Matius 28

Yesus bobali' hidup agi'

(28:1-10)

(Mrk. 16:1-8; Luk. 24:1-12; Yoh. 20:1-10)

1Timpu ari Minggu, holapm sunsukng, Maria Magdalena ongko Maria inyo bukai nantai botula' pakai' moniant pasaran nantai. 2Ntobukan ado gompa bumi kotakng hebat obai ado siku' urakng molekat Tuhatn turutn doi' langit lalu monggulikan batu ponutup pasaran nantai. Molekat nantai dudu' di pucu' batu ponutupnyo. 3Io bocohayo momanjah sama'an kilat. Pakai'annyo putih bondar. 4Boko ponjago pasaran nantai bogogora' obai topogola'. Sia' monjadi sama'an urakng mati.

5Apo molekat nantai bopandir ko boko botina' nantai, “Jangan gola'! Aku tohu kaitn monggoyapi Yesus inyo udah dihukupm mati di kayu salib. 6Sio kinyo di si'itn agi'. Sio udah bobali' hidup samo sama'an inyo udah Sio pandiran komainyo. Huncapm, moniant tompat bangkai Sio diulit'an. 7Watu ni'in, kaitn hagarcam botula' ko boko murid-Nyo. Pandiran ko sia' obai Sio udah bobali' hidup doi' komatian. Dinga'anbo! Sio paca'an botula' lobih doholu doi' kaitn ko doerah Galilea. Kaitn paca'an moniant Sio di su'utn. Dinga'ancam borito inyo udah ku sampaian ko kaitn ni'in!”

8Kotakan hagar sia' botula' doi' pasaran nantai. Agatn oso gola' apo kotakng rindakng, sia' bonggidi'an pakai' momadahan borito nantai ko boko murid Yesus. 9Sopongirap Yesus monomu'i boko botina' nantai dalapm pojalatan. Kato Sio, “Salapm!” Sia' mohampiki Sio, mongolu'i kaki Sio huatan monyombah Sio. 10Yesus bopandir ko sia', “Jangan gola'. Botula' huatan padahan ko boko somadikan-Ku oca' sia' botula' ko Galilea. Sia' paca'an botomu agatn Aku di su'utn.”

Borito tumbukan mongona'i boko murid Yesus mongolit bangkai-Nyo

(28:11-15)

11Pontongahan boko botina' nantai botula', boboropo ponjago pasaran nantai bobali' ko kota Yerusalem. Sia' momadahan ko boko imam kopala' somuo inyo udah tojadi nantai. 12Lalu, boko imam kopala' bohoupm agatn boko pomimpitn banso Yahudi. Sia' bokoputusan pakai' moonji'i banya' duit ko boko projurit. 13Sia' bopandir ko boko projurit nantai, “Kaitn gola' momadahan aman boko murid Yesus udah datakng timpu ari malapm, ongko sia' mongolit bangkai-Nyo pas kaitn tongahan tidu'. 14Aman gubernur mondinga' kisah nantai, koi paca'an bopandir agatn io oca' kaitn kinyo kona' hukupm.”

15Sia' monorima' duit nantai huatan bulah kisah sama'an inyo dipandiran ko sia'. Sampai watu ni'in, kisah tumbukan nantai ija' tosebar di antaro urakng Yahudi.

Yesus moutus boko murid-Nyo

(28:16-20)

(Mrk. 16:14-18; Luk. 24:36-49; Yoh. 20:19-23; Kis. 1:6-8)

16Kosobolas murid Yesus botula' ko doerah Galilea, ko sobuah bukit inyo udah dipadahan Yesus ko sia'. 17Timpu sia' moniant Yesus di su'utn, sia' tundu' monyungkapan monyombah Sio. Apo ado di antaro sia' inyo gangga'-gua'an. 18Yesus mohampiki sia' huatan bopandir, “Allah udah moonji'i kuaso ko Aku di sorugo ongko di bumi. 19Obai nantai, botula'cam ko somuo banso. Ajaricam boko urakng oca' sia' monjadi murid-Ku. Baptiscam sia' dalapm damo Bopai, Ana', huatan Roh Allah pakai' monunju'an obai sia' pocayo ko Allah Bopai, pocayo ko Yesus, huatan Roh Allah. 20Ajaricam sia' pakai' monaati somuo inyo udah Ku porintahan ko kaitn. Ingantcam: Aku paca'an hala monyoroto'i kaitn sampai ahir joman.”

Currently Selected:

Matius 28: TBDS

Highlight

Copy