Luki 19

Yezu la Zakiyɔsi

1Ti Yezu wa'am na kɛ̃ Yeriko tiŋa nyaa kina yɛ'a, 2Ti buraa boi bini ti ka yu'urɛ yi'ira Zakiyɔsi, dɛna kubetɔ'ɔhereba la nɛŋadaana, pãrɛ. 3Ti buraa wa zigera ti ka nyɛ Yezu en de se'em, gee nɛrekuuŋɔ la zuo, a ka nyɛti Yezu, doohe la buraa wa ba' dɛna la nɛre pika a naanɛ puan la zuo. 4Bala ti a zɔ diŋɛ nɛŋa ta zom kinkaŋa zuo ti a nyɛ Yezu, se'ere en sɔi la Yezu dole la bilam tɔla. 5Yezu en wa'am na paaɛ bilam la, a ze'ele mɛ bihɛ tia la zuo ha, gee yele “Zakiyɔsi, Zakiyɔsi, kabelɛ kalam sige na, gee zina, mam kɔ'ɔm yeti n dɛna fum yire saana zina.” 6Ti Zakiyɔsi kabelɛ sige na, ti a puurɛ pee ti a to'e Yezu a yire. 7Ti sɛba woo en nyɛ ŋwana la pɔhɛ gɔgeleŋɔ la ninmu'urɛ yeti, “A ye' ti a ta dɛna la be'em daana wa yire saana.” 8Gee Zakiyɔsi ze'ele la bilam yele Daana la yeti, “Bihɛ n Daana, mam wan puregɛ n lɔgerɔ wa za'a zinzimɔ bo' naheduma, ti se'em me ti n daa pim en sɛla puan, en wan yɔ a daana sugum nuuren bunaahi lebehe bo' en.” 9Ti Yezu yele en yeti, “Zina, faarɛ wa'am yire dina wa puan na, se'ere en sɔi la, buraa wa me dela Aberaham dayua. 10#Mat 18.11 Se'ere en sɔi la, mam Asaala Dayua wa wa'am na ti n yehe ɛ mɛ, la n faaɛ sɛba en bɔregɛ la bahɛ.”

Lagehɔ n bɔregɛ

(Matu 25.14-30)

11 # Mat 25.14-30 Nɛreba la en kelehe ŋwana la, ti a yele ba makerɛ dina wa, en pɔri Yerusalɛm la zuo, la ban me en ti'ihɛ ti Yinɛ sɔ'ɔlum la sunti bu wa'am nananawa na la. 12Ti a yele yeti, “Zuodaana ayima en wa kiŋɛ tiŋa en zaaɛ ti a ta to'e sɔ'ɔlum buyima muŋa bo' a mɛŋa lebena. 13Gee nyaa yi' a da'aba pia na, bo' ba ligekɔba pia, gee yele ba yeti, ‘Tari ya tuna gura ti n ta lebena.’ 14Gee buraa wa tiŋa nɛreba ka nɔŋɛ a yele, gee tum nɛreba a pooren, ti ba ta yele tiŋa la duma yeti, ‘Tumam ka boti buraa kana wa biha tɔ.’ 15Buraa wa en ta lebena la muŋa la, a bo' la nuurɛ ti ba yi' da'aba se'ehi ti a bo' ba ligekɔba la na, ti a baŋɛ ban dikɛ ligeri la tum nyɛ nyuurɔ se'em. 16Ti yia daana la wa'am na yeti, ‘N Daana, fum lagekɔberɛ la tum nyɛ la ligekɔba pia pa'ahɛ.’ 17Ti zuodaana wa yele a da'aba wa yeti, ‘Fu tuuma tuuma, fum dela da'abesuŋa. Beni zuo, fum en de yelemɛŋerɛ daana la lɔgerɔ fii wa la, tara tihi pia bihera.’ 18Ti yi'i daana la me wa'am na yeti, ‘N Daana, fum ligekɔberɛ la tum nyɛ la ligekɔba anuu.’ 19Ti Zuodaana wa yele en yeti, ‘Fum me, tara tihi sinuu bihera.’ 20Ti ayima me wa'am na yeti, ‘N Daana, fum lage kɔberɛ la en ŋwana. Mam daa pɔbɛ bu mɛ suŋa la tanɛ biŋe, 21se'ere en sɔi la dabeem en daa tari mam la hɔ. Se'ere en sɔi la, fum dela nɛre wurebere. Fum digehɛ la sɛla ti fum ka biŋe, gee me kɛ̃'ɛ̃ra zi'an ti fum ka burɛ.’ 22Ti Zuodaana wa yele da'aberɛ wa yeti, ‘N wan gakɛ hɔ la fum mɛŋa nuurɛ yetɔgum wa. Yameputua wa. Fum mi', fum pun mina ti mam dela nɛra wurebere, digeha sɛla ti n ka biŋe, gee kɛ̃'ɛ̃ra zi'an ti n ka burɛ? 23Ti ŋwani ti fum ka tari n lagehɔ la ta biŋe ligeri biŋere zi'an? Ti mam lebe ni na wa, n wan to'e ni n lagehɔ la ti dɔgelega pa'ahɛ?’ 24Gee nyaa yele sɛba en ze' la yeti, ‘To'e ya lage kɔberɛ la a zi'an bo' se'em en tari ligekɔba pia la.’ 25(Ti nɛreba la lebehe yele en yeti, ‘Daana, ena pun tara la ligekɔba pia.’) 26#Mat 13.12; Mak 4.25; Luk 8.18 ‘N yeti ya mɛ wa, ti se'em woo en tari la, ba wan bo' en kekeko pa'ahɛ, gee se'em en pun ka tara sɛla la, sɛla fii wa ti a tara la, ba wan to'e la a zi'an. 27Gee han dɛna mam dinduma sɛba en ka boti ni ti mam dɛna naba sɔna ba biha la, tari ya ba wa'am ka'lam na, la ya kɔrum ba n nɛŋan wa.’ ”

Yezu kɛ̃ Yerusalɛm

(Matu 21.1-11; Maki 11.1-11; Yɔn 12.12-19)

28Yezu en yele ŋwana ba'ahɛ la, a le to'e la sore yɛ'a zɔna Yerusalɛm.

29En ta pɔra Bɛtefege la Bɛtani tihi la, ze'sɛka ti ba yi'ira Olive Zoore la, ti a tum a zahereba bayi', 30yele ba yeti, “Kiŋɛ ya kɛ̃ timbila wa en boi ya nɛŋan wa puan. Yan ta kɛ̃'ɛ̃ra ka puan la, ya wan nyɛ ti ba lu' buŋa ze'ele, ti nɛra nan ka tabelɛ ba' ka. Lorege ya ka tari na bo' mam. 31Se'em han soke ya yeti, ‘Ya loregere buŋa la bu?’ Yeen yele ya en yeti, ‘Daana la en boti ka.’ ” 32Bala ti sɛba ti a tum la kiŋɛ, ta paaɛ nyɛ dɛ wuu Yezu en pa'alɛ ba se'em la. 33Ti ban boi bini lɔregera buŋa la, ti ka daana soke ba yeti, “Ŋwani ti ya lɔregera buŋa la?” 34Ti ba yeti, “Daana la en boti ka.” 35Ti ba tari buŋa la wa'am Yezu zi'an na. Ti ban yɛɛhɛ ba futo yaregɛ buŋa la zuo ba'ahɛ la, ba nyaa te'ele Yezu mɛ ti a zom yagelɛ ka zuo. 36Yezu en ba' buŋa la kina la, ti nɛreba tara ba futo yarena sɔya la zuo. 37En ta pɔra Olive Zoore la zuleŋa sore la, Ti a zahereba kuuŋɔ la za'a pɔhɛ pɛgera Yinɛ la nyɛɛma vɔɔla yɛta paŋa tuuma sɛ'a ti ba nyɛ, 38#Yoo 118.26; Luk 2.14 nyaa yɛta yeti,

“Sum boi mɛ la naba la

en dikɛ Daana la yu'urɛ wa'am na la.

Suma'ahum boi saazuo,

Ti na'ahegɔ bɔna saazuin zuin ha.”

39Ŋwana ti Farasiiduma la basɛba en lagum bɔna nɛrekuuŋɔ la puan la yele Yezu yeti, “Pa'ala, yele fum dɔleba la ti ba go'e.” 40Ti a me yele ba yeti, “Mam yeti ya me wa, ti bamam han pun sina, kuga wa wan voole mɛ bahɛ na.”

Yezu kele Yerusalɛm zuo

41Yezu en ta pɔra na nyɛ Yerusalɛm tiŋa la, a kele mɛ ka zuo, 42yeti, “Fum wa, fum wa fum han mini zina beere wa, Yele sɛ'a en tari suma'ahum kina na la. Gee nananawa yele aŋa sugɛ mɛ fum ninin, ti fum ka nyɛta. 43Yelemɛŋerɛ, dabeha a sɛ'a ye' fum zuo na, dabeha sɛ'a ti fum dinduma wan ti' dɔtɔ kaaɛ fum nangoone la za'a, mum zabera la fum luga woo. 44Ba wan wɔ̃regɛ fum za'a sige tiŋa, sagum fum la fum kɔma biŋe fum puan. Ba kan gee kugere deyina dɔgelɛ de tadaana zuo. Se'ere en sɔi la, fum daa ka baŋɛ Yinɛ limehego saŋa.”

Yezu piihi Pu'uhegɔ yire la

(Matu 21.12-17; Maki 11.15-19; Yɔn 2.13-22)

45Ti Yezu kɛ̃ pu'uhegɔ yire la, pɔhɛ sa'aha sɛba woo en koohe lɔgerɔ bini la, 46#Aza 56.7; Yɛr 7.11 gee yɛta yeti, “La gulehɛ yeti,

‘Mam yire wa dela pu'uhegɔ yire’;

gee bihɛ, yamam dikɛ de lebege la fãareba suka zi'an.”

47 # Luk 21.37 Daarɛ woo, Yezu boi la pu'uhegɔ yire la puan pa'ala. Gee malema kiinduma la, la gɔnmi'ineba la, la yizuto kima la me mu'ɛ nini ɛɛra sadɔseko ti ba wan doohe ku' en. 48Gee ba ka malum nyɛ sɛla ti ba wan iŋɛ, se'ere en sɔi la, nɛreba la za'a nɔŋɛ, gee bɔta ba kɛleha a yelehum la mɛ.

Currently Selected:

Luki 19: GBTP

Highlight

Copy