Tuuma 25

Pɔɔl belum tiŋandaana

1Naba Fesetuse n wa sooe tiŋa la, dabeha atã n tole, ti a ze'ele Kasariya kiŋɛ zom Yerusalɛm, 2ta paaɛ ti malema kiima la, la Yuda kiinduma la lagehɛ yele en Pɔɔl yele, ba belum en 3gee suhɛ ti a bahɛ Pɔɔl, la a bahɛ ti ba tari Pɔɔl lebe Yerusalɛm na. Gee ba pun maahum mɛ ti ba wan sugɛ gura en la ba ku en sore la zuo. 4Ti Fesetuse lerege ba yeti, ba pagɛ Pɔɔl la Kasariya tiŋa puan, la me kan yuue la eŋa mɛŋa n kiŋɛ bini. 5“Bala zuo” a yele ba yeti, “Ya nɛheduma la sige paaɛ mam Kasariya na, ti ban tari se'ere la buraa wa la, ba wan zɛregɛ ka.”

6Fɛsetuse ka kɛ̃ la ba gaŋɛ dabeha anii bii pia, a bahɛ bilam me gee kiŋɛ sige Kasariya, ti yiimbeere ti a kɛ̃ gakerɛ yire la puan ta zi'ire gakerɛ kuka la zuo, ti a gakɛ, gee bo' nuurɛ ti ba tari Pɔɔl na. 7Pɔɔl n paaɛ na la, Yuuduma n ze'ele Yerusalɛm sigena la kɔ'ɔm kaaɛ en bahɛ la tiŋasuka, kɔ'ɔm parena yɛla zo'e zo'e pagela a zuo, gee kan ta'am pa'alɛ ti la dela asira. 8Ti Pɔɔl me tɔgɛ a nuurɛ yeti, “Mam ka tuue Yuuduma ze'elego la, bii Pu'uhegɔ yire la, bii Kaiza la fii me.” 9Gee Fɛsetuse n boti a pee Yuuduma la puurɛ la zuo ti a soke Pɔɔl yeti, “Fum wan bɔta ti ba tari fum lebe Yerusalɛm ti n ta zi'ire bilam gakɛ hɔ yele sɛ'a ti ba zuuha fum wa?” 10Ti Pɔɔl lerege yeti, “Mam ze' la Kaiza gakerɛ kuka wa nɛŋan. Ka'lam n de mam yetɔgum wa zi'an. Mam ka tum se'ere tuue Yuuduma wa wuu fum mɛŋa n mi de se'em suŋa suŋa la. 11La han deni la mam tum la se'ere tuue ti la dɛna n ki, mam ka zigeri ti n li'ihɛ kumbumɔ. Gee n han ka tara tuure bɔna ba zuuhego la woo puan, nɛra ka boi me wan ta'am dikɛ mam iŋɛ ba nu'uhen. Mam n yeti se'em wa dela, n bahɛ ti Kaiza gakɛ n yele wa.” 12Ti Fesetuse tɔgɛ la a gakereba kiinduma la, gee lerege Pɔɔl yeti, “Fum beleni la Kaiza ti a bihɛ fum yele la bo' fum, la me han dɛna Kaiza, fum ye' la Kaiza.”

Fɛsetuse tɔgɛ la naba Agiripa

13Ti dabeha zo'e zo'e ta tole, ti naba Agiripa la Benise ta wa'am Kasariya na, ti ba pu'uhɛ Fesetuse. 14Ban boi bini dabeha kekeko la, ti daarɛ deyima ti Fesetuse dikɛ Pɔɔl yele wa biŋe naba wa nɛŋan yeti, “Buraa kayima n boi ka'lam ti naba Felikise yuum bahɛ ka paka deen. 15Mam daa ta bɔna Yerusalɛm la, ti malema kiinduma la la Yuuduma kiinduma la tɔgɛ ka yele bo' mam, gee yele mam ti ka dela ka ki. Gee yele mam ti n dela n gakɛ en ti a tuue mɛ. 16Ti mam yele ba yeti, la dagi tumam Arome duma tuunɛ ti tu dikɛ se'em iŋɛ zuuhereba la nu'uhen gee ti zuuha la ka ze'ele la zuuhereba la, ti ba bo' en sore ti a tɔgɛ a nuurɛ yetɔgum n de se'em. 17Bala, ban daa wa'am na la, mam daa ka gu'um, yiimbeere mɛa ti mam kɛ̃ zi'ire la gakerɛ kuka la zuo, gee bo' nuurɛ ti ba tari buraa wa na. 18Sɛba n zuuheri en la n ihege ze'ele la, ba ka nyaŋɛ yele buraa la tuure n de se'ere wuu mam n boti ni de se'em la. 19Ba daa tugum dɔla ɛ tɔgera la bamam la buraa la n ka sakɛ bo' taaba se'em ba pu'uhegɔ yɛla puan, la Buraa kayima ti ba yi'ira ka Yezu n ki, gee ti Pɔɔl la sakɛ ti buraa la vɔi mɛ. 20Mam n bɔregɛ ba yetɔgum la puan pun ka mina mam wa soke sɛla bii viihɛ bu se'em la, mam soke Pɔɔl wa yeti, a wan bɔta ti a kiŋɛ Yerusalɛm ti ba ta gakɛ en ban zuuhe en yele sɛ'a wa? 21Gee Pɔɔl ka sakɛ gee belum yeti, ti ba bahɛ en ti a bɔna paka deen la gura Kaiza puti'irɛ. Ti mam tara en bala gura ti n ta dikɛ en bo' Kaiza.” 22Ti naba Agiripa yele Fesetuse yeti, “Mam wan bɔta ti n wum buraa wa tugum n mɛŋa.” Ti Fesetuse yele naba Agiripa yeti, “Beere fum wan wum a tugum.”

Ba tari Pɔɔl paaɛ naba Agiripa nɛŋan

23Bala zuo, yiimbeere ti naba Agiripa la Benise wa'am na na, ti de'em kãra taaɛ ba poore, ti ba wa'am na kɛ̃ nɛrekuuŋɔ deo la puan, ti pɛntiireba yele gakereba la tiŋa la puan nɛrekãreba. Ti Fesetuse nyaa bo' nuurɛ ti ba tari Pɔɔl wa'am na. 24Ti Fesetuse ihege yeti, “Naba Agiripa la sɛba woo n boi ka'lam la tu wa, ya nyɛ buraa wa, ti Yuuduma la za'a ku nuurɛ Yerusalɛm puan la ka'lam, tahera ti a ka nari a vɔna la. 25Gee mam ka nyɛ a tuure n de se'ere ti la dɛna a ki. Ti en belum la ti a boti Kaiza en bihɛ a yele la, ti mam me , iŋɛ n puti'irɛ ti n tari en kiŋɛ. 26Gee mam ka nyɛ yele vua ŋwana mɔpi ti n gulehɛ a yele dikɛ bo' sɛba me n gani mam la. Bala zuo ti mam tari en wa'am ya za'a na, yele yele wuu fum naba Agiripa, ti tu za'a han viihɛ en bihɛ ba'ahɛ n ze'em wan nyɛ a yele se'ere gulehɛ. 27Se'ere n sɔi la, la ka tari vuurɛ ti fum dikɛ nɛra n boi paka deen ta'aha zi'an gee ka pa'alɛ a tuure n de se'ere.”

Currently Selected:

Tuuma 25: GBTP

Highlight

Copy