FAARSO 45
45
FAARSAANOTE ROORRICHI BUUDU XURUMBINNI QORE OOSOTA BAXILLU ROSIISHSHI FAARSO
MOOTETENNA IDAYICHOTE BAXILLI DAAFIRA GEEMBOONNI GEEWO
1Wodani'ya dancha coye malanno;
geewo'yano mootete kuleemmo;
arrawi'ya rahino borreessaanchi biire gedeeho.
2Ati manna baala roore xumaati;
Maganu maassi'rinohe daafira,
hasaawikki coommannoha ikkino.
3Ati bareedu! Xirchikkinninna gaacheenikkinni,
bagadokki amaxxi.
4Joongillenna taashsha qolate,
xirchikkinni qeelle afi'ratto gede gulufi;
wolqaataame cigilekki jawa looso loossanno.
5Maxxikki quxaminoho;
hakkuno, baarigaarrakki wodanira eanno;
dagano lekkakkira woroonni ubbanno.
6Magano! Mootimmakki hegerete;
mannakki halaalunni gashshatto.
7Ati halaale baxatto; bunshe giwatto;
kunnira, wole mootoollanni rooratto gede,
Maganu Maganikki hagiirru buuro buurinohe.
8Uddanokkira kaarbenna shitto assinoonni;
daaniichu hinkonni seesiinsoonnihura mootete mine heedhe,
gannanni gingilaatinni hagiidhatto.
9Mootete seenni, ayirraddu soqqamannohe meenti mereero no;
mootitte culku irra wodhite qiniitekkiinni uurritanno.
10Beetto'ya ballo! Macciishshi;
maccakkino kawa qoli;
kunni ka'a fiixikki amaale adhitooti.
11Moote xummekki baxino;
isi mootichakkiitina ayirrisisi.
12Xiroosi seenni afansha haa're abbannohe;
dureeyye baxantahera yite albakkiinni loollaabbanno.
13Mootete idayicho mootete mine hiitto biiffino?
Uddanose culkunni seesiinsoonnite.
14Biifado uddanose uddidhe mootenniwa e'anno;
jaallaseno dukkisannose.
15Hagiirrunninna hisanyootunni mare,
mootete holgira eanno.
16Moote! Annuwakki darga mookkannota lowo ooso afi'ratto;
baatto baalate aanano gashshaasine assite moohisattonsa.
17Su'mikki ilamate ilamara qaagamanno gede asseemmo;
kunnira, hegere hegerera daga galattannohe.
Currently Selected:
FAARSO 45: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
