KALAQAMA 28

1Yisihaaqi Yaiqoobi woshshe maassi'rihu gedensaanni, «Kana"aanete seenne adhitooti; 2ka'e amakki anni Beetueeli minira Mesiphexoomiya ha'ri; hakkiinnino amakki rodiita Laaba beetto adhi. 3Wo'manka Dandaanno Magani maassi'rohe; lowo oosono oohe; lowo daga annano assohe. 4Abirihaami maassi'rinte gede atenna sirchokki maassi'rohe; tenne Abirihaamira uyinotanna atino wosinchimma dagge hee'rootto gobba iqqa asse oohe» yiisi.

5Kunni garinni Yisihaaqi Yaiqoobi ha'ranno gede assi; Yaiqoobino Mesiphexoomiyaho hee'rannohuwa Laabawa ha'ri; Laaba Yaiqoobinna Eesawu ama Ribiqara rodooho; annisi Beetueeli Sooriyichaho.

EESAWU WOLE GALTE ADHI

6-7Yisihaaqi Yaiqoobi maassi'rinosita, seenne adhara Mesiphexoomiya soyinosita, maassi'risi woyiteno, «Kana"aani seenne adhitooti» yiinositanna Yaiqoobino annisinna amasi yitinota macciishshe Mesiphexoomiya ha'rinota buuxi. 8Kunni garinni Eesawu, annisi Yisihaaqi Kana"aanootu seenne baxannokkita afi. 9Kunnira mine noosi seenni aana lede Abirihaami beetti Ismaeeliwa mare beettosi Mahileeti adhi; ise Nebayooti rodooti.

YAIQOOBI BEETELI HEE'RE HAAQII'RINO HAAQEE

10Yaiqoobi Bersaabehinni Kaaraani ha'rara kai. 11Arrishsho e'uta mitto darga mare fooliishshi'ri; hakkiicho mitto kincho barki're goxi. 12Haaqeete baattotenni kae gordo iillino taqa afi; taqu aanaanni higge Maganu sokkaasine gidditanninna dirritanni no. 13Kaaliiqino aleenni hige uurre, «Ani, annikki Abirihaaminna Yisihaaqi Magani Kaaliiqaati; ateranna sirchikkira ikkitanno gede tenne goxxe nootto baatto eemmohe. 14Sirchokkino baattote shaafi gede asse batiseemmo; soojjaatinna galchimi, aliyyenna wodiidi geeshsha hala'latto; daga baalano atenninna sirchikkinni maassantanno. 15Kune ani ledokki noommo; ha'ratto doogo baalate agareemmohe; galagalche tenne gobba higatto gedeno asseemmohe. Kuloommohere baala wonshammohe geeshsha diagureemmohe» yiisi.

16Yaiqoobino goxanotenni kae, «Anilla diafoommona, halaalinta konne darga Kaaliiqi no» yii. 17Waajjino daafira, «Kuni dargi hiitto waajjishanno! Kuni dargi Maganu mineeti ikkinnina wole di''ikkino; gordo e'nanni waalchi konneeti» yii.

18Yaiqoobi gute kae barki're noo kincho haa're sooddicha asse uurrisi; Maganoho baxxinoha assate aanaho zayite duni. 19Hakko dargira su'ma Beeteli yee fushshi; alba kayinni hakko katami su'mi Loozaati.

20Yaiqoobi, «Ati ane ledo hee'rittoro, tenne ha'reemmo doogora agarittoero, iteemmo sagalenna uddi'reemmo uddano uyittoero, 21anni'ya minirano keerunni qolittoero, ati Kaaliiqi Magano'ya ikkatto. 22Sooddicha asse uurrisoommohu kuni kinchino ate magansi'nanni darga ikkanno; oottoeri baalunku giddonnino tonnunni mitte anga eemmohe» yee Kaaliiqira xano xa'ni.

Currently Selected:

KALAQAMA 28: QulMax

Highlight

Copy