FAARSO 44
44
FAARSAANOTE ROORRICHIRA QORE OOSO ROSIISHSHA
EEGGOTE HUUCCATTO
1Magano! Ati assoottore maccankenni macciishshinoommo;
annuwankeno alba yannansara loosoottoha dhaggete looso kultinonke.
2Ati daga baattonsa aaninni shorrite, ate manna baattonsara worootto;
wole gosa qorichishshe,
mannakki kayinni qawaaxxisootto.
3Baatto ragidhinohu dibagadinsanniiti;
wolqansano digatissinonsa;
qiniinonsahu, ati baxattonsanna,
ledonsa heedhe kaa'loottonsa daafiraati.
4Magani'yanna moote'ya ateeti;
mannikkirano qeelle aattohu ateeti.
5Ate wolqanni diinanke qeelleemmo;
su'mikkinni aananke ka'inore kandeemmo.
6Digaana'ya diaddaxxeemmo;
bagado'ya dihexxeemmo;
7Ati kayinni diininkewiinni gatisoottonke;
gibbannonkereno shollishootto.
8Magano, wo'manka woyite ate adawadhineemmo;
hegere geeshsha galanteemmohe.
9Xa kayinni giwoottonke; shollishoottonke;
olantonke ledono fula agurootto.
10Diinanke xoonqeemmo gede assoottonke;
gibbannonkerino mulqidhinonke.
11Ge'reewu gede gorramate sayisse oottonke;
dagate giddono billaallisoottonke.
12Mannakki mullurira hirootto;
mulla sayisse ootto.
13Olliinkera heedhanno gosa mishshannonke gede,
qooxeessinkera heedhannori oso'litannonkenna qacifattannonke gede assootto.
14Dagate maammaashsha,
mannu mereerono hii"i! Yinannire assoottonke.
15Shollinyi'ya wo'manka woyite leellannae,
saalu ille beeshshinoe.
16Togo ikkeemmohu baarigaarra'yanna ko'mitinoeri,
xontannoenna ceeggifattannoe yannaraati.
17Kuni duuchunku ninke aana ikkino;
ikkollana kayinni, dihamboommohe; gondoorokkino didiingoommo.
18Wodaninke badhera dihigino;
qaafonkeno doogokki aaninni wirri diyitino.
19Kayinnilla, kaa'lannohu nookkiha moyichu mereero tugge aguroottonke;
beebbu tunsichi giddo hunte ha'roottonke.
20Maganinke su'ma hamboommoha ikkoommero,
kaphu maganiwa wodananke qolloommoro,
21Maganu diafanno?
Isi diwodanu giddo noore afannoho?
22Ate daafira wo'ma woyite shinoonninke;
gorrinanni ge'reewi gedeno ikkinoommo.
23Kaaliiqa! Goxxootina, kainke!
Kainke! Hegere geeshsha callachishshootinke.
24Alba mayira go'latto?
Qarrankenna kadamanke mayira hawatto?
25Uullate aana diriirroommona,
bisinkeno baattote qa'minona,
26Kaaliiqa ballo! Ka'e kaa'linke!
Bagamannokkihu baxillikkira yite wodinke.
Currently Selected:
FAARSO 44: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
