KALAQAMA 16
16
AGGAARANNA ISMAEELI
1Abiraami galte Saarayi ooso di"iltinosi; isera Aggaara yinanniti Gibitsitte borojjicho noose. 2Saarayino Abiraamira, «Kuneeti ileemmakki gede Kaaliiqi hoolinoe; kunnira tenne borojjicho'ya adhi; miteekke ise widoonni ila afi'reemmaha ikkannona» yitusi. Abiraamino Saarayi yitinota macciishshe baxi. 3Abiraamino Kana"aani Gobbara 10 diro hee'rihu gedensaanni, Saarayi Gibitsitte borojjichose Aggaara haadhe ayiddaannisera Abiraamira galte assite uyitusi. 4Abiraamino Aggaara adhi; iseno godobbu; godobbuta affuhu gedensaanni naaxxite mootittese Saarayi mishshuse.
5Saarayino Abiraamira, «Tini beebba atera iillitohe; ise atera oommaheti aneeti; ise kayinni godobbanni heedhenni ane mishshinoena, aterenna anere Kaaliiqi yoo» yitusi.
6Abiraamino Saarayira, «Kuneeti borojjichokki angakki no; hasi'ritta gede assi» yiise. Hakkunni gedensaanni Saarayi shetisseennase Aggaara fulte ba'u.
7Kaaliiqi sokkaasinchino halallitte gobbara wayi buicho mule afise; buichono Suurira massitanno doogo aana no. 8Sokkaasinchuno, «Saarayi borojjicho Aggaara! Maminni dayitta? Mamira hadhanni nootta?» yee xa'mise.
Iseno, «Ani mootitte'ya Saarayiwiinni fule ba"anni noomma» yitusi.
9Kaaliiqi sokkaasinchino, «Galagalte mootittekkiwa higi; marte ise anga hee'ri» yiise. 10Qoleno, «Sirchokki lowo geeshsha batiseemmo; batinyunni kainohunni ayino kiirannokkiha ikkanno. 11Kuneeti, godowoottaha labbaa beettono ilatta; Kaaliiqi dadillunnita wi'lakki macciishshinohe daafira, su'masi Ismaeeli#16:11 Ismaeeli yaa Ibiraawootu afiinni Kaaliiqi macciishshanno yaate. yaatta. 12Isilla kayinni baandeelu harrichi gedeeha ikkanno; manna baala giwanno; mannuno iso dibaxanno; isino fiixasi giwe baxxe hee'ranno» yii.
13Aggaarano, «La"annoe Magano ille'yanni afe lubbotenni hee'rummanni?» yite, coyi'rinose Kaaliiqiha su'ma, «Eelirooi»#16:13 Eelirooi yaa Ibiraawootu afiinni la"annoe Magano yaate. yitu. 14Kunnira hattenne wayi bale, «Bieeri Lahayi Rooi» yini. Iseno Qaadesinna Bareedi mereero noote.
15Aggaarano Abiraamira labbaa beetto iltusi; Abiraamino Aggaara iltinosi beettira su'ma Ismaeeli yee fushshi. 16Aggaara Abiraamira Ismaeeli iltu yannara Abiraami 86 diri manchooti.
Currently Selected:
KALAQAMA 16: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
