FAARSO 27
27
DAAWITI FAARSO
GALATU HUUCCATTO
1Kaaliiqi xawaabba'yaatinna gato'yaati;
waajjishannoehu ayeti?
Kaaliiqi heeshsho'yara goloseetina,
masisannoehu ayeti?
2Bushuullu baarigaarra'ya gawajjitaeranna,
maala'ya ittara ka'anno yannara sarraaqante ubbanno.
3Lowo olanto gaangeessituero nafa wodani'ya dimasanno;
olu kaierono Magano hawaqi'reemmo.
4Kaaliiqa mitto coye huucci'roommo;
hasi'reemmohuno hakkonneeti;
hakkuno, heeshsho'ya diri baalankunni minesi hee'reemmo gede,
Kaaliiqi danchumma laeemmo gedenna,
Qullaawa Minesi hee're huucci'reemmo gedeeti.
5Qarru yannara daasisi giddo maaxannoe;
dukkanisi giddo gole amadannoe;
kinchu aanano gotti asse uurrisannoe.
6Kuneeti xa gaangaawi'yara noo baarigaarra aana
gotti gotti assannoe.
Dukkanisi giddo ilillisanni kakkaleemmo;
Kaaliiqira geeweemmosi; faarseemmosi.
7Kaaliiqa ballo, raare'ya macciishshie;
mararie, huuccatto'yarano dawaro qolie.
8Ati, «Dagge magansi'rie!» yiittoe yannara,
anino, «Kaaliiqa'ya maahoyye dayemmo» yuummo.
9Albakki shawwu assitootie;
ati kaa'laancho'yaatina,
ane soqqamaanchokki hanqite tugge agurtootie.
Magano gatisaancho'ya ballo,
wo'manka woyite agurtootie; callachishshootie.
10Anni'yanna ama'ya agurtuero nafa,
Kaaliiqi towatannoe.
11Kaaliiqa eeggate, doogokki rosiisie;
duggannori agarte nooe daafira,
keeraancho doogo ha'risie.
12Beebba coyidhannori, wolqatenni gawajjitaera ka'inoena,
baarigaarra'yara sayisse uyitootie.
13Lubbotenni hee're Kaaliiqi assanno danchumma,
afummokkinni digateemmo.
14Kaaliiqa hexxi;
jawaati; wodanikkino kaajjo;
Kaaliiqa hexxi.
Currently Selected:
FAARSO 27: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
