Yɔn 4

Yezu la Samariya tiŋa pɔka

1Yezu en ta baŋɛ ti Farasiiduma la wum ti, “Yezu nyaŋeri nɛreba zo'e zo'e gee bɔ'ɔra ba ko'om sua gana Yɔn‘ la,” 2gee la dagi Yezu a mɛŋa, gee a zahereba la en bo'ori nɛreba la ko'om sua la, 3ti a bahɛ Yudiya, gee yɛ'ɛha lɛbera Galilii. 4Gee la dela a doohe Samariya tiŋa puan. 5#Pi'il 33.19; Yos 24.32 Ti ba wa'am na paaɛ Samariya tinkãtɛ ti ba yi'iri Sika la, lɛm la samanɛ se'ere ti Yakɔbe yuum dikɛ bo' a dayua Yosefe la. 6Yakɔbe bulega n boi bini, ti Yezu n kiŋɛ taregɛ la, paaɛ zi'a bulega la zi'an. La wa dɛna la wuntɛɛn-sigelika.

7Ti Samariya tiŋa pɔka sige na ti ka akɛ ko'om, ti Yezu yele ka yeti, “Bu' mam ko'om ti n nyu.” 8(Bala ma'a la ti a zahereba la kɛ̃ la tinkãtɛ puan ha ti ba ta da' dia na.) 9#Ɛzi 4.1-5; Nɛh 4.1-2 Ti Samariya tiŋa pɔka wa yele en yeti, “Ŋwani ti fum Yuu nɛra zuhera ko'om mam Samariya pɔka wa zi'an?” (Bala ma'a la ti Yuuduma ka kaleni lɔge seko ti Samariyaduma kalum) 10Ti Yezu lerege en yeti. “Fum han mi' ni Yinɛ bo'olum la n de sebo, la se'em n de' en yɛta hɔ ti, ‘Bu' mam ko'om ti n nyu wa,’ fum wan zuhɛ ni en, ti a bo' ni fum vomko'om.” 11Ti pɔka la yele Yezu yeti, “N dɛɛma wa, fum ka tari gu'a, bulega wa me kɔ' mɛ ti fum wan nyɛ vom ko'om buna wa la biha? 12Fum gani tumam yaaba Yakɔbe n bo' tumam bulega wa la mɛ, ti a dayɔɔhi la a duhi za'a nyuura ka puan la?” 13Ti Yezu lebehe en yeti, “Se'em woo n nyu ko'buna wa, ko'nyuuro wan le tara en. 14Gee sɛba woo n nyu ko'sebo ti mam wan bo' ba la, ko'nyuuro kan le malum tara bamam duma. Gee ko'sebo ti mam wan bo' ba la, wan lebege la bulega ba puan bula vom ko'om yɛ'ɛha vom en kamba'ahɛ puan.” 15Ti pɔka wa yele Yezu yeti, “N dɛɛma wa, yi bo' mam ko'buna wa, ti ko'nyuuro da le makɛ tara mam, bii n kina ka'lam na agera ko'om.”

16Ti Yezu lerege en yeti, “Kiŋɛ ta yi' fum sira na.” 17Ti pɔka wa lerege en yeti, “Mam ka tari sira.” Ti Yezu lerege en yeti, “Fum tɔgɛ la yelemɛŋerɛ, la fum yeti, ‘N ka tari sira la.’ 18Se'ere en sɔi la, fum ele la sireba banuu, ti se'em ti fum bɔna la en nananawa, pun dagena fum sira. Sɛla ti fum yele la dela asira.” 19Ti pɔka wa yele en yeti, “Naa, mam bihɛ ti fum dela nɔtɔgeha. 20Tumam yaabeduma pu'uheri Yinɛ la zɔya wa zuto, gee yamam yeti, zi'an ti nɛreba wan pu'uha Yinɛ dela Yerusalɛm puan ma'a.” 21Ti Yezu lerege en yeti, “Pɔka wa, nam mam, ti saŋa kini na ti ya kan pu'uha Sɔ la zoore wa zuo, bii Yerusalɛm puan. 22Yamam pu'uheri la sɛla ti ya ka mina, gee tumam pu'uheri la sɛla ti tu mina. Se'ere n sɔi la, faarɛ ze'eti la Yuuduma zi'an na. 23Gee saŋa kini na, kaŋa n ŋwana, ti sɛba n de yelemɛŋerɛ pu'uhereba la, wan pu'uhera Sɔ la, Sia la yelemɛŋerɛ puan. Se'ere n sɔi la, Sɔ la eere la nɛrebana taaba ti ba pu'uha en. 24Yinɛ dela Sia, ti sɛba n pu'uheri en la dela ba pu'uha en Sia la yelemɛŋerɛ puan.” 25Ti pɔka la yele Yezu yeti, “Mam mi' ti Mɛzaaya la,” (se'em ti ba yi'ira Kiresta la) kini na. “Eŋa han wa'am na, a wan pa'alɛ tɔ sɛla woo.” 26Ti Yezu yele pɔka wa yeti, “Mam n bala. Mam se'em en tɔgera la fum wa.”

27Bilam, ti a zahereba la n bala paara na, ti la iŋɛ ba pakerɛ la en tɔgeri la pɔka, gee ba se'em ka lakɛ nuurɛ soke Pɔka wa nyaa “Beni ti fum bɔta?” Bii ba soke Yezu nyaa “Beni ti fum tɔgera la en?” 28Ti pɔka la bahɛ ka yoore la bilam, gee lebe tinkãtɛ la puan, ta muulɛ yele nɛreba yeti, 29“Wa'am ya na bihɛ ya, Buraa kayima n yele mam yele sɛ'a woo ti mam tum! Eii!, Ka wan dɛna Kiresta n bala, bii ka kan dɛna?” 30Ti nɛreba la yehe tinkãtɛ la puan, to'e sore yɛ'ɛha Yezu zi'an.

31Bala ma'a la ti Yezu zahereba la beleni en mɛ yeti, “Rabi, di dia fiiwa.” 32Ti a yele ba yeti, “Mam tari dia mɛ wan di ti ya ka mina.” 33Ti a zahereba la yɛta taaba yeti, “Nɛra n tari dia na bo' en ti a di bii’?” 34Ti Yezu lerege ba yeti, “Mam dia dela n tuna se'em n tum mam na la sumboolum, la n ba'ahɛ a tuunɛ la.” 35Ya ka tari yetɔgum busebo ni yeti, ‘Ŋmarehi sinaahi n gee la tu bum dia’? Gee mam yeti ya mɛ yeti, Bihɛ ya kaaɛ kaaɛ, la ya nyɛ samana la zuto dia n bi'ɛ se'em, bɔta buŋa. 36Buna la pun pɔhɛ tɔ'ɔha a yɔɔrɛ mɛ, gee ka'aha dia la yɛ'ɛha vom kamba'ahɛ puan, ŋwana ti buta, la buna la wan lagum nyɛɛna la taaba. 37Ya yetɔgebuna wa dela asira. ‘Ayima n buti, ti ayima buna.’ 38Mam tum ya ti ya kiŋɛ ta bum la zi'an ti ya ka tum. Basɛba n namehɛ, ti yamam kiŋɛ ta dita ba nyuurɔ.”

39Ti Samariyaduma en yehe tinkãtɛ la puan na la kekeko nam bo' Yezu, doohe la pɔka la n yele se'em yeti, “A yele mam la mam tum yele sɛ'a woo la.” 40Bala zuo, Samariya tinkãtɛ nɛreba wa n wa'am na na la, ba belum en mɛ ti a kɛ̃ la ba. Ti a sakɛ, kɛ̃ bilam dabeha ayi'. 41Ti nɛreba zo'e zo'e nam en, doohe a yelehum la puan. 42Gee nyaa yele pɔka la yeti, “La le dagena fum n yele tu se'em la zuo ti tu nam wa, gee tu mɛhi tuba n wum, ti tu baŋɛ ti eŋa n sirum de timpaberɛ wa zuo za'a faara la.”

Yezu lebe Galilii

43Dabeha ayi' n tole la, ti Yezu ze'ele bilam kiŋɛ Galilii. 44#Mat 13.57; Mak 6.4; Luk 4.24(Se'ere n sɔi la Yezu mɛŋa pun yeti, “Nɔtɔgeha ka tari zuo a mɛŋa tiŋa puan).” 45#Yɔn 2.23En paaɛ Galilii la, Galiliihi la to'e en mɛ, doohe la ban pun nyɛ sɛla woo ti Yezu tum Yerusalɛm de'eŋo la puan la. Se'ere en sɔi la, ba daa lagum bɔna de'eŋo la puan mɛ.

Yezu tibɛ kpɛ'ɛma dayua

46 # Yɔn 2.1-11 Ti Yezu le kiŋɛ Kana n boi Galilii puan, zi'an ti a tabelɛ bahɛ ti ko'om lebege daam la. Kpɛ'ɛma ayima dayua n wa bɛ̃'ɛra, bɔna Kapɛnum. 47Ti kpɛ'ɛma wa n ta wum ti Yezu ze'ele Yudiya wa'am la Galilii na la, ti a kiŋɛ ta belum en ti a wa'am na tibɛ a dayua wa, se'ere en sɔi la, a dayua la kɔ'ɔm yɛ'ɛha la yɔɔen. 48Ti Yezu yele en yeti, “Han dagena ti ya nyɛ la daalehum la nyalema, ya kan malum nam.” 49Ti kpɛ'ɛma wa belum Yezu yeti, “Naa, wa'am kalam na tibɛ n dayua wa gee ka ye' la kum.” 50Ti Yezu yele en yeti, “Kina gee fum dayua la kan ki.” Ti buraa wa nam yelehum la, Yezu n yele en se'em la, gee sige sore yɛ'ɛha kula. 51En boi sore zuo kula la, ti a yamehi zɔ tu'uhɛ en na yele en yeti, “Fum bia la vo'e ya.” 52Ti a soke ba sansɛka puan ti bia la ban'an la bahɛ ka la, ti ba yeti, “Zaam, wuntɛɛŋa gogo kaareŋa kayina wuntɛɛŋa zuo tiŋasuka, ti ka ɔɔrɔ la bahɛ en.” 53Bala ti buraa wa baŋɛ ti sankaŋa mɛa puan ti Yezu yele en yeti, “Kina gee fum bia la kan ki la.” Ti buraa wa nam Yezu, eŋa la a yire za'a. 54Daalehum kana pa'ahɛ la daalehum buyi' ti Yezu tum, eŋa n ze'ele Yudiya wa'am Galilii na la.

Currently Selected:

Yɔn 4: GBTP

Highlight

Copy