LUKAS 6

Hari Sabat abok kinok yirugwa wene

(Mat. 12:1-8; Mrk. 2:23-28)

1O hari Sabat ambi paga, Ar Yesus gandum ai yagoma nggweru laga dogolir, Ar aworomi nen,gandum eti enggen mbalkugwa o. Mbalku lagugwarik nen, Ir ininggi paga olin ndamuk ndamak erogo biluk narugwa. 2Ir ap Farisi inebe menden negen nen yugu dogolir, “Kir nen hari sabat paga ye mende nde mende eku dogogup o yiluk, nir mende agama paga wene mbalek enogo tagalkop eti nenaluk?”

3Yiluk yugu nanggugwa, Ar Yesus nen wene onggo yoraga dogolir, “Ar Daud akuni inom mende erom abu agi nanggige, ar nen ekige mende wene diru mbalek, kir nen yambenir tagwi a dek a? 4Wene hukum agama paga mbalek mutok eti, ir imam-imam kwak ar roti Allah ake begetek mende eti nunggu dogorak yiluk wene mbalek kigik ar ogwe, Ar Daud nen, Ar Tuhan ai palekma onggega lagagerek, nen roti Allah ake birugwa mende yemenogo ar narige o. Nengga lagagerek, tuguluk akuni inom mende yemenogo roti ambetak wogorarige.”

5Tuguluk Yesus nen yega dogolir, “O hari sabat yi, Ar Akuni Inakbur eti apma mende o!” yiluk yorarige.

Akuni inggi penak nggwe warek mende hari Sabat paga pano ekige wene

(Mat. 12:9-14; Mrk. 3:1-6)

6O hari Sabat ambi paga, Yesus uma tamban erir tagama wene emerira lagage. Etomala akuni ambi inggi penak nggwe min warek mende werekma, 7ir ap guru agama inom, nen ir ap Farisi mende inom, inebe we mende negen nen, Ar Yesus o hari sabat eti paga, ap eti oba u palka kalok, wene nanonggal yidu kalok ninom yuok nen yiluk inil welagugwa. 8Ogwe Ar Yesus nen, ir andugwi mende obok ilu agage o. Manen Ar nen akuni inggi penak warek enogo yoga dogolir, “Nilka paga ya menari eme o!” yiluk yorigemo, akuni enogo menatuk Ar ilka paga arar menari lagage o. 9Tuguluk Ar Yesus nen ir akuni eta welagwi mende yemenogo kinok yoraga dogolir, “Agama wene mbalek paga, hari Sabat paga ye mende nde mende eru ndak a? Pano mende kwak erurak a, arte maduk mende kwak erurak a? Akuni ndilinaburak a, arte maduk erogo baurak a?” 10Ar Yesus dagak-dagak obogar il bikdaga lagagerek, nen ar ap enogo yoga dogolir, “Kinggi lakbime,” yiluk yorigemo, ar akuni enogo inggi lakbirige. Yanogo inggi lakbega kigik, inggi arar pano ertagage o.

11Ogwe ir guru-guru agama inom, ir akuni Farisi mende inom, ir nen wenemuk pakalok yugu lagugwarik, ir nen Ar Yesus nenggerogon eruwok yiluk ir inane dambulkugwa o.

Yesus aworomi dua belas mirinakige wene

(Mat. 10:1-4; Mrk. 3:13-19)

12O eta paga, Ar Yesus tamban erik nen yiluk ado paga dagarige. Etomala, o ambi kukbaga, Ar nen tamban Allah oba eka mondok welagage. 13Yanogo arar o keyakigemo, Ar akuni Ar mutok lagwi mende obogar wai yoralok, ir yanogo inakla nen ap inebe dua belas eti arar pulinakige o. Ir dua belas paga pulinakige enogo, inendaga rasul-rasul arar talinakige. Nen ir inebe inendaga yi o: 14Ambi ar Simon (endaga ambi Petrus), nen ambi Andreas eti Simon ogarak; nen ambi Yakobus, nen ambi Yohanes, nen ambi Filipus, nen ambi Bartolomeus, 15nen ambi Matius, nen ambi Tomas ar ap Alfeus akbur, nen ambi Yakobus, nen ambi Simon (endaga ambi Patriot), 16Nen ambi Yudas ar Yakobus akbur, nen ambi Yudas Iskariot, yabonggane ap onggo nggeralkige enogo.

Ar Yesus nen wene yoraga, u warek mende pano erinaka, eka lagage wene

(Mat. 4:23-25)

17Tuguluk Ar Yesus ado paga nen, Ar aworomi inom wura wagugwarik, o kobakma negen puk ari wagugwa. Etala ir Ar aworomi amberak dogalek inom, nen ir akuni pakalok ya nda nen, o Yudea mende inom, o Yerusalem mende inom, nen o kota Tirus o nen Sidon o, i laut aik paga nggwe mende inom, obogar kuwak ari wagugwa o. 18Ir wagugwa mende eti, Ar Yesus nen wene emeriraga, nen ir u inoba dek erinaka erurak paga wagugwa o. Nen ir amberak kugi irimbo inakla unggirige mende inom ar wagugwama, inoba dek erinakige o. 19Ar ebe obarne wulka paga, akuni obogar u dek erinaka inil kugu lagugwarik, ir akuni obogar nen, Ar Yesus ebe oba ininggi dabukau paga, nggebedagu mondok ekugwa o.

Adeknggen kaurak o, nen ina'ir kaurak o mende wene

(Mat. 5:1-12)

20Ar Yesus Ar aworomi yemenogo il lakdaga lagagerek men yorarige,

“Kir kininggi dek mende kinakla adeknggen ar dogoni o,

Nenaluk, kir eti Allah awor akburi arar o!

21Kir yogondak erom abu werek mende eti, kinakla adeknggen togon dogoni o;

Nenaluk kir kinelabur erogo binagagin o!

Kir yogondak de yugwi mende, kinakla adeknggen togon dogoni o;

Nenaluk yabonggane, kir nen enda yugun o!

22 # 1Ptr. 4:14 Kir ina'ir kungginakwi inom, mugogo wulkinarkwi inom, yiduk maduk ekinakwi inom, inenggal yokiragwi inom, Ar Akuni Inakbur eti kalok erkinakwi ma, kinakla adeknggen ar dogoni. 23#2Taw. 36:16; Kis. 7:52Ir nabi-nabi alep welagugwa mende, ir eti ndak-ndak ar erinaku lagugwa o. Wene eti etaga kalok, kir kinakla adeknggen paga ar dogono. Nen kinadeknggen paga kinuwakda kodano, nenaluk kir kinamindi kinamende mbogor paga pakalok bege kugun o, yiluk yorarige.

24Ogwe kir kininggi werek mende yogondak arar nugartani o;

Nenaluk kir nen ertau wadok mende obogar etar nugu lagop o!

25Kir kinelabur togon ner nugwi mende eti yogondak arar nugartani o;

Nenaluk kir ogwe no kinoba arigin ar o!

Kir yogondak enda yugwi mende eti nugartani ar o;

Ogwe kir kiniliti buru yiluk kinade yirtagun ar o!

26Ir akuni obogar nen, kir wogok binagagwi mende eti, obogar nugartani o; nenaluk ir inumbui nen, ir ap nabi-nabi inenggal mende eti, o paga etoma etegerogon ar wogok bagu lagugwa o.”

Ninom wim mende inakba eku dogorak wene

(Mat. 5:38-48, 7:12a)

27“Ogwe kir yogondak, An yega kinaruk kolalir tagwi mende yi, An wene kinoba birtaga o: Kir kinom agorek mende, ir inakba togon dogoni o. Ambi inom ar, ir akuni nen ina'ir kungginakwi kigik, kir nen pano mban ar erinakwi dogono o. 28Akuni kir pudul kinakwi kalok, kir nen kinadeknggen inoba bino o. Nen ir akuni kir maduk erogo binagagwi kalok, ir eti inake tamban eku dogono o. 29Tuguluk ir akuni nen kinelokte penak nggwe kinakwi kalok, penak nggwe inom ar kinaruwak nen yiluk wogorano o. Tuguluk kiniyom jubah waganggwi kalok, kiniyom baju inom ar wogorano o. 30Akuni nen nenamende kwak kir nggino yokiragwi kalok, eti ar ir wogorano o; nen kinagarek ndilogo waganggwi kalok, iyok paga nggino yoragup ar o. 31Ir akuni nen kir ekbinagu wadok kertagwi eti ndak-ndak, kir nen ir akuni eti ndak-ndak arar ekbagu dogoni o.

32Ir akuni kir kinakba mende mban ir inakba erinakwi kalok, onggo nena kodagun? Ir akuni maduk ekwa mende ogwe, akuni ir inakba ekwi mende enogo mban ir inakba ekwi o! 33Tuguluk kir nen ir akuni pano ekbinagagwi enogo mban pano ekbagun kalok, onggo nena kodagun? Nenaluk ir akuni maduk ekwa nen ogwe eti ndak-ndak ar ekwi ma! 34Kir nen ir akuni uang pinjam wogoragu dogolir kalok, ir nen iyok paga ibar-ibar wokirar taga mende mban wogoragwi kalok, onggo nena kodagun? Nen ir akuni maduk ekwa eti, ir akuni maduk ekwa amberak uang pinjam etegerogon ar wogoralok, tuguluk iyok paga nggino yoragwi ar o! 35Ebe erurak kwak etegerogon dek o! Kir eru ebe kwak eti, kinom agorek mende inakba togon dogolir, panorogo erinaburak o. Kir nen pinjam wogoraurak kalok, kir nen iyok paga wornirawak nen yiluk andagup ar o. Etegerogo erugun kalok, onggo nggok ar kodagwi, nen kir Ar Allah lektek mondok mende akburi arar ertarugun o. Nenaluk Ar Allah nen ir akuni wa yitagodek mende inom, nen ir akuni maduk ekwa mende inom, obogar iliti pano erirnabir taga mende o. 36Kir Kinombae akuni inakba nggirik eta ndak-ndak, kir nen ogwe akuni inakba nggirik ar dogoni o!” yiluk yorarige.

Akuni inuwak dolinakwi wene

(Mat. 7:1-5)

37“Kir nen ir akuni wedek mende hukuman wogoragup o, nenaluk yabungga etoma, Ar Allah nen kir eterogon hukuman wokerau enogo o. Ir akuni wedek mende maga bagu dogoni o, eterogon ar Allah nen kir maga binagagin o. 38Ir akuni wedek mende eti, kinamende wogorani o, eti ndak-ndak Ar Allah nen kir kinamende wokeraga; nen kir kinake pugurogo birige mende etoma kulogo dagalogo wokeragin o. Nenaluk, kir nen ir akuni wedek mende inake walkigik yagadir tagwi eti ndak-ndak, Ar Allah nen kir kinake ogwe etegerogon walkigik ar yagadogo wokiragin o.”

39 # Mat. 15:14 Tuguluk Ar Yesus nen, wene ambi oba lirogo yoraga dogolir, “Ar akuni il mbuk ambi nen, ar il mbuk ambi wolok ligin kalok, ir imbirak-imbirak ar wininggala wuragun o. 40#Mat. 10:24-25; Yoh. 13:16, 15:20Ir akuni sekolah ekwi mende nen ar guru inom ndak-ndak ertarukbuk ar o. Ogwe ir sekolah arar ekbiluk kalok, ar guru enogo inom ndak-ndak arar ertarugun.

41Nen kir kinilimo o nggok mbalek mende kwak wokatigidek dogolir, nenaluk kir kinogarak ilimo mokmok eti wokatan yogop? 42Kir kinilimo o nggok mbalek mende kinil kartigikdek ar dogolir, nogar eme-eme, mokmok kilimo eti wuldagik nen yiluk kir kinogari nenggerogon yoraurak kogop? Wene yidilpak mende kir arar o! O nggok mbalek kir kinilimo eti ndak wuldartani o. Nen arar wuldatalok kalok, kir nen kinogari inilimo nena agarik eti kinil kugi, nen mokmok onggege mende eti wuldau ndagar erkinaka kugun o.”

O edo ebe o nen o enggen o awene

(Mat. 7:16-20, 12:33-35)

43“O mudi-mudi pano dagi taga eti enggen maduk yiri tagodek o. Eta eterogon ar, o maduk engga barelek mende nen enggen pano yirir tagodek ar o. 44#Mat. 12:33O enggen mbalek paga, o edo inilu arir taga mende o. Mumun adok werek mende eti, o ara enggen ndak-ndak yirukbuk, nen wiridi adok werek eti anggur enggen ndak-ndak yirukbuk ar o. 45#Mat. 12:34Akuni pano mende kalok, wene pano mende ar wulakwi, nenaluk eti iniliti pano mondok ar werekma o. Ir akuni wene maduk mende mban wulakwi kalok, ir inilitimo eti maduk mende mban dogirtaga mende o. Nenaluk, wene ir akuni inande paga nen wundi warir taga eti, ir inilitimo nen werek eti ar wundi wari taga mende o.”

Aklanggar werek o nen aklanggar dek o imbirak o palkugwa wene

(Mat. 7:24-27)

46Kir nen, “Tuhan, Tuhan, yiluk wi yornugwi mende, An nen kir eru yokiragi mende, kir nen ekikdek yoma nenaluk? 47Ir akuni An noba watuk, nen wene yega inaruk koldiluk, nen wene ebe erir lagwi kalok, akuni eti ta kwak inom walkaurak kogop? An nen ar ebe inugur kinak o, 48Ar akuni eti, ar ap o palka dogolir, o ukbula bumo agar kululir lagagerek nen nggir paga ukbula biluk palkige eti ndak ndak-ndak o. Ma i utuk waga dogolir, nen i obarne nen o palek miyalik nen yiluk ekige mende, o palek enogo miyalurak ndak dek agage o, nenaluk o enogo ukbula pik pak nggir paga birige eti nen o. 49Ogwe ir akuni An nane kolaldiluk ogwe, nen ebe eri tagodek mende eti, ir akuni o palku dogolir ukbula bigikdek palkwi eti ndak-ndak arar o. Etiar ma, i utuk waga dogolir, o palek enogo tagalogo laga dogolir, o palek ebe miyak mayak arar etarir taga mende o!”

Currently Selected:

LUKAS 6: WLW

Highlight

Copy