Matius 27

Yesus dibaba' ko Gubernur Pilatus oca' diadili

(27:1-2)

(Mrk. 15:1; Luk. 23:1-2; Yoh. 18:28-32)

1Sunsukng-pukau, boko imam kopala' agatn boko pomimpitn banso Yahudi bulah koputusan oca' Yesus dihukupm mati. 2Sia' mongobat Sio, mombaba'-Nyo, lalu monyorahan-Nyo ko Pilatus, gubernur propinsi nantai.

Yudas bunuh diri

(27:3-10)

(Kis. 1:18-19)

3Yudas, nam urakng inyo monjual Yesus, io moniant obai udah ado koputusan pakai' mohukupm mati Yesus. Timpu nantai, Yudas monyosal. Io momulakan tigo puluh pingkai' duit pira' nantai ko boko imam kopala' ongko boko pomimpitn banso Yahudi nantai. 4Katonyo, “Aku udah bodosa monjual urakng inyo kinyo bosalah sampai Sio dihukupm mati.”

Apo sia' monimbas, “Koi co poduli. Kolai botanggukng jawab doi' porbuatan kolai siku'.” 5Jadi, Yudas mombuakan duit nantai ko dalapm Rumah Allah, lalu botula' monggantukng diri.

6Boko imam kopala' monguti' duit nantai lalu bopandir, “Duit ninam duit inyo dibayaran pakai' mombunuh urakng. Obai nianan, kito culih momansu'annyo ko dalapm tompat posombahan.” 7Jadi, sia' bulah koputusan pakai' momakai duit nantai pakai' momboli sobidakng tanah inyo disobut Tanah Tukakng Poriu'. Sia' bulah tanah nantai monjadi tompat pasaran boko urakng asikng. 8Obai sia' momakai duit darah nantai, lalu sampai ari ni'in tanah nantai disobut ‘Tanah Darah’.

9Agatn ubo nantai, pomandiran Nabi Yeremia watu joman komai monjadi nyata. Katonyo, “Sia' monorima' tigo puluh pingkai' duit pira', ia'an rogo inyo ditotapan urakng Israel sobagai bayaran pakai' Sio. 10Sia' momakai duit nantai pakai' momboli Tanah Tukakng Poriu'. Tuhatn udah boposatn ko aku mongona'i nantai.”#27:9-10: Doi' buku Zakharia 11:12-13 ongko Yeremia 32:6-9.

Yesus di baba' kopohadapan Gubernur Pilatus

(27:11-26)

(Mrk. 15:1-15; Luk. 23:1-5, 13-25; Yoh. 18:33–19:16)

11Jadi Yesus dibaba' ko pohadapan gubernur Pilatus. Gubernur nantai botakutn ko Sio, “Bondaram Duatn ni'in rajo urakng Yahudi?”

Timbas Yesus, “Ubo inyo kolai katoannam.”

12Boko imam kopala' ongko boko pomimpitn banso Yahudi monuduh Sio. Apo, watu nantai, co Sio monimbasi sobigi' pandirpan.

13Lalu kato Pilatus ko Sio, “Pasti Duatn mondinga' somuo tuduhan sia' tohadap Duatn. Mapo Duatn co monyangkalnyo?” 14Apo Yesus totap co monimbasi sobigi' pandirpan. Obai nianam, Pilatus monjadi kotakan hiratn.

15Watu sotiap Ari Rayo Paskah, gubernur biasonyo molopasan siku' urakng doi' ponjara, sosuai agatn pilihan masrakat. 16Watu nantai ado sikuꞌ urakng di ponjara inyo tokonal. Damonyo Yesus Barabas. 17Jadi, watu urakng banya' udah bokumpul, Pilatus botakutn ko sia', “Sopo kironyo inyo kaitn minto Aku lopasan pakai' kaitn? Yesus Barabas damo Yesus inyo disobut ‘Kristus’?” 18(Pilatus bopandir ubo nantai obai io tohu alasannyo boko pomimpitn Yahudi monyorahan Yesus ko io, nantai obai sia' tungi agatn Yesus).

19Pilatus tongahan dudu' di krosi tompat io moadili pokaro. Watu nantai, bininyo mongiripm posatn ko io, “Sari ni'in, obai pokaro Urakng nantai mombulah aku bomimpi inyo bogola'i. Mimpi nantai bulahku mondorita'. Obai nianam, jangan kolai sonjumpat'an pokaro Urakng inyo kinyo bosalah nantai.”

20Apo boko imam kopala' ongko boko pomimpitn banso Yahudi mohasut urakng banya' nantai pakai' mominto oca' Barabas dilopasan huatan Yesus dihukupm mati. 21Gubernur nantai botakutn agi' ko sia', “Doi' koduo urakng nantai, sopo inyo honda' kaitn bebasan?”

Kato sia', “Barabas!”

22Kato Pilatus ko sia', “Aman ubo nian, la'apo inyo kaitn kohonda'i aku labuhan tohadap Yesus inyo disobut ‘Kristus’?”

Sia' somuo bopandir, “Bunuh Sio di kayu salib!”

23Kato Pilatus, “Apo la'apo kojahatan-Nyo?”

Apo sia' mongkitn borakng mondorah, “Bunuh Sio di kayu salib!”

24Ahirnyo Pilatus mooso obai usahanyo pakai' mombebasan Yesus co bohasil. Malahan, urakng banya' nantai udah honda' bulah korusuhan. Jadi, io monguti' ara'i lalu mombasu'i jarinyo di pohadapan urakng banya' nantai. Katonyo, “Aku cuku botanggukng jawab mongona'i komatian Urakng ni'in! Nian urusan kaitn ba!”

25Timbas somuo urakng banya' nantai, “Biaram koi huatan boko bobia' koi botanggukng jawab mongona'i komatian-Nyo!”

26Lalu, Pilatus mombebasan Barabas obai porminta'an sia'. Apo Yesus dicambuk. Lalu Pilatus monyorahan Yesus ko boko projuritnyo pakai' dihukupm mati di kayu salib.

Boko projurit mohanyam Yesus

(27:27-31)

(Mrk. 15:16-20; Yoh. 19:2-3)

27Lopas nian boko projurit Pilatus nantai mombaba' Yesus ko istana gubernur.#27:27: Dalapm istana nantai, ado markas tompat monahan urakng inyo paca'an dihukupm. Sia' moningkau soluruh pasukan pakai' bokumpul mongoliliki Yesus. 28Ongko sia' labuham mohanyam Sio sobagai rajo. Sia' momucul pakai'an-Nyo lalu mongona'an jubah mirah ko Sio. 29Sia' moanyam ubo mahkota doi' boko ranggau boduri, lalu molota'annyo di pucu' kopala' Sio. Sia' molota'an soruas buluh ko jari kanan-Nyo, oca' kotiat'an sama'an tungkah rajo. Lalu, sia' tundu' di pohadapan-Nyo huatan moulu'-ulu'-Nyo. Kato sia', “Pujicam Rajo Urakng Yahudi!” 30Sia' moigahi-Nyo huatan monguti' buluh nantai lalu boduda'an kopala'-Nyo. 31Lopas sia' jadi moulu'-ulu' Sio, sia' momucul jubah nantai lalu mongona'an agi' pakai'an-Nyo siku'. Lopas nian sia' mombaba' Sio ko luar pakai' dihukupm mati di kayu salib.

Yesus dipaku di kayu salib#27:32-44: Dalapm pomorintahan Roma, ninam caronyo pakai' mohukupm mati urakng ponjahat. (Urakng Israel mohukupm mati agatn caro monikapm urakng ponjahat agatn batu.) Sia' bulah salib doi' duo tota' kayu dipulah monjadi sama'an hurup T. Sobolupm urakng jahat nantai dipaku di kayu salib, io disipat agatn cambuk. Lalu, koduo longannyo diangkat huatan longan kanan ongko longan kiba'nyo dipakuan ko kayu salib nantai. Koduo kakinyo pan dipakuan. Lalu kayu salib nantai ditinjakan agatn caro monanam kayu nantai ko dalapm tanah damo dikopihan di batu bosar. Urakng inyo dihukupm di kayu salib nantai kinyo lansukng mati. Sio ija' ulih hidup bojapm-japm damo boari-ari manahnyo, huatan kotakan mondorita'. Sio digantukng dalapm koadaan kolanjakng, huatan boko urakng inyo molalu'i tompat nantai paca'an mohanyam ongko moulu'nyo. Jadi, io co bayo mondorita' socaro pisik apo kotakan dipomaluan jam.

(27:32-44)

(Mrk. 15:21-32; Luk. 23:26, 33-43; Yoh. 19:17-24)

32Watu sia' bojalatn ko luar kota, boko projurit nantai botomu agatn siku' urakng doi' kota Kirene. Damonyo Simon. Sia' momoso io pakai' momikul kayu salib Yesus. 33Sia' datakam di tompat inyo bodamoan Golgota. Damo nantai rotinyo “Tompat Tongkorak”. 34Di santai, sia' moonji'i Yesus minum anggur inyo dicampur sompodu. Apo lopas Sio mooso'inyo, Sio co honda' mominumnyo. 35Sia' momakuan Sio di kayu salib huatan moninjakan kayu salib nantai. Lopas nantai, boko projurit monguti' pakai'an Yesus. Sia' mombuakng undi pakai' monontuan sopo inyo paca'an mondapat'an pakai'an-Nyo.#27:35: Poristiwa ni'in bulah pomandiran doi' Mazmur 22:19 monjadi nyata. 36Lalu sia' dudu' di santai pakai' monjago Sio. 37Sia' momasakng tulisan di kayu salib nantai di pucu' kopala'-Nyo. Tulisan nantai bunyinyo, “Ninam Yesus, Rajo Urakng Yahudi.”#27:37: Pomorintah Romawi molabuhan hukupan mati di kayu salib di tompat umum oca' urakng banya' ulih moniant. Sia' jam momasakng pongumuman di kayu nantai oca' urakng tohu apo kosalahannyo. Nantai moingant'an urakng pakai' monaati pomorintah. Tulisan inyo dipasakng di pucu' Yesus morupoan boulu'an Yesus (obai sia' kinyo pocayo Sio nam rajo) DAMO ejekan ko urakng Yahudi (obai moremehan kuaso sia' dibandikan agatn kuaso pomorintah Romawi). 38Sia' pan momakuan di kayu salib duo urakng ponjahat bosamo agatn Yesus, inyo siku' di sopia' kanan-Nyo huatan inyo siku' agi' di sopia' kiba'-Nyo.

39Boko urakng inyo lalu di santai mohanyam Sio. Sia' monggala'-monggili'an kopala'. 40Kato sia', “Uai Duatn inyo honda' morobahan Rumah Allah lalu mombangunnyo agi' dalapm tigo ari! Aman Duatn bondar-bondar Ana' Allah, solamant'anbo diri Duatn. Turutnbo doi' kayu salib nian!”

41Ubo nian jam boko imam kopala', boko guru agama Yahudi, huatan boko totuho banso Yahudi. Sia' moulu'-ulu' Yesus. 42Kato sia', “Sio monyolamant'an urakng bukai, apo diri siku' co disolamant'an-Nyo! Aman Sio bondar-bondar Rajo Urakng Israel, kohonda'nyo Sio ulih turutn doi' salib nian! Aman Sio mampu molabuhan nantai, koi paca'an pocayo agatn-Nyo. 43Sio pocayo ko Allah. Sio kalo bopandir obai Sio nam Ana' Allah. Jadi, aman Allah bondar-bondar sonang agatn Sio, biaram Allah monyolamant'an-Nyo watu ni'in!”

44Koduo urakng ponjahat inyo dipaku di kayu salib di sopia' Yesus, sia' pan mohanyam Sio ubo nantaiam.

Yesus mati

(27:45-56)

(Mrk. 15:33-41; Luk. 23:44-49; Yoh. 19:28-30)

45Watu japm duo bolas tongah ari, soluruh doerah nantai potakng-kabut sampai japm tigo babahari. 46Kiro-kiro japm tigo babahari, Yesus mondorah kotakan borakng, “Kato-Nyo Eli, Eli, lama sabakhtani?” Rotinyo, “Allah-Ku, Allah-Ku, hibo Duatn moninggalan Aku?”#27:46: Doi' buku Mazmur 22:2. 47Boboropo urakng inyo mondinga' nantai co tohu rotinyo. Kato sia', “Sio moningkau nabi Elia.”#27:4-47: Yesus mondorah dalapm baso Aram (ia'an baso urakng Yahudi). Kato ‘Eli’ dalapm baso Aram rotinyo ‘Allah-Ku’, apo bunyinyo kato nantai mirip agatn ‘Eli’ dalapm baso Yunani. Jadi, ado urakng inyo bopikir Yesus moningkau nabi Elia. Watu joman komai nabi Elia kinyo mati (Allah mombaba' io ko sorugo dalapm koreta inyo boapi). Jadi, banya' urakng Yahudi pocayo nabi Elia ulih datakng agi' ko dunia ni'in pakai' monulukng urakng. 48Siku' urakng doi' sia' copat botula' bogoyap sosuatu somacapm kapas bahatn inyo ulih monyorap ara'i. Io moncolupannyo ko dalapm anggur mansapm lalu dikobat'an kohujukng buluh. Lalu io julukan ko bibir Yesus oca' diminum-Nyo. 49Apo boko urakng bukai bopandir, “Jangan! Mara kito tiat aman Elia datakng monyolamant'an Sio.” 50Yesus mondorah agi' agatn saro borakng, lalu monyorahan nyao-Nyo lalu matiam.

51Watu nantai jam, tidikng di dalapm Rumah Allah birat duo, doi' pucu' ko babah.#27:51: Dalapm godukng Rumah Allah, ado ruakan husus kohadirat Allah. Ado tidikng inyo momisahan ruakan nantai agatn ruakan bukai. Sokali sotohutn ongkah Imam Agukng ulih mansu' ruakan nantai. Jadi, watu tidikng nantai birat rotinyo conyiant batasan agi'. Kohadirat Allah conyiant di ruakan husus nantai. Rumah Allah co monjadi pusat pakai' monyombah Sio agi'. Molalu'i Yesus, kito watu ni'in ulih mansu' kohadirat Allah. Tiat Ibrani 6:19-20, 9:1-15, 10:19-22 ongko Efesus 2:18, 3:12. Ado gompa bumi ongko banya' batu bosar pocah. 52Boko lubakng pasaran tobuka' lalu banya' urakng doi' umant Allah hidup agi' doi' komatian. 53(Lopas Yesus hidup agi', sia' koluar doi' boko pasaran lalu mansu' ko kota Yerusalem. Di santai banya' urakng moniant sia'.)

54Kopala' pasukan ongko boko projurit inyo monjago Yesus moniant gompa bumi ongko somuo inyo tojadi nantai. Obai nianam, sia' monjadi gola' bondar. Kato sia', “Bondaram, Urakng ni'in bondar-bondar Ana' Allah!”

55Di santai ado jam boboropo botina' inyo moniant doi' jouh. Sia' nanam botina' inyo tuyut Yesus doi' doerah Galilea pakai' molayati Sio. 56Di antaro sia' ia'an Maria Magdalena, Maria (indai doi' Yakobus ongko Yusuf), huatan indai doi' rasul Yakobus ongko Yohanes, ia'an nantai koduo ana' Zebedeus.

Yesus dipasar di dalapm gua

(27:57-61)

(Mrk. 15:42-47; Luk. 23:50-56; Yoh. 19:38-42)

57Pas huntu malapm, ado siku' urakng dampu datakng. Damonyo Yusuf. Io salah siku' murid Yesus inyo boasal doi' kota Arimatea. 58Io botula' ko gubernur Pilatus lalu minto ijitn oca' io ulih momasar bangkai Yesus. Pilatus monyiuh oca' bangkai Yesus dionju' ko io. 59Jadi, Yusuf mombaba' bangkai nantai, lalu momutut-Nyo agatn koitn inyo bowarna putih borosih. 60Io molota'an bangkai Yesus di dalapm pasaran boharu. Pasaran nantai umputn Yusuf siku' inyo io pulah di dalapm bukit batu. Io monggulikan sobuah batu bosar pakai' monutup lubakng pasaran nantai. Lalu, io pulakam.#27:60: Yusuf ditulukng Nikodemus, inyo jam anggota Majelis agama Yahudi (Yohanes 19:39-42). Komungkitan bosar, sia' jam ditulukng boko hulutn sia' obai batu ponutup pasaran nantai bosar bondar. 61(Maria Magdalena ongko Maria inyo bukainyo dudu' di santai di pohadapan pasaran nantai.)

Pasaran Yesus dijago

(27:62-66)

62Kohobu'annyo, ari Sabat, boko imam kopala' ongko boko pomimpitn agama Yahudi doi' kolompok Farisi, sia' botula' mohadap Pilatus. 63Kato sia', “Habakng, koi ingant watu Yesus ponipu nantai ija' hidup, Sio kalo bopandir, ‘Lopas tigo ari, Aku paca'an hidup agi'.’ 64Obai nantaiam, siuhcam oca' pasaran-Nyo dijago sampai ari inyo kotigo. Aman cado, mungkitn boko murid-Nyo paca'an datakng pakai' mongolit bangkai-Nyo. Lalu, sia' paca'an monipu boko urakng agatn momandiran, ‘Sio udah hidup agi' doi' komatian.’ Agatn caro nantaisia' monipu urakng paca'an lobih buru' daripado watu potamo Sio monipu urakng.”#27:64: Boko pomimpitn agama Yahudi kinyo pocayo obai Yesus nam Rajo Inyo Dijanjian Allah. Jadi, sia' bopikir Sio ponipu urakng watu Sio momadahan obai Sio nam Rajo nantai.

65Kato Pilatus ko sia', “Boi'am. Baba'cam boko ponjago ni'in. Jago'icam pasaran nantai boboi'.” 66Jadi sia' botula' bosamo agatn boko ponjago nantai pakai' monjago pasaran Yesus. Sia' pan monyegel batu ponutupnyo oca' conyiant urakng inyo ulih mongombaci' pasaran nantai.

Currently Selected:

Matius 27: TBDS

Highlight

Copy