MAATEWOOSI 28

YESUUSI REYOTENNI KAI

(Maq 16:1-10; Luq 24:1-12; Yoh 20:1-10)

1Ayihudete Fooliishsho Barri saihu gedensaanni lamalate umi barra soodo guto, Megidelitte Maariyaaminna wole Maariyaami waamma la"ara ha'ri. 2Hedeweelcho baatto lowo geeshsha shafantu; Maganu sokkaasinchi gordunni dirre waammate tu'noonni kincho gongo'mishe hoole aanaho ofolli. 3Sokkaasinchu albino belequ gede xawanno; uddanosi kaadete gede waajjote. 4Agaraasine sokkaasincho waajjite qece yite reyinohu gede ikkitu. 5Sokkaasinchu kayinni meentoho, «Ki'ne woyite waajjitinoonte; suntiha Yesuusa hasidhinanni heedhinoonnita afoommo. 6Isi konniicho dino; balaxe coyi'rinonte gede kaino. Madaarroonnisi darga kuneeti daggine la'e! 7Xa hadhine rosaanosira, ‹Reyotenni kaino; ki'ne balaxe Galiila ha'rinona hakko affinannisi› yitine kullensa; kune kuloommo'ne» yiinsa.

8Hakkunni gedensaanni, meentu waajjillunninna lowo hagiirrinni waammatewiinni rahe fule rosaanote kulara dodi. 9Yesuusi doogote ha'ranni noore afe, «Keeru ki'ne ledo hee'ro!» yiinsa. Insano isiwa shiqqi yee, lekkasira uwe kumbuuli. 10Hatte yannara Yesuusi, «Waajjitinoonte! Hadhine Galiila sa'anno gede roduuwi'yara kulle. ‹Hakkiicho affinanniena yiino› yiiyyensa» yii.

GAADDO YESUUSI KAINOTA QEESOOTU ROORROOTIRA KULTU

11Meentu ha'ranni hee'reenna, gaaddote giddonni gamu katama hadhe ikkino coye baala qeesootu roorrootira kultu. 12Qeesootu roorrooti geerru ledo gamba yite amaalantuhu gedensaanni, gaaddote lowo woxe uyite, 13«‹Ninke gonxe hee'neenna hashsha rosaanosi dagge moorte adhite hadhino› yitine mannaho kulle. 14Konne coye gobbate gashshaanchi macciishshiro, ki'ne affinoonnikki gede assine kulleemmona yaaddinoonte» yitunsa. 15Kunnira gaaddo woxe adhite kulloonninsa gede assitu. Kuni coyi techo geeshsha Yihudu gobbara kullanna hee'ranno.

YESUUSI TONAA MITE ROSAANOSIRA LEELLI

(Maq 16:14-18; Luq 24:36-49; Yoh 20:19-23; Soq 1:6-8; 1Qor 15:3-8)

16Tonaa mitunku rosaano Yesuusi hadhe yiinowa Galiilu Ilaala hadhu. 17Iso affe magansidhusi; gamu kayinni huluullantu. 18Yesuusi insawa shiqqi yee, «Roorre baala gordohonna baattote uyinoonnie. 19Xaate hadhine gosa baala Annu, Beettunna Qullaawu Ayyaani su'minni cuu'inanni rosaano'ya assensa. 20Hajajoommo'nere baala assitanno gede rosiissensa! Kuneeti, gobbate goofimarchi geeshsha ani ki'ne ledo noommo» yiinsa.

Currently Selected:

MAATEWOOSI 28: QulMax

Highlight

Copy