Tuuma 26

Pɔɔl tɔgɛ po'e a mɛŋa Agiripa nɛŋan

1Ti naba Agiripa yele Pɔɔl yeti, “Sore boi ti fum tɔgɛ po'e fum mɛŋa.” Ti Pɔɔl zɛkɛ a nu'uhi pɔhɛ mageha gee tɔgera pɔ'ɔra' a mɛŋa.

2“Mam bihɛ n mɛŋa ti mam dela zusuŋɔ daana, ti la dela fum naba Agiripa nɛŋan ti n tɔgɛ po'e n mɛŋa zina, zuuhego seto woo ti Yuuduma wa zuuhe mam la. 3Se'ere en sɔi la, fum dela se'em en mi' suŋa suŋa, Yuuduma malema la za'a, la yima yima se'em en boi Yuuduma wa tiŋasuka. Bala zuo, mam beleni fum mɛ ti, fum kelehe mam la sugeri:

4“Yuuduma woo mi' mam vom n ani se'em n bumbile-paalumen na, ba mi' mam en yuum ihegere na vɔna vom sebo la n nɛreba, la Yerusalɛm puan mɛ. 5#Tuum 23.6; Fil 3.5 Ba mi' ti la yuue mɛ, ba han wan tɔgɛ sira, ti mam yuum pun dɛna la pu'uheba wele se'ere en yuum ba' mu'ɛ ninin la, vɔna n Farasiinɛ. 6Gee nananawa mam ze' la ka'lam ti ba gakɛ mam doohe la, mam tari beere puti'irɛ la nɔbiŋere se'ere ti Yinɛ yuum biŋe la tu yaabeduma la zuo. 7Nɔbiŋere se'ere ti tumam Izirale buuri pia la ayi' la mu'ɛ nini na'aha Yinɛ bulika la yu'uŋɔ woo, gee tara puti'irɛ ti tu beere wan to'e la. Naa naba, la dela putɛ'dina wa zuo ti Yuuduma wa zuuha mam wa. 8Ŋwani ti la kpe'em bo' ya se'em ti ya sakɛ ti Yinɛ vo'ore kum?

9 # Tuum 8.3; 22.4-5 “Yelemɛŋerɛ mam mɛŋa mi' suŋa suŋa ti mam daa maahum mɛ ti n tum yɛla kekeko zabɛ la yu'urɛ wa en de Yezu en de Nazaareŋa wa. 10Mam daa sirum tuni se'em Yerusalɛm puan n bala. Mam daa to'e kpe'eŋo seko malema kiinduma la zi'an la, mam daa ka pagɛ nɛresunduma ma'a, gee mam dela se'em en ni pa' ba poore ti ba ku ba ba han ta yeti ba ku. 11Mam daa dole zamehegɔ yiya la woo puan mɛ mɛleha ba, gee pɛregera ba ti ba tu yu'urɛ. Mam susuya n ba' nyiie la ba ti mam kiha ba la zuo, mam dole ba nama la bala yageha tihi.

Pɔɔl pa'alɛ lan iŋɛ en se'em

(Tuuma 9.1-19; 22.6-16)

12“N daa tari la putɛ'dina mɛa yɛ'a Damasekuse, ti malema kiinduma la me bo' mam kpe'eŋo gee tum mam. 13Naa, Ti wuntɛɛn-sigelika ti mam bɔna sore zuo yɛ'a la, ti bugum ze'ele saazuo niiɛ gana wuntɛɛŋa la, nyakɛ kaaɛ mam la n nɛreba la mum . 14Naa, tu za'a n lu' tiŋa gã'a la, mam wum la kua n yi'iri mam Hiburu yetɔgum puan yeti, ‘Sɔɔl, Sɔɔl, beni zuo ti fum mɛleha mam? La wan bi'ɛ fum ti fum tara fum nama tɛbera kuto.’ 15Ti mam soke yeti, ‘Fum dela ani n Daana?’ Ti Daana la lerege mam yeti, ‘Mam dela Yezu. Mam bala ti fum dɔla mɛleha la. 16Bala, ihege la fum ze'ele suŋa. Se'ere n sɔi la, mam n niiɛ n mɛŋa bo' fum wa dela yele dina wa zuo. N looe fum, ti fum dɛna n tuntuna, la fum tɔgɛ fum n nyɛ mam yele sɛ'a, la yele sɛ'a ti n niiɛ a pooren. 17N wan faaɛ hɔ fum mɛŋa nɛreba Yuuduma wa nu'uhen bahɛ, la sɛba n dagi Yuuduma ti n tuna fum ba zi'an, 18ti fum pikɛ ba nini ti ba ta'am ŋmɛregɛ lika la puan lebe niihum la puan na, ba yehe Sagena la bobere la puan wa'am Yinɛ ze'a na, la ba to'e ba be'em sugeri, gee me lagum pa'ahɛ sɛba n pee ba mɛhi doohe ban tari sakerɛ bo' mam se'em la.’

Pɔɔl yele eŋa n tɔgɛ yelehum la se'em

19“Ŋwana n tole la, naba Agiripa, mam daa ka zagehɛ saazuo ligeri wa n lilege bo' mam wa, 20#Tuum 9.20, 28-29 gee n daa yele de bo' la sɛba n boi Damasekuse puan yia, gee nyaa tagelɛ Yerusalɛm, nyaa tagela Yudiya kɔrɔmkɔrɔm, nyaa dikɛ sɛba n dagi Yuda buuri la me, ti bamam me tee la ba ŋmɛregɛ lebe Yinɛ zi'an, la ba tuna tuunsɛ'a n pa'alɛ ti ba tee ya. 21Yele dina wa zuo ti Yuuduma wa ta gi' mam pu'uhegɔ yire la puan zigera ti ba ku mam. 22Wa'am na paaɛ zina, Yinɛ n suŋɛ mam, ti mam ta'am zɛ'a ka'lam wa, tɔgera bɔ'ɔra nɛrekãreba la tarenduma, dagi la yele se'ere ha, gee sɛla ti nɔtɔgeheba la Moose yeti la wan wa'am na tum la zuo. 23#1 Kor 15.20; Aza 42.6; 49.6 Ba yuum purɛ ti Kiresta wan nyɛ mɛlehegɔ, gee dɛna yia daana ti a ihege a kum puan, la a muulɛ niihum yele wa bo' tumam nɛreba, tumam nɛreba wa yia gee nyaa bo' sɛba n dagi Yuuduma la.”

Pɔɔl yele naba Agiripa ti a nam yelehum la

24Pɔɔl n boi bini tɔgera ŋwana gu'ura a mɛŋa la, ti Fesetuse tahɛ buki yeti, “Pɔɔl, fum yirege mɛ. Fum nyɛ ya, zamehegɔ zo'e zo'e la n bahɛ ti fum zãla wa.” 25Ti Pɔɔl me yeti, “Mam ka yirege, zuo Daana Fesetuse, mam tɔgeri la yelemɛŋerɛ la. 26Yelemɛŋerɛ la dela, Naba mi' yele ana mɛ bala ti mam tɔgera a bala fai bɔ'ɔra en la. Se'ere n sɔi la, mam mi ti a ka tamɛ yele ana wa la deyina me, se'ere n sɔi yele ana wa la deyina me daa ka boi iŋɛ yoko puan. 27Naba Agiripa, fum nam nɔtɔgeheba la? Mam mi' ti fum nam ba.” 28Ti naba Agiripa yele Pɔɔl yeti, “Fum kɔ'ɔm zigera mɛ ti mam lebege Yezu zahera kalam?” 29Ti Pɔɔl lerege en yeti, “Kalam bii bãla bãla, mam sɔheri Yinɛ ti pun dagena fum ma'a, gee sɛba woo n kelehe mam zina me wa'am na dɛna wuu mam n de se'em zina wa, mam bãhi wa ma'a yeen da ba' ba.”

30Ti naba Agiripa vaaɛ ihege, la timbihega nɛŋa daana la, la Benise, la sɛba woo n lagum zi'a la ba la, 31ti ban ye; yɛha la, ba yeti taaba yeti, “Burakana wa ka iti sɛla n de ba ku bii ba pagɛ ka.” 32Ti naba Agiripa yele Fesetuse yeti, “Tu wan bahɛ ni buraa wa, a mɛŋa han ka yele ni ti a boti a paaɛ la Kaiza zi'an.”

Currently Selected:

Tuuma 26: GBTP

Highlight

Copy