MARKUS 16

Yesus iluk atuk menagage wene

(Mat. 28:1-10; Luk. 24:1-12; Yoh. 20:1-10)

1O hari Sabat obok ekbiluk, ir kumi Maria Magdalena o, Maria Yakobus agwiya o, kwe Salome o, Yesus warek nogo oba, o enggen amburu obari pano mende dabulogo buok nen yiluk, onggo kuni lagugwa. 2Onggo kun biluk, ir kumi enogo o ibibir Minggu enogo paga, o keyalek molinggi dagi wagagemo, kuburan yomanogo arar lagugwa. 3Tuan taga lagu dogolir, ir-ir wene yir lagu dogolir, “Yigom tu larek enogo, ta nen kurogo danggulogo lakbu yamak ninagin o?” yiluk wene mbalir lagugwa. 4Eterogon yir lagugwa eti, nggir tu larek eti nggok kado, anggin ambik mende ma yir lagugwa. Nen arar panggo yi lagugwarik, inil lakugu lagugwa, yigom tu larek enogo koknalogo lagabek, ande kurik inil karugwa. 5Ir inil kalok, iniliti iyau yiluk, arar kwiyonla akuni warek mende bartagama yomanogo unggi lagugwa. Unggugu dogolir, Ininggi ebengga nggwe yomanogo, ap lerago iyom jubah putih yugu korek inil karugwa, korek werekma ir kumi enogo inil kugu lagugwarik inagur ambik lagugwa.

6Ap lerago enogo nen yoraga dogolir, “Kinobade andagup o! Kir Yesus o Nazaret mende, o kari-karo paga warogo lambologo bega enogo kwarir wagop o. Ar ebe yomala dek o. Ar obok iluk atuk menaga o! Kinil kani o, Ar ebe warek winogo begama akdip yoma. 7#Mat. 26:32; Mrk. 14:28Kir yogondak ya paga arar lani o, wene yi abok mende, ir Yesus aworomi dua belas mende yoralok, nen ar Petrus yegerogo yorno o,‘Kir o yoma auwan kinagik, Ar alebagik o Galilea ari lagama o. O etomala Ar ebe kir kinil kugun o. Nen wene alebagik Ar nen yokiraga laga enogo ndak-ndak ar etagage o.’”

8Ir kumi enogo inobade mondok ertatuk, o kwiyonla yemenogo ibar-ibar dambe kalok kode lagugwa. Nen wene ekugwa mende akuni amberak ugunar mondok yoralokdek, nenaluk ir inobade ambik ertagugwa paga nen.

BUKU MARKUS ALEP KWAK MBALKUGWA MENDE MUTOK IREPMA MBALEK YEGEROGON

Ar Yesus nen kwe Maria Magdalena il nawak nen yiluk telekma agage wene

(Mat. 28:9-10; Yoh. 20:11-18)

9[Ar Yesus akuni kambir tagama nen obok iluk agagerek, O keyalek hari Minggu paga, alebagik kwe Maria Magdalena il neyawak nen yiluk, Ebe telekma etagage. (Kwe Maria eti, alebagik Yesus nen kugi inebe 7 taga akla nen nggigilogo wulakige mende ernogo.) 10Etegerogon ma, ar kwe Maria Magdalena enogo, Ar Yesus ogari warekma kumbi de yugwi welagunem inoba lagagerek, wene ertagage mende yomanogo mbililogo yoragage. 11Ogwe, ar kwe Maria nen Ar Yesus obok iluk aga nil kigi yirige enogo, inaruk kolalkugwarik ar ogwe, ir nen ebebar o yiluk andalokdek o.

Ar Yesus aworomi inebe mbere inil nawak nen yiluk enam agage

(Luk. 24:13-35)

12Etegerogo ekbiluk, Ar Yesus inil nawak nen yiluk, ir Ar Aworomi inebe mbere enogo, o kampung ambila luok nen yiluk lagunem, Ar elokte adik mende negen ar, ir inoba telekma ertagage o. 13Etiar ma, ir enogo iniyok taga wagu lagugwarik, inokbagi ambetak wene etagage mende yomanogo mbililogo yoragugwa. Ogwe ir iniliti ebebar o, yiluk andalokdek ar o.

Ar Yesus aworomi mutek lagwi mende inil nawak nen yiluk kenam agage

(Mat. 28:16-20; Luk. 24:36-49; Yoh. 20:19-23; Kis. 1:6-8)

14Yabongga Ar Yesus inil nawak nen yiluk, Aworomi mutek lagwi mende inebe 11 paga enogo, kukbagane erom nunggunem telekma ertagage. Ar Yesus inil nawak nen yiluk telekma etari waga lagagerek, ir akuni amberak Ar Yesus obok iluk agage inil kalok, yoragwi yomanogo ir nen, ebebar o yiluk iniliti dikbigidek inalebuak nggir ndak-ndak tu larek welagunem, inenggadi warogo wenemuk yoragage. 15#Kis. 1:8Ar Yesus nen ir yoraga dogolir, “Pano Wene Ar Allah Ane yege mende enogo, ir akuni idil unggur etoma obogar inaruk koluak nen yorano o. 16Ir akuni iniliti ebebar andagikdek mende, yabongga hukuman wogoragin o. Etegerogo ogwe, ir akuni iniliti ebebar andagun mende eti, ima wukdano, nen yabongga ir inebe ndilkodagun o. 17Iniliti ebebar andaga yenggak erogo, ir akuni eti nen An nendaga paga ye kugi nde kugi mugogo wulinakwi, nen ir nen yi akuni ndik akuni inane paga inilu atuk yugu dogogun o. 18Ir nen wado aik mbalinaka, nen i mum dabulik inom wogoramo nugun ogwe, inebe wartarugun dek mondok o. Ir nen akuni u warek mende inalebuak taga ininggi denggekbugwi kalok, ir akuni yomanogo u inoba dek ertaga dogogin o.”

Yesus Mbogor taga dagarige

(Luk. 24:50-53; Kis. 1:9-11)

19 # Kis. 1:9-11 Ar Yesus ir inom wene obok mbalka lagagerek, Ar ebe mbogor taga dagarige. Nen etomala Ar Allah imbirak inapma balok dogogun o. 20Etegerogo ekbiluk, ir Ar Yesus aworomi mutek lagwi mende yomanogo ya paga nda paga, o idil unggur lagu lagugwarik, Pano Wene Allah Ane yirige mende yomanogo, emerirar lagugwa o. Ar Ninombae Allah endaga mbogor nen yamak daga kigik, ir nen Ar eyabu erir lagwi, nen wene yoragwi yemenogo apma dik yuak nen, elalin erubuk mende telekma pak kalok ekwi paga, ir nen yoragwi enogo ebebar mende wene arar ertagage o.]

WENE IREPMA YA BUKU MARKUS ALEP KWAK MBALEK PAGA OBA LAMBOLEK MENDE

[9Ir kumi yemenogo ar Petrus ogari inom inoba lagugwarik, wene ar ap lerago nen yorarige mende yemenogo ugu nggaruk togo mbililogo yorarugwa. 10Tuguluk Ar Yesus awurumi inobaru, wene pano iluk mende enogo yorar, o timur nggwe nen barat nggwe kudi arar lagugwa o.]

Currently Selected:

MARKUS 16: WLW

Highlight

Copy