KALAQAMA 14
14
ABIRAAMI LOOXI QAFADAMINOHA GATISI
1Hatte yannara, Baabilooni moote Amiraafeeli, Elaasaari moote Ariyooki, Elaami moote Kedoorilaomeeri, Goyimi moote Tidaaliiti; kuri shoolunku moote, 2woloota onte moote qassara hadhu; gaande marriri ontunku mootoolla: Soddoomu moote Beeraai, Gomooru moote Birshai, Adaama moote Shiniaabi, Tseboyimi moote Shemebeerinna Zooaari yinanni gobba moote Beelaiiti. 3Kuri ontunku moote mitteenni Maxinete Baarira Sidiimi Lagichira olaho xaaddu. 4Kuri ontunku mootoolla 12 diro Kedoorilaomeeri gashshinoreeti; tonaa sayikki diro kayinni, isi aana gibbo kayissu.
5Tonaa shoolki diro Kedoorilaomeerinna isi ledo namoontino mootoolla olantonsa ledo dagge Refoota Ashitirooti Qarinayimi, Zuuzoota Haami, Eemoota Shaweqiriyatayimi Xawira qeeltu. 6Hoori mannano ilaalaame Seiiri Gobbara qeeltunsa; molo baatto mule noo dargi Elfaraani yinannihu geeshsha shorritunsa. 7Hakkiinni higge, Qaadesi yinanniwa daggu; hatte yannara hakko dargi su'ma Eyinimishipaaxi yinanni. Amaaleqootu gobba baala amaddu; Hazezooni-Tamaari heedhanno Amooraawootano qeeltu.
8Hakkunni gedensaanni Soddoomu, Gomooru, Adaama, Tseboyiminna Beelai mootoolla olantonsa Sidiimi Lagichira dirte olantu. 9Olantinohuno Elaami, Goyimi, Baabilooninna Elaasaari mootoolla ledooti; ontenti mootoolla shoolente mootoolla ledo olantinohu kunni garinniiti. 10Sidiimi Lagichira suwete balla wo'mitino; kunnira, Soddoomunna Gomooru mootoolla olu giddonni xooqqe fultara wo'naa'ltanni heedhe ballate giddo ubbu; gattinori sasu mootoolla kayinni ilaallate widira higge xooqqu. 11Shoolenti mootoolla Soddoomahonna Gomooraho noore baala, sagale nafa gattukkinni gudhite adhite hadhu. 12Soddoomaho hee'rannoha Abiraami rodii beetto Looxi qafadde, jajjasi baalankano adhite hadhu.
13Ikkollana, mittu manchi xooqanni daye ikkinore baala Ibiraawichaho Abiraamira kulisi; hatte yannara, Abiraami Amooraawichu Memire odahe qullaawate mule hee'ranno. Memire, roduuwisi Eshikoolinna, Aneeri Abiraamira olu garooti. 14Abiraami rodiisi beetti qafadaminota macciishshe, minesi ilantinore ola egentinore 318 manna qodhisiise, shoolenta moote faana gane Daani geeshsha ha'ri. 15Hakkiicho manna gaamo gaamo asse beehe diinnasi ledo hashsha olame qeeli; Demaasiqora aliyyeenni noohu Hooba yinanniwi geeshsha shorrinsa. 16Adhaminore baalanka galagalche qoli; rodiisi beetto Looxino jajjisi ledo daware abbi; isi ledo haa're abbinonsari qafadaminohu wolu meentinna labballuno no.
MELKETSEDEQI ABIRAAMI MAASSI'RISI
17Abiraami Kedoorilaomeerinna ledonsa noo mootoolla qeele higanna, Soddoomu moote, Mootete Lagicha yinannihuwa Shaweehi Lagichira haa'rasira shiqi. 18Wo'munkura Aliidi Magani qeesichi Saaleemi moote Melketsedeqi Abiraamira sagalenna woyinete xajje abbisi. 19Abiraami maassi'rannisi, «Gordonna baatto kalaqinohu Wo'munkura Aliidi Magani maassi'rohe; 20diinnakki qeelatto gede assinohehu Wo'munkura Aliidi Magani galatamo» yii. Abiraamino qafade abbino jajji baalunku giddonni tonnunni mitte anga Melketsedeqira uyisi.
21Soddoomu moote Abiraamira, «Qafadde adhootto jajja baala umikkira gatisidhe, manna'ya kayinni qolie» yiisi.
22Abiraamino, «Gordonna baatto kalaqinohu Wo'munkura Aliidi Magani Kaaliiqi afanna, 23‹Abiraami ani duroonsoommosi› yaattokki gede wolu gateenna mitto heqicha woy koattete usuraancho nafa ikkiro atere mittoreno diadheemmo. 24Ane manni itinohanna ane ledo hadhinori garo'ya Aneeri, Eshikoolinna Memire adhitanno qeecha agurranna ani mittoreno diadheemmo» yiisi.
Currently Selected:
KALAQAMA 14: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
