Matius 25

Poumpamoan mongona'i boko botina' daro inyo pintar-corodi' agatn inyo budu

(25:1-13)

1“Watu Aku datakng agi', Koraja'an Sorugo samo sama'an kisah ni'in: Ado sopuluh urakng botina' daro inyo botula' ko pogai kawitn pakai' monyambut pongantitn lolaki.#25:1: Boko botina' daro ni'in ia'an kawal pongantitn botina'. Sia' bokumpul di rumah Bopai pongantitn botina' nantai pakai' pogai kawitn inyo dilabuhan watu malapm. Tugas boko botina' daro nantai ia'an mohimpa'i pongantitn lolaki watu Io datakng. Sia' masikng-masikng mombaba' pompolitoannyo. 2Lima' botina' daro inyo budu, huatan lima' inyo pintar-corodi'. 3-4Lima' botina' daro inyo pintar-corodi' mombaba' pompolitoan agatn minya' posodia'an di botul. Apo lima' botina' daro inyo budu bayo mombaba' pompolitoan, sia' co mombaba' minya'. 5Obai pongantitn lolaki manah kinyo datakng, jadi somuo botina' daro nantai mongantu' lalu toidu'.

6Watu tongah malapm, sopongirap ado urakng inyo mondorah, ‘Pongantitn lolaki datakam. Mara sambutcam io!’ 7Boko botina' daro nantai huas lalu monyiap'an pompolitoan sia' masikng-masikng. 8Boko botina' daro inyo budu bopandir ko boko botina' daro inyo pintar-corodi'. Kato sia', ‘Onji'i koi minya' kaitn sodikit bo, obai pompolitoan koi udah honda' buta'am.’ 9Apo boko botina' daro inyo pintar-corodi' nantai bopandir, ‘Koi co ulih bobagi agatn kaitn! Gola' kinyo cukup. Jadi momboli cam ko urakng ponjual minya'.’ 10Lalu boko botina' daro inyo budu nantai botula' momboli minya'. Apo, tongahan sia' bojalatn, pongantitn lolaki nantai datakam. Kolima' botina' inyo udah siap ulih mansu' ko pogai kawitn nantai bosamo-samo agatn pongantitn lolaki. Lalu, lawakng ditutupam.

11Lopas nian, boko botina' daro inyo budu nantai datakam. Kato sia', ‘Habakng, Habakng, buka'i koi lawakng!’ 12Apo pongantitn lolaki nantai monimbasi, ‘Cado! Aku co konal agatn kaitn.’

13 Ubo nian jam paca'an tojadi agatn boko urakng inyo kinyo siap watu Aku datakng agi'. Obai nantai, bojago-jagocam, obai kaitn co tohu ari damo japmnyo.”

Poumpamoan mongona'i boko polayatn inyo dipocayo'i agatn duit

(25:14-30)

(Luk. 19:12-27)

14“Koraja'an Sorugo samo sama'an poumpamoan ni'in: Ado siku' habakng inyo honda' botula' ko doerah inyo jouh. Sio moningkau boko hulutn lalu mompocayoan banya' duit ko sia'. 15Sio mompocayoan duit nantai sosuai agatn pongulihan sia'. Sio moonju' lima' ribu pingkai' duit ko siku' hulutn. Sio moonju' duo ribu pingkai' duit ko siku' urakng hulutn inyo bukai. Sio moonju' soribu pingkai' duit ko polayatn inyo bukai agi'. Lalu io botula'.

16Hulutn inyo monorima' lima' ribu pingkai' duit nantai, lansukng botula' huatan monjadiannyo modal usaha. Io bodapat kountukan lima' ribu pingkai' duit agi'. 17Ubo nian jam hulutn inyo monorima' duo ribu pingkai' duit. Io bodapat untukng duo ribu pingkai' duit agi'. 18Apo, hulutn inyo monorima' soribu pingkai' duit nantai, io botula' mongali lubakng di tanah. Di santai, io moombakan duit habakngnyo.

19Kopomanahannyo lopas nantai, habakng doi' boko hulutn nantai pulakam. Sio honda' moadoan pohitukan agatn sia'. 20Hulutn inyo monorima' lima' ribu pingkai' duit nantai datakng mombaba' duit lima' ribu pingkai' agi'. Kato-nyo, ‘Habakng, Duatn moonju' lima' ribu pingkai' duit ko aku. Tiat, aku momakai duit nantai pakai' bousaha ongko aku bodapat kountukan lima' ribu pingkai' agi'.’ 21Lalu, habakngnyo nantai bopandir ko io, ‘Boi'am! Kolai hulutn inyo boi' huatan sotia. Obai nantai kolai dapat dipocayo agatn urusan inyo kocit, jadi aku paca'an moonju' kuaso ko kolai pakai' urusan inyo bosar agi'. Mara mansu'. Bosonang-sonang bosamo agatn aku!’

22Lopas nian, hulutn inyo monorima' duo ribu pingkai' duit datakng. Katonyo, ‘Habakng, Duatn moonju' ko aku duo ribu pingkai' duit. Tiat, aku udah bodapat kountukan duo ribu pingkai' agi'.’ 23Lalu habakngnyo nantai bopandir ko io, ‘Boi'! Kolai hulutn inyo boi' huatan sotia. Obai kolai dapat dipocayo'i agatn urusan inyo kocit, jadi aku paca'an moonju' kuaso ko kolai pakai' urusan inyo bosar. Mara mansu'. Bosonang-sonang bosamo agatn aku!’

24Lopas nian, hulutn inyo monorima' soribu pingkai' duit nantai datakng. Katonyo, ‘Habakng, aku tohu duatn ni'in urakng inyo kojapm. Duatn dapat untukng doi' pokoroja'an urakng bukai samo sama'an potani inyo monguti' hasil hanyian doi' lakau inyo kinyo io tanam. 25Obai nian, aku gola'. Aku botula' moombakan duit duatn nantai di dalapm tanah. Tiat, ni'in duit duatn.’ 26Lalu habakngnyo nantai monimbas, ‘Kolai hulutn inyo jahat huatan losa-lombaro! Jadi kolai udah tohu aku dapat kountukan doi' pokoroja'an urakng bukai samo sama'an potani inyo monguti' hasil hanyian doi' lakau inyo co ku tanam. 27Aman sama'an nian, soharusnyo kolai moonju' duit nantai ko urakng inyo honda' monjalatannyo, oca' watu aku pulakng, aku mondapat duitku agatn bunganyo jam.

28 Lopas nian io bopandir ko boko urakng inyo bodiritn di santai, Kuti' duit nantai doi' io ni'in. Onju' duit nantai ko hulutn inyo umputn sopuluh ribu pingkai' duit nian. 29Obai, urakng inyo udah ado, paca'an dionji'i lobih banya' agi' sampai bolimpah. Apo urakng inyo co nyiant, la'apo inyo ado di io pan paca'an dikuti' doi'nyo. 30Nah, mongona'i hulutn inyo co boguno nantai. Buakan ja'am io koluar ko tompat inyo kotakng potakng. Di siatn boko urakng paca'an monangis huatan bokorit gigi obai sangant ajab sonsaro.’ ”#25:14-30: Agatn kisah ni'in, Yesus moajaran obai kito gola' botanggukng jawab doi' somuo inyo Sio onju' ko kito, tomansu' duit, komampuan, koboi'an, momboritoan Kabar Boi', dll.

Yesus paca'an bobali' pakai' moadili somuo urakng

(25:31-46)

31“Ana' Monsio, paca'an datakng agi' sobagai Rajo. Somuo molekat paca'an datakng bosamo-samo agatn Sio. Sio paca'an dudu' di pucu' tahta-Nyo inyo hebat. 32-33Lalu, somuo banso paca'an dikumpulan di pohadapan-Ku. Sio paca'an monyongkayoan boko urakng inyo hidup bondar di hadapan Allah di sopia' kanan huatan boko urakng inyo kinyo hidup bondar di sopia' kiba'. Samo sama'an siku' urakng gombala monyongkayoan domba di sopia' kanan sodakan kambikng di sopia' kiba'.

34Lalu, sobagai Rajo, Sio paca'an bopandir ko boko urakng di sopia' kanannyo, ‘Maracam, kaitn inyo diborokati ulih Bopai-Ku! Mansu'cam ko dalapm Koraja'an inyo disodiaan pakai' kaitn tangga'i dunia dipulah. 35Kaitn ulih mansu' obai timpu Aku kolaparan, kaitn moonji'i Aku pomakatn. Timpu Aku korahakan, kaitn moonji'i Aku minum. Timpu Aku monomuai di doerah kaitn, kaitn monorima' Aku di dalapm rumah kaitn. 36Pas Aku co nyiant pakai'an, kaitn moonji'i Aku pakai'an. Timpu Aku boponyakit, kaitn moubat'i Aku. Timpu Aku di ponjara, kaitn monjongu' Aku.’ 37Lalu boko urakng inyo bondar nantai paca'an botakutn ko Sio, ‘Tuhatn, sombilo koi kalo moniant Duatn kolaparan huatan moonji'i Duatn pomakatn? Sombilo koi moniant Duatn korahakan huatan moonji'i Duatn minum? 38Sombilo koi moniant Duatn ubo siku' urakng inyo monomuai di doerah koi, huatan monorima' Duatn di dalapm rumah koi? Sombilo koi moniant Duatn co bopakaian huatan moonji'i Duatn pakai'an? 39Sombilo koi moniant Duatn sakit damo dalapm ponjara huatan koi monjongu' Duatn?’ 40Rajo nantai, paca'an monimbas sia', ‘Pondinga'ancam! Watu kaitn molabuhan boko hal sama'an nantai pakai' salah siku' urakng doi' somadikan-Ku inyo kotakan jaro ni'in, nantai samo sama'an kaitn molabuhan boko hal nantai pakai' Aku.’

41Lopas nian, Rajo nantai paca'an bopandir ko boko urakng di sopia' kiba'nyo, ‘Hingkascam doi' pohadapan-Ku, kaitn inyo dihukupm! Mansu' cam ko dalapm api inyo co kalo buta' ia'an nantai tompat inyo udah disiapan pakai' Rajo Sitatn huatan boko molekatnyo. 42Kaitn dibuakan ko siatn, obai timpu Aku kolaparan, kaitn co moonji'i Aku pomakatn. Timpu Aku korahakan, kaitn co moonji'i Aku minum. 43Timpu Aku sonsiku'an monomuai di doerah kaitn, kaitn co mongorumahan Aku. Timpu Aku co nyiant pakai'an, kaitn co moonji'i Aku pakai'an. Timpu Aku sakit damo di ponjara, kaitn co monjongu' Aku.’ 44Lalu boko urakng nantai paca'an botakutn ko Sio, ‘Tuhatn, sombilo kironyo koi kalo moniant Duatn kolaparan, damo korahakan, damo samo sama'an urakng ponomuai, damo co nyiant pakai'an, damo sakit, damo dalapm ponjara, huatan koi co monulukng Duatn?’ 45Rajo nantai paca'an monimbas sia', ‘Dinga'an cam! Timpu kaitn co molabuhan boko hal sama'an nantai pakai' salah siku' urakng doi' somadikan-Ku inyo kotakng jaro ni'in, nantai samo sama'an kaitn co molabuhan boko hal nantai pakai' Aku jam.’ 46Lalu boko urakng nantai paca'an dihukupm agatn hukupan somanah-manahnyo di noraka. Apo boko urakng inyo hidup bondar di hadapan Allah paca'an hidup somanah-mamahnyo di sorugo.”

Currently Selected:

Matius 25: TBDS

Highlight

Copy