MAATEWOOSI 27

YESUUSI PHILAAXOOSI ALBIRA YOOTE SHIQI

(Maq 15:1; Luq 23:1-2; Yoh 18:28-32)

1Soodo guto qeesootu roorrootinna geerru baalu Yesuusi aana reyote yoo yiisiissara amaalantu. 2Hakkunni gedensaanni, Yesuusa usurte haadhe hadhe gashshaanchu Philaaxoosira sayisse uyitu.

3Yihudi Yesuusi aana reyote yoo yinoonnita macciishshe gaabbi; sajjoonka kinchu birra qeesootu roorrootiranna gobbate geerrira masse qole, 4«Keeraancho mancho reyote sayise aa'yara sao assoommo» yii.

Insa kayinni, «Ninke mayi xiwinke! Umikki hajaati!» yitusi.

5Isino sajjoonka birra Qullaawu Mini giddo fince hune, ha're qalxi're reyi.

6Qeesootu roorrooti sajjoonka kinchu birra haadhe, «Kuni mundeete woxe ikkino daafira Qullaawu Mini fushshaati ledo karsa digaraho» yitu. 7Kunnira amaalante wosinaho waammate darga ikkanno gede dora gananno manchi uulla hirtu. 8Kunninni kainohunni, hattenne uulla techo geeshsha, «Mundeete uullaati» yinanni.

9Kunni garinni, Himanaanchu Ermiyaasi, «Israeelete gosa heddinosi waaga sajjoo kinchu birra adhitu. 10Mootichu hajajinoe garinni, dora ganannohu uullara baattu» yiino himani wo'mi.#Erm 32:6-9; Zak 11:12-13 lai.

YESUUSA PHILAAXOOSIWA HAADHE MASSITUSI

(Maq 15:2-5; Luq 23:3-5; Yoh 18:33-38)

11Hatte yannara Yesuusi gashshaanchu Philaaxoosi albira shiqi. Philaaxoosino, «Ati Ayihudete mooteeti?» yee xa'misi.

Yesuusino, «Ati yiitto gedeeti» yee dawari. 12Ikkollana qeesootu roorrootinna geerru bushiishshannasi mittoreno diqolino. 13Hakkunni gedensaanni Philaaxoosi Yesuusa, «Meu coyinni bushiishshannahe sammi yaatto?» yiisi.

14Yesuusi kayinni, gashshaanchu maala'la geeshsha yitinosi coyira mitte dawaro nafa diqolino.

YESUUSIRA REYOTE YOO YITU

(Maq 15:6-15; Luq 23:13-25; Yoh 18:39-40; 19:1-16)

15Gashshaanchu, Agure Sa"ate Ayyaanira mannu, «Tirinke!» yaannoha mitto usuranya tira rosoho. 16Hatte yannara, «Barbaani» yinannihu haxawarru manchi usurame no. 17Kunnira mannu gamba yeenna Philaaxoosi, «Aye tirammo'nera baxxinanni? Barbaaninso Kiristoosa yinanni Yesuusa?» yee xa'mi. 18Togo yiinohu, Yesuusa dhiibbetenni sayisse uyitinota afinohuraati.

19Hakkunni gedensaanni Philaaxoosi yoote barcimira ofolle hee'reenna galtesi, «Isinni kainohunni ani ankarro haaqeete lowo geeshsha qarramanni galoommana, kunni keeraanchu manchi aana mittoreno assitooti!» yite sokka sokku.

20Hatte yannara qeesootu roorrootinna geerru, «Barbaani tirinke! Yesuusi kayinni reyo!» yite Philaaxoosi xa'manno manna kakkayissu. 21Gashshaanchuno, «Lamunku giddonni hiikkonne tirammo'nera baxxinanni?» yee manna layinkimeeshsho xa'mi.

Insano, «Barbaani tirattonkera banxeemmo» yite qoltusi.

22Philaaxoosi, «Kiristoosa yinanniha Yesuusa hiissoyya?» yee xa'minsa.

Insa baalunku, «Suti!» yite qoltu. 23Gashshaanchuno, «Mayira? Isi assino bunshe maati?» yiinsa.

Insa kayinni, «Suti!» yite ledde cancitu.

24Kunnira, Philaaxoosi kuni coyi canco ledannota ikkinnina woyyannori nookkita afe, waa abbisiisi're, «Kunni manchi reyo ane dihassanno. Ki'ne kayinni diagurtanno'ne!» yee mannu albaanni anga hayishshi'ri.

25Mannu baalunku, «Isi reyonni daanno cubbi ninkeranna oosonkera iillo» yii.

26Hatte yannara Philaaxoosi Barbaani tire, Yesuusa kayinni lichetenni gansiise, suntanni gede sayise uyi.

GAADDO YESUUSA QACIFATTUSI

(Maq 15:16-20; Yoh 19:2-3)

27Hatte yannara, Gashshaanchu gaaddo Yesuusa haadhe Philaaxoosi hoowe massitusi. Gaaddo baala Yesuusa gaangeessite uurritanno gede assitu. 28Uddanosi mulqite, duume xiillitte uddano uddisiissusi. 29Utu worraaqqa seekkite umoho wortusi. Qiniiticho angara siqqo worte, albasiinni guluphitanni, «Ayihudete Moote, mootimma geedonnita ikkitohe!» yitanni qacifattusi. 30Anja tuffanni, siqqono angasinni haadhe umo gantusi. 31Qacifattusihu gedensaanni duume xiillitte uddano mulqite, uddanosi uddisiisse suttara haadhe hadhusi.

YESUUSI SUTAMA

(Maq 15:21-32; Luq 23:26-43; Yoh 19:17-27)

32Gashshaanchu hoowenni fultanni heedhe, Simiooni yinanniha Qereenu gobba mancho affe, Yesuusi masiqala duhanno gede qarrissusi. 33Yesuusa Golgoota haadhe massitusi. Golgoota yaa, Umu Qooncho yaate. 34Hakkiicho hadhote ledo karsinoonnita woyinete xajje uyitusi. Isi kayinni suumetenni kise kae aga giwi.#Far 69:21 lai. 35Yesuusa suttuhu gedensaanni, uddannasira hixa tuqqite beeqqitu.#Far 22:18 lai. 36Hakkiicho ofolte iso agartu. 37Yesuusi sutaminohu mayiraatiro kultanno borro, «Kuni Yihudu Moote Yesuusaati» yite borreessite umosiinni wortu.

38Hatte yannara, Yesuusi ledo lame addi-fuloota abbite mitto qiniitesiinni, mitto gurasiinni suttu.

39Mulesiinni hige sa"anno manni umo shafanni, 40«Qullaawa Mine diigge sasu barrinni minattohu, hanni umokki gatisissiyya! Maganu Beetto ikkoottoro, hanni masiqalu aaninni dirri!» yee arrassisi.

41Kunni garinni Qeesootu Roorrooti, Muse Seeri rosiisaanonna geerru, 42«Wole gatisinona, umosi kayinni gatisa didandaanno. Isi Israeelete Moote ikkinoro, hanni masiqalu aaninni dirrossi; ninkeno la'ne ka'ne ammanneemmosina!» yite qacifattusi. 43Isi Magano hexxino. « ‹Ani Maganu Beettooti› yiinona, baxinoro hanni Maganu xa gatisossisiyya!» yitu.#Far 22:8 lai.

44Ledosi sutante noo addi-fulootino hakko garinni xontinosi.

YESUUSI REYO

(Maq 15:33-41; Luq 23:44-49; Yoh 19:28-30)

45Barra lee saatenni kayise honse saate geeshsha baatto baala tunsitu. 46Honse saate ikkita Yesuusi, «Eloyi! Eloyi! Lama Sabaqitani?» yee lowo qaalinni coyi'ri. Hatto yaa, «Magano'ya, Magano'ya, mayira agurittoe?» yaate.#Far 22:1 lai.

47Hakko uurrite noori giddonni mitu mitu macciishshite, «Kuneeti, Eeliyaasi woshshanni no!» yitu. 48Hatte yannara insa giddonni mittichu dode mare, haanxicho shiishu giddo cuue, Yesuusi aganno gede siqqote umira wore uyisi.#Far 69:21 lai. 49Wolootu kayinni, «Hanni agarre! Eeliyaasi daye gatisannosiro la'neemmona!» yitu.

50Yesuusi layinkimeeshsho lowo geeshsha raare kaeenna foolu fulisi.

51Hatte yannara, Qullaawu Mini dukko alinni eeli geeshsha dadhante lamewa fultu. Uullano milli yitu; kinnano daddadhantu.#Ful 26:31-33 lai. 52Waammano fa'nanteenna, reyitino keeraano giddonnino lowo manni kai. 53Waammate giddonni fulte, Yesuusi reyotenni kaihu gedensaanni Qullaawa Katama Yerusaalame e'u. Hakkiicho lowo mannira leeltu.

54Olantote roorrichinna isi ledo Yesuusa agarte noori uulla milli yitutanna ikkino coye baala la'e lowo geeshsha waajjite, «Kuni manchi halaalintanni Maganu Beettooti» yitu.

55Lowo meenti xeertote uurre la"anni no. Insa Galiilunni kayise Yesuusa towatanni hoodesi ha'rinoreeti. 56Insa giddo Megidelitte Maariyaami, Yaiqoobinna Yooseefi ama Maariyaaminna Zebidewoosi ooso amano ledo no.

YESUUSA WAAMMOONNI GARA

(Maq 15:42-47; Luq 23:50-56; Yoh 19:38-42)

57Hawarrita Yooseefi yinannihu mittu dureessu Armaatiyu Katami manchi hakkiira kae dayi. Isino Yesuusi rosaanchooti. 58Kuni manchi Philaaxoosiwa mare, Yesuusi reeshsha aannosi gede huucci'ri. Philaaxoosino Yesuusi reeshsha uyinannisi gede hajaji. 59Kunnira Yooseefi Yesuusi reeshsha masiqalu aaninni dirrise, haaro seemmanni kafani. 60Kincho kurkurre seekkinoonnitera haaro umisi waamma giddo madaarisi. Hakkunni gedensaanni lowo kincho gongo'mishe, waammate afoo cufe ha'ri. 61Megidelitte Maariyaaminna wole Maariyaami hakkiicho waammate albaanni ofolle no.

YESUUSI WAAMMA AGARTINORE

62Ga'a gede Ayihudete Fooliishsho Barraati; qeesootu roorrootinna Farisootu mitteenni Philaaxoosiwa marte, 63«Mooticha, hakku so'risiisaanchu lubbotenni hee're, ‹Sasu barri gedensaanni reyotenni kaeemmo› yiinoti qaagantinonke. 64Kunnira, rosaanosi marte moortannokki gedenna mannahono, ‹Kuneeti, reyotenni kaino› yite dudubbannokki gede sasu barri geeshsha waamma agarantanno gede hajaji. Hatto ikka hoogiro, gedensiidi so'risiisa albitenni roore ikkitanno» yitu.

65Philaaxoosino, «Kuneeti, agartanno gaaddo noo'nena martine hasidhinoonni garinni agarsiisidhe!» yiinsa. 66Kunnira marte waammate kinchi aana maattama gante agartanno gede gaaddo wortu.

Currently Selected:

MAATEWOOSI 27: QulMax

Highlight

Copy