Yɔn 6

Yezu diihe nɛreba tuha anuu

(Matu 14.13-21; Maki 6.30-44; Luki 9.10-17)

1Ŋwana en tole la, ti Yezu yakɛ Galilii tiŋa ko'kãtɛ la yakenɛ deyima la ti ba yi'ira Tiberiyasi la ha. 2Ti nɛrekuuŋɔ bibigera dɔla en se'ere zuo, ba nyɛ daalehum sɛ'a ti a tuna bɔ'ɔra bã'duma la. 3Ti Yezu zom zoore zuo, ta zi'an bilam la a zahereba la. 4Azɔɛtole la en de Yuuduma malema de'eŋo la pɔri mɛ. 5Ti Yezu n gorege zuo nyɛ ti nɛrekuuŋɔ kini tɔɔra en na la, ti a soke Filipi yeti, “Bɛha ti tu wan nyɛ dia da' bo' nɛreba wa ti ba di?” 6A soke ŋwana ti a makɛ en bihɛ mɛ, gee a mɛŋa mi' en yeti a iŋɛ se'em. 7Ti Filipi lerege en yeti, “Ŋmarehi siyoobe yɔɔrɛ pun kan ta'am da' dia bo' nɛrebɔbegɔ wa ti nɛra woo yeen paaɛ fiifiihe.” 8Ti a zahereba la ayima, Simɔn Pita suuɔ la Anduru, yele Yezu yeti, 9“Bumbilepaalega boi ka'lam ziira boroboro banuu la zim iyi'. Gee bana yeti ba iŋɛ nɛrekuuŋɔ wa la wani?” 10Ti Yezu yele ba yeti, “Bahɛ ya ti nɛreba la zi'ire tiŋa.” Muɔ me n zo'e zi'an la puan, ti nɛreba la zi'ire, nɛreba n en paaɛ wuu tuha anuu la zi'ire tiŋa. 11Ti Yezu to'e boroboro la, bo' Yinɛ fara ba'ahɛ, gee bahɛ ti ba tɔrɛ bo' nɛreba la n zi' la. Gee to'e zim la iŋɛ bala mɛa, ti nɛra woo to'e paaɛ en boti se'em. 12Nɛreba la n di tigɛ la, ti a yele a zahereba la yeti, “Doohe ya va ban tigɛ gee bahɛ sɛla woo la za'a, ti sɛla da gee.” 13Bala ti ba doohe lagehɛ sɛla woo, zɔra la ti n yee boroboro anuu la ti nɛreba la obe tigɛ gee bahɛ la puan la, pirɛ pitɔ pia la tuyi'. 14Nɛreba la n nyɛ daalehum kana wa ti Yezu tum la, ti ba pi'ilum yɛta yeti, “Ena n sirum de nɔtɔgeha se'em n wan wa'am timpaberɛ wa zuo na la.”

15Yezu n baŋɛ ti nɛreba la maahum mɛ ti ba wa'am na pɛregɛ bobe en na'am la, a bahɛ ba mɛ gee kiŋɛ zom zoore la zuo ha a ma'a.

Yezu kini ko'om zuo

(Matu 14.22-33; Maki 6.45-52)

16Yinɛ n ta lu la, ti a zahereba la kiŋɛ paaɛ ateko la nɔgbene, 17paaɛ zom uureŋɔ ti ba yakɛ Kapɛnum tiŋa. Bala ma'a ti la nyuulum mɛ, gee ti Yezu nan ka lebe ba zi'an na. 18Ti komi'ihe pɔhɛ ŋmɛ'ɛra, se'ere n sɔi la, sabeeo kiŋɔ n lobere ko'om la zuo. 19Bama n mɔm uureŋɔ la kiŋɛ wuu miila atã anaahi la, ba nyɛ ti Yezu yagɛ la ko'om la zuo kina paara uureŋɔ la na, ti dabeem kɛ̃ ba. 20Gee a yele ba yeti, “La dela mam. Da zoti ya dabeem.” 21Ti ban yeti ba ze'ele uureŋɔ la ti a zom la, ba bihɛ ti ba pun bɔna la doone, zɛ'sɛka ti ba ye' ni la.

Saazuo Boroboro

22Yiimbeere, ti nɛrekuuŋɔ la n zaam boi ateko la yakenɛ deyima ha la, tiɛ ti uureŋɔ zaam ka boi gee gee la uureŋɔ kuyina ma'a n zaam boi . Ba me zaam nyɛ ti Yezu zaam ka doohe a zahereba la uureŋɔ la, gee a zahereba la ma'a n zaam kiŋɛ. 23Ti uurenɔ tuseto ze'ele Tiberiyasi tiŋa wa'am na paaɛ zi'an ti Daana la zaam bo' fara boroboro la zuo gee ti nɛreba la zaam obe la. 24Gee nɛrekuuŋɔ la n nyɛ ti Yezu, bii a zahereba la ka boi zi'an la puan la, ti ba zom uurenɔ la mɛhi kiŋɛ Kapɛnum tiŋa ta ɛɛra en.

25Ban ta nyɛ en ateko la yakenɛ deyima la ha la, ba yele en yeti, “Rabi, wani ma'a ti fum wa'an ka'lam na?” 26Ti Yezu lerege ba yeti, “N yeti ya la yelemɛŋerɛ yelemɛŋerɛ wa, yan eere mam wa dagi la daalehum la ti ya nyɛ la, gee yan zaam obe boroboro la tigɛ la zuo. 27Da tuni ya ɛɛra disɛka n wan ba'ahɛ, gee tuni ya ɛɛra disɛka n wan bɔna wuuha, bo' ya vom kamba'ahɛ, sebo ti mam Asaala Dayua wa wan bo' ya la. Se'ere en sɔi la, mam ma'a ti Yinɛ n de Sɔ la daalehum bɔna a puan.” 28Ti ba soke en yeti, “Beni en de tu iŋɛ, ta'am ita sɛla ti Yinɛ tuuma?” 29Ti Yezu lerege ba yeti, “Yinɛ en boti ya tuna se'ere dela, ya nam mam se'em ti a tum na wa.” 30Ti ba soke en yeti, “Beni daalehum ti fum wan tum, ti tu nyɛ gee nam bo' fum. Beni tuunɛ ti fum wan tum?” 31#Yɛh 16.4-15; Yoo 78.24; Yɛm 16.20-21 Tumam yaabeduma yuum di la maana muɔ puan la ha. Wuu lan gulehɛ se'em yeti, ‘A bo' ba la boroboro n ze'ele saazuo na ti ba di la.’ ” 32Ti Yezu yele ba yeti, “N yeti ya la yelemɛŋerɛ yelemɛŋerɛ wa, Moose n yuum bo' ya boroboro sɛka la dagi saazuo boroboro, gee la dela mam Sɔ n bo'ori ya boroboro se'ere n sirum ze'ele saazuo na. 33Se'ere n sɔi la, Yinɛ boroboro dela boroboro n ze'ele saazuo sige na, bɔ'ɔra timpaberɛ wa za'a vom.” 34Ti ba lebehe en yeti, “Naa, yi bɔ'ɔra tɔ boroboro kana wa saŋa woo.”

35Ti Yezu yele ba yeti, “Mam n de vom boroboro la. Se'em woo n wa'am mam zi'an na, kan malum nyɛ kom. Se'em woo n nam mam, ko'yuuro kan malum tara en. 36Gee mam pun yele ya yeti, Ya nyɛ mam mɛ, gee la bala za'a ya ka nam bo' mam. 37Sɛla woo ti Sɔ la dikɛ bo' mam, wan wa'am mam zi'an na, ti se'em woo me n wa'an mam zi'an na, mam kan makɛ dige en bahɛ. 38Se'ere n en sɔi la, mam ze'ele saazuo sige na dagi la n tuna n mɛŋa sumboolum, gee se'em daana n tum mam na la sumboolum. 39Ti dina wa n de se'em daana n tum mam na la sumboolum yelemɛŋerɛ. Ti n da bɔregɛ se'em, sɛba woo ti a dikɛ bo' mam la puan bahɛ, gee n ihige ba ba'ahegɔ daarɛ. 40Dina wa n de mam Sɔ la suboolum yelemɛŋerɛ, ti sɛba woo n nyɛ Dayua la gee nam bo' ka la, wan tara vomkanba'ahɛ, ti n ta vo'e ba ba'ahegɔ daarɛ la.”

41Ti Yuuduma la pɔhɛ nyɔna en la en yeti, “Mam n de boroboro n ze'ele saazuo sige na la.” 42Ba nyɔni yeti, “Dagi ena n de Yezu la,Yosefe dayua la, se'em sɔ la a ma ti tu mina wa? Ti la iŋɛ la wani ti a ŋmɛregɛ yɛta ti, ‘Mam ze'ele la saazuo sige na’?” 43Ti Yezu lerege ba yeti, “Da gugeleni ya la taaba. 44Nɛra kan ta'am wa'am mam zi'an na, han dagena Sɔ la n tum mam na la mɛŋa n ve'e en na. Ti n me wan vo'e nɛre eŋa daana ba'ahegɔ daarɛ la. 45#Aza 54.13 La gulehɛ bɔna nɔtɔgeheba gɔŋɔ puan yeti, ‘Yinɛ mɛŋa wan pa'alɛ ba za'a.’ Se'em woo n wum Sɔ la kua, gee zamehɛ Sɔ la zi'an n ye' mam zi'an na. 46Dagi ti se'em n tabelɛ nyɛ Sɔ la, han dagena se'em n ze'ele Yinɛ zi'an na la. Eŋa daana n nyɛ sɔ la. 47N yeti ya la yelemɛŋerɛ yelemɛŋerɛ wa, ti se'em woo n nam tari la vomkanba'ahɛ. 48Mam n de vom boroboro la. 49Ya yaabeduma yuum di maana dia la mɛ muɔ la puan ha, gee ba za'a ki ya. 50Boroboro en ze'ele saazuo sige na n ŋwana, ti se'em woo n obe de, kan ki. 51Mam n de vom boroboro la, ze'ele saazuo sige na la. Se'em woo en obe boroboro dina wa wan vɔna wuuha. Boroboro se'ere ti mam yeti n dikɛ bo' timpaberɛ wa ti ba tara vom la dela mam inganɛ wa.” 52Ŋwana ti Yuuduma la pɔhɛ ŋmɛ'ɛra nɔkpe'ene tuulɛ la ba mɛhi yeti, “Ŋwani ti buraa kana wa wan dikɛ ka inganɛ bo' tumam ti tu obe?” 53Ti Yezu yele ba yeti, “Yelemɛŋerɛ yelemɛŋerɛ ti n yɛta wa, ti han dagena ya obe la mam asaala dayua wa inganɛ, gee nyu mam ziim, ya kan tara vom ya puan.” 54Se'em en obe mam inganɛ, gee nyu mam ziim la n wan tari vomkanba'ahɛ, ti n ihige en ba'ahegɔ daarɛ. 55Mam inganɛ wa dela dia yelemɛŋerɛ, ti mam ziim wa dɛna sɛla en nyuuri yelemɛŋerɛ. 56Se'em en obe mam iŋa wa, gee nyu mam ziim la boi la mam puan, ti mam me bɔna la en. 57Wuu Sɔ la n de vom daana tum mam na ti mam vɔna Sɔ la zuo la, bala mɛa ti se'em woo n obe mam wan vɔna mam zuo. 58Boroboro dina n ze'ele saazuo sige na, de ka ani wuu ya yaabeduma n yuum di boroboro gee kelum ki la. Gee fum se'em en boroboro dina wan vɔna wuuha.” 59A tɔgɛ yetɔgebuna wa la en daa boi Kapɛnum tiŋa Zamehegɔ yire la puan pa'ala la.

Vom kamba'ahɛ Yelehum

60Yezu zahereba la kekeko n wum ti Yezu tɔgɛ yele ana la, ti ba yɛta taaba yeti, “Pa'alegɔ kuna ba' kpe'em mɛ. Ani n wan to'e ku?” 61Gee Yezu en daa pun mina a mɛŋa puan ti a zahereba la gugeleni mɛ la, ti a yele ba yeti, “Yetɔgebuna daam yamam me mɛ? 62Gee ya nyaa han ta nyɛ ti asaala dayua wa lebe zɔna zi'an ti a daa pun bɔna la ya wan yeti bu? 63La dela Fa'a Sia la n bo'ori vom, gee inganɛ la ka bo'ori sɛla sɛla. Yelehum wa ti mam tɔgɛ bo' ya wa dela Sia, gee dɛna vom. 64Gee sɛba boi ya puan ka nam bɔ.” Se'ere n sɔi la, pɔhega na la, Yezu pun mina ba puan sɛba n wan nam bo' en, la se'em n de en wan ta koohe en mɛ. 65Bala ti a yele ba yeti, “Ŋwana zuo ti mam yele ya yeti, se'em kan ta'am wa'am mam zi'an na, han dagena mam Sɔ n bo' sore.”

66Yetɔge buna wa zuo, Yezu zahereba kekeko lebe la pooren ka le dɔla en. 67Ti Yezu soke a zahereba pia la bayi' la yeti, “Yamam me boti ya kiŋɛ mɛ bii?” 68#Mat 16.16; Mak 8.29; Luk 9.20 Ti Simɔn Pita lerege en yeti, “Daana, to yeti tu kiŋɛ ta paaɛ la ani? Fum n tari vomkanba'ahɛ yelehum la. 69Tumam nam mɛ, gee mina ti fum en de FA'A Daana ze'ele Yinɛ.” 70Ti Yezu lerege ba yeti, “Dagi mam mɛŋa n looe yamam pia la bayi wa? Gee la bala za'a, ya ayima dela bumbɛ'a.” 71Yezu tɔgeri la Simɔn Isikariyɔte dayua Yudasi yele n bala. Eŋa n pun dɛna pia la bayi' la puan la, gee a wan koohe Yezu.

Currently Selected:

Yɔn 6: GBTP

Highlight

Copy