ်းလူၺ်ႈၵၼ်တင်းပေႃႈမၼ်းဢေႃႈ။ ပေႃႈမၼ်းၼၼ်ႉ ဢမ်ႇႁူႉလွင်ႈဢၼ်မၼ်းၼွၼ်းဢိၵ်ႇတင်းလွင်ႈဢၼ်မၼ်းလုၵ်ႉၼၼ်ႉ။- 36ၼင်ႇၼၼ်လႄႈ လုၵ်ႈယိင်းလေႃးတႃႉ သွင်ၵေႃႉၼၼ်ႉပႃးပတိၵ်ႉသၼ်ႇထေႇ ၵွပ်ႈပိူဝ်ႈပေႃႈသွင်ၶႃၼၼ်ႉဢေႃႈ။- 37လုၵ်ႈယိင်းၵေႃႉယႂ်ႇၼၼ်ႉ ၵိူတ်ႇလဵင်ႉလုၵ်ႈၸၢႆးလႄႈ ႁွင်ႉႁဵၵ်ႈၸိုဝ်ႈမၼ်းမေႃႇၽႃႉဢေႃႈ။ ၵေႃႉၼၼ်ႉပဵၼ်ပေႃႈၵူၼ်းမေႃႇၽႃႉတင်းလၢႆတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။- 38လုၵ်ႈယိင်းၵေႃႉလဵၵ်ႉၵိူတ်ႇလဵင်ႉလုၵ်ႈၸၢႆးလႄႈ ႁွင်ႉႁဵၵ်ႈၸိုဝ်ႈမၼ်း ပိၼ်ႇဢမ်ႇမီႉဢေႃႈ။ ၵေႃႉၼၼ်ႉပဵၼ်ပေႃႈၵူၼ်း ဢမ်ႇမုၼ်ႇ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
Currently Selected:
ငဝ်ႈၵမ်ႇၽႃႇ 19: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
