MAATEWOOSI 25

TONNU SEENNI LAWISHSHA

1Yesuusi lede, «Hatte yannara Gordu Gashshooti seenne adhara daannoha haa'rara caabbicho anga adhe noore tonne seenne lawanno. 2Insa giddonni onte balalootaho; onte busulootaho. 3Balalootaho laamba worranniri noonsana laambu kayinni dinonsa. 4Busulootu laamba worrannire anga adhe giddono laamba wodhe no. 5Seenne adhannohu daa keeshshita, wo'munku goxe bai.

6«Hashshu taalootira, ‹Kuneeti, seenne adhannohu dayino! Amme fultine haadhe!› yinanni canco macciishshini. 7Hatte yannara baalunku seenni kae caabbichonsa biddi assi'ri. 8Balalootu seenni busuloota, ‹Caabbichinke xoaraatina laambi'ne aaninni shiima uuyyenke› yii. 9Busulootu kayinni, ‹Ninkeranna ki'nera ikkanno laambi dinonke. Kunni daafira hadhine hirranniwiinni ki'nera ikkannoha hidhe› yiinsa.

10«Balalootu seenni laamba hidhara ha're hee'reenna seenne adhannohu dayi. Qixxaawe agadhe noo seenni dayinoha haa're ledosi jilu hari giddora ei; cufanano cunfi. 11Gede'ninori kae daye, ‹Mooticha ballo, faninke!› yii.

12«Isi kayinni, ‹Halaale kuleemmo'nena, ani diegennoommo'ne!› yiinsa.

13«Kunnira, barranna saate diaffinoonnina jaattine agadhe!» yiinsa.

SASE SOQQAMAANO LAWISHSHA

(Luq 19:11-27)

14Yesuusi, «Gordu Gashshooti, ‹Mittu manchi wole gobba ha'ranni soqqamaanosi woshshe jajjasi uyi're ha'rinoha lawanno. 15Mootichuno dandiitanno deerrinni, mittoho onte kume birra, mittoho lame kume birra, mittoho qole mitto kume birra beehe ha'ri. 16Onte kume birra adhihu, ha're daddale wole onte kume birra ledi. 17Lame kume birra adhihuno, ha're daddale wole lame kume birra ledi. 18Mitto kume birra adhihu kayinni, ha're mootichu woxe baatto ume madaari. 19Lowo yanna gedensaanni, hattenne soqqamaano mootichi daye jajjasi towaxxi.

20«Onte kume adhi soqqamaanchi daye, ‹Mooticha'ya, ati onte kume birra oottoe; kuneeti, ani daddale onte kume ledoommo› yii. 21Mootichisino, ‹Dancha assootto! Ati ammanamoottohonna dancha soqqamaanchooti. Shiimurira ammanamoottona, loworira shoomeemmohe. Amo Mootichikki hagiirre gutami!› yiisi.

22«Lame kume birra adhihuno daye, ‹Mooticha'ya! Ati lame kume birra oottoe; kuneeti, ani daddale lame kume ledoommo› yii.

23«Mootichisino, ‹Danchaho! Ati ammanamoottohonna dancha soqqamaanchooti. Shiimurira ammanamoottona, loworira shoomeemmohe. Amo Mootichikki hagiirre gutami!› yiisi.

24«Mitto kume birra adhihu daye, ‹Mooticha'ya! Wixi'roottokkiha mixxattoha, fincoottokkiha gamba assi'rattoha kaajjado mancho ikkoottota egennoommo. 25Kunnira waajje woxekki baatto ume madaaroommo; woxikki kuneeti› yiisi.

26«Mootichu kayinni, ‹Ati bushunna cee'maleessu soqqamaanchi, wixi'roommokkiha mixxeemmota, fincoommokkiha gamba assi'reemmota egennoottoha ikkiro, 27woxe'ya lexxannowa wora hasiissannohe; ani dayemmo yannara qallote ledo adheemmoha hunootto. 28Xa woxe haadhine tonnu kumi noosihura uuyye. 29Noosihura lendanni; noosikkihu aaninni kayinni noosinka haa'ne hoollanni. 30Konne tidhinokki soqqamaancho gobba fushshitine tunsichoho tugge. Hakkiicho wi'lanna suume ita agartannosi› yiino» yii.

GOOFIMARCHOHO DAGGANNO YOO

31Yesuusi lede, «Manchi Beetti sokkaasine baalatenni dukkisame ayirrinyunni daye ayirrinyu barcimira ofollanno. 32Gosa baala albasiinni gamba yitanno. Allaalaanchu ge'reewo meuwiinni badannonte gede, isino gosa kawanna ka'a badanno. 33Ge'reewo qiniiteenni, me"e guraanni uurrisanno.

34«Hatte yannara Moote qiniitesiinni noore, ‹Ki'ne Anni'ya maassi'rino'neri! Amme! Alame kalaqantuhunni kayise qixxaawino'neha Gordu Gashshoote ragidhe! 35Hudi'reenna itissinoonnie; goo'reenna hayikkissinoonnie; wosinchimma dayenna haadhinoonnie. 36Kalleenna uddisiissinoonnie; dhiwameenna la'inoonnie; usurameenna xa'mitinoonnie› yaannonsa.

37«Hatte yannara keeraano, ‹Mooticha, hudidhe daggeenna anfe mamoote itinsummohe? Goo'rite daggeenna anfe mamoote hayikkinsummohe? 38Wosinchimma daggeenna anfe mamoote haa'nummohe? Kallite daggeenna anfe mamoote uddisiinsummohe? 39Dhiwanteenna woy usuranteenna anfe mamoote xa'minummohe?› yitanno.

40«Mooteno, ‹Halaale kuleemmo'nena, kuri maa'nuullu roduuwi'ya giddonni mittoho nafa assitinoonnihu baalu anera assitinoonniho yaate› yee qolinsa.

41«Hakkunni gedensaanni guraanni noorirano, ‹Ki'ne rumantinoonniri! Anewiinni xeertidhe! Sheexaanehonna sokkaanosira qixxeessinoonnitewa hegere giirawa hadhe! 42Hudi'reenna di"itissinoonnie; goo'reenna dihayikkissinoonnie; 43wosinchimma dayenna dihaadhinoonnie. Kalleenna diuddisiissinoonnie; dhiwameenna dila'inoonnie; usurameenna dixa'mitinoonnie› yaannonsa.

44«Insa qolte, ‹Mooticha, hudidheenna woy goo'riteenna, wosinchimma daggeenna woy kalliteenna, dhiwanteenna woy usuranteenna anfe mamoote kaa'la hoongummohe?› yite qoltannosi.

45«Mooteno, ‹Halaale kuleemmo'nena, kuri maa'nuullu roduuwi'ya giddonni mittoho nafa assitinoonnikkihu baalu anera assitinoonnikkiho yaate› yee qolannonsa.

46«Kunni daafira, ki'ne hegere qorrichiwa, keeraano kayinni hegere heeshshowa hadhanno» yiinsa.

Currently Selected:

MAATEWOOSI 25: QulMax

Highlight

Copy