KALAQAMA 29

YAIQOOBI LAABA MINIRA IILLI

1Yaiqoobi kae soojjaati gobba ha'ri. 2Hakkiira iillanni hee're xawoho mitte wayi bue afi; sase hoshsha hooffille saadati buete gaangaawira no; tini saadano waa tenne buenni agganno; bueteno lowo kincho tu'nanni. 3Hooffille saada baalanti hakkiicho gamba yituhu gedensaanni allaalaasine kincho gongo'mishshe hoolte waa hayikkissanno; saadansa hayikkisidhuhu gedensaanni kayinni kincho dawarte balete tu'anno.

4Yaiqoobino allaalaasine, «Ayidde'ya, ki'ne hiikkiinni dagginoonnireeti?» yee xa'minsa. Insano, «Ninke Kaaraaninni dangoommoreeti» yite dawartusi.

5Isino, «Naakoori beetti beetto Laaba egentinoonni?» yee xa'minsa. Insano, «Ee egenninoommo» yitu.

6Isino qole, «Isi keere no?» yee xa'mi.

Insano, «Ee keereholla; beettosi Raaheelino kuu"uneeti, ge'reewo haadhe dagganni no» yitu.

7Yaiqoobino, «Yanna barraati; saada minira qo'litinanni yanna di"iillitino; waa hayikkissine ka'ine massitine mayira diallaaltinanni?» yiino.

8Insano, «Allaalaasine baalanti saadansa adhite dagga geeshsha mittoreno assine dianfeemmo; baalunku daggeenna kincho kaa'lamme hoolle saada hayikkisi'neemmo» yitusi.

9Isi insa ledo hasaawanni hee'reenna Raaheeli anniseta hooffille saada haadhe hakkiira daggu; iseno hooffille saada allaaltanno. 10Yaiqoobino amasi rodiita Laaba beetto Raaheelinna hooffille saadasi afi yannara shiqqi yee, buete afiinni kincho hoole waa hayikkisinsa. 11Raaheelino sunqe, hagiidhino daafira wi'le qo'la hoogi. 12Hakkunni gedensaanni Raaheelira, «Ani annikki fiixaati; Ribiqa beettooti» yiise. Iseno doddanni hadhe konne coye annisera kultu. 13Laabano rodoosi beettiha Yaiqoobi duduwo macciishshe haa'rasira rahe mari; hanqafe sunqisihu gedensaanni, minisira haa're ha'risi. Yaiqoobino baalanka coye Laabara hasaawi. 14Laabano, «Halaalinta ati maala'yaatinna mundee'yaati» yiisi. Yaiqoobino mittu agani geeshsha abbisi ledo hee'ri.

YAIQOOBI RAAHEELINNA LIYA DAAFIRA LAABARA SOQQAMI

15Laaba Yaiqoobi, «Ate fiixa'yaati yee calla soqqamie diyeemmo; kunnira daafurikkira maricho eemmohero kulie» yiisi. 16Laabara lamu seenni noosi; bayirate su'mi Liyaati; maa'nete su'mi Raaheeliiti. 17Liya ille shiimate; Raaheeli kayinni dana xumate; albano biifadote.

18Yaiqoobi Raaheeli lowo geeshsha baxino daafira, «Raaheeli uyittoero 7 diro soqqameemmohe» yii.

19Laabano, «Woleho aammonkunni atera uummohero woyyannona, ane ledo hee'ri» yii. 20Yaiqoobino Raaheeli daafira 7 diro soqqami; ise baxino daafira 7 diri shiima barra ikkisi.

21Yaiqoobi Laabara, «Coyi'rammoommo yanna gooffinona, xaate beetto uyie» yiisi. 22Laabano jila jile aanino manna baala woshshi. 23Hashshita Laaba beettosi Liya haa're Yaiqoobira uyi; Yaiqoobino adhe galtesi assi'ri. 24Laaba beettosi Liyara borojjichosi Zilfa soqqantannose gede uyise. 25Soodo la'nanni woyite ise hada Liyaati; Yaiqoobi Laabara, «Togo mayira assittoe? Soqqamoommohehu Raaheeli daafiraati; mayira dogittoeyya?» yiisi.

26Laabano, «Gobbankera bayira heedheenna maa'ne aa bude di"ikkino. 27Konne 7 barra agari; qolte wole 7 diro soqqamittoero Raaheelino eemmohe» yiisi.

28Yaiqoobino kunni coyira sumuu yii; Liya ledo 7 barra keeshshihu gedensaanni Laaba Raaheelino Yaiqoobira uyisi. 29Raaheelira soqqantannose gede Biliha yinanni borojjicho uyise. 30Yaiqoobi Raaheelino adhe galtesi assi'ri. Raaheeli Liyanni roorse baxise; hakkunni gedensaannino Laabara 7 diro lede soqqami.

YAIQOOBIRA OOSO ILANTUSI

31Yaiqoobi Liya naadinosekkita afe Kaaliiqi, iltanno gede assise. Raaheeli kayinni gaanate. 32Liya godobbe labbaa beetto ilte, «Kaaliiqi qarra'ya laino; kunni ka'a ayiddaanni'yano baxannoe» yite su'ma Roobeeli#29:32 Roobeeli yaa Ibiraawootu afiinni Reubeeni yinanni; hatto yaano, hashshu labbaa beetto afi'roomma, woy qarra'ya afino yaate. yite fushshitu. 33Xaano godobbe labbaa beetto ilte, «Naandoonniekkita macciishshe Kaaliiqi konne ledinoe» yite su'ma Simiooni#29:33 Simiooni yaa Ibiraawootu afiinni macciishshi yaate. yite fushshitusi. 34Xaano godobbe labbaa beetto ilte, «Xaano ayiddaanni'ya anewa gamba yaanno» yite su'ma Leewi#29:34 Leewi yaa Ibiraawootu afiinni gamba yaanno yaate. yite fushshitusi. 35Xaano godobbe labbaa beetto ilte, «Xaa woyite Kaaliiqa galaxxeemma» yite su'ma Yihuda#29:35 Yihuda Ibiraawootu afiinni hoda yinanni; hatto yaano galataho yaate. yite fushshitusi. Hakkunni gedensaanni ila uurritu.

Currently Selected:

KALAQAMA 29: QulMax

Highlight

Copy