KALAQAMA 18
18
SASU WOSINI ABIRIHAAMIRA ABBINO SOKKA
1Mitte soodo barru taalootira Abirihaami dukkanu waalchira ofolle hee'reenna, Kaaliiqi Memire haqqe qullaawate mule leellisi. 2Haxo gotti yee la"anno woyite, sasu manni uurre nooha afe, haa'ransara dukkanu waalchinni kae dodi; alba hige gombisame keere haa're, 3«Mooticha'ya ballo eeggatena, baxittoeha ikkiro, ane borojjichokki agurte sa"attoekki gede huucci'reemmohe. 4Lekka hayishshidhinanniha shiima waa abbina'ne geeshsha, kunni caalira fooliishshidhe. 5Qae'ya daggininka woyite, shiima sagale abbeenna'ne ittine, wolqa assidhine hakkunni gedensaanni hadhinannina» yiinsa.
Insano, «Maahoyyena, hedootto gede assi» yitusi.
6Abirihaamino Saarawa dukkanu giddora rahe mare, «Rakke mitto saffe ikkitannota fila bullee haadhe liisse tima gani» yiise. 7Isino saadanniwa mare lowo geeshsha hardino siito haa're, soqqamaanchisira ee, rahe gorre qixxeessanno gede assi. 8Geintonna iibbado ado maalu ledo wosinaho haa're abbi; Abirihaami haqqichote woroonni albansaanni uurre soqqamanna ittu.
9Insano, «Galtekki Saara hiikkiicho no?» yite xa'mitusi.
Isino, «Hakko dukkanu giddo no» yiinsa.
10Wosinisi giddonni mittu, «Daanno diro techonte gede atewa galagale higeemmo; galtekki Saara qaaqqo afidhanno» yii. Saarano dukkanu waalchira Abirihaamira badheenni heedhe konne coye macciishshitu. 11Hatte yannara, Abirihaaminna Saara lowo geeshsha geedhe no; Saararano ilate diri sae noose. 12Kunnira, Saara wodanisenni, «Halaalinta geedhummahu gedensaanni labbaahu ledo xaadammara dandeemmani? Ayiddaanni'yano horonta geedhino» yite oso'litu.
13Kaaliiqino Abirihaamira, «Saara, ‹Halaalinta geedhummahu gedensaanni ileemmani?› yite mayira oso'litu? 14Halaalinta ani Kaaliiqi dandeemmokkiri nooni? Daanno diro techonte gede atewa higeemmo; Saarano qaaqqo afidhanno» yiisi. 15Saarano waajjitinohura, «Dioso'loomma» yite morontu. Isino, «Dee'ni, oso'loottalla» yiise.
ABIRIHAAMI SODDOOMU DAAFIRA EEGAMI
16Mannuno hakkiichinni kae, Soddoomu widira alba wodhi; Abirihaamino geegiissinsa. 17Kaaliiqino, «Ani asseemmore Abirihaamira maaxeemmoni? 18Abirihaamino halaalinta jawanna wolqaataame gosa ikkanno; gobbate aana noo manni baalu isi widoonni hige maassamanno. 19Keeraanchimmanna sumbe assatenni Kaaliiqi doogo agadhitanno gede oososinna insa gedensaanni dagganno ilama baala rosiisara dooroommosi; hatto assituro, Abirihaamira coyi'roommo coye baalanka wonsheemmo» yii.
20Kaaliiqino, «Soddoomunna Gomooru bunshenni kainohunni raaranno manni raare lowo geeshsha batidhino; cubbinsano quwa saino. 21Hanni anewa iillitino raare addahoronna dharahoro la"ammora dirreemmo» yii.
22Lamunku manchi Soddooma higge hadhu; Kaaliiqi kayinni Abirihaami ledo uurre gati. 23Abirihaamino isiwa shiqqi yee, «Halaalinta keeraancho cubbaataammu ledo hunattoni? 24Katamu giddo 50 keeraano heedhuro halaalinta baalanka hunattoni? Katama 50 keeraano giddo noote daafira yite dimaaratto? 25Keeraano cubbaataammu ledo shaatto yee dihedeemmo; keeraano cubbaataammu gede diassatto; hatto assittoro keeraano cubbaataammu ledo qorichishakkiiti; gobba baalate gashshaanchi ati hattoo coye assattoni?» yii.
26Kaaliiqino, «Soddoomu Katami giddo 50 keeraano afi'rummoro insa daafira yee katama gatiseemmo» yii. 27Abirihaamino daware, «Ani bukonna buluulo ikkoommohu ate Mootichi'ya ledo hasaawa wonaa hanafoommona hanqitootie. 28Ontawu keeraano giddonni 5 xeiro, katama baala 5 xeino daafira hunattoni?» yii.
Kaaliiqino, «45 afi'rummoro dihuneemmo» yii.
29Abirihaamino, «Miteekke hakkiicho 40 callu heedhurona?» yee xa'mi.
Isino, «40 daafira yee gatiseemmo» yii.
30«Mooticha'ya xaano coyi'reemmona hanqitooti; miteekke hakkiicho 30 heedhurona?» yii.
Isino, «Hakkiicho 30 afi'rummoro, insa daafira yee katama gatiseemmo» yii.
31Abirihaamino qole, «Kuneeti ate Mootichi'ya ledo coyi'ra wonaa hanafoommona hanqitootie; miteekke hakkiicho 20 heedhurona?» yii.
Isino, «Hakkiicho 20 heedhuro insa daafira yee katama dihuneemmo» yii.
32Abirihaamino, «Tenne mitte hige calla coyi'reemmona Mooticha'ya hanqitootie; miteekke hakkiicho 10 heedhurona?» yii.
Isino, «10 heedhuro, insa daafira yee katama dihuneemmo» yii. 33Kaaliiqino Abirihaami ledo hasaawa gudihu gedensaanni ha'ri. Abirihaamino minisira higi.
Currently Selected:
KALAQAMA 18: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
