KALAQAMA 30

1Raaheeli Yaiqoobira ooso iltinokki daafira rodoose hinaassu. Yaiqoobino, «Ila uyie; hakkuyi ka'a reemma» yitusi.

2Yaiqoobino Raaheelira hanqe, «Halaalintanni ani ila ho'late Magano lawummohe? Ila afi'rattakki gede assinohehu Maganohowe!» yiise.

3Iseno, «Kune borojjicho'ya Biliha no; ise ila afidhuro, anino ise widoonni hige ilate ama ikkeemmana, ise adhi» yitusi. 4Borojjichoseno galte ikkitannosi gede uyitusi. Yaiqoobi iseno adhe galte assi'ri. 5Bilihano godobbe Yaiqoobira labbaa beetto iltusi. 6Raaheelino, «Maganu coyi'rinoe; ku'lo'yano macciishshe labbaa beetto uyinoe» yite, su'ma Daani#30:6 Daani yaa Ibiraawootu afiinni coyi'rinoe yaate. yite fushshitusi. 7Raaheeli borojjicho Biliha ledde godobbe, Yaiqoobira layinkiha labbaa beetto iltusi. 8Raaheelino, «Jawaata sharro rodoo'ya ledo sharrame qeeloomma» yite, su'ma Nifitaalemi#30:8 Nifitaalemi yaa Ibiraawootu afiinni sharrote yaate. yite fushshitusi.

9Liyano ledde ila afidhannokkita affe, borojjichose Zilfa galte ikkitannosi gede Yaiqoobira uyitusi. 10Zilfano Yaiqoobira labbaa beetto iltusi. 11Liyano, «Kaayyo afi'roomma» yite su'ma Gaadi#30:11 Gaadi yaa Ibiraawootu afiinni kaayyote yaate. yite fushshitusi. 12Zilfa Yaiqoobira layinkihano labbaa beetto iltusi. 13Liyano, «Hagiirraame ikkoomma; meentuno, ‹Hagiirraame mancho› yaannoe» yite su'ma Aseeri#30:13 Aseeri yaa Ibiraawootu afiinni hagiirre yaate. yite fushshitusi.

14Roobeeli qamade mindanni aganira loonsanniwa mare, Inkoye#30:14 Inkoye hatte yannara meyati kunni haqqi laalo itturo godowu gatannose yine hendanni. yinanni haqqi laalo afi're, amasi Liyara abbe uyise. Raaheelino Liyara, «Beettikki abbiheta inkoyete laalo uyie» yituse.

15Iseno, «Ayiddaanna'ya adhoottati ajjeennahe, qolte xaano beetti'ya abbinoe inkoye adhattara kaitta?» yituse. Raaheelino, «Inkoyete laalo uyittaero techo hashsha Yaiqoobi ate ledo galara dandaanno» yituse.

16Hatte hawarro Yaiqoobi loosuwiinni higanni hee'reennanni Liya fulte, «Beetti'ya inkoyenni baaxxoommahe daafira, techo anewa galatto» yitusi. Isino hakko hashsha ise ledo gali.

17Maganu Liya huuccattono macciishsheenna, Yaiqoobira ontikkiha labbaa beetto iltusi. 18Iseno, «Borojjicho'ya ayiddaanni'yara oomma daafira Maganu ba'raa'ra uyinoe» yite su'ma Yisaakoori#30:18 Yisaakoori yaa Ibiraawootu afiinni ba'raa'ra woy baatooshshe yaate. yite fushshitusi. 19Liya ledde godobbe Yaiqoobira leelkiha labbaa beetto iltu. 20Iseno, «Maganu dancha ba'raara uyinoe; lee labballo iloommasi daafira xaate ayiddaani'yano ayirrisannoe» yite, su'ma Zaabilooni#30:20 Zaabilooni yaa Ibiraawootu afiinni ayirrinye woy afansha yaate. yite fushshitusi. 21Hakkunni gedensaanni meya beettono ilte su'ma Diina yite fushshituse.

22Qoleno Maganu Raaheeli towate, huuccattoseno macciishshe, iltanno gede assise. 23Iseno godobbe labbaa beetto ilte, «Maganu saalunni fushshinoe» yitu. 24Qolteno, «Kaaliiqi layinkiha labbaa beetto ledoe» yite, su'ma Yooseefi#30:24 Yooseefi yaa Ibiraawootu afiinni woleno ledoe yaate. yite fushshitusi.

YAIQOOBI JIRO AFI'RINO GARA

25Raaheeli Yooseefi iltuhu gedensaanni Yaiqoobi Laabara, «Xaate ilamoommo gobba ha'reemmo gede assie. 26Lamunku seennikki daafira yee ikke daafuroommota afoottona, insanna ooso'ya adhe ha'reemmona uyie» yii.

27Laabano, «Kaaliiqi ate widoonni hige maassi'rinoeta kulotenni afoommona, ballo anewa hee'ri. 28Daafurikkira eemmohere kulie» yiisi.

29Yaiqoobino, «Ikke soqqamoommohe garanna ani allaalanna saadakki hiitto ikkite qalantinoro afootto. 30Ani daammora albaanni shiima saadalla noohe; techo kayinni lowo geeshsha batidhinohe; ane daanni Kaaliiqi maassi'rinohe; xaate ani mini'yara loosi'ra hasiissannoe» yiisi.

31Laabano, «Maahoyyena, maricho ooheyya?» yee xa'misi.

Yaiqoobino, «Anera woxe uyitootie; ani yeemmoheha mitto coye assittoero, galagale hooffille saadakki allaaleemmo. 32Techo hooffille saadakki giddora e"e ge'reewikki giddonni kolishsho, hacaranna burroota, meikki giddonnino eleellaammanna burroota badeemmo; kuri daafuri'ya waagira ikkona. 33Kunni garinni ammanama'ya albillittete leeltanno; daafuri'ya waaga la"attora daatto woyite, burroota woy eleellaamma ikkinokki me"e afittoro, qoleno koliddaanna ikkinokki ge'reewo afittoro, moorame dayinoho yaate» yiisi.

34Laabano, «Maahoyye yootto gede ikkona» yii. 35Ikkollana hakko barra, burroota meu goccanna eleellaamma goodanna hacara, burrootanna koliddaanna ge'reewo bade oososi allaaltanno gede assi. 36Hakkunni gedensaanni Laaba hooffille saadasi ga'ne 3 barri doogo Yaiqoobiwiinni fafe ha'ri. Yaiqoobino gattinota Laaba saada allaalanni keeshshi.

37Yaiqoobino gowacho, daanshichonna dhoqonote siqquwa fushshi're, siqquwate goga sholoole borreesse seekki. 38Borreesse seekkino siqquwano saada waa aggara dagganno woyite la'anno gede waa toonkanni badiri giddo wori. Saada waa aggara dagganno yannara, 39siqquwa la'anni gocca uurritu; hakkunni gedensaanni, gocca haa're burroota, muraamurrootanna eleellaamma wilii'le qali. 40Yaiqoobi konne wilii'le addinni badi; gattinore kayinni muraamurrootanna koliddaanna Laaba saadara albaanni uurrisi; kunni garinni umisi saada haammachiishi're Laabatewiinni badi.

41Illete biifinorinna misinori gocca uurranno woyite, Yaiqoobi siqquwa albansaanni noo badiri giddo woranno; kunni garinni siqquwate mule hee're gocca haa'ranno. 42Shottino saadara albaanni kayinni siqquwa diworino; kunni garinni shottino saada Laabata ikkitanna jawaata kayinni Yaiqoobita ikkitu. 43Yaiqoobino lowo geeshsha dureessa ikki; lowo me"e, ge'reewo, gaalanna harre, hattono labbaanna meya borojjeno afi'ri.

Currently Selected:

KALAQAMA 30: QulMax

Highlight

Copy