MARKUS 15

Yesus wolok Pilatus ilka paga lagugwa wene

(Mat. 27:1-2,11-14; Luk. 23:1-5; Yoh. 18:28-38)

1O keyalek mondok, ir ap Mahkamah Agama mende inebe obogar inom, ir ap imam-imam inakepala inom, ir ap Yahudi mende inewai nggaindak mende inom, ir ap Allah guru-guru agama obogar inom, ir ibar-ibar kuak eku lagugwarik wene arar mbalkugwa. Wene mbalku lagugwarik, ar Yesus enogo kede marogo wolok Pilatus uwagam bilagugwa. 2Ar Pilatus uwagam bi lagugwama, Pilatus nen wene kinok Ar Yesus yoga dogolir, “Kar ebebar Ap nggok kendaga mbogor Raja Yahudi mende ebebar a, dek a?” yiluk yorigi nanggige Ar Yesus nen, “Kar nen yegen eti arar o,” yiluk yorige. 3Yorigi nanggige, Ir ap imam-imam inakepala enogo nen, ye wene nde wene ebe dek mende ar Ogwe, ar Yesus oba denggelogo birugwa. 4Etegerogo oba denggelogo bugu nanggugwa, ar Pilatus nen Yesus ambi inom ar kinok yoga dogolir, “Ye wene nde wene ebe dek mende ar Kar koba denggelogo birtagwi yoma kilkan o. Kar nen wene onggo ambi yoraurak andar tagan a, dek a? 5Etegerogo yorigerek ogwe, ar Yesus wene onggo yigikdek puk mondogar welagi nanggige, ar Pilatus enogo nen ap yi we!” yiluk biwakige.

Yesus mondok waruok o yiluk yirugwa wene mbililik

(Mat. 27:15-26; Luk. 23:13-25; Yoh. 18:39–19:16)

6Ir ap Yahudi mende dago nggok Paskah ake dakwi eti paga mban ar, ir akuni pakalok nen, ap kede warek mende yi kwak wulnira eme o, yiluk ar Pilatus nggino yogwi kalok, wulinaka lagage o. 7Akuni kede warek bar tagama penjara akla etoma, ir ap pemerintah nina'ir o yiluk inom wuk aku dogolir, akuni inakugwa paga kede warogo barugwa mende, ap ambi endaga Barabas etoma inom welagage. 8Itiar ma, Ir ap kuak erek enogo nen, ar Pilatus uwagam kuak eri wagu lagugwarik, nen ar nggino yogu dogolir, dago nggok Paskah ake daku dogolir, ap kede marek mende pigalogo wuldartagan enogo ma, ap ambi kede pigalogo woknerau nggino yokogo o, yiluk yorugwa. 9Yiluk yorugwama, ar Pilatus nen ir kinok yoraga dogolir, “Ar ap Raja endaga mbogor Yahudi mende yi, an nen kede pigalogo kir kinake wulkira warurak wadok a kina'ir a?” yiluk yoragige. 10Nenaluk, ir ap imam-imam nen, ar Yesus wene oba uwa yugu lagugwarik, ebe kede warogo wolok wagugwa eti, ar Pilatus akla paga nen yenggak darige eti paga arar o. 11Ir ap imam-imam inakepala yomanogo nen, ar Barabas kwak nir ninake wulnira eme o, yiluk yorurak paga, ir akuni pakalok yomanogo inakla nggagalkugwa. 12Etegerogo yugu nanggugwa, ar Pilatus nen ambi inom ar yoraga dogolir, “Etegerogo kalok, ap nggok endaga mbogor Raja Yahudi mende kir yitagwi yi, an nen nenggerogo erurak?”

13Yoragi nanggige, ir nen inane nggok taga yogu dogolir, “O kari-karo taga lambologo burak o,” yiluk yirugwa.

14Yorugwama ar Pilatus nen kinok yoraga dogolir, “Ogwe Ar nen maduk eke kwak nggi o?” yiluk yoragige.

Etegerogo yoragi nanggige ir nen inane mondok nggok togo yugu dogolir, “O kari-karo taga lambologo burak o,” yiluk yirugwa.

15Ir akuni kuak erek yomanogo mondok inane nggok taga yugu nanggugwa, ar Pilatus nen ir iniliti yanggo yuak nen yiluk, ar Barabas enogo ir inake kede pigalogo wuliragage. Etegerogo ekbiluk Ar Yesus enogo ndugi mburak mbarak wakbiluk, o kari-karo paga lambologo buak nen yiluk wogoragage.

Yesus aik dagok mbaik dagok yorugwa wene mbililik

(Mat. 27:27-31; Yoh. 19:2-3)

16Wogoragagemo, ir ap inarige werek tentara nen ir inewe ap nggok Gubernur werekma, wene uwak dologo amburu mbalir tagama pengadilan lagugwa. Ir tentara yomanogo Kuak eruak nen yiluk, inayonggo birugwa. 17Inayonggo birugwa yomanogo kuak eri wagugwarik, ar Yesus tu jubah elokte ungu eti yikbugwi, alebuak taga mumun adok werek mende mahkota ndak-ndak mendagago, nen enogo yikbirugwa. 18Etegerogo erogo bugu lagugwarik, ir iniliti dakor taga keyagi wakbugu dogolir, “Wa! Ir ap Yahudi mende inewe Raja kendaga mbogor kar arar kago o!” yiluk yorugwa. 19Etegerogo yogu dogolir, ndugi paga alebuak tagalkwi, ir inawori ar Yesus oba bugwi, nen iniliti dakor taga inendop anggul yunggu yiluk, inur wandutek dogolir alon palkugwa. 20Etegerogo ekbiluk nen, obando kanggu lagugwarik, tu jubah elokte ungu mende yikbirugwa enogo, nggorogo biluk, akdipmo ar Yesus iyom pakean iyoktaga yikbirugwa. Etegerogo obok yikbugu lagugwarik, o kari-karo taga lambologo buok nen yiluk wolok tekman nggwe wulkugwa.

Yesus o kari karo taga warogo lambologo birugwa wene mbililik

(Mat. 27:32-44; Luk. 23:26-43; Yoh. 19:17-27)

21 # Rm. 16:13 Wolok lagunem tuan odo paga etoma, ap ambi endaga Simon, ai o Kirene mende Aleksander o, Rufus o inombae, kampung nggwe nen kota laknen yiluk iliti ugunar waganem, inom abuk agu lagugwarik, “O kari-karo erek yi ugu waganin o,” yiluk inane obatne paga, panggok togon ar yorugwa.

22Nen Ar Yesus enogo arar wolok o endaga Golgota, nir ninane paga “akuni inalebuak kodogum nggililigem,” etoma arar wolok bilagugwa o. 23Wolok bi lagugwarik Anggur amburu inom, ambi kondali talek endaga mur eti amburu inom, yidak wudak erogo biluk, ar Yesus nawak nen yiluk wogorugwarik ogwe, Ar nalokdek damber karige o. 24Nen ir nen o kari-karo paga lambologo biluk, o enogo menogo birugwa. Nen Ar iyom pakean nggolalek enogo, ta kwak kodagin yiluk, o mbuk tenggelogo yi kwa yi kwa ekugwa.

25Ar Yesus o kari-karo paga lambologo birugwa enogo eti, o keyalek jam 9 paga ar ekugwa. 26Tuguluk o kari karo enogo enggakbumo, “Yahudi mende inewe endaga mbogor Raja yi arar o,” yiluk, wene ar waru edo oba birugwa enogo diru mbalogo birugwa. 27Lambologo bugu lagu lagugwarik, ar Yesus eraklilu penak-penak, ap mbere inilmudu waganggwa mende, o kari karo paga inadik ndak dombok lambologo barugwa.

[28Ap eta erinakugwa mende eti, Alkitab akla diru mbalek ebe yegerogo: “Ir akuni inakla paga andagun eti, Ar ogwe maduk ekwa mende ar o, yiluk inakla andagun o.”]

29 # Mzm. 22:8, 109:25; Mrk. 14:58; Yoh. 2:19 Tuguluk ir akuni ambetak etoma nggwe lagugwa mende nen, ir inalubak yedo mado eku dogolir, “Keik, An Allah Ai Palek miyalogo biluk, akdipmo palka neyagik, nogo mbere ambi yigin o, yiluk yirigen ernogo, 30kebe o kari-karo paga nen mbo wura eme nda, kebe ndilau ndak kalok,” yiluk yorugwa. 31Ir ap Imam-imam inakepala o, nen ir guru-guru agama o, etegerogonar ar nin yogik eku dogolir, “Akuni wedek mende kwak, Ar nen ndilinaka lagarik ogwe, Ar Enggawerek kwak ndilau ndak dek o. 32Ar Israel mende endaga mbogor, Raja ndilinakwa mende ebebar kalok, o kari-karo paga nen, wura waga nir ninil kugu dogoluk kalok, nir niniliti Ar oba ebebar andawok nen o!”

Ir ap mbere, Ar Yesus inom o kari-karo paga lambologo barugwa yanogo nen ogwe, etegerogo ar maduk-maduk yorugwa o.

Ar Yesus kanggige wene

(Mat. 27:45-56; Luk. 23:44-49; Yoh. 19:28-30)

33O etinem, dinggagane odo kirogon jam dua belas ndak-ndak, o arar amum diduk yiluk werek kigik, jam tiga kudi arar o mbiyalkige o. 34#Mzm. 22:2Nen o keyanggwi jam tiga paga eta, Ar Yesus ane nggok paga yega dogolir, “Eloi, Eloi, lama sabakhtani?” Yiluk yirige enggen eti: “Nombae Allah o, Nombae Allah o nenaluk An togokdanggen o?” yiluk yirige o. 35Ir akuni yomanogo welagugwa mende nen, ar Yesus ane yega inaruk kolalku lagugwarik, “Wadigi wae, ar Elia wai yorir taga o!” yiluk yirugwa. 36#Mzm. 69:22Ar ap ambi ir inanggedokla yanogo nen, ibar-ibar lagagerek, i wogoru arar ekige. Ekbiluk nen, o mbuduk irep paga kunogo bega lagagerek, anggur amburu ade werek mende enogo paga yidak wudak erogo, Ar Yesus andema bega dogolir, yegerogo yirige, “Yogo pugarni, ar Elia watuk nen, o kari karo paga nen nggorogo wurabi waga ninil kuwok nen o,” yiluk yirige. 37Etegerogo yoraga kigik, Ar Yesus ane nggok paga naik yega lagagerek, Ar iliti arar werok togon kanggige o. 38#Kel. 26:31-33Iliti werok togon arar kangga kigik, Ar Allah Ai Palek ma kain horden tugunik welagage enogo, odo kirogo ugubaga ogona nggwe nen kogonanggwe nggaguk yirige o. 39Ar ap tentara inewe, Ar Yesus o kari karo paga warek werekma, ilka paga welagage enogo Ar Yesus kangga dogolir obogar, ertagage mende yomanogo, obogar il kega lagagerek, ar tentara inewe eti nen yega dogolir, “Ap yi Allah akbur ebebar o!” yiluk yirige.

40 # Luk. 8:2-3 O etala, ir kumi ambetak o elokte etagage yomanogo, loknengga negen nen inil welagugwa. Ir kumi yomanogo inebe eti Salome inom, Maria Magdalena inom, nen Maria Yakobus agwiya ngger lerago inom, nen ar Yoses o. 41Ir kumi inebe yi, Yesus o Galilea werekma Ar mutek lagu dogolir yamak kugu lagugwa mende. Nen ir kumi ambetak pakalok etala welagugwa eti, ar Yesus inom o Yerusalem wagugwa mende obogar welagugwa o.

Yesus warek kwiyonla birugwa wene

(Mat. 27:57-61; Luk. 23:50-56; Yoh. 19:38-42)

42-43Ar Yesus enogo kanggi nanggige, o kubenen tamban erurakma pik puk erogo bugwi paga, o ki agi nanggige. Ir ap Mahkamah Agama enogo mende ap ambi endaga Yusuf, ai o Arimatea mende, ebe alon palek mende ma, “Ar Allah apma banuwak o,” yiluk tokega werekma, obade degar, ar Pilatus uwagam laga-lagagerek, Ar Yesus ebe warek enogo woknirin o, yiluk nggino yori lagage o. 44Nggino yogi nanggige, ar Pilatus enogo nen, obok kangge o yiluk yirugwa aruk kolalka lagagerek, iyo, yiluk ap tentara inewe yonggo lakbirige enogo wagi nanggige, Ar Yesus obok kangge a, dek a, yiluk kinok wokarige. 45Tuguluk, ar Pilatus ar ap tentara inewe nen wene onggo yorige arar aruk kolalka lagagerek, ar Yusuf enogo ebe warek wagani lau ndak o, yiluk yorige. 46Yoragi nanggige, tu pakean endaga kain linen moda tabak ambi onggo kunogo wolok, ebe warek o kari karo paga nen wurabi waga lagagerek, kain linen enogo paga pirik-perek dinggilkige. Dinggilogo akuni warek mende bartagama kurtaga nggila erek werekma, etoma arar birige o. Etegerogo bega lagagerek, kwiyon akuni warek batagama ernogo, nggir tabak nggok paga tu lakbirige. 47Ebe onggol dirige enogo, ir kumi Maria Magdalena o, Maria ar Yoses agwiya o, ir inil paga ekugwa.

Currently Selected:

MARKUS 15: WLW

Highlight

Copy