Matius 26

Boko Pomimpitn urakng Yahudi bohajat honda' mombunuh Yesus

(26:1-5)

(Mrk. 14:1-2; Luk. 22:1-2; Yoh. 11:45-53)

1Lopas Yesus jadi momandiran somuo pomandiran-Nyo nantai, Sio bopandir ko boko murid-Nyo. 2Kato-Nyo, “Kaitn tohu cadoai obai duo ari agi' paca'an ado Ari Rayo Paskah. Watu nian, boko urakng paca'an monangkap Ana' Monsio, sia' paca'an monyorahan-Nyo ko boko urakng oca' Sio dihukupm mati di kayu salib.”

3Watu nian jam, boko imam kopala' huatan boko pomimpitn urakng Yahudi bokumpul di istana Imam Agukng, damonyo Kayafas. 4Sia' mohoupan poroncana'an oca' ulih monangkap Yesus socaro diapm-diapm lalu mombunuh Sio. 5Apo sia' bopandir, “Jangan kito cubo monangkap Yesus watu boko urakng morayaan Ari Rayo Paskah, obai nononyo paca'an bulah korusuhan di antaro rayat.”#26:5: Mungkitn boko pomimpitn agama Yahudi nantai gola' aman boko urakng inyo bopihak ko Yesus molawatn sia'. Apo mungkitn jam sia' gola' pomorintah Romawi paca'an mohukupm sia' aman tolibat dalapm korusuhan nantai.

Botina' inyo monuyung minya' harupm ko kopala' Yesus tandonyo morogo'i Sio

(26:6-13)

(Mrk. 14:3-9; Yoh. 12:1-8)

6Di kota Betania, Yesus ado di rumah Simon komainyo boponyakit kulit inyo bogola'i. 7Watu nian, ado siku' botina' datakng ko Yesus. Botina' nantai mombaba' sobotul pualam inyo bisi minya' harupm inyo mahal.#26:7: Botul nantai dipulah doi' pualam (ulih jam disobut onyx). Pualam nantai jenis batu bowarna putih huatan kuning inyo indah huatan mahal. Batu nantai didatakan doi' nogori Mesir. Watu Yesus tongahan dudu' makatn, botina' nantai monuyung minya' nantai ko kopala' Yesus tando mohormati Sio.

8Pas boko murid-Nyo moniant nantai, sia' godi. Kato sia', “Hibo minya' harupm nantai dipolobu'i ubo nantai? 9Minya' harupm nian ulih dijual agatn rogo inyo mahal lalu duitnyo dionju' ko boko urakng jaro!”

10Apo Yesus mongotohu'i pikiran sia' nantai. Kato-Nyo ko sia', “Jangan kaitn monyusahan botina' ni'in! Io molabuhan lou' inyo boi' ko aku. 11Kaitn hala ado kosompatan pakai' bulah koboi'an ko boko urakng jaro obai sia' hala ada'an di antaro kaitn. Apo Aku co paca'an hala bosamo-samo agatn kaitn. 12Agatn monuyung minya' harupm nantai ko kopala'-Ku, sobondarnyo botina' ni'in udah monyiap'an bukakng-Ku pakai' dipasar. 13Pondinga'an! Di soluruh dunia, di mono ja' Kabar Boi' diboritoan, porbuatan botina' ni'in paca'an dikisahan jam sampai io kinyo tongkolupatn.”

Rasul Yudas bohajat monjual Yesus ko boko urakng inyo molawatn-Nyo

(26:14-16)

(Mrk. 14:10-11; Luk. 22:3-6)

14Lopas nian, Yudas Iskariot, salah siku' doi' koduo bolas rasul Yesus, io botula' ko boko imam kopala'. 15Katonyo, “La'apo inyo paca'an kaitn onju' ko aku aman aku monyorahan Yesus ko kaitn?” Lalu sia' mombayar tigo puluh pingkai' duit pira' ko io. 16Doi' watu nantai, Yudas mula'i bogoyap kosompatan inyo boi' pakai' monyorahan Yesus ko sia'.

Yesus morayaan Ari Rayo Paskah bosamo agatn boko murid-Nyo

(26:17-25)

(Mrk. 14:12-21; Luk. 22:7-14, 21-23; Yoh. 13:21-30)

17Pas datakng watunyo mula'i morayaan Ari Rayo roti Kinyo Boragi. Jadi, watu ari potamo dalapm poraya'an nantai, boko murid Yesus datakng ko Sio. Kato sia', “Di mono inyo Duatn kohonda'i koi monyiap'an pomakatn pakai' poraya'an paskah pakai' Duatn?”

18Timbas Yesus, “Mansu' ko kota Yerusalem ko urakng nantai inyo kito konal. Padahan ko io, ‘Guru ado posatn. Watu pakai' Sio hampir datakam.#26:18: Inyo dimasud agatn ‘watu pakai' Sio’ ia'an watu inyo udah ditotapan Allah obai Yesus mati. Yesus udah bonubuat mongona'i komatian-Nyo boboropo kali (16:21, 17:12, 22-23, 20:18-19). Mungkitn boko murid-Nyo ongko urakng nantai tohumo lapo inyo dimasud-Nyo. Urakng nantai udah kotiat'annyo kawal agatn Yesus. Sio honda' morayaan Paskah di dalapm rumah kolai bosamo-samo agatn boko murid-Nyo.’ ” 19Lalu, boko murid Yesus molabuhan la'apo inyo disiuh ko sia'. Sia' botula' monyiap'an pomakatn nantai pakai' morayaan Paskah.

20Lopas ari udah malapm, Yesus dudu' makatn bosamo-samo agatn koduo bolas murid-Nyo. 21Pas sia' tongahan makatn, Sio bopandir, “Pondinga'anba Aku! Salah siku' doi' kaitn paca'an monjual Aku ko boko musuh-Ku.”

22Hal nantai bulah hati sia' kotakan salu'. Sia' siku'-monyiku' bopandir ko Sio, “Pasti bukainyo aku, oi Tuhatn?”

23Timbas Yesus, “Urakng inyo moncolupan rotinyo ko dalapm mangku' bosamo Aku, io nanam inyo paca'an monjual Aku. 24Udah totulis dalapm Buku Suci mongona'i Ana' Monsio inyo paca'an dijual ko boko urakng inyo molawatn Sio.#26:24: Mazmur 41:9 mongatoan Rajo Inyo Dijanjian Allah paca'an dihianati kawal-Nyo. Mazmur 22, 118:22 ongko Yesaya 53 mongatoan Sio paca'an mondorita' lalu mati. Sosuai agatn tulisan nantai, hal nantai paca'an tojadi ko Sio. Apo Allah paca'an mohukupm urakng inyo molabuhan nantai. Lobih boi' pakai' urakng nantai aman io kinyo kalo dilahiran samo sokali!”

25Lalu, Yudas, urakng inyo paca'an monjual Yesus, io bopandir, “Pasti bukainyo aku, oi Guru?” Timbas Yesus, “Ubo nanam kato kolai.”

Pojamuan makatn pakai' moingant Yesus

(26:26-29)

(Mrk. 14:22-25; Luk. 22:15-20; 1Kor. 11:23-25)

26Pas sia' tongahan makatn,#26:26: Yesus monambahan roti ko poraya'an Paskah. Tiat catatan di Lukas 22:16. Yesus moncanggapm roti lalu moucap'an doa sukur. Sio momingkai'-mingkai' roti lalu moonju'nyo ko boko murid-Nyo. Kato-Nyo, “Kuti'cam, makatncam, ninam bukakng-Ku.”

27Lopas nantai, Yesus monguti' socangkir anggur. Sio moucap doa sukur agi' lalu moonju' anggur nantai ko sia'. Kato-Nyo, “Somuo kaitn, minumcam. 28Obai, ninam darah-Ku inyo paca'an ditumpahan pakai' urakng banya' watu Aku mati. Nantai paca'an tojadi oca' boko urakng ulih diamputi doi' boko dosa sia'. Nianam Pojanjian Allah inyo disahan agatn darah-Ku.#26:28: Watu joman komai, urakng Israel disunant sobagai tando sia' umant Allah. Sia' jam momposombahan bonatakng oca' dosa diamputi. Nanam Pojanjian Allah inyo manah. Apo ni'in ado Pojanjian Allah inyo boharu. Sopo ja' inyo pocayo ko Yesus, hidup sosuai kohonda'-Nyo, urakng nantai diamputi lalu monjadi umant-Nyo. 29Apo porotian ni'in: Aku co paca'an minum anggur agi' sampai Aku minum anggur inyo boharu bosamo-samo agatn kaitn dalapm Koraja'an Allah Bopai-Ku.”

Yesus momadahan obai Rasul Petrus paca'an monyangkal-Nyo

(26:30-35)

(Mrk. 14:26-31; Luk. 22:31-34; Yoh. 13:36-38)

30Lalu, Yesus ongko boko murid-Nyo monyanyian lagu pujian ko Allah. Lopas nantai, sia' botula' ko bukit Jaitun.

31 Di santai, Yesus bopandir ko sia', “Watu malapm ni'in jam, kaitn somuo paca'an moninggalan Aku. Obai gola' tojadi sosuai agatn pomandiran Allah ni'in inyo totulis dalapm Buku Suci: ‘Aku paca'an mombunuh Gombala nantai, lalu boko domba-Nyo paca'an botomboburan.’#26:31: Doi' buku Zakharia 13:7. Yesus disamoan agatn ‘gombala’ ongko boko murid-Nyo disamoan agatn ‘kokumpulan domba’. Memang Allah co ‘mombunuh’ Yesus, apo komatian Yesus tomansu' dalapm hajat Allah inyo sompurna. Tiat Boko Rasul 2:23. 32Apo lopas Allah bulah Aku hidup agi', Aku paca'an botula' mondoholu'i kaitn ko propinsi Galilea.”

33Petrus bopandir ko Yesus, “Mungkitn somuo kawal inyo bukai paca'an moninggalan Duatn, apo pasti aku cado!”

34Lalu Yesus bopandir ko io, “Porotian ja'am! Watu malapm ni'in jam kolai paca'an momandiran obai kolai co konal agatn Aku sampai tigo kali sobolupm manu' bokuku'.”

35Kato Petrus ko Sio, “Biar pan aku gola' mati bosamo agatn Duatn, aku co paca'an bopandir co mongonal Duatn.” Somuo murid inyo bukai bopandir ubo nantai jam.

Yesus bodoa di kobutn Getsemani#26:36-46: ‘Getsemani’ rotinyo ‘pomerasan (minya') Jaitun’. Kobutn Getsemani ubo kobutn inyo ditumbuhi kayu jaitun. Kobutn nantai ado di tongah bukit Jaitun. Yesus ongko boko murid-Nyo hala botomu di siatn (Lukas 22:39; Yohanes 18:2).

(26:36-46)

(Mrk. 14:32-42; Luk. 22:39-46)

36Lopas nian, Yesus ongko boko murid-Nyo datakam ko tompat inyo bodamoan Getsemani. Di santai, Sio bopandir ko sia', “Kaitn dudu' di si'itn holu'ai, Aku botula' ko su'utn pakai' bodoa.” 37Sio mombaba' Petrus ongko koduo ana' Zebedeus#26:37: Koduo ana' Zebedeus, ia'an Rasul Yakobus ongko Rasul Yohanes. bosamo agatn-Nyo. Watu nantai, Yesus mula'i mooso kotakan salu' ongko golisah. 38Sio bopandir ko sia', “Hati-Ku kotakan salu', osonyo ubo honda' mati. Kaitn tinggal di si'itan ongko bojojago agatn Aku.”

39Lopas nian, Yesus botula' lobih jouh sodikit. Sio tundu' sampai ko tanah lalu bodoa. Kato-Nyo, “Oi Bopai-Ku, aman ulih, bebasanbo Aku doi' pondorita'an inyo gola' Kualapi ni'in.#26:39: Teks asli BASO. Yunani momakai kiasan mongona'i ‘cangkir’ rotinyo ‘pondorita'an’. Apo jangan monurut kohonda'-Ku, apo monurut kohonda' Bopai ja'am inyo jadi.” 40Lopas nantai, Sio bobali' agi' ko kotigo murid-Nyo nantai. Sio monomu'i sia' tongahan toidu'. Kato-Nyo ko Petrus, “Tonyato sojapm ja' co kaitn tahatn bojojago agatn-Ku! 41Bojojago cam ongko bodoacam oca' kaitn totap pocayo watu dicubo'i. Memang hati kaitn honda' botahatn mohadapi coba'an, apo tobiat monsio kaitn lomah.”

42Lopas nian, Yesus botula' bodoa pakai' koduo kalinyo. Kato-Nyo, “Oi, Bopai-Ku. Aman Aku gola' moalapi pondorita'an ni'in, culih disangkal, lalu tojadicam sosuai agatn kohonda' Duatn!” 43Lopas nian, Yesus bobali' agi' ko boko murid-Nyo. Sio monomu'i sia' tongahan tidu' agi' obai sia' kotakan mongantu'.

44Yesus moninggalan sia' lalu botula' bodoa kotigo kalinyo. Sio bodoa agi' pakai' hal inyo samo. 45Lalu, Sio bobali' agi' ko boko murid-Nyo. Kato-Nyo, “Kaitn ija' tidu' ongko botongga', bai? Tiatbo, watunyo datakam pakai' Ana' Monsio disorahan ko boko urakng inyo bodosa. 46Huas cam! Hincapm kito botula'am ko sia'. Io inyo monjual Ku udah datakam.”

Yesus ditangkap

(26:47-56)

(Mrk. 14:43-50; Luk. 22:47-53; Yoh. 18:1-11)

47Watu Yesus ija' bopandir, Yudas datakng. Io ia'an salah siku' doi' koduo bolas rasul. Bosamo agatn io, sorombokan urakng datakam mombaba' podakng ongko pompangkukng. Sia' disiuh boko imam kopala' ongko boko pomimpitn banso Yahudi. 48(Nah, sobolupmnyo, Yudas nantai udah bulah hajat pakai' monjual Yesus ko rombokan inyo molawatn Yesus nantai. Io moonji'i tando ni'in ko sia'. Katonyo, “Urakng inyo aku ciupm, nianam urakngnyo. Tangkapcam Sio!”) 49Jadi, pas rombokannyo datakam, Yudas lansukng mondataki Yesus. Katonyo, “Salapm, Guru!” Lalu, Yudas monciupm Sio.

50Kato Yesus, “Uai kawal, labuhan ja' la'apo inyo monjadi hajat kulo.”

Copat rombokan nantai maju, monangkap Yesus. 51Salah siku' inyo bosamo Yesus moncabut podakng, lansukng monyorakng siku' hulutn doi' Imam Agukng. Io monota' kolindakan hulutn nantai sampai pogat. 52Apo Yesus bopandir ko io, “Sarukan agi' podakng nian ko dalapm sarukngnyo. Obai somuo urakng inyo monggunoan podakng paca'an mati tobunuh obai podakng jam. 53Pasti aman Aku minto ko Bopai-Ku, Sio paca'an hagarmo mongiripan lobih doi' duo bolas pasukan tontara molekat pakai' monulukng Aku. 54Apo aman Aku molabuhan nantai, lalu tulisan di dalapm Buku Suci mongona'i Aku kinyo paca'an digonapi. Tulisan nantai momandiran obai somuonyo gola' tojadi sama'an inyo tojadi watu ni'in.”

55Watu nantai, Yesus bopandir ko urakng banya' nantai, “Kata'an Aku ni'in ponjahat bai, kaitn sampai datakng agatn mombaba' podakng ongko pompangkukng pakai' monangkap Aku? Padohal, sotiap ari Aku dudu' mongajar di tongah lamanan Rumah Allah. Apo watu nantai kaitn co monangkap Aku. 56Apo, somuonyo ni'in tojadi oca' pomandiran mongona'i Aku inyo ditulis boko nabi digonapi.” Lalu somuo murid Yesus morarian diri moninggalan Sio.

Yesus di pohadapan Majelis agama Yahudi

(26:57-68)

(Mrk. 14:53-65; Luk. 22:54-55, 63-71; Yoh. 18:12-14, 19-24)

57Timpu nantai, boko guru agama Yahudi ongko boko pomimpitn banso Yahudi udah bokumpul di rumah Kayafas, ia'an Imam Agukng; inyo kotakan tinggi jabatannyo. Boko urakng inyo monangkap Yesus mombaba'-Nyo ko rumah nantai. 58Petrus mombodapan Sio doi' jouh. Sampai ko rumah nantai, Petrus mansu' ko tongah lamanan lalu dudu' bosamo agatn boko ponjago, oca' ulih mongotohu'i la'apo inyo paca'an tojadi agatn Yesus.

59Boko imam kopala' ongko somuo Majelis agama Yahudi, sia' bousaha goyap buti oca' Yesus ulih dihukupm mati. Jadi, sia' bogoyap boko urakng inyo paca'an moonji'i kosasian inyo kinyo bondar molawatn Yesus. 60Boko urakng maju, apo boko pomimpitn nantai kinyo bohasil mondapat'an buti la'apo pan. Apo, kali-labuh ado duo urakng inyo maju pakai' bosasi. 61Kato sia' duo, “Urakng ni'in kalo bopandir obai Io ulih morobahan Rumah Allah lalu mombangunnyo agi' dalapm tigo ari.”

62Lalu Imam Agukng nantai bodiritn. Katonyo ko Yesus, “Hibo Duatn co monimbas tuduhan nantai inyo dituduhan ko Duatn?” 63Apo Yesus bodiapm mo. Lalu Imam Agukng nantai botakutn agi', “Demi Allah inyo hidup, aku monyiuh Duatn pakai' monimbas koi. Kata'an Duatn Rajo inyo Dijanjian Allah inyo kito sobut ‘Mesias’? Kata'an Duatn Ana' Allah ai?”

64Timbas Yesus, “Ubo kato kaitn nam. Apo porotian ja' ni'in! Mula'i doi' watu ni'in, kaitn paca'an moniant Ana' Monsio, dudu' di tompat inyo tohormat disopia' kanan Allah Inyo Kotakan Bokuaso. Kaitn paca'an moniant-Nyo datakng doi' sorugo di pucu' boko awatn.”

65 Mondinga' nantai, Imam Agukng nantai mombirat-birat pakai'annyo. Katonyo ko boko pomimpitn inyo bukai di santai, “Io mohayam Allah! Co pontikng bogoyap sasi pakai' mongatoan kosalahan-Nyo! Kaitn udah mondinga' Sio mohayam Allah. 66Jadi, ubo la'apo pondapat kaitn?”

Timbas sia', “Io gola' dihukupm mati!”#26:66: Boko pomimpitn urakng Yahudi kinyo pocayo agatn Yesus obai Rajo Inyo Dijanjian Allah. Lalu, sia' bopikir Yesus mongutu' Allah watu Sio mongatoan Sio bokuaso (dudu' di sopia' kanan Allah ongko datakng di pucu' awatn). (Tiat Dan. 7:13-14) Monurut agama Yahudi, urakng inyo bulah kosalahan nantai gola' dihukupm mati (Imamat 24:16). Apo, obai urakng Israel dikuaso'i pomorintahan Romawi, ongkah pomimpitn Romawi ulih bulah koputusan pakai' urakng dihukupm mati. Lalu, Yesus dibaba' ko Gubernur Pilatus.

67Lalu sia' moigahi mato-muho Yesus ongko monompilikng-Nyo. Boko urakng bukainyo boduda'an Sio. 68Kato sia', “Butianbo aman Duatn bondar-bondar Rajo Inyo Dijanjian Allah inyo kito sobut Mesias. Padahancam, sopo inyo boduda'an Duatn?”

Rasul Petrus monyangkal Yesus

(26:69-75)

(Mrk. 14:66-72; Luk. 22:56-62; Yoh. 18:15-18, 25-27)

69Timpu nantai, Petrus dudu' di tongah lamanan rumah nantai. Siku' urakng hulutn botina' mondampiki io. Kato hulutn nantai, “Kolai ninam hala bosamo-samo agatn Yesus, urakng doi' doerah Galilea nantai!”

70Apo Petrus monyangkal di pohadapan boko urakng nantai. Katonyo, “Tou'an aku cuku tohu la'apo inyo kolai pandiran.”

71Lalu, io bojalatn ko pintu gerbakng tongah lamanan nantai. Siku' hulutn botina' inyo bukai moniantnyo. Kato hulutn nantai ko boko urakng inyo ado di santai, “Urakng ninam bosamo-samo agatn Yesus, urakng doi' Nazaret nantai.”

72Apo Petrus monyangkal agi' sampai bosumpah. Katonyo, “Aku bondar-bondar co mongonal urakng nantai!”

73Co manah lopas nantai, boko urakng inyo ado di santai mohampiki Petrus. Kato sia', “Pasti kolai ni'in salah siku' urakng doi' sia', boko murid Urakng nantai doi' Galilea. Nantai nyata doi' logat baso kolai.”

74Lalu Petrus mula'i bosumpah ongko bopandir, “Aku bondar-bondar co konal agatn urakng nantai!” Watu nantai jam, manu' bokuku'. 75Petrus toingant agatn pomandiran Yesus ko io, “Sobolupm manu' bokuku', kolai paca'an monyangkal Aku tigo kali.” Lopas nantai, Petrus koluar doi' tongahlamanan rumah nantai, lalu monangis obai kotakan salu'.

Currently Selected:

Matius 26: TBDS

Highlight

Copy