MARKUS 7

Inumbu inomba ekulagugwa inobabur alep kwak mende wene

(Mat. 15:1-9)

1Ir ap Farisi mende inom, nen ir guru-guru agama mende inom, o Yerusalem nen, Ar Yesus oba wagugwa. 2Wagugwarik ma, ir nen Ar Yesus aworomi inebe mende negen eti, wene agama wene yugu ndak-ndak negen dek, ininggi i kokikdek erom nunggwi inil darugwa. 3Nenaluk Ir Farisi mende inom, nen ir Yahudi mende inom, ir obogar nen, inumbui nen eku lagugwa mende dik duk eku lagugwa. Ir ininggi korirtagwi awene diru mbalek ndak-ndak kokikdek kigik, erom engga nau mondok maga arar welagage o. 4Nena-nena nonggwa mende pasar nen kwak onggo mbaldiluk mo kalok, i tobalkikdek kigik naurak mondok maga. Ma, Wene ir inumbu inomba nen inobabur eku lagugwa mende etoma, akber ar pago dogolir, gelas i tobalu ake inom, mangkok i tobalu ake inom, ye mende nde mende tembaga paga erek mende obogar i tobalu ake inom, awene werek mban ar welagage o. 5Eterogo erir taga mende ma, ir Farisi mende inom nen ir guru-guru agama inom, ir nen Ar Yesus kinok yogu dogolir, “Ir Kar mukarek lagwi mende yi, nenaluk erom ininggi korekdek nengga? Ir wene nir ninumbu ninomba kologo birugwa ndak-ndak ekikdek eti nenaluk?” 6#Yes. 29:13Yiluk yogu nanggugwa, ar Yesus nen yoraga dogolir, “Kir ekwangger mende yuwak ekwa kir yi arar o. Ma, ar Yesaya nen kir kinabok mende wene elalogo yirige yi ebebar o;

‘Kir akuni yi, kinande paga an wogok danggwi ogwe,

iniliti perak An noba kunik dek, adikmo nggwe ar agarik o.

7Nenaluk wene akuni emerirar tagwi eti, akuni inane mende ar ogwe, ir nen An nane yuwak erogo emeriragwi ma,

we elamarogo arar yadek banunggwi agoktip o!’

8Wene Allah Wene diru mbalek kwak togok biluk, akuni inane diru mbalek kwak akbir akber pakbiluk agokip o.”

9Tuguluk Ar Yesus nen ambi inom yoraga dogolir, “Kir nen wene emerirar tagwi mende kwak pago dogu ake paga, Ar Allah Ane diru mbalek kwak monogo togok birtagwi o. 10#Kel. 20:12, 21:17; Im. 20:9; Ul. 5:16Ar Musa nen kinagwiya-kinombae inalon palku dogorak o. ‘Nen Ar ta nen agwiya ombae wene maduk mende yoraga kalok, ar eti ebe mondok min arar warurak o yiluk wene diru mbalek welagage o.’ 11Ogwe, kir nen wene yoragu dogolir: Ar ta nen kwak agwiya ombae wene yoraga dogolir, ‘Nagwiya nombae, nena-nena kir wokerau kinake pugurogo bigi mende, Ar Allah ake arar bigimo o,’ yiluk yega kalok, 12kir nen ar akuni eti agwiya ombae inake eru wene kolek mende eti arar eken o yiluk, oba anggin dek telek erogo arar bugwi kinagi o. 13Ma, Ar Allah wene eti tagalogo biluk, kir kinane mende medo kigik arar akuni yorar tagwi o. Wene yi ndak-ndak, pakalogar kir nen tagalogo birtagwi o,” yiluk yoragage.

Akuni maduk erninabir taga mende edo yoragage wene

(Mat. 15:10-20)

14Ar Yesus nen akuni pakalok ar wai yoralok yoraga dogolir, “Kir kinakla dirogon ebertaruwak nen, wene kinaruk dirogon kolalku dogoni o. 15Ye mende nde mende nunggwi mende eti paga, akuni maduk erinabir taga mende dek o. Ogwe, wene inilitimo nen ebek diluk wundir taga eti paga mban ar, akuni maduk erinabir taga mende o. [16Etiar ma, kinaruk werek kalok, dirogon arar kolalku dogoni o, yiluk yoragage.]”

17Yoraga lagagerek, akuni nogo togok dalok, uma unggigi nanggige, Ar mutok lagwi mende nogo nen, Kar ugu darogo negen yorniragen enogo, wene enggen dirogon yorniran o, yiluk yorugwa. 18Yiluk yogu nanggugwa, ar nogo nen, “Wene yigi eti, kir kinom dik bigik dek ar a? Ye mende nde mende tekman nggwe nen akuni inakla onggegetek paga, maduk inoba arir taga mende dek o, yiluk kir kinunggu dek ar a? 19Nenaluk Nunggwi mende yemenogo, iniliti akla lektaga mende dek o, ogwe inelabur akla laga lagartek nen inamodoma nggwe wundi taga enogo kir kinungguk dek a.” Wene ebe eta yirige paga, ye mende nde mende nau maga biluk welagugwa mende yemenogo, obogar nunggu dogu ndak o, yiluk, wene mbalkige.

20Yanogo lagagerek tuguluk ambi yoraga dogolir, “Kinilitimo nen wulketek paga arar maduk erkinabir taga mende o. 21Nenaluk? Akuni inilitimo nen, ye maduk nde maduk erurak ebekwi, nen ebeku dogolir: kumi ap maduk erinabu ebekwi, akuni inamendek kimaru ebekwi, ap waru ebekwi, 22Kumi ap inakburi oba kunikmo erinakwi, ye mende nde mende wadok-wadok erir nugwi, maduk erurak mban eberir nugwi, inakla nggodokbak akuni nuk puk erogo bagwi, wene inenggadi wu warek negen mban erir nugwi, ir kalok nenaluk eka yiluk nggodo mbalogo erir nugwi, Roh Kudus abok mbalkwi, iniliti yadek datar nugwi, inadik wadok andagetek paga mban wogok batar nugwi. 23Ye wene nde wene yi, kinilitimo nen eber biluk wulketek paga, akuni maduk erinabir taga mendek o,” yiluk yoragage o.

Kwe ambi iliti Ar Yesus ebebar andalok oba panggolkige wene

(Mat. 15:21-28)

24Yoralok, o etoma mbo biluk, o Tirus (akuni Yahudi mende inuma dek, ogwe akuni wedek mende inuma) etoma unggwi lagage. Onggega lagagerek, o ambi palek ma unggwi lagagerek yomenogo dogolir, “Akuni inil nagwi kau, kimago dogik,” yiluk andarigerek ogwe, ndak dek. 25-26Nenaluk, kwe ambi Yahudi mende dek ogwe, ebe kwe Yunani mende ma, ar endak lagagemo eti, daerah Fenisia kota Siria paga mende ma, ar agadak kodak kugi irimbo ilitimo unggirigerek mo, Ar Yesus wagage aruk kolal diluk, ar uwagam wagage o. Waga lagagerek, apma tebe yiluk, akba werek-werek dogolir, “Ae, nombae!” yiluk yoga dogolir, “An nagadak kodak ma, kugi irimbo ilitimo unggirigerek ma, nggigilogo wulakbinok nen yiluk, aee nggino lak yokigi o, Nombae.” 27Yorigi nanggige, ar Yesus nen, “Ir elege inagarom pipak ndonggorogon nenggekdek kigik, inake dago enogo yangge wogoraurak eti maga o.”

28Yorigi nanggige, ar kwe nogo nen, “Arar ogwe, Nombae! Elege nogo inarom nunggwi dagik, erom enggen ininggimo nen yumbuk togon wuketek enogo eti, yangge arar nertaga mende o,” yiluk yorige.

29Yorigi nanggige, Ar nen, “Kar wene pano kakla andalok yegen eti paga, kugi eti kagadak ilitimo nen muk lelok togon wulke o, ma ibar kuma lan o,” yiluk yorige.

30Yorigi nanggige, uma laga lagage, agadak enogo kugi ilitimo nen wulkigemo, windik werek ma il ka lagage.

Yesus nen ap aruk dogu mende pano ekige wene

31Etegerogo ekdega lagigerek, ar Yesus nogo nen, o Tirus togokdiluk, o Sidon paga nggwe tu, i danu aik Galilea paga nggwe arar lagage. 32Ari lagigerek ma, ir akuni etoma nogo nen, ap aruk dogu mende wolok Ar Yesus uwagam bi lagu lagugwarik, Ar Yesus nen inggi okbak pakta waru yiluk inakbarek-inakbarek dogolir yorugwa. 33Yogu nanggugwa, ir akuni obok kimarek togokbalok, ar aruk dogu enogo eme o, yotuk, imbirak ninadik lagu lagugwarik, ar arukmo penak-penak, Ar Yesus inggi onggol bega dogolir, auri waganogo bega, nen akdi inggi paktega ekige o. 34Ekbega lagagerek, Ar Yesus eloktenggen mbogor paga iliktaga lagagerek, akla tar nggok akber paga waka dogolir, “Efata,” yiluk yorige o. Nen wene eti enggen eti, “Abir Kurtarin!” yiluk o.

35Yogi nanggige, aruk kurtaga, ane dek enogo, ane werek aga, aga lagigerek ane ebe arar yirige. 36Ane ebe yigi nanggige, Ar Yesus nen akuni etoma welagwi enogo inaruk waka dogolir, akuni mondok yoragup o, yiluk yorarige. Ogwe ir akuni yomanogo nen, ir akuni amberak yoragik mban ar eku lagugwa o. 37Nen ir akuni yorar lagugwa mende yemenogo obogar nen, wik au yiluk yugu dogolir, “Ar nen obogar pano mban ar eke o. Nen ir akuni inaruk dogu mende inom, inane unggur dek mende inom, Ar nen pano erinake o!” yiluk abok wigalkugwa.

Currently Selected:

MARKUS 7: WLW

Highlight

Copy