Yɔn 5

Vo'ohego dabeherɛ tibegɔ

1Yele ana pooren ti Yuuduma malema de'eŋo kuyima saŋa paaɛ, ti Yezu kiŋɛ zom Yerusalɛm. 2Yerusalɛm puan la, nayaŋa kayima ti ba yi'ira ka piihi nayaŋa, ti bɔka gã'a ti ba yi'ira ka Heburu puan ti Bɛti-zata, tara bɔpagehi sinuu. 3Zɛ'sina sinuu wa puan ti bã'duma kekeko, fɔɔhi, wɔbehi la kɔɔrenɔ ni wa'am na gã'a gura. 4[Ba gã' gura la ko'om la ta gbirege. Se'ere n sɔi Daana Suŋera n ni makɛ saŋa wa'am na sige ko'om la puan gbirege bu, ti ba'ara sɛka woo n sige ko'om la puan yia, a bã'a ni bahɛ mɛ.] #5.4 Yia yia gulehegɔ la tuseto ka tari ŋwana. 5Ti buraa kayima bɔna bini bɛ̃' yuuma pihitã la anii. 6Yezu n nyɛ en ti a gã' bini gee me mina ti a bɛ̃' yuue mɛ la, ti a soke en yeti “Fum boti tibegɔ?” 7Ti buraa wa lebehe en yeti, “Naa, Suŋera la ni han sige na damɛ ko'om la, mam ka tari se'em ni wan suŋɛ mam ti n lu ko'om la puan yia. Mam ni ta maahena la, ti ayima n pun lu bini.” 8Ti Yezu yele en yeti, “Ihige kilum fum suŋɔ kiŋɛ.” 9#Yɔn 9.14 Bilam bilam ti buraa la nyɛ ka tibegɔ, vaaɛ ihige saazuo, kilum ka suŋɔ tu' kina.

Yele dina wa iŋɛ la vo'ohego daarɛ puan. 10#Nɛh 13.19; Yɛr 17.21 Bala ti Yuuduma la yele buraa wa n nyɛ ka tibegɔ wa yeti, “Zina dela vo'ohego dabeherɛ, la dagi ma'a ti fum ziira suŋɔ.” 11Gee buraa wa lerege ba yeti, “Buraa sɛka n tibɛ mam la n yele mam ti, ‘Kilum fum suŋɔ la kina.’ ” 12Ti ba soke en yeti, “Buraa kani n bala yele fum yeti, ‘Kilum fum suŋɔ kiŋɛ la’?” 13Buraa wa n nyɛ ka tibegɔ wa me ka mi' Yezu n de se'em. Ti Yezu me doohe nɛrekuuŋɔ la puan yehe. 14Pooren ti Yezu ta nyɛ buraa wa pu'uhegɔ yire la puan, yele en yeti, “Bihɛ, fum ban'an la bahɛ ya. Da le tum be'em ti la tari sɛla n gani ŋwana le wa'an fum zuo na.” 15Ti buraa wa kiŋɛ nyaa ta yele Yuuduma la yeti, la dela Yezu n daa tibɛ mam la. 16Ŋwana zuo ti Yuda duma la ihige dɔla Yezu dɔlega, eŋa en tuni tuun-ana wa taaba vo'ohego dabeherɛ puan la. 17Ti Yezu lerege ba yeti, “Mam Sɔ n tuni la, mam me tuni mɛ.” 18Ŋwana zuo, ti Yuuduma wa malum mu'ɛ la nini ɛɛra ba ko' en, beni zuo, a ka galum la vo'ohego daarɛ kiha la ma'a, gee a galum mɛ la eŋa en yi'iri Yinɛ ti a mɛŋa Sɔ, tara a mɛŋa makera la Yinɛ la.

Dayua la paŋa

19Ti Yezu yele ba yeti, “N yeti ya la yelemɛŋerɛ yelemɛŋerɛ wa, ti Dayua la kan ta'an tuna a mɛŋa tuuma, han dagena sɛla ti a nyɛ ti Sɔ la tuna la. Sɛla woo ti Sɔ la tuna la, bala mɛa ti Dayua la tuna. 20Sɔ la nɔŋɛ Dayua la mɛ, gee pa'ala en sɛla woo ti eŋa n de Sɔ la tuna. A me wan pa'alɛ en yele kãra n gani yele ana wa, ti la iŋɛ ya pakerɛ 21La dela asira ti, wuu Sɔ la n ihigere kum bɔ'ɔra ba vom se'em la, bala mɛa ti Dayua la me bɔ'ɔra nɛreba vom en boti se'em. 22Sɔ la mɛŋa ka gakeri nɛra, gee a dikɛ gakerɛ paŋa la za'a bo' la Dayua la, 23ti bala ti nɛra woo wan na'aha dayua la wuu ban na'ahɛ Sɔ la se'em la. Fum se'em woo n ka na'ahɛ Dayua la, ka na'ahɛ sɔ se'em n tum en na la. 24N yeti ya la yelemɛŋerɛ yelemɛŋerɛ wa. Se'em woo n wum mam yelehum wa, gee nam se'em daana n tum mam na la, tari la vomkanba'ahɛ. Ena daana ka boi gakerɛ puan. A daana tee mɛ kum puan wa'am vom puan na.

25“N yeti ya la yelemɛŋerɛ yelemɛŋerɛ wa ti, saŋa kini na, ka pun paaɛ, ti ki'induma wan wum Yinɛ dayua wa kua, ti sɛba n wum wan vɔna 26Wuu sɔ la mɛŋa n tari vom a puan se'em la, bala mɛa ti a bo' Dayua la me sore ti a tara vom a puan, 27gee me kelum bo' Dayua wa paŋa ti a gakɛ, se'ere n sɔi la, a dela Asaala Dayua. 28Da bahɛ ya ti la iŋɛ ya pakerɛ la yele ana, gee saŋa la kini na ti sɛba ti ba pi' ba yɔɔrɔ puan wan wum Dayua la kua, 29#Dan 12.2 ihige ba yɔɔrɔ la puan yehe na, ti sɛba n tum sum wan vo'e ihige kɛ̃ vomkanba'ahɛ puan, ti sɛba n tum be'em me vo'e ihige kɛ̃ namehegɔ puan.

Yezu Aze'nyɛduma

30“Mam ka tuni tuunɛ n ma'a. Mam n wum se'em la, mam gakeri dɔla la bala mɛa. Bala zuo, mam gakerɛ la dela tuuntɔɔ se'ere n sɔi la, mam ka tuni n mɛŋa sumboolum, gee se'em n tum mam la sumboolum. 31Mam han muula n mɛŋa yele, n muulegɔ la kan dɛna asira. 32Ayima n boi ha muula mam yele, ti mam me mina ti en tɔgeri n yele se'em la dela yelemɛŋerɛ. 33#Yɔn 1.19-27; 3.27-30 Ya daa tum nɛreba mɛ Yɔn zi'an, ti Yɔn me yele ya yelemɛŋerɛ la. 34Mam yeti sɛla wa dagi la mam to'ere la asaala aze'nyɛ yetɔgum, gee mam yeti ŋwana la yamam nyɛ faarɛ. 35Yɔn n daa bala ana wuu butolila la, dita niira, ti ya daa maahum ya suya ti ya lagum nyɛɛm a bugum la puan dabeha ayi. 36Gee mam tari la yelehum n gani Yɔn. Tuunsɛ'a ti n Sɔ dikɛ bo' mam ti n tum ba'ahɛ la, tuun aŋa ti n tuna wa. Ŋwana wa pa'alɛ mɛ ti, Sɔ la n tum mam na. 37#Mat 3.17; Mak 1.11; Luk 3.22 Mam Sɔ se'em n tum mam na la mɛŋa pun tɔgɛ mam yele mɛ. Yamam ka tabelɛ wum a kua bii ya nyɛ a naanɛ, 38ya me ka tari a yelehum la ya puan se'ere n sɔi la, ya ka nam se'em ti a tum na la.

39“Ya viiheri pa'alegɔ gɔnɔ la puan la daare woo, se'ere n sɔi la ya ti'ihɛ ti vom kamba'ahɛ yɛla n boi bini, gee gɔnɔ tuna mɛa n bala tɔgera mam yele la. 40Gee la bala za'a ya zagehɛ mɛ ti ya kan wa'an mam zi'an na la ya nyɛ vom la. 41Mam ka eere nɛreba na'ahegɔ. 42Gee mam mi' ya ti ka tari Yinɛ nɔŋerɛ ya puan. 43Han dɛna mam, mam wa'am la n Sɔ yu'urɛ puan na, gee ya ka to'e mam. Gee se'em han wa'am a mɛŋa na, ya to'ore en mɛ. 44Ya yeti ya iŋɛ la wani nam mam. Ya han tɔ'ɔha taaba na'ahegɔ, gee ka ɛɛra la ninmu'urɛ, na'ahegɔ seko n ze'eti se'em ma'a n de Yinɛ la zi'an na la? 45Da ti'ihɛ ya ti mam n wan ta ze'ele Sɔ la nɛŋan zɛregɛ ya. Se'em n zɛregɛ ya dela Moose, se'em ti ya dikɛ ya puti'irɛ delum la. 46Ya han sirum nam ni Moose, ya wan nam ni mam. Se'ere n sɔi la, Moose gulehɛ la mam yele. 47Gee ya han ka nam Moose n gulehɛ sɛla la, ya yeti ya iŋɛ la ŋwani nam mam yeti ya sɛla wa?”

Currently Selected:

Yɔn 5: GBTP

Highlight

Copy