KALAQAMA 17
17
BARCIMA GONDOORU MALAATE IKKITINO GARA
1Abiraamira 99 diro ikkisi yannara Kaaliiqi leellesi, «Ani Wo'mankare Dandeemmo Maganootina, ane ledo qaafi; wo'ma woyite dancha coye assi. 2Gondooro'yano atenna ane mereero woreemmo; lowo geeshsha batiseemmohe» yiisi. 3Abiraamino alba hige gombisame Maganoho kumbuuli. Maganuno, 4«Kuneeti ate ledo gondooro e"eemmo; lowo gosa anna asseemmohe. 5Lowo gosa anna asseemmohe daafira, techo ka'a su'mikki Abiraami yaa agurreenna Abirihaami#17:5 Abirihaami yaa Ibiraawootu afiinni «Lowo manni anna» yaate. ikkanno. 6Lowo geeshsha batiseemmohe; lowo gosano asseemmohe; mootoollano atewiinni fultanno.
7«Atenna ane mereero, ate gedensaannino sirchikki ledo gondoori'ya soorramannokki gede asseemmo; ateranna ate gedensaanni sirchikkira Magano ikkeemmo. 8Wosinchimma hee'rattota Kana"aani Gobba baala, geedote ikkitanno gede ateranna ate gedensaanni sirchikkira eemmo; insarano Maganonsa ikkeemmo» yiisi.
9Maganu qole Abirihaamira, «Atinna ate gedensaanni daannohu sirchikki ate ledo eoommo gondooro hegere geeshsha agadhe. 10Anenna ate mereero, ate gedensaannino sirchikki mereero agadhitinanni gondoori kunninni aane nooho: Ki'ne ledo hee'rannohu labbaahu baalu barcimo. 11Anenna ki'ne mereero noo gondoorira malaate ikkanno gede barcintinanni. 12Settu barri qaaqqi barcimona; mine ilaminohu woy gobbanni woxunni hirre abbinoonnihu labbaahu baalu barcimona. 13Minekki ilaminohu, woxunni hirroonnihuno gatikkinni barcimona. Kunni garinni bisi'nera hee'ranno malaati hegerera gondooro ikkanno. 14Barciminokkihu baalu, gondooro'ya diigino daafira, fiixisiwiinni badame ho'lo» yiisi.
15Maganuno Abirihaamira, «Galtekki su'ma Saarayi yitooti; techo ka'a su'mise Saara#17:15 Saara yaa Ibiraawootu afiinni mootete beettooti yaate. ikkona. 16Maassi'reemmose; qoleno isewiinni labbaa beetto eemmohe; maassi'reemmose; gosate amano asseemmose; ilase giddonni mootoolla fultanno» yiisi.
17Abirihaamino alba hige gombisame kumbuuli; oso'le kae wodanisinni, «100 diro ikkino manchi halaalinta ooso ilannoni? 90 diro ikkinoseti Saarano iltannoni?» yii. 18Abirihaamino Maganoho, «Ismaeeli maassidhe ragi'rannoe gede assoottoero woyyate» yiisi.
19Maganuno, «Dee'ni! Addaho galtekki Saara labbaa beetto iltannohe; su'masino Yisihaaqi#17:19 Yisihaaqi yaa Ibiraawootu afiinni oso'lanno yaate. yite woshshatto; isi gedensaanni sirchisira hegerera ikkanno gede gondooro'ya isi ledo e"eemmo. 20Ismaeeli daafira yoottoreno macciishshoommo; isono maassi'reemmosi; lowo ila eemmosi; sirchosino lowo geeshsha batiseemmo; 12 roorrooti anna ikkanno; sirchosino jawa gosa asseemmo. 21Gondooro'ya kayinni daanno diro tenne yannara Saara iltannohehu Yisihaaqi ledo e"eemmo» yiisi. 22Maganu Abirihaami ledo hasaawa gudihu gedensaanni agure ha'ri.
23Abirihaamino beettosi Ismaeeli, minesi ilantino borojjenna, woxunni hidhinore baala, maatesi baala Maganu yiino gede hakko barra barcimshiishi. 24Abirihaami barcimi yannara 99 diri manchooti. 25Beettisi Ismaeelino barcimi yannara 13 diri beettooti. 26Abirihaaminna beettisi Ismaeeli mitto barra barcintino. 27Mine ilantinorinna gobbanni woxunni hirroonniri labballu baalu isi ledo barcintu.
Currently Selected:
KALAQAMA 17: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
