KALAQAMA 12
12
ABIRAAMI WOSHSHAMA
1Kaaliiqi Abiraami, «Gobbakki agurte, fiixikkinna ayiddikkiwiinni baxxite, ani leellisheemmohe gobba ha'ri» yiisi.
2Wolqaataame gosa asseemmohe; maassi'reemmohe; su'makki egennaminoha asseemmo; wolootahono maasso ikkatto; 3Maassidhannohere maassi'reemmo; runtannohere rumeemmo; baattote aana heedhanno daga baalanti ate widoonni higge maassantanno.
4Abiraami Kaaliiqi kulinosinte gede, Kaaraaninni fule ha'ri; isi hatte yannara 75 diri manchooti; Looxino ledosi ha'ri. 5Abiraami, galtesi Saarayinna rodiisi beetti Looxi Kaaraani heedhe afidhino jajjanna soqqamaasinensa baala adhite Kana"aani gobba hadhu. Kana"aani iillitu yannara, 6Abiraami Sekeemi nootewa More haqqicho qullaawanniwa iilla geeshsha ha'ri; hatte yannara Kana"aanootu hatte gobbara heedhanno. 7Kaaliiqi Abiraamira leelle, «Tenne baatto sirchikkira eemmohe» yiisi. Kunnira, Abiraami leellinosi Kaaliiqira hakko darga kakkalote darga seekki. 8Hakkiinnino kae, Beeteli Katamira soojjaatoonni ilaalaame gobba fuli; Beeteli galchimira, Gayi Katama soojjaatira qole agure dukkana dukka'ni; hakkiicho kakkalote darga seekke Kaaliiqiha qullaawa su'ma gane magansi'ri. 9Dargunni darga sa"anni Negebi#12:9 Negebi yaa Ibiraawootu afiinni, wodiidi gobba yaate. dayi.
ABIRAAMINNA SAARAYI GIBITSETE GOBBARA
10Kana"aani Gobbara hude ubbu; hude wolqissuta Abiraami hudete yanna hakko sayisara yee Gibitse ha'ri. 11Abiraami Gibitse iilla rahi yannara, galtesi Saarayira, «Ati lowo geeshsha xuma ikkoottata afoommo. 12Gibitsootu ate affanno yannara, ‹Tini galtesiiti› yite ane shitannoe; ate kayinni lubbotenni hee'rattara agurtannohe. 13Kunni daafira, atenni kainohunni lubbotenni hee'reemmo gedenna dancha illenni la'annoe gede, ‹Ani rodoosiiti› yiinsa» yiise.
14Gibitse e'u yannara, Gibitsootu Abiraami galte lowo geeshsha xuma ikkitinota affu. 15Feriooni ledo gashshaano xumillese affe, Ferioonira kultu; iseno mootete minira haadhe massitu. 16Isenni kainohunni Gibitsete moote Abiraami dancha illenni laisi; kunnira ge'reewo, me"e, lalo, harre, gaala, meyanna labbaa soqqamaasine uyisi.
17Ikkollana, Abiraami galte Saarayinni kainohunni Kaaliiqi Feriooniranna minisi manni baalaho shetisanno dhibba soyi. 18Hakkunni gedensaanni, Feriooni Abiraami woshshiishe, «Togo mayira assittoe? Saarayi galtekki ikkitinota mayira kula hoogittoe? 19Rodoo'yaati yite galte'ya assi're mini'yara adhe ha'reemmo gede mayira assittoe? Galtekki kuneetina, haadhe fulie!» yiisi. 20Moote roorrootisira hajajo uyi; insano hajajinonsa garinni Abiraaminna galtesi jajjisi baalunku ledo gobbatenni fushshitunsa.
Currently Selected:
KALAQAMA 12: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014