ငဝ်ႈၵမ်ႇၽႃႇ 17
17
ပတီႉၺိၺ်ႇထိူဝ်ႁိမ်းပၢႆၼင်
1ဝၢႆးၼၼ်ႉမိူဝ်ႈဢၼ်ဢသၢၵ်ႈဢႃႇပြမ်ႇလႆႈၵဝ်ႈသိပ်းပၢႆၵဝ်ႈပီႊၼၼ်ႉၸိုင်၊ ထႃႇဝရႃႉၽြႃးပေႃႇမႃးၵႃႈတီႈဢႃႇပြမ်ႇလႄႈလၢတ်ႈဝႃႈ၊ ၵဝ်ပဵၼ်ၽြႃးပဵၼ်ၸဝ်ႈ၊ ၸဝ်ႈဢၼၼ်ႇတႃႉတၼ်းၶူဝ်းဢေႃႈ။ ၵႂႃႇမႃးၵႃႈတီႈၽၢႆႇၼႃႈၵဝ်လႄႈ မီးတၢင်းဢၼ်ၸေးၸုမ်ႇတႃႉ။- 2ၵဝ်တၵ်းႁဵတ်းပတီႉၺိၺ်ႇၵဝ်ဝႆႉ ဝူင်ႈၵၢင်ၵဝ်တင်းမႂ်းဢေႃႈ။ ၵဝ်တၵ်းႁႂ်ႈမႂ်းယႂ်ႇၽႄႈၼမ်ၵိုၼ်းမႃး ၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။- 3ဢႃႇပြမ်ႇၵေႃႈၶုပ်ႉမူပ်ႇလႄႈၽြႃးပဵၼ်ၸဝ်ႈသမ်ႉလၢတ်ႈလႄႈဝႃႈ၊- 4တူၺ်းလူး၊ ပတီႉၺိၺ်ႇဢၼ်ၵဝ်ႁဵတ်းၼႆႉၸိုင် မီးဝႆႉတီႈမႂ်းဢေႃႈ။ မႂ်းတၵ်းပဵၼ်ပေႃႈမဵဝ်းၵူၼ်းၼမ်ၼႃႇဢေႃႈ။- 5ၸိုဝ်ႈမႂ်းၸိုင် ၵမ်းလိုၼ်းဢမ်ႇလႆႈႁွင်ႉႁဵၵ်ႈၸိုဝ်ႈဢႃႇပြမ်ႇ။ တၵ်းလႆႈႁွင်ႉႁဵၵ်ႈၸိုဝ်ႈ ဢႃႇပြႃႇႁၢမ်ႇဢေႃႈ။ လွင်ႈမၼ်းၸမ်ႉ ၵဝ်လႆႈႁႂ်ႈမႂ်းပဵၼ်ပေႃႈမဵဝ်းၵူၼ်းၼမ်ၼႃႇယဝ်ႉ။- 6ၵဝ်တၵ်းႁႂ်ႈမႂ်းယႂ်ႇၽႄႈၼမ်ၵိုၼ်းမႃးၼႃႇလူင်လၢင်ဢေႃႈ။ ၵဝ်တၵ်းဢဝ်မႂ်းသေလႄႈ ႁႂ်ႈပဵၼ်မဵဝ်းၵူၼ်းၼမ်ၼႃႇဢေႃႈ။ ၵႃႈၼႂ်းၸိူဝ်ႉၶိူဝ်းမႂ်းၵေႃႈ ၶုၼ်ႁေႃၶမ်းတၵ်းပေႃႇဢွၵ်ႇပဵၼ်မႃးဢေႃႈ။- 7ၵဝ်တၵ်းပဵၼ်ၽြႃးတီႈမႂ်း ဢိၵ်ႇတင်းၸိူဝ်ႉၶိူဝ်းမႂ်းလိုၼ်းမႂ်းဢေႃႈ၊ ဝႃႈၼႆ၊ ၵဝ်တၵ်းႁႂ်ႈပတီႉၺိၺ်ႇၵဝ်ပဵၼ် ပတီႉၺိၺ်ႇထႃႇဝရႃႉ ဝူင်ႈၵၢင်ၵဝ်တင်းမႂ်း ဢိၵ်ႇတင်းၸိူဝ်ႉၶိူဝ်းမႂ်း၊ လိုၼ်းမႂ်းသိုပ်ႇသိုပ်ႇတၢမ်းတၢမ်းၼၼ်ႉဢေႃႈ။- 8ၵဝ်တၵ်းဢဝ်မိူင်းဢၼ်မႂ်းပဵၼ်ၶႅၵ်ႇယူႇတေႃႈလဵဝ် ဢၼ်ဝႃႈမိူင်းၶႃႇၼၢၼ်ႇ တင်းသဵင်ႈတင်းလူင်ၼႆႉ ပၼ်တီႈမႂ်းဢိၵ်ႇတင်း ၸိူဝ်ႉၶိူဝ်းမႂ်းလိုၼ်းမႂ်းၼၼ်ႉ ႁႂ်ႈလႆႈပိူင်ႇယူႇသေႇသေႇဢေႃႈ။ ၵဝ်တၵ်းပဵၼ်ၽြႃးၶဝ်ဢေႃႈ၊ ဝႃႈၼင်ႇၼႆဢေႃႈ။
9ၵမ်းၼၼ်ႉ ၽြႃးပဵၼ်ၸဝ်ႈသမ်ႉလၢတ်ႈတီႈဢႃႇပြႃႇႁၢမ်ႇလႄႈဝႃႈ၊ ပိူဝ်ႈၼႆလႄႈ မႂ်းဢိၵ်ႇတင်းၸိူဝ်ႉၶိူဝ်းမႂ်းလိုၼ်းမႂ်းသိုပ်ႇသိုပ်ႇတၢမ်းတၢမ်းၼၼ်ႉ တၵ်းလႆႈပႂ်ႉၵမ်ပႂ်ႉၸွမ်းပတီႉၺိၺ်ႇၵဝ်ဢေႃႈ။- 10ပတီႉၺိၺ်ႇၵဝ်ဢၼ်သူတၵ်းလႆႈပႂ်ႉၵမ်ပႂ်ႉၸွမ်းၵႃႈတီႈဝူင်ႈၵၢင်ၵဝ်တင်းမႂ်း ဢိၵ်ႇတင်းၸိူဝ်ႉၶိူဝ်းမႂ်းလိုၼ်းမႂ်းၼၼ်ႉၸမ်ႉ၊ ၵႃႈတီႈသူ ၵႃႈပဵၼ်ၵူၼ်းၸၢႆး တၵ်းလႆႈၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၵူႈၵေႃႉၵူႈၵူၼ်းဢေႃႈ။- 11မင်ႇၵလႃႇတၢင်းဢၼ်သူၶၢမ်ႇတၢင်းဢၼ်ထိူဝ်ႁိမ်းပၢႆၼင်ၼၼ်ႉ တၵ်းလႆႈပဵၼ်လၢၵ်ႈၶၼႃႇသၢၵ်ႈသေႇပတီႉၺိၺ်ႇဢၼ်ၵဝ်ႁဵတ်းဝႆႉ ဝူင်ႈၵၢင်ၵဝ်တင်းသူၼၼ်ႉဢေႃႈ။- 12ၼႂ်းၸိူဝ်ႉၶိူဝ်းသူသိုပ်ႇသိုပ်ႇတၢမ်းတၢမ်းၼၼ်ႉ ၵူၼ်းၸၢႆးဢၼ်ၵိူတ်ႇလဵင်ႉၵႃႈတီႈႁိူၼ်းသူသေဢမ်ႇဝႃႈ၊ ဢၼ်ယင်းဢမ်ႇပဵၼ် ၸိူဝ်ႉၶိူဝ်းသူလႄႈ သူဢဝ်ငိုၼ်းသိုဝ်ႉဢဝ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းမႃးသေဢမ်ႇဝႃႈ၊ မိူဝ်ႈဢၼ်ဢသၢၵ်ႈၶွပ်ႈပႅတ်ႇဝၼ်းၼၼ်ႉၸိုင် တၵ်းလႆႈၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်းၵူႈၵေႃႉၵူႈၵူၼ်းဢေႃႈ။- 13ၵေႃႉဢၼ်ၵိူတ်ႇလဵင်ႉၵႃႈတီႈႁိူၼ်းသူ၊ ၵေႃႉဢၼ်ဢဝ်ငိုၼ်းသိုဝ်ႉမႃးၼၼ်ႉ တၵ်းလႆႈၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းဢေႃႈ။ ပတီႉၺိၺ်ႇၵဝ်ၼၼ်ႉၵေႃႈ၊ တၵ်းလႆႈပဵၼ်ပတီႉၺိၺ်ႇထႃႇဝရႃႉၵႃႈၼႂ်းၼိူဝ်ႉၼႂ်းၼင်သူဢေႃႈ။- 14ၵူၼ်းၸၢႆးဢၼ်ယင်းဢမ်ႇမီးတၢင်းဢၼ်ထိူဝ်ႁိမ်း ဢၼ်ယင်းဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းပၢႆၼင်ၼၼ်ႉ တၵ်းလႆႈၶၢမ်ႇတၢင်းဢၼ် ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းမၼ်းဢေႃႈ။ ၵေႃႉၼၼ်ႉယႃႉပတီႉၺိၺ်ႇၵဝ်ပႅတ်ႈယဝ်ႉ၊ ဝႃႈၼင်ႇၼႆဢေႃႈ။
15ၵမ်းၼၼ်ႉ ၽြႃးပဵၼ်ၸဝ်ႈလၢတ်ႈတီႈဢႃႇပြႃႇႁၢမ်ႇလႄႈဝႃႈ၊ မေးမႂ်းၸႃႇရေးၼၼ်ႉၸမ်ႉ၊ ဢမ်ႇလႆႈႁွင်ႉႁဵၵ်ႈၸိုဝ်ႈသဵင်ဢၼ်ဝႃႈၸႃႇရေးၼၼ်ႉ၊ တၵ်းလႆႈႁွင်ႉႁဵၵ်ႈၸိုဝ်ႈၸႃႇရႃႇဢေႃႈ။- 16ၵဝ်တၵ်းပၼ်တၢင်းလီတီႈမၼ်းလႄႈ၊ ၵဝ်တၵ်းဢဝ်မၼ်းပၼ်လုၵ်ႈၸၢႆးတီႈမႂ်းဢေႃႈ။ ၵဝ်တၵ်းပၼ်တၢင်းလီတီႈမၼ်းလႄႈ မၼ်းၵေႃႈ တၵ်းပဵၼ်မဵဝ်းၵူၼ်းလၢႆၸိူဝ်ႉလၢႆမဵဝ်းဢေႃႈ။ ၵႃႈၼႂ်းၸိူဝ်ႉၶိူဝ်းမၼ်းၼၼ်ႉၵေႃႈ၊ ၶုၼ်ႁေႃၶမ်းမဵဝ်းၵူၼ်းၼမ်ၼႃႇတၵ်းပေႃႇဢွၵ်ႇပဵၼ်မႃးဢေႃႈ၊ ဝႃႈၼင်ႇၼႆဢေႃႈ။- 17မိူဝ်ႈၼၼ်ႉဢႃႇပြႃႇႁၢမ်ႇ ၶုပ်ႉမူပ်ႇယူႇ၊ ယုမ်ႉၶူဝ်ယူႇသေလႄႈ လၢတ်ႈၼႂ်းၸႂ်လႄႈဝႃႈ၊ ၵေႃႉဢၼ်ဢသၢၵ်ႈလႆႈပၢၵ်ႇပီႊၼႆႉ တၵ်းမီးလုၵ်ႈမီးလၢင်းႁိုဝ်ၼေႃႊ။ ၸႃႇရႃႇဢၼ်ဢသၢၵ်ႈလႆႈၵဝ်ႈသိပ်းပီႊၼၼ်ႉ တၵ်းၵိူတ်ႇလဵင်ႉလုၵ်ႈလဵင်ႉလၢင်းႁိုဝ်ၼေႃႊ၊ ဝႃႈၼင်ႇၼႆသေယဝ်ႉ၊- 18ဢႃႇပြႃႇႁၢမ်ႇလဝ်ႊလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ ႁႂ်ႈဢီႉသမေႇလႃႉ ဢသၢၵ်ႈလိပ်းယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 19ၽြႃးပဵၼ်ၸဝ်ႈၵေႃႈဝႃႈ၊ မေးမႂ်းၸႃႇရႃႇတၵ်းၵိူတ်ႇလဵင်ႉလုၵ်ႈၸၢႆးတီႈမႂ်း ဢမၢၼ်ႇၶၼ်ပဵၼ်ဢေႃႈ။ တၵ်းလႆႈႁွင်ႉႁဵၵ်ႈၸိုဝ်ႈမၼ်းဢီႉၸၢၵ်ႈဢေႃႈ။ ၵဝ်တၵ်းႁႂ်ႈပတီႉၺိၺ်ႇၵဝ် ပဵၼ်ပတီႉၺိၺ်ႇထႃႇဝရႃႉတီႈမၼ်း ဢိၵ်ႇတင်းၸိူဝ်ႉၶိူဝ်းမၼ်းလိုၼ်းမၼ်းဢေႃႈ။- 20လွင်ႈဢီႉသမေႇလႃႉၸမ်ႉ၊ ၵဝ်လႆႈထွမ်ႇဢဝ်ၵႂၢမ်းမႂ်းယဝ်ႉ။ ၵဝ်တၵ်းပၼ်တၢင်းလီတီႈမၼ်းဢေႃႈ။ ၵဝ်တၵ်းႁႂ်ႈၸိူဝ်ႉၶိူဝ်းမၼ်းယႂ်ႇၽႄႈမႃးလႄႈ တၵ်းႁႂ်ႈမၼ်းၼမ်ၵိုၼ်းမႃးဢေႃႈ။ မၼ်းတၵ်းပဵၼ်ပေႃႈၶုၼ်သိပ်းသွင်ပႃးဢေႃႈ။ ၵဝ်တၵ်းႁဵတ်းႁႂ်ႈမၼ်းပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ။- 21ၵူၺ်းၵႃႈ ပတီႉၺိၺ်ႇၵဝ်ၸိုင်၊ တၵ်းႁႂ်ႈတႄႇယူႇတီႈဢီႉၸၢၵ်ႈ၊ လုၵ်ႈၸၢႆးဢၼ်ၸႃႇရႃႇတၵ်းၵိူတ်ႇလဵင်ႉတီႈမႂ်းပီႊၼႃႈ မိူဝ်ႈဢၼ်ထိုင်ၶိင်ႇၼႆႉၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊- 22သဵင်ဢၼ်မၼ်းၸဝ်ႈမွၵ်ႇလၢတ်ႈၼၼ်ႉ ထၢတ်ႇယဵၼ်လႄႈ ၽြႃးပဵၼ်ၸဝ်ႈလုၵ်ႉသေၵႃႈတီႈဢႃႇပြႃႇႁၢမ်ႇ ၶိုၼ်ႈၵႂႃႇသေဢေႃႈ။
23 ဢႃႇပြႃႇႁၢမ်ႇၵေႃႈ ဢဝ်ၸႃႉၸဵမ်လုၵ်ႈၸၢႆးမၼ်းဢီႉသမေႇလႃႉလႄႈ ၶဝ်ၸိူဝ်းဢၼ်ၵိူတ်ႇလဵင်ႉမႃးၵႃႈတီႈႁိူၼ်းမၼ်းတင်းသဵင်ႈတင်းလူင် ဢိၵ်ႇတင်းၶဝ်ၸိူဝ်းဢၼ်မၼ်းဢဝ်ငိုၼ်းသိုဝ်ႉဝႆႉတင်းသဵင်ႈတင်းလူင် ဢၼ်ဝႃႈၵူၼ်းၸၢႆးဢၼ်ၸၢပ်ႈသႅင်ႇၵၼ်တင်းႁိူၼ်း ဢႃႇပြႃႇႁၢမ်ႇတင်းသဵင်ႈတင်းလူင်ၸိူဝ်းၼၼ်ႉလႄႈ၊ ၼႂ်းဝၼ်းလဵဝ်ၼၼ်ႉၵူၺ်း၊ ပၼ်မင်ႇၵလႃႇ တၢင်းဢၼ်ထိူဝ်ႁိမ်းပၢႆၼင်ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈမီးဢမိင်ႉဝႆႉၼၼ်ႉဢေႃႈ။- 24ဢႃႇပြႃႇႁၢမ်ႇၼၼ်ႉ မိူဝ်ႈဢၼ်တူဝ်မၼ်း ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းပၢႆၼင်ၼၼ်ႉၼၼ်ႉၸိုင် ဢသၢၵ်ႈလႆႈၵဝ်ႈသိပ်းပၢႆၵဝ်ႈပီႊဢေႃႈ။- 25လုၵ်ႈၸၢႆးမၼ်းဢီႉသမေႇလႃႉၼၼ်ႉ၊ မိူဝ်ႈဢၼ်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းပၢႆၼင်ၼၼ်ႉၸိုင်၊ ဢသၢၵ်ႈလႆႈသိပ်းသၢမ်ပီႊဢေႃႈ။- 26ဢႃႇပြႃႇႁၢမ်ႇဢိၵ်ႇတင်း လုၵ်ႈၸၢႆးမၼ်းဢီႉသမေႇလႃႉၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၼႂ်းဝၼ်းလဵဝ်ၼၼ်ႉဢေႃႈ။- 27ၶဝ်ၸိူဝ်းဢၼ်ၵိူတ်ႇလဵင်ႉမႃးၵႃႈတီႈႁိူၼ်းမၼ်း၊ ၶဝ်ၸိူဝ်းဢၼ်မၼ်းဢဝ်ငိုၼ်းသိုဝ်ႉဢဝ်ၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းမႃး၊ ၵူၼ်းၸၢႆးဢၼ်ၸၢပ်ႈသႅင်ႇၵၼ်တင်းႁိူၼ်းမၼ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉ ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းလူၺ်ႈၵၼ်တင်းမၼ်းဢေႃႈ။
Currently Selected:
ငဝ်ႈၵမ်ႇၽႃႇ 17: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
