LUKAS 2

Ar Yesus endar tagage wene

(Mat. 1:18-25)

1O eta paga, ar ap Kaisar Agustus nen yega dogolir, akuni Kerajaan Roma mende obogar inendaga diru mbalurak o, yiluk wene wulakige o. 2Nen akuni inendaga ibanini ekugwa eti, ar ap Kirenius eti, o Siria paga etoma gubernur menatuk werek kigik ekugwa o. 3Ir akuni obogar, o kota ir inuma edo paga dombok, inendaga eruak nen yiluk lagugwa o.

4Nen ar ap Yusuf eti, o Nazaret Galilea paga etoma nen, ar ap Raja Daud eti umbu wigalek mende ma, ar Daud endak tagagemo, o Betlehem Yudea paga etoma, lagage. 5Ar Yusuf kwe Maria ar agwe wene warek mende ernogo, abuda kigik imbirak inendaga diru mbali lagugwa. 6Ir o Betlehem arar ari lagugwarik paga, ar kwe Maria elege il bagalatuk, endarurak arar panggo yi wagage. 7Nen arar panggo yi wagagemo, Ar ak manggwiya, elege wedak arar endarkige. Nen elege enogo arar endar tagagemo, Nen ir o nogo yumo telek dek agagerekma, Ebe endago kain paga pirik perek erogo, o palungan #2:7: Palungan: Eti ir akuni Yahudi mende nen, sapi inagangga mbalogo akla biluk wogora tagama endaga. akla gandum #2:7: Gandum: Eti padi talek ma, ir akuni Yahudi mende nen, gandum enggen mbalogo biluk tepung eku lagugwa. Ma tepung eti paga roti eku lagugwa o. agalok mbalek birugwa paga ndalogo windirugwa.

Ir malaikat mende nen, gembala-gembala inoba wagugwa wene

8Ir ap gembala-gembala, domba inaruam o kukbaga, todi anggup paga etoma arar welagugwa o. 9Ir inagur bikbak, ap Tuhan mende malaikat nen inoba arar menari wagu nanggugwa, Ar Tuhan akbinak mende eti, yibadogo inoba lakbigi nanggige, ir inobade mondok ambik arar etagugwa o. 10Ogwe ar malaikat enogo nen yega dogolir, “Kir kinobade arugup o! An pano wene ambi, kir kinake nen ir akuni obogar inakla adeknggen arurak mende awene wolok wagi o. 11Etiar ma, o kota ar Daud endak tagagemo, Ar Raja Ndilinakwa endaga Kristus Tuhan eti, yogondak arar endak taga o. 12Ebe yegerogon kinil kugun etnaga o: Elege ngger endago kain paga peralek, o palungan akla windik, kir kinil kugun etnaga o.”

13Etanogo medorogon ar, ar malaikat ernogo oba, ye malaikat nde malaikat enam ari wagugwarik, Ar Allah endaga wogok bugu dogolir, yegerogon yirugwa,

14Ar Allah lektek mende mbogor paga eti, kendaga nggok togo wogok bagago o!

Nen o agar paga yoma, ir akuni nen, Tuhan iliti adeknggen arurak mende ekwi ernogo, ir inadeknggen arar etaruak o.

15Nen ir malaikat mende ernogo, togok balok, o mbogor paga arar lagugwama, ir gembala-gembala ernogo, ar ambi yogik eku dogolir, “Ar Tuhan nen yoknera waga ndak-ndak, Nir o Betlehem wene elalkemo etoma ninil bika luok o,” yiluk yirugwa.

16Yugu lagugwarik, ir ibar-ibar arar lagugwa mende, Ar kwe Maria o, nen ar ap Yusuf o, nen elege ngger endago ernogo, o palungan akla windik birugwama inil ka lagugwa.

17Nen ir ap gembala-gembala ernogo, elege endago birugwa inil kalok, ir malaikat nen, elege ngger endago abok yirugwa mende ernogo, mbililogo yorarugwa. 18Nen ir akuni obogar inaruk kolalku lagugwarik, wi au, yiluk bi warkugwa. 19Ogwe ar Maria ernogo, wene yirugwa mende obogar, akla dogolir, iliti ebeka lagage. 20Ir ap gembala yemenogo, iniyok paga o onggama etoma lagu dogolir, Ar Allah kaitok mende Kar ar o, yiluk woguk bir lagugwa. Nenaluk, ir malaikat mende nen wene yirugwa ndak-ndak ar, etagagemo inil karugwa eti paga o.

Ar Yesus endaga talkugwa

21 # Im. 12:3; Luk. 1:31 Ar elege enogo endago kigik, ininggi delapan nogo yiluk, sunat arar ekugwa. Nen ir Ar elege enogo endaga, Ar agwiya akla abuda agikdek kigik yorige ndak-ndak, endaga Yesus arar talkugwa o.

Ar Yesus o Tuhan Ai palekma, Tuhan ake birugwa wene

22 # Im. 12:6-8 Eku lagugwarik, ar Yusuf o, nen kwe Maria o, ir akuni Yahudi mende, wene hukum Musa diru mbalkige yugu mutok, inoba korinaburak ake paga arar panggo yi wagage o. Ma ir elege endago enogo wolok, o Yerusalem etoma, Ar Tuhan ake burak paga wolok arar lagugwa o. 23#Kel. 13:2, 12Nenaluk, Hukum Tuhan paga etoma nen yega dogolir, “Ir elege ap manggwiya endago mende kau, Tuhan ake bagu dogorak o,” yiluk wene mbalek welagage. 24Nen wene Hukum Tuhan paga kolek ambi eti, ir inake tewe tekukur kodi nggulok imbirak a, tewe merpati kodi nggulok imbirak a, Tuhan ake burak wene kolek ndak-ndak, erurak yiluk andarugwa ar o.

25O eta paga, ap ambi endaga Simeon eti, o Yerusalem paga etoma welagage. Ar ebe ap pano mende arar, nen ar ebe Allah oba iliti um palek mondok dogolir, ir akuni Israel mende, Ar Allah nen menda ndilinabigin yiluk, torek welagage. Nen etegerogon werek kigik, Roh Allah nen ar aruam welagage. 26Nen Ar Roh Allah nen, kar ap Raja Ndilinakwa mende, ar Tuhan nen ane amburu yirige eti, Ar auwan endak tagikdek kigik, kar kambigin mondok dek o, yiluk yorige mende, ilu welagage. 27Ar Roh Allah nen, ar Simeon yamak kega kigik, Tuhan Ai palek ma arar unggi lagage. 28Nen Ar Simeon ernogo, elege endago enogo agamo wagangga lagagerek, Ar Allah endaga wogok bega dogolir,

29“Tuhan wae, yogondak Kar kane amburu yirigen ernogo, arar eken o.

Etiar ma, an kayedoman yi, niliti adeknggen paga arar kambigin o.

30Nenaluk, akuni Ndilinakwa Kar nen lakbi wagan eti,

An nil nen kundurogon arar kigi o.

31Ir ye ap nde ap inake,

Kar nen Ndilinakwa yi pulogo begen o.

32 # Yes. 42:6, 49:6, 52:10 Nen ir ye ap nde ap ninggalok mende etoma, Kar koba waruak nen yiluk, inaruan warumo etoma,

akbinak ndak-ndak arar yibalogo bagen o.

Nen akbinak eti paga,

ir akuni Israel mende inalon palku dogorak ake arar o.”

33Ar Simeon wene etoma yega inaruk kolku lagugwarik, Ar elege enogo agwiya ombae nen, wi au yiluk, bi wakugwa. 34Ar Simeon adeknggen inoba baga lagagerek, ar elege agwiya, kwe Maria enogo yoga dogolir, “Ar elege yi, Ar Allah nen, ir akuni Israel mende inalep dek erogo baga, nen inebe ndilogo baga, erurak ake pulogo lakbi waga o. 35Nen etegerogon ma, wene ir inakla tebelek welagugwa mende ernogo, buga laga o. Nen kir kinilitimo buru yigin eti, pisau aik mago paga talek ndalkinabigin o.”

36Nen ar kwe nabi anggok mondok mende ambi welagage. Ar endaga eti Hana, ombae endaga Fanuel. Nen ar suku Asyer mende. Nen ar tujuh tahun paga ap waganek welagagerek ogwe, 37tuguluk togwe birugwama, Ar Tuhan Ai palekma nen dambe kalok lagikdek kigik, umur inggi delapan puluh empat tahun arar ekige o. Nen Ar Allah eyabu etoma eka dogolir, tamban inom, puasa inom, ninggi nanggi dindaga kukbaga, eka lagage. 38Etiar ma, etinem ar waga lagagerek, Ar Allah keyagi waka dogolir, ar Elege enogo abok, ir akuni Ar Allah nen, o Yerusalem paga welagwi mende, kede pigalogo baurak mende abok yoraga lagage.

O Nazaret iyok paga arar lagage.

39Ar Yusuf o, nen kwe Maria imbirak, Hukum Tuhan wene diru mbalek ndak-ndak arar eku lagugwarik, ir iniyok paga, o Nazaret Galilea paga etoma arar lagugwa. 40Nen Ar Elege enogo ebe nggok arir laga dogolir, nen obatne ambik arar etagage. Ar akla wene kolek mondok, Ar Allah nen inili kunik mondok arar ekige.

Ar Yesus Tuhan ai palekma unggirigerek ekige wene

41 # Kel. 12:1-27; Ul. 16:1-8 Ir Ar Yesus agwiya ombae ernogo, tahun ninggi nanggi arar, o Yerusalem paga etoma, Hari Raya Paskah ake, inom komarurak paga lagu lagugwa. 42Nen Ar Yesus arar umur dua belas tahun etagagemo, ir eritagwi ndak-ndak eruwok nen yiluk, lagugwa. 43Nen wene komakunem yemenogo inom eku lagugwarik, ir arar inuma lagugwa. Ogwe Ar Yesus, elege ernogo, o Yerusalem arar kigik, Ar agwiya ombae, inakla oba mi atuk arar lagugwama. 44Ir inakla nen, Ar ebe akuni dogalek lagunem yemenogo, inakla inom lektaga yiluk, lagugwa. Lagwi arar kigik, o ki arurak arar eki nanggige, ar ogariyak inom, nen akuni inom kunik mende yemenogo inom, inakla waga dogu a, yiluk kwarkugwa. 45Ogwe ir inom abuk atukdek mondok arar o. Etegerogon etarigi nanggige, ir enogo iniyok paga, o Yerusalem etoma arar kwarir lagugwa. 46Nen ir kwarir nugwi ar kigik, ininggi o mbere ambi paga arar ekbiluk, ar ebe o Tuhan Ai palekma dogogi nanggige kwarkugwa. Nen ar ebe, ir ap guru agama nen wene kinok korok dagak yogwi kalok, onggo yurak paga, aruk dogoganem kwakugwa. 47Ar wene ilu mondok, nen aklanggar pakalok dogolir, wene onggo yega kalok, ir akuni yemenogo nen, wi au yiluk, bi wakunem karugwa. 48Ir ap inanggok nen ogwe, wi au yiluk, bi wakugwa. Nen Ar agwiya nen yoga dogolir, “Nak o, Kar yi nenaluk erninaken nda? Kar kombae nimbirak, Kar kwakabir nggakbuk dida yogo o!”

49Yorugwama, Ar Yesus nen onggo yoraga dogolir, “Kir nagwiya nombae kimbirak, An kwak narkop nenaluk? Kalok nagwiya nombae kir kimbirak, wene An Nombae Ai palek ma, ari unggiluk dogorak wene enogo kir kinunggukdek a?” 50Ogwe, Ar Yesus wene onggo yirige mende inakla andalokdek mondok.

51Nen tuguluk ar Yesus, agwiya ombae inom, o Nazaret arar lagugwarik, ir inane aruk kolek mondok arar welagage. Wene etoma obogar, Ar agwiya ilitimo tebelek pago welagage. 52#1Sam. 2:26; Ams. 3:4Ar Yesus nogo, anggok arir laga, akla kolek etarir laga, nen Ar Allah nen iliti kunik eka, nen ir akuni nen owadok kugwi ekulagugwa.

Currently Selected:

LUKAS 2: WLW

Highlight

Copy