Luki 21

Pokuurɛ bo'olum

(Maki 12.41-44)

1Ti Yezu nyɛ ti buntateba tara ba bo'olum kina ita bo'olum pi'ɔ la puan, 2ti a nyɛ ti pɔkɔ-naha tari a lagekɔba ayi' ta iŋɛ pi'ɔ la puan. 3Ti a yeti, “N yeti ya la yelemɛŋerɛ wa, pɔkɔ-naha wa en bo' gana ba za'a. 4Se'ere en sɔi la, bana woo yehe la sɛla ba tarega la puan bo', gee eŋa la a nɔŋɔ la za'a, a bo' la en tari sɛla za'a wan di ni en bala.”

Yezu ti'ele yele pu'uhegɔ yire la gbiregeri yele

(Matu 24.1-2; Maki 13.1-2)

5Nɛreba basɛba en tɔgeri pu'uhegɔ yire la yele, ban gulɛ ku se'em la kuga suma, la bo'olum sumɔ sebo taaba ti nɛreba tara bɔ'ɔra Yinɛ ku puan la. Ti Yezu yele ba yeti, 6“Lɔgetuna wa woo ti ya nyɛta wa, dabeha kini na, ti kugere kan gee paga de tadaana zuo. Ba wan gbirege ba za'a sige tiŋa.”

Saŋa daalehum la namehegɔ

(Matu 24.3-14; Maki 13.3-13)

7Ti nɛreba la soke en yeti, “Pa'ala, ŋwani ma'a ti yele dina wan iŋɛ, la daalehum boni n wan pa'alɛ ti yele wa pɔri?” 8Ti a yele ba yeti, “Mini ya suŋa ti se'em da pã'ahɛ ya. Se'ere en sɔi la, nɛreba zo'e zo'e wan wa'am mam yu'urɛ puan na yeti, ‘Mam n de en.’ ‘Sankana wa pɔri mɛ.’ Da dole ya ba poore.

9“Ya han ta wuna pɛntɛrɛ yɛla la gbiregeri yɛla, da bahɛ ya ti ya paleŋa ɛgera, Se'ere en sɔi la, yele ana woo wan ba'ahum iŋɛ yia, gee ba'ahegɔ saŋa la kɔ'ɔm kan tagelɛ yele aŋa pooren.” 10Ti a nyaa yele ba yeti, “Tiŋa wan ihege zabera la tiŋa, ti sɔ'ɔlum ihege zabera la sɔ'ɔlum. 11Tinmiiŋo kãra wan wa'am na, ti zi'ihi sise'ehi me kom pɛɛlega la bã'ahi kãra me lu. Palen-ɛka yɛla la daalehum kãra wan zɛ'ɛta saazuo wa na.

12“Gee ti yele ana wa za'a wan pɔhɛ la, ba wan pɔhɛ nyɔgɛ ya, namehɛ ya, gee dikɛ ya tihɛ ba zamehegɔ yiya puan la paka deto puan. Ba wan tari ya ta ze'ele naduma la timbihereba nɛheduma nɛŋan mam yu'urɛ wa zuo. 13Ŋwana wa wan dɛna fole yu'ɛ bo' ya ti ya muulɛ mam yele. 14#Luk 12.11-12 Bala, da maahum ya puti'ira ti ya te'ele ta gu' ya mɛhi, 15se'ere en sɔi la, mam mɛŋa wan ta bo' ya yelesɛ'a la yɛm sebo ti ya dinduma la kan ta'am ze'ele la ya bii tɔgɛ nyaŋɛ ya. 16Dɔgereba, la ya suurɔ, la yireduma, la ya zɔduma wan pun ta koohe ya tihɛ, ti ba ku ya sɛba. 17Nɛreba wan yaaɛ ya za'a mam yu'urɛ wa zuo. 18Gee ya zuo zonko la kuyina me kan bahɛ bɔregɛ. 19Ya ŋmibega puan ti ya sɛɛhi wan nyɛ faarɛ.

Yezu ti'ele yele Yerusalɛm tiŋa sageŋɔ yele

(Matu 24.15-21; Maki 13.14-19)

20“Ya han ta nyɛ ti pɛntiireba kaaɛ Yerusalɛm tiŋa wa mum, mini ya ti Yerusalɛm sageŋɔ la pɔri. 21Bala, yamam sɛba en boi Yuda tiŋa la, zɔ zom zɔya zuto, ti sɛba en boi tiŋa puan la, me bahɛ ka, ti sɛba n boi yiŋa ha me da kɛ̃ ka puan na. 22#Hoz 9.7 Se'ere en sɔi la, dabeha ana dela leregere dabeha, ti la doohe gulehegɔ la en gulehɛ yele se'em la. 23Yele boi pɔgepuuhi duma, la sɛba en tari kɔmbilɛɛhi ti ba mɔgera zuo, dabeha ana puan. Se'ere en sɔi la, Yinɛ wan bahɛ ti susagekãtɛ sige tiŋa wa zuo, ti a sunsunyiim taaɛ bahɛ nɛreba wa zuo. 24Su'a wan kɔrum ba, gee ti ba nyɔgɛ basɛba tari kiŋɛ ti ba dɛna da'aba tihi zo'e zo'e puan, gee ti nɛresɛba en ka dole Yinɛ wan nɛ Yerusalɛm tiŋa wa taalɛ tiŋa, gura ti sɛba en ka mi' Yinɛ la paŋa saŋa la ta wa'am na tum ba'ahɛ.

Asaala Dayua lɛbega saŋa

(Matu 24.29-30; Maki 13.24-27)

25 # Aza 13.10; Yɛh 32.7; Yow 2.31; Lil 6.12-13 “Daalehum wan ta bɔna yintule wa puan, ŋmarega wa puan la ŋmarebibehi puan. Tiŋa wa zuo, daalehum la wan ta dɛna la susageŋɔ en wan paaɛ tihi doohe la tihi n wan tulum ba mɛhi se'em doohe la ateko ko'om wa dameŋa, la bu ko'mi'ihi. 26Nɛreba wan lige la dabeem, doohe la ban nyɛ sɛla n ze'ele saazuo sigera ba zuo na la. Se'ere en sɔi la, saazuo wa ha pahi la han ta yeti la miim mɛ. 27Bilam ti ba nyaa wan nyɛ ‘Ti Asaala Dayua boi sagbanɛ zuo sigera na,’ la paŋa la suŋa kãtɛ. 28Yele ana wa han ta pɔhɛ itegɔ, ihege ya saazuo la ya gɔra biha saazuo, se'ere en sɔi la ya ayɔto'e la pɔri na.”

Zamehɛ yɛm Kinkaŋa puan

(Matu 24.32-35; Maki 13.28-31)

29Ti a nyaa yele ba makerɛ yeti, “Bihɛ ya kinkaŋa wa la tiihi wa za'a. 30Ba han ni ta puhera vɔpaala, ya mɛhi wan nyɛ ge mina ti siiɔ pun paaɛ mɛ n bala. 31Bala mɛa, ya han ta nyɛta ti yele ana iti, ya mina ti Yinɛ sɔ'ɔlum la pɔri na. 32N yeti ya la yelemɛŋerɛ wa, ti zina beere nɛreba wa kan ba'ahɛ gee ti yele ana wa wa'am na tum. 33Saazuo la tiŋa wan ba'ahɛ, gee mam yelehum wa kan malum ba'ahɛ.

Bihega kã'aŋɔ

34“Gurɛ ya ya mɛhi suŋa, han dagena bala ya suya wan tibegɛ la nyɛlumkãra la buka la vom wa puti'ira ti daandina wa la ta wa'am na di'e ya wuu bɛregɔ. 35Se'ere en sɔi la dabedina wa wan sige se'em woo en boi timpaberɛ wa zuo za'a. 36Bala, maahum ya ya mɛhi saŋa woo, Pu'uheri ya ti ya wan tara paŋa nyaŋɛ piiɛ yele ana wa woo n wan iŋɛ la, gee ta'am ze'ele Asaala Dayua la nɛŋan.”

37 # Luk 19.47 Daare woo Yezu ni bɔna la pu'uhegɔ yire la puan pa'ala, gee ti yu'uŋɔ woo ti a ni yehe kiŋɛ ta bɔna zoore se'ere ti ba yi'ira Olive Zoore la zuo. 38Ti nɛreba la za'a ni ihege bulika yu'uŋɔ yu'uŋɔ, kiŋɛ pu'uhegɔ yire la puan ti ba ta kelehe a yetɔgum la.

Currently Selected:

Luki 21: GBTP

Highlight

Copy