MAATEWOOSI 26

YESUUSIRA GANNOONNI GANO

(Maq 14:1-2; Luq 22:1-2; Yoh 11:45-53)

1Yesuusi konne coye baala rosiisihu gedensaanni rosaanosira, 2«Lamu barri gedensaanni Agure Sa"ate Ayyaana ayyirrinsannita affinoonni. Manchi Beettono sutamate sayisse uyitanno» yiinsa.#Ful 12:1-27 lai.

3Qeesootu roorrootinna geerru Qeesootu Roorrichi Qeyaafa yinannihu nafara gamba yitu. 4Hakkiicho Yesuusa amadde shitanno doogo ma'litu. 5Ikkollana, «Mannu gibbo kayisanno» yite waajjitino daafira, «Ayyaanunni dikinseemmo» yitu.

YESUUSIRA SHITTO BUURTU MANCHO DHAGGE

(Maq 14:3-9; Yoh 12:1-8)

6Yesuusi Biitaaniyaho taraawannoha gogu dhibba afi'rino manchi Simiooni mine sagalete ofolle hee'reenna, 7mitticho mancho lowo woxinni hirrannita naardoosi yinanni shitto, albasxiroosi yinanni kinchinni seekkinoonni gujuujjera haadhe dagge, Yesuusi umi aana duntu.

8Rosaanosi konne coye la'e hanqite, «Tenne shitto mulla mayira hunnanni? 9Woleteemmero, tenne shitto lowo woxira hirre, woxe buxanete uyinannihu baino!» yitu.

10Yesuusi yitino coye macciishshe, «Tenne mancho mayira qarrissinannise? Ise anera dancha coye assitino. 11Buxane wo'manka woyite ki'ne ledo noona, ani kayinni wo'manka woyite ki'ne ledo dihee'reemmo. 12Ise tenne shitto umi'ya aana dunatenni, ane waammate qixxeessitanni nooe. 13Halaale yeemmo'nena, gobba baalate konne Dancha Duduwo dudumbanniwa baala, ise qaaggora kuni assitinori kullanna hee'ranno» yiinsa.

YIHUDI YESUUSA SAYISE AATE MA'LI

(Maq 14:10-11; Luq 22:3-6)

14Hatte yannara, tonaa lame rosaanosi giddonni mittu Asiqorootichu Yihudi, qeesootu roorrootiwa mare, 15«Yesuusa sayise uummo'nero ma uyitinannie?» yii.

Insano sajjoo kinchu birra uyitusi. 16Isi hatte saatenni kayise Yesuusa sayise aate, injo hasi'ranni keeshshi.

YESUUSI AGURE SA"ATE AYYAANI HURBAATE ROSAANOSI LEDO ITI

(Maq 14:12-21; Luq 22:7-14,21-23; Yoh 13:21-30)

17Timu Ayyaanira umi barra, rosaanosi Yesuusiwa shiqqi yite, «Agure Sa"ate Ayyaaniha hashshi hurbaate hiikkiicho qixxeessinummohero woyyate?» yite xa'mitusi.

18Isino, «Katama e'inanni yannara balaxxine affinanni manchi minira martine minu anna, ‹Rosiisaanchu yanna iillitinona rosaano'ya ledo Agure Sa"ate Ayyaaniha hashshi hurbaate iteemmo mini hiikkiichooti?› yiino yiiyye» yiinsa. 19Rosaanosi Yesuusi yiinonsante gede, Agure Sa"ate Ayyaaniha hashshi hurbaate hakkiicho qixxeessitu.

20Yesuusi hawarrita tonaa lamunku rosaanosi ledo hurbaate itara ofolli. 21Hurbaate ittanni heedheenna Yesuusi, «Halaale kuleemmo'nena, ki'ne giddonni mittu ane sayise aannoe» yii.

22Rosaanosi kunni coyira lowo geeshsha dadillite mittu mittunku Mooticha, «Aneeti ikka?» yitu.

23Yesuusi qole, «Sayise aannoehu, ane ledo xilteho anga wore tima qasi'ranni nooho. 24Manchi Beetti alba yine borreessinoonni garinni reyanno; Manchi Beetto sayise aannohura hakko manchira kayinni aanne'e! Hakku manchi ilama hoogoommero woyyannosihu baino» yii.

25Sayise aannohu Yihudi, «Rosiisaancho'ya, aneetini?» yii.

Yesuusino, «Atinni yootto» yiisi.

MOOTICHU HURBAATE

(Maq 14:22-26; Luq 22:15-20; 1Qor 11:23-25)

26Ittanni heedheenna Yesuusi tima haa're, galatu huuccatto asse, hiiqqaqqe, rosaanosira, «Hii'e itte; kuni maala'yaatina» yee uyinsa.

27Finiinchono haa're, galatu huuccatto asse kae, «Wo'munku kunni finiinchinni agge. 28Tini lowo manni cubbo agursiisate du'nantannoti haaru gondoori mundee'yaati. 29Halaale kuleemmo'nena, Anni'ya Gashshootira haaro agammo geeshsha, techonni kayise tenne woyine layinkimeeshsho diageemmo» yiinsa.

30Hakkunni gedensaanni, galatu faarso faarsite ka'e Ejedhete Ilaala gooddidhu.

PHEEXIROOSI KAADANNOSITA YESUUSI BALAXE HIMANI

(Maq 14:27-31; Luq 22:31-34; Yoh 13:36-38)

31Yesuusi lede rosaanosira, «‹Allaalaancho ganeemmo; ge'reewuno billaallanno› yine borreessinoonnina, techo hashsha ki'ne baalunku kaaddinannie.#Zak 13:7 lai. 32Ikkollana reyotenni kaummohu gedensaanni, ki'ne balaxe Galiila saeemmo» yiinsa.

33Hatte yannara Pheexiroosi, «Wolu baalu nafa kaadihero, ani diagudheemmohe» yee coyi'ri.

34Yesuusi qole, «Halaale kuleemmohena, techo hashsha lukkichu gana geeshsha sase higge kaadattoe» yiisi.

35Pheexiroosi kayinni, «Reyano hasiissannoha ikkiro, ate ledo reemmo ikkinnina horontanni dikaadeemmohe!» yee kaajjishe coyi'ri. Wole rosaano baalano hatto yitu.

YESUUSI GEETESEMAANETE MAGANO HUUCCI'RI

(Maq 14:32-42; Luq 22:39-46)

36Hakkunni gedensaanni, Yesuusi rosaanosi ledo Geetesemaane kae ha'ri. Hakkiira iillitu yannara Yesuusi rosaanosi, «Ani ko'o mare Magano huucci'rammo geeshsha, ki'ne konne ofolle» yiinsa. 37Pheexiroosinna lamenka Zebidewoosi ooso haa're ha'ri. Hakkiicho yaaddonna dadillu amadisi. 38Insara, «Lubbo'ya reyote geeshsha dadillitino. Ki'ne kayinni goxxinikkinni konniicho agarre!» yiinsa. 39Insawiinni alba hige shiqqi yee, uulla uwe, «Anna'ya, dandaamannoha ikkiro, kuni qarri anewiinni saona! Kayinnilla, ate hedo gede ikko ikkinnina ane hedo gede ikkoonke» yii.

40Hakkunni gedensaanni sasente rosaanosiwa higanno woyite, goxxe noore afi. Kunnira Pheexiroosira, «Ane ledo mitte saate nafa geleela didandiitinanni? 41Jifamate giddora e'inannikki gede jaattine huuccidhe! Ayyaanu qixxaawaho; maalu kayinni daafuraamoho» yii.

42Galagale Yesuusi layinkimeeshsho xeerti're ha're, «Anna'ya, kuni qarru finiinchi anewiinni sa"annokkiha ikkiro, ate hedo gede ikkona» yaanni huucci'ri. 43Layinkimeeshsho rosaanosiwa daanno woyite, goxxe noore afi. 44Galagale insa agure ha're alba yee huucci'ri gede yaanni sayikkimeeshsho huucci'ri. 45Hakkunni gedensaanni, rosaanosiwa galagale hige, «Xaano goxxinenna fooliishshidhinella heedhinoonni? Xaate ikkino; yanna iillitinona, Manchi Beetto cubbaataammu angara sayinse uyinanni saate iillitino. 46Ka'e ha'nona; sayise aannoehu kuneeti dayinona» yiinsa.

YESUUSI AMADAMA

(Maq 14:43-50; Luq 22:47-53; Yoh 18:3-12)

47Yesuusi coyi'ranni hee'reenna, tonaa lame rosaanosi ledohu Yihudi kae dayi. Isi ledo bisenna dulla anga adhinohu lowo manni dayi. Insano qeesootu roorrootiwiinninna geerruwiinni sonkeenna dagginoreeti. 48Sayise aannohu Yihudi mannaho, «Hasidhinannihu ani sunqeemmohona iso amadde!» yee malaate uyinonsa. 49Yihudi hakkawoyintenni Yesuusiwa daye, «Rosiisaancho'ya, keereho?» yee sunqisi.

50Yesuusi qole, «Jaala'ya! Xaate dayotto haja guxxi!» yiisi. Hakkunni gedensaanni, mannu daye Yesuusa amadi. 51Yesuusi mule uurrite noori giddonni mittichu bise fushshe, qeesootu qari soqqamaanchira macca gane tayisi. 52Yesuusi kayinni, «Bise fushshidhannori bisetenni reyitannona bisekki kou giddora qoli!. 53Ani Anna'ya huucci'roommoro kumunni kiirranni sokkaasine soyaera dandaannokkiha lawihe? 54Hatto ikkoommero, ‹Qarra adha hasiissannosi› yaannohu Qullaawu Maxaafi qaali hiitto ikke wo'manno?» yiisi.

55Hatte yannara Yesuusi hakkiicho gamba yiino mannira, «Mulqi'rannoha amandannihu gede ane amadate bisenna dulla duqqitine daggini? Barra baala Qullaawu Mini giddo rosiisanni ledo'ne hee'rummo geeshsha diamaddinoonnie. 56Kuni baalu ikkinohu kayinni alba himanaano himantinori wo'manno gedeeti» yii. Hatte yannara rosaanosi baala Yesuusa agurte xooqqu.

YESUUSI YOOTE SONGOWA SHIQI

(Maq 14:53-65; Luq 22:54-55; Yoh 18:13-14,19-24)

57Hakkunni gedensaanni, Yesuusa amadduri haadhe Qeesootu Roorrichi Qeyaafawa massitusi. Hakkiicho Seeru rosiisaanonna geerru gamba yite no. 58Pheexiroosi, Yesuusiwiinni xeerti're badheenni ha'ranni Qeesootu Roorrichi hoowe geeshsha mari. Ikkitote gara la"ara hoowe giddoonni e"e agaraasinete ledo ofolli. 59Qeesootu roorrootinna Aliidi Yoo Mine ofolle noo manni baalu Yesuusa shinanni gede, kaphu taje hasi'ranni no. 60Lowo manni kaphunni naqqasiro nafa, reyote yoora iillishanno coye diafidhino. Gedensaanni lamu manni naqaashshe ikke shiqe, 61«Kuni manchi, ‹Maganunniha Qullaawa Mine diige, sasu barri giddo qole mina dandeemmo› yaanna macciishshinoommo» yitu.

62Qeesootu Roorrichi gotti yee Yesuusa, «Kuni manni ate aana coyi'ranni noo coyira qo'lattori dinoheni?» yee xa'mi. 63Yesuusi kayinni mittoreno qolikkinni sammi yii. Qeesootu Roorrichi lede, «Heeshshote Magani su'minni xa'meemmohena Ati Maganu Beetto, Kiristoosa ikkoottoro kulie» yiisi.

64Yesuusino, «Ati yiitto gedeeti. Ikkollana kunni ka'a Manchi Beetti Wo'manka Dandaanno Maganira qiniiteenni ofollinoha affinanni; hattono gordu gomichinni dukkisame daanna la'inanni» yiinsa.#Dan 7:13 lai.

65Hatte yannara Qeesootu Roorrichi hanqe uddanosi dare, «Kuneeti, Magano xonino! Ki'neno xonino xono macciishshitinoonni! Kawiichinni sa'ino naqaashshe mayira hasi'neemmo? 66Xa mayitinanni?» yii.

Insano, «Reyona!» yitu.

67Hatte yannara anja tuffanni, tuttugganni, qawaaddanni, 68«Kiristoosi! Hanni ganihehu ayetiro himani?» yitusi.

PHEEXIROOSI YESUUSA KAADI

(Maq 14:66-72; Luq 22:56-62; Yoh 18:15-18,25-27)

69Pheexiroosi, Qeesootu Roorrichi mine hoowete giddo ofolle hee'reenna, mitte borojjicho isiwa dagge, «Atino Naaziretete Yesuusi ledoho» yitusi. 70Isi kayinni, «Ati yaattaha diafoommo» yee mannu baalu albaanni moromi. 71Gobbara fulanni hee'reenna mitte wole borojjicho affe, hakkiicho noo mannira, «Kuni manchi Naaziretete Yesuusi ledoho» yitu.

72Pheexiroosi kayinni, «Konne ati yaattaha diegennoommo» yaanni layinkimeeshsho xaari. 73Shiima yanna gedensaanni, hakkiicho uurre noo manni Pheexiroosiwa shiqqi yee, «Coyikki egensiisanno; addaho atino insa widiho» yitusi.

74Hatte yannara Pheexiroosi, «Maganu afoe, ani konne yitinanni mancho diegennoommo!» yaanni xaari. Hakkawoyintenni lukkichu gani.

75Pheexiroosino, « ‹Lukkichu ganikkinni sase higge diegennoommosi› yaattoe» yee Yesuusi coyi'rino coyi qulli yeennasi gobbara fule hururame wi'li.

Currently Selected:

MAATEWOOSI 26: QulMax

Highlight

Copy