Tuuma 24

Pɔɔl paaɛ Felikise Kasariya

1Ŋwana wa dabeha anuu puan, ti malema nɛŋadaana Ananiya sigena la kiinduma basɛba, la nɛra ayima en de yetɔgetɔgera ti ba yi'ira en Tetulose, ti ba dikɛ Pɔɔl yele biŋe timbihega nɛŋadaana la nɛŋan. 2Ban sam Pɔɔl ŋwana ba'ahɛ la, ti Tetulose wa pɔhɛ Pɔɔl zɛregerɛ, yɛta yeti:

Naa sukpe'ene, “Fum zuo, suma'ahum boi tu mɛ wa'am na paaɛ zina, ti teere tee bo' tiŋa wa nɛreba wa, fum mi'ilum la zuo. 3Tu nini ba' tigɛ la yele ana wa ti tu pɛgera a sadɔɔ woo puan la zi'an woo, la pupeelum. 4Gee mam ka boti n gu'um la zuo, mam beleni fum mɛ ti fum kelehe tu suhega wa gi'a gi'a la fum zu'uhegɔ la. 5Tumam n nyɛ buraa wa, yelemɛŋerɛ, a dela nɛrebe'o n de nyɔ̃pɔ̃hega bo' tiŋa wa. A dela se'em n baheri ti gbiregeri sigera Yuda buuri wa n boi timpaberɛ wa zuo zi'an woo, dɛna lageŋɔ seko ti ba yi'ira ba Nazarenduma la nɛŋadaana. 6A pun zigɛ mɛ ti a galum Pu'uhegɔ yire la, ti tumam me nyɔkɛ en. [7Gee naba la pɛntiireba nɛŋa daana Lisiya n wa'am na la gbiregeri kãtɛ, faaɛ en tumam nu'uhen]#24.7 Diimen diimen gulehegɔ la tuseto tari ka'lam mɛ. 8Gee yamam mɛhi la han viihɛ bihɛ, ya wan wum a mɛŋa zi'an, yele sɛ'a woo ti tumam dikɛ zɛregera en wa.”

9Ti Yuuduma la me pa'ahɛ ba nuurɛ yeti, sɛla woo ti ba yele la n kɔ'ɔm bala ti ba tɔgɛ la.

Pɔɔl tɔgɛ gu' a mɛŋa Felikise nɛŋan

10Timbihega nɛŋadaana la ta yele Pɔɔl ti a me tɔgɛ a nuurɛ la, ti Pɔɔl yeti:

“Mam puurɛ pee mɛ la fum bo' mam sore ti n tɔgɛ n nuurɛ wa. Mam mi' ti fum bihɛ tiŋa wa la ka nɛreba dagi zina. 11Gee fum mɛŋa n wum se'em la, la ka gaŋɛ dabeha pia la ayi' n ŋwana, ti mam kiŋɛ zom Yerusalɛm ti n ta pu'uhɛ. 12Ba ka nyɛ mam ti mam ŋmɛ'ɛri nɔkpe'ene la se'em pu'uhegɔ yire la puan, bii n gbirege nɛreba zamehegɔ yire puan bii tiŋa la puan. 13Ba me ze' nananawa, ba pun kan tara se'ere ti ba pa'alɛ yeti bamam n zuuheri mam se'ere zuo wa la dela yelemɛŋerɛ. 14Gee se'ere n de yelemɛŋerɛ ti mam wan yele fum dela, la doohe la Sore la ti bamam yeti, de dela be'em tigere, gee mam pu'uhi la tu yaabeduma Yinɛ la, gee nam sɛla woo en gulehɛ biŋe doohe ze'elego la nɔtɔgeheba gulehɛ biŋe la. 15Mam tari la beere puti'irɛ Yinɛ zi'an. Beere puti'irɛ se'ere ti bamam mɛhi pun sakɛ ti, tuntɔɔduma la be'em duma ihegere kum puan la wan tum. 16Ŋwana zuo la, mam kpeŋere la n mɛŋa saŋawoo ti n tara putɛ'sunɛ bo' Yinɛ, la nɛreba za'a. 17#Tuum 21.17-28 Yuuma n tole ha, ti mam yuum tari n bo'olum wa'am na ti n bo' n tiŋa nɛreba, gee me tara n kaabegɔ bo'olum na ti n kaabɛ. 18Mam wa'am na bɔna malema ana puan la, ti ba nyɛ mam Pu'uhegɔ yire la puan, ti n boi la peere malema la ba'ahegɔ puan. Nɛreba daa ka zo'e bini, bii daaŋɔ seko sige bini. 19Gee Yuuduma basɛba n daa ze'ele Esiya wa'am na, bamam me pun suni ti ba me boni fum nɛŋan ka'lam, la ba yele bamam me n tari se'ere la mam. 20Bii bahɛ ti nɛrebana wa yele fum n tuure n daa de se'ere ban daa tari mam kiŋɛ kiinduma la nɛŋan la, 21#Tuum 23.6 Han dagena yele dina wa ma'a ti n daa zɛ'a ba nɛŋan gee yele la. ‘De dela nɛreba han ki ba wan le ihege la. Yele dina wa zuo ti mam zɛ'a fum nɛŋan zina wa.”

22Gee Felikise n pun mina Sore la yele la, malum dikɛ yetɔgum la ze'ele la dabeherɛ se'ere yeti, “Lasiya n de pɛntiira kiima la han sige na, n wan bihɛ fum yele wa puan n de se'em.” 23Gee bo' pɛntiira nɛŋa daana se'em en biheri pɛntiireba kɔbega la nuurɛ yeti, guri ya en, gee bahɛ ya en ti a tara fai fii wa, da gu'uri ya a zɔduma ti ba da kina na bihera en gee bɔ'ɔra en sɛla ti a bɔta.

Pɔɔl boi pɛntiireba nu'uhen

24Ti la iŋɛ dabeha fii wa, ti Felikise doohe la a pɔga Durusila n de Yuda buuri la wa'am, tum ti ba yi' Pɔɔl na, ti a bahɛ en ti a tɔgɛ bu en ti wum a sakerɛ Kiresta Yezu puan n ani se'em. 25Ti Pɔɔl n ta tɔgera pa'ala tuntɔɔnɛ, tana fum mɛŋa tara, la gakerɛ la n kini se'em na la, ti dabeem kɛ̃ Felikise, ti a yele Pɔɔl yeti, “Kiŋɛ ti la iŋɛ fii, n han le ta nyɛ fole, n wan tum ti ba yi' fum na.” 26Gee ŋwana woo la, a puti'irɛ dela Pɔɔl wan bo' en ligeri. Yele dina wa me zuo ti a ni makɛ yi' Pɔɔl na zi'a la en sɔha.

27Yuuma ayi' n ta wa'am na tole, ti Pɔkiyose Fesetuse sooe Felikise, gee Felikise wa de gakɛ n boti a iŋɛ ti Yuuduma la puurɛ pee la, a bahɛ ti Pɔɔl kelum bɔna la paka deo puan.

Currently Selected:

Tuuma 24: GBTP

Highlight

Copy