Luki 22

Ba ku nuurɛ ti ba ku Yezu

(Matu 26.1-5; Maki 14.1-2; Yɔn 11.45-53)

1 # Yɛh 12.1-27 Boroboro zaŋa de'eŋo la ti ba yi'ira azɔɛtole la ta pɔra mɛ, 2ti malema kiinduma la, la gɔnmi'ineba la nyaa ɛɛra sose'ere ti ba wan doohe ku Yezu, se'ere en sɔi la, dabeem en daa tari ba la nɛreba la.

3Ti Sagena la kɛ̃ Yudasi ti ba yi'ira Isikariyɔte, dɛna Yezu zahereba pia la bayi' la ayima la. 4Ti a welege kiŋɛ ta naaɛ la malema kiinduma la, la pu'uhegɔ yire kpɛ'ɛnduma sɛba en biheri pɛntiireba la, nyaa yele ba eŋa en wan koohe Yezu bo' ba se'em. 5Ti ba puurɛ pee gaŋɛ, ti ba ku nuurɛ ti ba bo' en ligeri, 6ti a me sakɛ, gee nyaa ɛɛra sore ti a koohe Yezu bo' ba, sansɛka ti nɛrekuuŋɔ kan ta bɔna la Yezu.

Azɔɛtole de'eŋo la maaheŋɔ

(Matu 26.17-25; Maki 14.12-21; Yɔn 13.21-30)

7Boroboro zaŋa de'eŋo la ti ba ni kaabɛ azɔɛtole pebila la saŋa la en bala paaɛ. 8Bala ti Yezu tum Pita la Yɔn, yele ba yeti, “Kiŋɛ ya ta maahum azɔɛtole dia bo' tu, ti tu wa'am na di.” 9Ti ba soke en yeti, “Bɛha ti fum bɔta ti tu ta maahum azɔɛtole dia la ti tu di?” 10Ti Yezu yele ba yeti, “Kelehe ya,” ya han ta kɛ̃ tiŋa la puan, ya wan tu'uhɛ buraa ti ka zi ko'om la yoore. Doohe ya ka, ta kɛ̃ yire se'ere puan ti a wan kɛ̃ la, 11la ya yele yire la daana yeti, ‘Pa'ala la yeti, “Saama bɔ'ɔ la bɛɛ ti n zi'ire di azɔɛtole dia wa la n zahereba wa?” ’ 12Yidaana la wan pa'alɛ ya bɔ'yaleŋa ti ba pun maahum kɔ. Maahum ya azɔɛtole dia la bilam bo' tu.” 13Bala ti a zahereba la kiŋɛ, sirum ta nyɛ sɛla woo wuu Yezu en yele ba se'em la, nyaa maahum azɔɛtole dia la bilam.

Daana zaanuurɛ tuulum dia la

(Matu 26.26-30; Maki 14.22-26; 1 Korintiduma 11.23-25)

14Saŋa la en ta paaɛ la, ti Yezu zi'ire a zi'irego zi'an dia la zi'an, ti a tuntuneba la zi'a la en dɛla taaba. 15Ti a yele ba yeti, “Mam ba' boti ni ti n di azɔɛtole wa mɛ la ya gee nyaa kɛ̃ n namehegɔ wa puan, 16gee n yeti ya mɛ wa, ti n kan di, gura ti dia la vuurɛ en de se'ere la tum tole Yinɛ sɔ'ɔlum la puan.” 17Gee nyaa dikɛ wula la daam, bo' Yinɛ fara ba'ahɛ, gee yele ba yeti, “To'e ya nyu gee bo' taaba. 18Mam yeti ya mɛ wa ti, ze'ele sankana yɛ'a, mam kan nyu tiihi wala daam wa, gura ti Yinɛ sɔ'ɔlum la wa'am na.” 19Gee dikɛ boroboro, en bo' fara ba'ahɛ la, a fike boroboro la mɛ bo' ba gee yeti, “Mam iŋa en ŋwana dikera bɔ'ɔra ya wa. Iti ya ŋwana tɛra n yele.” 20#Yɛr 31.31-34 A iŋɛ daam la wula la me la bala mɛa ban di ba'ahɛ la, a yeti, “Wula wa en ka'ari bɔ'ɔra ya wa dela mam nɔpu'ulepaalɛ ti n pu'ula la ya, la n ziim. 21#Yoo 41.9 Gee bihɛ ya, se'em en koohe mam la en bala zi'a la mam wa, ti a nu'o bɔna laa wa puan wa. 22La dela sira ti Asaala Dayua la wan kiŋɛ wuu lan gã'arɛ se'em na la, gee yele boi se'em en wan koohe en la zuo.” 23Ti a zahereba la pɔhɛ sɔkera taaba, ba se'em n wan sakɛ tum tuun-dina wa.

Se'em en wan gana za'a nɔkpe'ene

24 # Mat 18.1; Mak 9.34; Luk 9.46 Ti nɔkpe'ene lu Yezu zahereba la tiŋasuka, ba se'em n gani za'a zuo. 25#Mat 20.25-27; Mak 10.42-44 Ti a yele ba yeti, “Tiŋa wa zuo na'duma dikɛ ba mɛhi di' la ba nɛreba, ti sɛba en boi kpe'eŋo puan me dikɛ ba mɛhi di' nɛresɛba en boi ba nu'uhen la. 26#Mat 23.11; Mak 9.35 Gee la kan ana bala bo' yamam. La tugum dɛna se'em la dela la, se'em en gani za'a ya puan la, tugum dɛna bia ya za'a puan. Ti se'em en de nɛŋadaana ya puan, tugum lebege ana wuu se'em en tɔti la. 27#Yɔn 13.12-15 Ti'ihɛ ya de bihɛ, ani n gani za'a? Se'em en zi' dɛla la bii se'em en zi' tɔta la? Dagi se'em en zi' dɛla la? Gee mam boi la ya mɛ wuu se'em en ze' tɔta la.

28“Yamam en de sɛba en ze' la mam kankaŋi n mageha wa woo puan. 29Bala ti mam dikɛ sɔ'ɔlum bo' ya, wuu Sɔ la n dikɛ sɔ'ɔlum la iŋɛ mam nu'uhen se'em la, 30#Mat 19.28 ti ya ta ta'am di gee nyu la mam n dia zi'an n sɔ'ɔlum la puan, gee zi'a na'am kugehi zuo bihera Izirale buuri pia la bayi' la.

Pita ki'ihegɔ

(Matu 26.31-35; Maki 14.27-31; Yɔn 13.36-38)

31“Ti Yezu yeti, Simɔn, Simɔn, kɛleha suŋa, Sagena la to'e la yɔ'ɔ ti a yeele ya za'a wuu ki uto la bahɛ. 32Gee mam pu'uhɛ bo' fum mɛ ti fum sakerɛ da koŋe. Gee fum, fum han ta ŋmɛregɛ lebe na, kpemehe fum suurɔ wa.” 33Ti Pita yele Yezu yeti, “N Daana, mam maahum ya ti mam la fum lagum kɛ̃ paka deen, la han pun dɛna la kum me, n ki la hɔ.” 34Ti Yezu yeti, “N yeti fum Pita, ti nɔdɔɔ kan kaahɛ zina, han dagena fum ta ki'ihɛ butã ti fum ka mi' mam.”

Ligeri daŋa, sore kinɛ tapɔɔ la su'a

35 # Mat 10.9-10; Mak 6.8-9; Luk 9.3; 10.4 Ti Yezu yele ba yeti, “Mam daa tum ya ti ya yehe gee ka tara ligeri dãhi, la sore kinɛ tapɔtɔ,bii tagera la, ya daa koŋe la sɛla?” Ti ba yeti, “Aayi, sɛla sɛla.” 36Ti a yele ba yeti, “Gee nananawa, se'em en tari ligeri daŋa a dikɛ, fum se'em me en tari sore kinɛ tapɔɔ fum dikɛ, ti se'em me n ka tari su'a, a koohe a fuo da' sua. 37#Aza 53.12 N yeti ya mɛ wa, ti gulehɛ kuna dela ku wa'am sira na mam puan. La gulehɛ yeti, ‘Ba kãalɛ en pa'ahɛ la nageyigehi puan.’ La sirum dela sira ti ban gulehɛ mam yele se'em la sirum wa'am na tum.” 38Ti a zahereba la yele en yeti, “Daana, bihɛ, sɔ'ɔhi siyi en ŋwana.” Ti a yele ba yeti, “La seke ya.”

Yezu pu'uhi Olive Zoore zuo

(Matu 26.36-46; Maki 14.32-42)

39Ti Yezu yehe na yɛ'a Olive Zoore zuo wuu en ni pun ita se'em la, ti a zahereba la doohe en. 40Yezu en ta paaɛ en ye zi'an la, a yele ba yeti, “Pu'uhi ya mɛ ti makerɛ be'o saŋa la da nyaŋɛ ya.” 41Ti Yezu vurege wuu nu'o kugelobete lua zi'an, gee bahɛ ba, nyaa kpa' duma, pu'uhɛ yeti, 42“N Sɔ, fum han bɔta, da bahɛ ti n nyu namehegɔ wanɛ dina wa puan. Gee dagi mam suboolum, gee fum suboolum en de se'ere la tum.” [43Ti Suŋera ze'ele saazuo, wa'am na zi'an na kpemehe en. 44Ti a ze'ele a susageŋɔ la puan pu'uhɛ tuulɛ tuulɛ, ti a iŋa muregere ana wuu ziim la tɔgeha tiŋa. Diimen diimen gulehegɔ tuseto ka tari ka'lam] 45En ihege a pu'uhegɔ la puan la, a lebe la a zahereba la zi'an na, paaɛ na nyɛ ba ti ba gã' giha mɛ, susageŋɔ zo'e zo'e la zuo. 46Ti a yele ba yeti, “Ŋwani ti ya giha? Ihege ya la ya pu'uhɛ ti pã'ahebe'o saŋa la da nyaŋɛ ya.”

Yezu Ŋma'a, la a nyɔkerɛ

(Matu 26.47-56; Maki 14.43-50; Yɔn 18.3-11)

47En boi bini tɔgera la, ti nɛrekuuŋɔ en bala bibigera na, ti se'em ti ba yi'ira Yudasi, dɛna Yezu zahereba pia la bayi' la puan ayima la, en boi ba nɛŋa. Ti a paara Yezu zi'an na ti a mɔgɛ en; 48ti Yezu yele en yeti, “Yudasi, fum yeti fum koohe Asaala Dayua wa me la mɔka wa yoi?” 49Sɛba en boi la en en nyɛ nɛreba la en kini na la, ba soke yeti, “Daana, ti kɛ̃' ba la sɔ'ɔhi?” 50Ti Yezu zahereba la ayima fooe a su'a kɛ̃' malema nɛŋadaana ayima da'aberɛ tuberɛ fike bahɛ. 51Ti Yezu yele en yeti, “Da le pa'ahɛ dɛ.” Gee kalum tuberɛ la, ti de lebe iŋɛ sum. 52Ti Yezu nyaa yele malema kiinduma la, la pu'uhegɔ yire pɛntiireba kpɛ'ɛnduma, la yizuto kima la en wa'am na ti ba nyɔkɛ en la yeti, “Yamam yehe mɛ na la sɔ'ɔhi la dɔya wuu mam dela nageyiga? 53#Luk 19.47; 21.37 Mam ni bɔna la ya daare woo pu'uhegɔ yire la puan, gee ya ka nyɔkɛ mam. Gee ya saŋa en ŋwana, lika puan paŋa saŋa en ŋwana.”

Pita Ki'ihɛ Yezu

(Matu 26.57-58, 69-75; Maki 14.53-54, 66-72; Yɔn 18.12-18, 25-27)

54Ti ba nyaa nyɔkɛ Yezu, tari en kiŋɛ, tari en na kɛ̃ malema nɛŋadaana la yire. Ti Pita bɔna pooren ha dɔla na. 55Ti ba ta tuurɛ bugum zinzaka la tiŋasuka ɔɔha, ti Pita me wa'am na zi'ire la ba. 56Ti pugela en de da'aberɛ nyɛ Pita bugum la zi'an, bihɛ en gee yeti, “Buraa kana wa ni dɔla la Yezu.” 57Ti Pita ki'ihɛ yeti, “Pɔka wa, mam ka mi' en.” 58Ti la iŋɛ fii wa, ti nɛra ayima me bihɛ en gee yeti, “Fum dela ba ayima.” Ti Pita yeti, “Buraa wa, mam ka pa'ahɛ ba puan.” 59Ti la le iŋɛ wuu gogo kaareŋa, ti nɛra ayima me kelum yeti, aayi, “Yelemɛŋerɛ, Buraa kana wa me ni bɔna mɛ la Yezu, se'ere en sɔi la a dela Galiliiŋa.” 60Ti Pita yeti, “Buraa wa, mam ka mi' fum yeti sɛla wa.” Sankaŋa puan la, Pita en nan boi bini tɔgera la, ti Nɔdɔɔ kaahɛ. 61Ti Daana la ŋmɛregɛ bihɛ Pita. Ti Pita tiɛ Daana la yelehum la, en daa yele en yeti, “Gee ti nɔdɔɔ ta kaaha zina, ti fum ki'ihɛ butã ti fum ka mi' mam.” 62Ti Pita yehe yiŋa ta kele ninmu'urɛ.

Ba keheri gee ŋmɛ'ɛra Yezu

(Matu 26.67-68; Maki 14.65)

63Ti buraahi se'ehi en gurɛ Yezu la pɔhɛ kɛhera en gee ŋmɛ'ɛra en, 64dikɛ sɛla lu' a nɛŋa gee sɔkera en yeti, “Bukɛ ani n ŋmɛ' fum wa.” 65Gee kɔ'ɔm tuura en tuunyooro yima yima.

Yezu paaɛ kiinduma nɛŋan

(Matu 26.59-66; Maki 14.55-64; Yɔn 18.19-24)

66Ti beere ta yilegɛ, ti yizuto kima, la malema kiinduma la, la gɔnmi'ineba la lagehɛ taaba, ti ba nyaa tari Yezu wa'am ba kiinduma tugum zi'an la na. 67Ti ba yele en yeti, “Fum han dɛna Kiresta la, yele tu.” Ti a yele ba yeti, “Mam han pun yele ya, ya kan pun nam, 68n me han soke ya sokere, ya me pun kan lebehe. 69Gee yehe nananawa, Asaala dayua la wan zi'ire la Yinɛ Paŋa zuɔ nu'o.” 70Ti ba za'a soke yeti, “Fum nyɛ dela Yinɛ dayua?” Ti a yele ba yeti “Ya yele la bala wa.” 71Ti ba yele taaba yeti, “Beni aze'nyɛ le yɛ'ɛha ti tu le ɛɛra ti tu nyɛ? Tu wum de la tu mɛhi a mɛŋa nuuren!”

Currently Selected:

Luki 22: GBTP

Highlight

Copy