LUKAS 1

Ibanini inilu erogo wene

1Teofilus kiliti kobabur pano yanggolek mondok o.

Ir akuni pakalok nen ye wene nde wene, nir werekma etagage mende etoma diru pik pak enggedogo diru mbalogo bega o. 2Nen ir inebe akuni alebagik eka inil karugwa mende eti nen, nir yornirarugwa ndak-ndak, diru mbalku dogolir, nen wene ebe yorar lektagwi o. 3An wene obogar alep etagage mende etoma, etagage ndak-ndak dik dak mbenagago, Tuan kar kake kilu aruwak nen yiluk, diru elokte pik pak kwalogo mbalurak nakla paga pano andagi o. 4An eki eti, Tuan kar ebebar mende kilu aruwak nen yiluk, eki o. Nenaluk Tuan kar wene ebebar mende eti, ebebar o, yiluk kilu aruwak nen o.

Yohanes Pembaptis endak tarigin abok yirige wene

5 # 1Taw. 24:10 O Yudea#1:5: Yudea: Yege yi ir akuni Palestina mende obogar yorage o. etoma, ap Herodes endaga nggok werek kigik, ap imam omanggi endaga Zakharia welagage. Ar ebe imam-imam ap Abia mende inom welagage. Agwe endaga Elisabet, ar ebe ir imam mende paga wigalek ar o. 6Ir agun agwe imbirak iniluk dogolir, ir eku lagugwa eti, Ar Allah adeknggen welagage o. Ir imbirak wene eru yirige mende inom, wene Hukum Tuhan yirige mende inom, mondok dikbiluk eku lagugwa. 7Ir imbirak inak inakbur elege dek welagugwa. Nenaluk, kwe Elisabet ar yibidi welagage, nen ir imbirak ndak-ndak obogar kedau agugwa o.

8O ambi paga, ap Abia aworomi denek inom yabu erurak panggo yi wagagemo, Allah ilka paga, ar Zakharia yabu imam erir taga mende mendek, eka lagage. 9Tuhan Ai Palekma kemenyan kali kuni unggurak paga, o mbuk ta gwak oba arigin yiluk, ir imam-imam nen waganggugwa mende, ar Zakharia oba agigemo, kar Tuhan Ai palekma unggurak o, yiluk yorugwa ma, nen ar Zakharia kemenyan,#1:9: Kemenyan: Eti kali kun degetekma obari pano mondok ma, Tuhan Ai palekma tamban eku dogolir, kali kunggu lagugwa. kali kuni unggirige. 10Akuni pakalok tekman nggwe tamban ekwi kigik, o kemenyan enogo kali kuni unggirige. 11Etanogo ekanem ar, malaikat Tuhan mende ar Zakharia oba inggi ebema nggwe, meja kemenyan kali kuni tagama ndalek eragalu kenam ari wagage. 12Kenam arigi nanggige, ar Zakharia nen malaikat enogo il kalok, iliti dibi yiluk obade agage. 13Ogwe ar malaikat enogo nen yoga dogolir, “Zakharia wae! Kobade agup o, tamban eken Allah obogar aruk kolalke o. Kagwe, kwe Elisabet elege ap arar endarigin o. Nen ar endaga Yohanes arar talino o, yiluk yorige. 14Elege enogo endak taga kigik, kar kadeknggen aga nen akuni obogar inadeknggen agwi erugun o. 15#Bil. 6:3Ar Tuhan nen kologo birige paga, ar ebe ap nggok ar arigin o. Nen ar i anggur inom, nen i iniliti nggagali taga mende inom, nengga dogogin mondok dek o. Endak tarigin kudi paga nen, Roh Allah eti oba dulik dogogin o. 16Ar Yohanes nen, ir akuni Israel mende obogar iniyok paga woginarek, Tuhan Allah ir mende oba ba ligin o. 17#Mal. 4:5-6Ar ebe eti, Tuhan nen mirogo yonggo lakbi wagage mende etatuk, ar ebe obatne alon palek Elia ndak-ndak etarigin o. Ar nen ombae akbur imbirak dambulinaka, nen akuni tebe yiluk ekidek mende, tebe yiluk iniliti pano ebebar andugwi mende erogo baga, erigin o. Eta eterogon ma, ar nen akuni ambik dogalek, Ar Tuhan ake aruwak nen yiluk, mor-mor erogo bagin o.”

18Yiluk yorigi nanggige, ar Zakharia nen, “An wene eti ebebar etarigin o, yiluk nakla andagin eti nenggerogon nda?” yiluk yorige. Yoga lagagerek, “An obok kedau agi o, nen an nagwe ogwe obogar kedau aga ar o,” yiluk yorige.

19 # Dan. 8:16, 9:21 Malaikat enogo nen onggo yoga dogolir, “An yi Gabriel arar o. An Allah eyabu erir taga mende, Ar nen wene yi yori lan o, yiluk lakbani wagama, yokiri wagi o. 20An nen nena mende yigi etoma, etari waga paga kugun ar o. Ogwe kar ebebar yiluk andagikdek ma, kar kane yigikdek mondok kigik; an yigi ndak-ndak etari waga kudi paga ari ligin o.”

21Etanogo paga, akuni obogar ap Zakharia torek welagugwa. Ar yi Tuhan ai palekma arambik mondok ar werek yi nenaluk, yiluk ebekugwa.

22Nen ar wundi waga lagagerek, ar ane ambi, ir mondok yoralokdek arar o. Ar ane paga yugwak inggi damok paga mban ar yoraga, nen ane unggukdek mondok arar welagage. Etegerogon etarigi nanggige, ir Akuni obogar nen, yogo Tuhan ai palekma akman nggwe etoma, wene ambi elalke mende il kalok wundi waga o.

23Tuhan Ai palekma eru mende obogar eka lagagerek, ar Zakharia enogo uma arar lagage o. 24Etanogo dogolukdek ar, kwe agwe Elisabet arar elege abuda agigemo, nen ar uma nen inggi tur lima paga wulkikdek mondok welagage o. 25Nen ar yega dogolir, “Yogondakne, Ar Tuhan an yamakneyage o, ma an yiduk maduk yoknugu lagiya ernogo, pano erogo banengge o.”

Yesus endak tarurak yirige wene

26Kwe Elisabet tur enam paga ekbiluk nen arar abuda agage, Allah nen malaikat Gabriel o Nazaret kota agar Galilea paga etoma lan o, yiluk lakbi wagage. 27#Mat. 1:18Ar Gabriel kodak endaga Maria, ap inom noge yigikdek eti bika lan o, yiluk lakbirige. Kodak ap inom noge yegedek eti, ap imbirak wene warirtaga eti endaga Yusuf, ap Raja Daud mende wigalek. 28Ar malaikat enogo kodak Maria oba wagagerek nen, wene men yorige, “Kole, kagurakma, kar Tuhan nen adeknggen adik denek mende arar koba bagagerek ma, Ar Tuhan ebe kimbirak dogogin o!”

29Ar malaikat nen, kwe Maria wene yorige enogo paga agur lalok, wene an keyagi warnabi waga eti nenaluk, yiluk kinok akla paga nen ebeka lagage. 30malaikat enogo nen yega dogolir, “Maria, kobade agup o, Ar Allah adeknggen kar koba arar bagage o. 31#Mat. 1:21Kar arar kabuda arigin o, nen kagadak endak biluk, Ar Endaga Yesus arar talino o, yiluk yorige. 32#2Sam. 7:12, 13, 16; Yes. 9:6Ar Ebe ap endaga nggok mende etatuk, nen ar ebe Allah akbur yogu dogogun o. Tuhan Allah nen, Ar ebe, ar umbu Raja Daud welagage ndak-ndak erogo bigin o. 33Nen Ar ebe akuni Yakub mende wigalek etoma inake raja negen menatuk, ir inawene mbalka dogogin o. Nen Ar mende kerajaan eti, yi kudi o, yiluk arigin dek mondok o.”

34Ogwe ar Maria nen malaikat enogo yoga dogolir, “An ap ninom noge yitagodek ar ma, Wene yegen yi nenggerogon etarigin nda?” yiluk yorige.

35Yorigemo ar malaikat enogo nen onggo yoga dogolir, “Roh Allah kar koba watuk, nen Ar Allah obarne kar koba labokabi warigin o. Etegerogon ma, elege kar endarigin eti, oba maduk dek pano mondok, Allah akbur arar o. 36Kakla andano o: Kwe Elisabet, kar kimbirak kunik mende, Ar ebe obok kedau, ogwe ir akuni nen yugu dogolir, ar kwe yibidi o, yiluk yogu lagugwa ernogo, elege obok abuda agarik kigik, tur inggi enam bulan alka mbalke o. 37#Kej. 18:14Nenaluk Ar Allah nen yegetek kwak eti, mondok wedek ma mbiyok yirtagodek arar o.”

38Tuguluk Maria nen yega dogolir, “An yi Ar Tuhan ayedoman arar o; ma Ar akla andage ndak-ndak arar, an noba etaruak o,” yiluk yirige. Yigi nanggige, ar malaikat enogo, ar Maria dambe kalok arar lagage o.

Maria nen kwe Elisabet bika lagage wene

39Eti ekbiluk, ar Maria ibar-ibar o kota Yudea kurtaga etoma lagage. 40Nen ar ap Zakharia uma lagigerik, nen uma unggiluk, ar nen kwe Elisabet keyagi wari lagage. 41Eta eterogon ma, Maria Elisabet keyagi wakige aruk kolaldiluk, elege kwe Elisabet akla enogo abodok yirige o. Ma, Ar Roh Allah eti, kwe Elisabet enogo oba labori wagagemo, 42Ar nen ane yega dogolir, “Kumi inebe pakalok yoma ar ogwe, kar kwak ar adeknggen koba bagaga dogogin o! Nen elege kar endarigin eti, adeknggen oba bigin o. 43An yi ta agama nen, Ar Tuhan agwiya yi an noba waga nda? 44Kar an keyagi warnaka naruk kolka nggodek, elege an nelaburla yi, adeknggen nen abodok yege o. 45Kar kadeknggen togon o, kar Tuhan oba ebebar andagen paga, Ar nen yege eti, kar koba ebebar etarigin o!” yiluk yorige.

Maria nen, wa yiluk yirige wene

46 # 1Sam. 2:1-10 Kodak Maria nen yega dogolir,

“Nakla paga nen, Ar Allah wogokbir taga o,

47nen an nakla adeknggen pakalok kertaga eti,

nenaluk, Ar Allah ndilnakwa mende eti paga arar o.

48 # 1Sam. 1:11 An ayedoman maduk mende yi, an noba Ar akla eberek werek eti paga o.

O kuri dombok yoma yogondak yi paga,

An nadeknggen mondok ar o, yiluk yega o.

49Ar Allah obatne ambik mende eti paga ma,

wene nggok mende ambi, An noba erogo banengge o.

Ar endaga maduk oba dek arar dogogin o.

50Akuni endagago wigalarir wagu nggodek,

Ar Tuhan nen akuni Ar oba alon palogo, inobade dogir taga mende ernogo,

adeknggen inoba bagin o.

51Ar inggi obatne nggok mende paga,

Akuni iniliti woguk datugwi mende eti, tidik mbidik erogo baga,

nen ir eru inakla andega mende, nadok kadok erogo bagin o.

52 # Ayb. 5:11, 12:19 Ir ap raja-raja takhta paga nen ineyabu dek erogo balok, Nen ir akuni yiduk maduk welagwi mende enogo wogok bagin o.

53Akuni inakla ye abu nde abu welagwi mende, obabur pano eka paga, ndonggorogon erogo bagin o.

Ar inggi werek mende, inggi dek erogo biluk, mugogo wuldigin o.

54Nir ninumbui,

inane amburu yirugwa mutok,

Ar ayedoman mende Israel enogo yamakigin o.

55 # Kej. 17:7 Ar Tuhan eti, ane amburu yegetek mende oba mi ari tagodek o,

Ar nen Abraham oba akba karige mende inggukdek aru ndak dek o.

nen ar umbuwi wigalek mende, inaitok mendok dogogun o.”

56Eterogon yega lagagerek, nen ar kodak Maria enogo, kwe Elisabet imbirak welaga kigik, tur inggi kenagan negen welagagerek nen, yabunggane uma iyok paga lagage.

Ar Yohanes Pembaptis endak tagage wene

57Ar kwe Elisabet enogo ak endarurak korok arar panggo yi wagagemo, ak elege ap arar endarkige o. 58Endak tagagemo, ir akuni inom welagugwa mende inom, ar ewe awor yemenogo inom, Elisabet abok inaruk kuldiluk, “Ar Tuhan iliti pano nen, mondok akba kege o,” yiluk yirugwarik, ir obogar inakla adeknggen karugwa o.

59 # Im. 12:3 Ar elege enogo endago kigik, inggi delapan hari ekbiluk, sunat #1:59: Sunat: Ar Allah Ane amburu Abraham yorige mende wene yalogo bega dogolir, akburi elege ap endak tagwi kalok, inebe auwan umur 8 hari paga kigik, inayo agakdo irep mbalkwi awene endaga yugwi. eru paga wolok lagugwa. Nen Elege yi endaga Zakharia ombae endaga ndak-ndak ar taluwok, yiluk yirugwa. 60Mende, ar agwiya nen, “Dek o. Endaga Yohanes talugun o,” yiluk yirige.

61Etege diluk yorarigemo, ir yomenogo nen, “Kar kewe kawor inendaga eterogon dekma, endaga eti nenaluk talken?” yiluk, eterogon yirugwa. 62Elege enogo ombae Zakharia enogo ininggi damok paga yogu dogolir, “Endaga nggi talurak?” yiluk kinok yorugwa.

63Yorugwama, Ar Zakharia nen, Nggir mende diru mbalitaga mende, eti omanggi woknirni o, yiluk yirigemo wogorugwama, “Ar endaga Yohanes o,” yiluk mbalkigemo, we au, yiluk bi wakugwa. 64Wogok bugwi kigi etanogo ar, ar Zakharia enogo ane kurak yiluk, Allah keyagi warkige. 65Etege biluk ekigemo, ir akuni inom welagugwa mende yemenogo inobade mondok agugwa. Inobade atuk, wene etagage mende enogo abok, o Yudea ado paga nggwe etoma, mbililogo yorar lagugwama, wene eti wigalarir lagage. 66Etegerogon etagage akuni inaruk kolkugwarik, inakla paga kinok yugu dogolir, “Elege ebe nenggerogon etarigin nda?” Nenaluk, ar elege eti, Tuhan nen aruam mondok welagage o.

Zakharia nen Allah wogokbirige wene

67Ar Zakharia enogo, Roh Allah akla kerok togon unggirigemo, Tuhan wene yirige mende yega dogolir;

68“Ar Tuhan woguk buwok o,

Ar Allah Israel mende!

Akuni Ar Akburi yamak niyau paga, Ar ebe waga o.

Nen kede pigalogo wulak bagin o.

69Ar nen nir ap ndilinakwa obatne werek Daud umbuak, nen Ar ayedoman eti woknirage o.

70Ar o pagane kwak etoma ar, ir ap nabi-nabi pulogo barige mende etoma inobaru,

Ar Tuhan Ane amburu yirige eti,

71nir ir akuni tili mende ininggimo nen,

ir akuni nir ina'ir kuninabi taga mende ininggimo nen, ndilninabu ake nen o. 72Ir nir ninumbu ninomba inoba Ar iliti pano nen,

Ar ane amburu birige mende eti dikduk arar erigin o.

73-74Ar nir nombae Abraham oba kumbuk mbalka dogolir,

akuni tili mende ininggimo nen ndil ninabigin yiluk yirige o.

Nir Ar eyabu eru ninobade dek dogolir ekwi,

75nen ninggi nanggi Ar eyabu mban ekwi,

nen Ar iliti pano aru mende mban ekwi,

etegeron ekwi mondok niniluk dogogun kudi paga o.

76 # Mal. 3:1 Nakbur kar yokugu dogolir, nabi Allah mende, nggok lektek kar arar yokugu dogogun o.

Ar Tuhan wagikdek kigik, kar ndak lakbagumo, lalok,

Ar aruan mbililogo yaka,

77akuni Ar akburi mende, kir kinomaduk arar korogo binagaluk kalok,

kinebe ndilkinabigin o, yiluk yorar ligin o.

78Nir mende Tuhan eti, iliti pano akuni inakba ekwa o;

nen nir ndil ninabu paga arar wagage o.

O keyalek mondok,

mo il dagi warir taga ndak-ndak,

79 # Yes. 9:1 Akuni o amum mo welagwi obogar inom,

nen inobade nen welagwi mende inom, Ar akbinak mende obogar ninake yibaknira taga o.

Ar nen nir yinggin yonggon erogo,

tuan akuni iniliti dambulik, pano mondok dogir tagama nggwe binani ligin o.”

80Ar elege Zakharia akbur ernogo, ebe anggok arir laga dogolir, iliti inom agurengge inom, kode arir ligin o. Nen ar o waganekma, ye dek ma nde dek ma etoma welaga kigik, ir akuni Israel mende inoba kenam arurak, o pulik enogo paga arar ari ligin o.

Currently Selected:

LUKAS 1: WLW

Highlight

Copy