MARKUS 8

Yesus nen akuni inebe 4.000 paga roti ugurogo wogoragage wene

(Mat. 15:32-39)

1Etinem, akuni inebe ambik mondok ar komarek inom welagugwa. Nen akuni yemenogo erom engga wogorau dek nen, Ar Yesus aworomi wai yoralok, yoraga dogolir, 2“Wadigi wae! Ir akuni ambik yoma, An inakba o, mutnarek ninom wagwi kigik, nogo nininggi o tiga paga arar yogorik mo, erom naungge mende kodalok wagia mende arar takbo yegemo o. 3Ir ambetak inai logar nen wagiyarikmu, An inuma lakbamo, lagu dogolir tuan taga erom abu nen inil puduk bir lugun o.”

4Yiluk yoragi nanggige ar aworomi ane waganggwi enogo nen wene onggo yogu dogolir, “O waganekma akuni inai mondok dekma yoma, yogo ir akuni ambik yoma inake paga, naungge mende o nggoma kwaktar lugun kegen?”

5Yorugu nanggugwa Ar Yesus nen, “Kir roti mende biluk werek?”

yiluk yirigemo, Ir nen onggo yogu dogolir, “Dek o. We tujuh paga mban biluk agorik o,” yiluk yorugwa.

6Yogu nanggugwa ar Yesus nen akuni ambik komakugwa enogo agar paga korek taruwak nen yiluk yoraga lagagerek, roti tujuh enogo inggimo wagangga lagagerek, Nombae Allah wa, yiluk yotuk, roti yemenogo aworomi ane waganggwi yemenogo, ir nen tumburuwak nen yiluk wogoragage. 7Nen ir ikan bugudak ndak biluk welagugwa mende inom ar, Ar Yesus wogorugwa. Wogorugwama, ar Yesus inggimo wagangga lagagerek, Allah wa, yiluk tamban eka lagagerek, ikan yemenogo inom tumburirani o, yiluk wogoragage. 8Wogoragagemo mondok inelabur togon arar narugwa. Narugwama, roti mbalela inelabur agagemo ndinogo birugwa mende, tu mburim mende yago ininggi tujuh paga arar yagakugwa. 9Ir akuni erom wogoragage enogo inebe empat ribu paga arar. Roti arar narugwama, yogo kinuma lani o, yiluk lakbarige. 10Lakbalok, ar Yesus mutok lagwi enogo, arar to perahu paga dagagu lagugwarik, o Dalamanuta etoma arar unda lagugwa.

Ir Farisi mende nen, elalin ambi erin yorugwa wene

(Mat. 16:1-4)

11 # Mat. 12:38-39; Luk. 11:16,29 Arar unda lagu lagugwa, ir Farisi mende nen Ar Yesus oba wagu lagugwarik, inom wene lakbigik wakbigik aredo waku dogolir, wedek obabur mbaluok nen yiluk, elalin mbogor paga nen ambi erin nda yiluk nggino yorugwa. 12Yorugu nanggugwa, ar Yesus nen wene onggo yoraga dogolir, “Kir akuni yogondak ya paga agotik mende yi, nenaluk elalin eru nggino yirtagwi? An wene yokerak o, kir kinake elalin mondok erigin dek o.” 13Yoraga lagagerek, Ir nogo togor dalok, Ar Yesus to perahu paga onggega lagagerek, i danau aik alibagan nggwe arar unda lagugwa.

Ir Farisi mende inom, nen Herodes inom mende inamende ragi abok yirige wene

(Mat. 16:5-12)

14Ar Yesus mutok lagwi mende enogo, roti waganu inunggukdek agugwa. Ogwe we omanggiar perahu akla etanogo wolok lagugwa. 15#Luk. 12:1Ar Yesus nen yoraga dogolir, “Ir ap Farisi mende inom, ar Herodes inom, inane iniliti andak tagwi eti, ragi roti enggen piruak nen yiluk akla biktaga mende eti kwak ma,” pikpak dikbalok, inatuam waku dogoni o, yiluk yoragage. 16Nen ir Ar mutok lagwi mende enogo, roti nininggimo dek kalok yonerage o, yiluk yir lagugwa. 17Yugwi ar Yesus yenggak daga lagagerek, “Kir nenaluk roti dek wene yugwi agotik? Kir auwan dik banegakdek dogolir yugwi agotik kinagi o? Kir kiniliti akpir arar a? 18#Yer. 5:21; Yeh. 12:2; Mrk. 4:12Kir kinil werek ogwe, kinil kegekdegar kinagi. Kir kinaruk werek ogwe, kinaruk kulkekdegar kinagi o. 19Ir akuni inebe lima ribu paga, roti ugurogo wogoragagimo, nalok inelabur nen ndinogo birugwa enogo, kir tu mende paga yagakugup? Ir wene onggo yogu dogolir?”

“Tu dua belas paga arar,” yagakugu o yiluk, yorugwa. 20“Tuguluk, ir akuni empat ribu paga, roti lima paga nowak nen yiluk, ugurogo wogoragagi ernogo, ugurik ndin agagemo birugwa enogo mburim tu menden ande kerok togon yagadogo birugup?”

Yoragi nanggige, ir nogo nen, “Nininggi tujuh paga arar yagar kugu o.”

21Yogu nanggugwa, Ar nen, “Yogondak ya, kir an auwan dik banenggekdek dogolir yugwi agotik kinagi o?” yiluk yorarige.

Yesus nen o Betsaida etoma ap il mbuk mende pano erogo birige wene

22Tuguluk, ar Yesus aworomi inom, o Betsaida paga arar unggwi lagugwa. Unggwi wagugwama, ir akuni yomanogo nen, ap il mbuk ambi ar Yesus uwagam wolok bi wagugwarik, u paluak nen yiluk, nggino yorugwa. 23Ar Yesus enogo ir inakba nen, ap enogo inggi pagago wolok, uma leger abel tekman nggwe wundi lagage. Wundi lagagerek, wuri waganogo ilimu bega, inggi il mbuk mo yemenogo paktega ekige o. Eka lagagerek, “Nena-nena ambi kil kegen a?” yiluk kinok ap il mbuk nogo yorige.

24Ap enogo il benggelatuk eloktekma laktaga lagagerek, yega dogolir, “Akuni tuan lagwi dagirik ogwe, o talek dagi o.”

25Yigi nanggige, tuguluk ar inggi ilimu ambi inom paktarige. Paktarigemo nen, il mbuk enogo pano aktuk, ye o nde o il yenggak telekma mondok arar il karige. 26Il pano etbega lagagerek, yogo kuma lan o yiluk lakbega dogolir, kiok paga Desa yoma mondok warugup o, yiluk yorige.

Ar Petrus nen kar Kristus arar keyagi o, yiluk yorige wene

(Mat. 16:13-20; Luk. 9:18-21)

27Lakbega lagagerek, Ar Yesus Awurumi inom o etoma nen, o Kaisarea Filipi, desa-desa dombok etoma arar lagugwa. Nen tuan paga lagu dogolir, ar Yesus nen ir Ar Awurumi enogo yoraga dogolir, “Ir akuni yoma nen, an ta inakla andar tagwi dagop?” yiluk kinok wokdarige. 28#Mrk. 6:14-15; Luk. 9:7-8Ir onggo yugu dogolir, “Ir akuni ambetak nen, kar eti Yohanes andartagwi, nen ir amberak nen eti Elia arar andagwi, nen ir ambetak nen ap Nabi mende arar kenam aga o, yiluk andar tagwi o.”

29 # Yoh. 6:68-69 Yugu nanggugwa ar Yesus nen, “Nen kir kwak nen an ta kinakla andar tagwi?” yoragi nanggige,

Ar Petrus nen yega dogolir, “Kar eti Mesias arar o,” yiluk yorige.

30Yogi nanggige, Yesus nen an nabok yi, akuni ambi mbililogo mondok yoragup o, yiluk inaruk wakige.

Yesus anggon panggon oba erogo burak ibibir yoragage wene inom, ar mutok lagu dogolir eku dogorak mende inom yoragage wene.

(Mat. 16:21-28; Luk. 9:22-27)

31Inaruk wakbega lagagerek, wene ambi inom inaruk waka dogolir, An Akuni Inakbur endar tagagi ernogo, mondok noba anggin panggin erogo banugun o. Ap inanggok dombok inom, imam-imam kepala inom, ahli-ahli taurat inom, kar eti ninungguk dek o, yiluk yoknituk, nebe min narugun o. Nen warek ninggi mbere ambi ekbiluk niluk arigin o. 32Wene telekma bagalogo yoragi nanggige, ar Petrus nen Yesus elokte, nomorogo wolok laga lagagerek, “Eterogo yugup o,” yiluk, wenemuk yorige. 33Ar Yesus nen ar ane aworomi amberak nogo il dagurogo bikdaga lagagerek, Petrus wenemuk yoga dogolir, “Kar Iblis yi, Allah iliti andak taga mutok ekikdek, akuni iniliti andar tagwi mende mutok ekwa ma, mondok lan o!” yiluk mberirige.

34 # Mat. 10:38; Luk. 14:27 Nen Ir akuni komago inom, ar aworomi inom, wai yoragagemo apma kuak eri wagugwama yoraga dogolir, “An mutnarek nugu dogorak andagwi kalok, kir ye mendek nde mendek eru kinakla wadok andagwi nogo mbo bugwi, nen o kari karo enogo piyal kodagwi ekbiluk mutnarek laurak o. 35#Mat. 10:39; Luk. 17:33; Yoh. 12:25Ta kwak nen ebe idi togo yiluk ndilkodagin kalok, ar ebe aluak nalarigin o. Nen, ta nen An nake paga inom, Pano Wene ake paga inom, aluak nalarigin kalok, ar ebe idi erogo ndil kodagin o. 36O agar taga yoma obogar onde wakbiluk kinggi werek arigin ar ogwe, nen kalep nalarigin kalok nena ake? 37Nenaluk kalep nalarigin kalok, alep onggo akdikmo nena-nena kwak ambi burak ndak kogop a? 38Ir akuni maduk mban ekwi dogolir, ap ar ane waganggugu yiluk tebe yiluk dogir tagodek mendek inanggedokla, an nendaga inom, nane inom, akuni ta nen an nendaga paga inom, nane inom, yorau enggadi nen dambe kigin kalok, Ap Akbur Ambiar endago nogo, o ambi paga, Ombae obangge dik duk erogo bumo, ir malaikat dogalek denek inom waga dogoluk, akuni nogo inendaga yurak enggadi dek ar yigin o.”

Currently Selected:

MARKUS 8: WLW

Highlight

Copy