Luki 20

Ba soke Yezu a paŋa la yele

(Matu 21.23-27; Maki 11.27-33)

1Daarɛ deyima ti Yezu pa'ala nɛreba pu'uhegɔ yire la puan, gee yɛta ba faarɛ yelehum la, ti malema kiinduma la, la gɔnmi'ineba la doohe la yizuto kima la wa'am a zi'an na, 2yele en yeti, “Yele tu, beni paŋa ti fum tara tuna tuun-ana wa? Ani en bo' fum sore?” 3Ti a lebehe ba yeti, “Mam me wan soke ya sokere ti ya lebehe mam. 4Yɔn ko'om sua la ti a daa sɔɔra la yehe la saazuo ze'a na bii asaala zi'an?” 5Ti ba lebe ta suhɛ la taaba yeti, “Tu han yeti, ‘Bu ze'ele la saazuo na,’ a wan soke tu nyaa, ‘Beni ti tu daa ka sakɛ bo' en?’ 6Tu me han yeti, ‘Bu ze'ele la asaala zi'an na,’ nɛreba wa woo en ze' wa wan lobe tu la kuga. Se'ere en sɔi la bamam woo mi suŋa suŋa ti Yɔn dela nɔtɔgeha.” 7Bala ti ba lebe ta yele en yeti, “Bamam ka mi' bu n daa ze'ele zi'an na. 8Ti Yezu me yele ba yeti, “Bala ti mam me kan yele ya se'em en bo' mam sore ti n tuna tuun-ana wa za'a la.”

Puto-yameŋa makerɛ

(Matu 21.33-46; Maki 12.1-12)

9 # Aza 5.1 Ti Yezu pɔhɛ yɛta nɛreba la makerɛ dina yeti, “Buraa n burɛ a tiihi dia va'am, dikɛ bo' bihereba ti ba bihera, gee kiŋɛ tiŋa kayima n zaaɛ ta yuue. 10Ti go'ohego saŋa ta paaɛ, ti a tum a da'aberɛ bihereba la zi'an ti ba to'e a tɔtɛ bo' n na. Gee Bihereba wa en nyɛ va'am daana wa da'aberɛ la wa la, ba nyɔkɛ en mɛ ŋmɛ' gee bahɛ en la nu'bɛɛla ti a lebe. 11Ti va'am daana wa le tum a da'aberɛ ba zi'an, ti ba nyɔkɛ kaŋa me ŋmɛ' gee iŋɛ en sɛla en ka suŋa gee bahɛ en ti a lebe nu'bɛɛla. 12Ti a le kelum tum ta'a daana, ti ba ŋmɛ' eŋa me pɔgelum dige en bahɛ yiŋa. 13Ti va'am daana wa nyaa yele a mɛŋa yeti, ‘Beni ti n nyaa wan iŋɛ? N nyaa wan tum la n mɛŋa dayɔba'arɛ wa, daanse'ere ba wan na'ahɛ eŋa.’ 14Gee sɛba en biheri va'am wa la n ta nyɛ ti va'am daana Wa dayua la kini na la, ti ba sɔhɛ bo' taaba yeti, ‘Se'em en wan ta sooe sɔna la en bala kina na wa. Bahɛ ya ti tu ku en gee ti lɔgerɔ wa nyaa dɛna tumam dinɛ.’ 15Ŋwana ti ba gurɛ en ve'e yehe va'am la yiŋa, ku en. Beni ti va'am daana wa wan dikɛ iŋɛ sɛba en biheri a va'am wa? 16A wan wa'am na sagum sagum bihereba bana wa za'a gee dikɛ va'am la tee bo' basɛba.” Nɛreba la n wum ŋwana la, ba kaahɛ me buki yeti, “Yinɛ da sakɛ ti ŋwana iŋɛ.” 17#Yoo 118.22 Ti Yezu bihɛ ba zii, gee yeti, “Tɔgebuna wa vuurɛ dela deni?

‘Kugese'ere ti mɛteba zagehɛ la,

kugedinɛ mɛa en de ɛ̃berɛ la zuo’?

18Se'em woo en lu kugedina wa zuo wan ŋma zɔra zɔra, kugedina wa me wan mɛrehɛ se'em daana woo ti de lu a zuo.” 19Gɔnmi'ineba la, la malema kiinduma la en baŋɛ ti a makɛ makerɛ dina wa bahɛ la bamam zuo la, ba maahum mɛ ti ba nyɔkɛ en gogo kaareŋa kaŋa puan la, gee zɔ nɛreba la dabeem.

Kuba yua sokere

(Matu 22.15-22; Maki 12.13-17)

20Ti ba lebe pooren ta ana bããlam, gee tum viihereba en ani wuu ba dela nɛresuma a zi'an na, ti ba ta'am bɛ̃rɛ en doohe a nuurɛ yetɔgum puan, ti ba ta'am nyɔkɛ en ta bo' yele gakereba la timbihega kpɛ'ɛnduma la. 21Bala ti nɛrebana wa soke Yezu yeti, “Pa'ala, tu mi' ti sɛla ti fum yɛta bii fum pa'ala, dela ma'a, fum ka lugehe nɛreba tɔgera, gee fum pa'ali la Yinɛ sore la en de se'em la la yelemɛŋerɛ la puan. 22La de sore bo' tu ti tu yɔɔra tu kuba bɔ'ɔra Kaiza bii la dagi de sore?” 23Gee Yezu baŋɛ ba nyaleŋɔ la za'a mɛ, gee yele ba yeti, 24“Pa'alɛ ya mam dinaari, ani zuo, la ani yu'urɛ en boi bu zuo la?” Ti ba yeti, “Kaiza.” 25Ti Yezu yele ba yeti, “Bala, yi dikeri ya sɛla en de Kaiza dinɛ bɔ'ɔra Kaiza, gee dikera sɛla n de Yinɛ dinɛ, bɔ'ɔra Yinɛ.” 26Ba ka nyaŋɛ nyɛ la yeleyinɛ mɛ nɛrekuuŋɔ la nɛŋan ti ba wan ta'am bɛ̃rɛ en la en tɔgɛ se'em la. Ti a lebehego la me iŋɛ ba pakerɛ paaɛ paaɛ, ti ba yari yee suram.

Ihegere sokere

(Matu 22.23-33; Maki 12.18-27)

27 # Tuum 23.8 Ti Sadusii duma, sɛba en yeti ihegere ka boi la, wa'am Yezu zi'an na 28#Tii 25.5 soke en sokere yeti, “Pa'ala, Moose yuum gulehɛ bo' tu yeti, buraa suuɔ han ki gee bahɛ a pɔga ti ka ka tara bia, buraa la suuɔ di pokuurɛ la dɔgɛ kɔma purɛ a suuɔ la yu'urɛ. 29Ŋwana ti suurɔ tuyopɔi bɔna, ti yia daana la di a pɔga, ki gee ka tara bia, 30Ti se'em en tagelɛ la sooe di, 31ti ta'a daana me wa sooe di. La iŋɛ la bala ti ba bayopɔi la di pɔka la soohum, ki gee ka tara bia. 32Ba'ahegɔ za'a, ti pɔka la me ta ki. 33Ihegere saŋa la puan, ba ani n wan ta sɔna pɔka la, gee ti ba bayopɔi la za'a di ka soohum la?”

34Ti Yezu yele ba yeti, “Sɛba en boi vom buna wa puan sankana wa puan la, en diti pɔgeba gee ɛleha pɔgehi. 35Gee sɛba ti ba bihɛ ti ba nari ti ba tara zi'an sansɛka en kini na la, la ihegere saŋa la, kan ta dita pɔgeba bii ɛla sireba. 36Yelemɛŋerɛ, ba kan le ta kiira, se'ere en sɔi la ba ta yeti ba ana mɛ wuu Yinɛ Suŋereba la, dɛna Yinɛ kɔma en yehe, ihegere la puan. 37#Yɛh 3.6 Han le dɛna ihegere la puan, Moose mɛŋa pun pa'alɛ mɛ ti la boi mɛ. Se'ere en sɔi la tuntuo la n wa taaɛ dita bugum la, zi'an ti Moose tɔgɛ a Daana la yele yeti, a dela Aberaham Yinɛ, Aziki Yinɛ la Yakɔbe Yinɛ la. 38Yinɛ me kan ta'am dɛna ki'induma Yinɛ, gee a dela vɔpa Yinɛ. Yinɛ zi'an, ba woo vɔi mɛ.” 39Ŋwana ti gɔnmi'ineba basɛba lebehe yeti, “Pa'ala, fum kɔ'ɔm tɔgɛ la ma'a.” 40Se'ere en sɔi la, sɛba en soke en la ka le tara nuurɛ ti ba le soke en se'ere pa'ahɛ.

Ani en de Deviti Dayua la

(Matu 22.41-46; Maki 12.35-37)

41Ti Yezu nyaa yele ba yeti, “Ŋwani ti ba wan ta'am yeti, Kiresta la dela Deviti dayua? 42#Yoo 110.1 Deviti mɛŋa yele a Yuuma Gɔŋɔ la puan yeti,

‘Daana la yele mam Daana la yeti,

“Zi'ire n zuɔ nu'o wa,

43gura ti n ta bahɛ ti fum dinduma lebege fum nama dafeere.” ’

44Deviti yi' en la a Daana, bala ŋwani ti ba wan yi'ira en Deviti dayua?”

Yezu tɔgɛ gɔnmi'ineba la

(Matu 23.1-26; Maki 12.38-40)

45Ti Yezu yele a zahereba la nɛreba za'a tuban yeti, 46“Mini ya gɔnmi'ineba wa n nɔŋɛ ba ɛɛra kaara la fuwogero wa. Ba nɔŋɛ la nɛreba dɔbeta pu'uha ba da'ahi puan, gee nɔŋɛ ba zi'an nɛheduma kugehi zuto, pu'uhegɔ yiya puan, la nɛŋa duma kugehi zuto de'eŋo kãra puan. 47Ba saari la pokɔpa yiya. Ban boti nɛreba nyɛta ba la zuo, ba pu'uhi la pu'uhi wogero. Ba wan ta to'e sageŋɔ kãtɛ en gani za'a.”

Currently Selected:

Luki 20: GBTP

Highlight

Copy