KALAQAMA 13
13
ABIRAAMINNA LOOXI BABBAXXITU
1Abiraami galtesinna noosi jajja baalanka adhe Gibitsetenni fule Negebi ha'ri; Looxino ledosi ha'ri. 2Abiraami saada, birranna culka afi'ratenni lowo geeshsha dureessa manchooti.
3Negebinni kae, dargunni darga sa"anni Beeteli mari; Beetelinna Gayi mereero noo darga iilli; kuni dargi kunni albaanni dukka'ne ofollinowaatinna, 4kakkalote darga seekkinowaati. Hakkiichono Kaaliiqiha qullaawa su'ma gane magansi'ri.
5Abiraami ledo ha'ranni noohura Looxira ge'reewu, meu, lalu, dukkanna, umisi maatenna soqqamaasine noosi. 6Abiraamiranna Looxira lowoti saadate hoshsha noonsahuranna hosiisidhanno dargi ruukkinonsahura mitteenni heedhara didandiitino. 7Kunninni kainohunni Abiraami allaalaasinenna Looxi allaalaasine mereero gibbo kalaqantu; hatte yannara hattenne gobbara heedhannori Kana"aanootahonna Ferizootaho.
8Hakkunni gedensaanni Abiraami Looxira, «Ninke roduuwaho; anenna ate mereero, allaalaasine'yanna allaalaasinekki mereero gibbo ka"a dihasiissanno. 9Kunni daafira, badamme hee'nummoro woyyanno; baattotenni hasi'ritto widiido doodhi; ati gura widiido adhittoro, ani qiniitira hige ha'reemmo; ati qiniiti widiido adhittoro, ani gura widira hige ha'reemmo» yiisi.
10Looxi la"anno woyite, Yordaanoosi Lagi gaangaawira noo gobba baala wayi wo'minota ikkase afi; Kaaliiqi Soddoomanna Gomoora hunara albaanni, Zooaari geeshsha, gobba Kaaliiqi Gannate gede Gibitsete Laga labbannote. 11Kunnira, Looxi Yordaanoosi gaangaawira noo gobba baala doodhe, soojjaatira hige ha'ri; kunni garinni mimmitinsawiinni baxxitu. 12Abiraami Kana"aani Baattora hee'ri; Looxi kayinni lagaho noo katamma mereero hee'ri; Soddooma iilla geeshsha dukkanasi dargunni darga soorri. 13Soddoomu manni kayinni lowo geeshsha bushahonna Kaaliiqi giwanno coye assannoho.
ABIRAAMI KEBIROONI HA'RI
14Looxi baxxihu gedensaanni Kaaliiqi Abiraamira, «Nootto darga heedhe aliyyeranna wodiidira, soojjaatiranna galchimira higge lai. 15La"atto gobba baala ateranna sirchikkira geedonnita asse eemmohe. 16Sirchokki baattote shaafi gede asse batiseemmo; baattote shaafa kiira dandaannohu hee'riro, ate sirchono kiira dandiinanni. 17Xa ka'e atera eemmohe baatto aana ka'anna kawa ha'rante, seendillesenna hala'linyesi lai» yiisi.
18Abiraami dukkannasi diige, Kebirooni qullaawanniwa Memire odahewa mare hee'ri; hakkiichono Kaaliiqira kakkalote darga seekki.
Currently Selected:
KALAQAMA 13: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
