LUKAS 5

Yesus aworomi ibibir mirinakige mende wene

(Mat. 4:18-22; Mrk. 1:16-20)

1O nanonggal ambi wagagemo, Ar Yesus i Genesaret enggelek ma menatuk werekma, akuni pakalok yemenogo nen, Ar tombo-tombo yogu dogolir, Allah nen wene bege mende ambi yorniran o yiluk yorugwa. 2Ar Yesus il danau enggelekma lakarige mende, perahu mbere ima labek lakalok; ir ikan waganir lektaga mende yemenogo to perahu akla nen wulkugwagarik ikan wagani taga mende jala yemenogo oba kokwi il darige. 3#Mat. 13:1-2; Mrk. 3:9-10, 4:1Ar Yesus to perahu ambi akla dagarige, to eti Simon mende paga, tuguluk Simon to perahu yi odo nggwe onggol dani eme yiluk yorige. Yotuk Ar Yesus to perahu enogo akla kotatuk, nen akuni pakalok yemenogo wene emerirarige.

4Wene obok emeriraga lagagerek, Ar nen Simon yoga dogolir, “To perahu warin o, odo negen ungguwok nen yiluk yorige. Nen jala eti ikan waganuwok nen, yoma nggwe lakbin,” yiluk yorige.

5 # Yoh. 21:3 Ar Simon nen yoga dogolir, “Guru Nombae o, Yogondak kukbaga nir noge yigikdek yoma wurabir nugu lagorik ogwe, ikan mondok wogonakidek o, yiluk yorige! Ogwe Nombae Kar nen yeganem ma, pano ar o; an ambi inom ar ya wurabik o yiluk yirige.” 6#Yoh. 21:6Ir etegerogon arar eku lagugwa, ikan jala akla pakalok mondok yagar tatuk, inanggin nen jala muk likbi yigen yiluk ekige o. 7Eta eterogon etagi nanggige, ir inogariyak yonggo yorarugwama, ir to perahu ambetak aklah nen yamakda wagugwa. Inogariyak ambetak wagugwarik, nen to perahu mbere yanogo ikan waganek dombok yagarku lagugwa, ikan inanggin nen, to perahu yemenogo ima kuruk yik nen yiluk ekige o. 8Ar Simon yanogo ertaga il kega lagagerek, ar Yesus ika paga tebe yiluk, tuguluk ar yoga dogolir, “Tuhan! An togor daniluk lan o. Nenaluk an yi akuni maduk ekwa mende arar o, yiluk yorige!”

9Simon o, nen ar ogariyak inom yemenogo obogar, ikan pakalok waganggugwa yemenogo inil birkigik, ir nen we yiluk, bi warkugwa o. 10Eta eterogon ar, Simon ogariyak ar Yakobus ogarak Yohanes imbirak ar ap Zebedeus akburi, ir inom ar bi warkugwa. Tuguluk Ar Yesus nen Simon yoga dogolir, “Kobade kugup o! Yogondak ya kudi nen arar, kar akuni wogonakwa mende arar ertarigin o,” yiluk yorige.

11Simon ar ogariyak inom, to perahu yemenogo likalok wolok, i aik paga bi dagarugwarik nen, obogar yemenogo dambe kalok, nen Yesus mutek arar lagugwa.

Yesus nen akuni ambi oba agalumo ya mbalek nda mbalek inobade kaurak mende ma, oba pano erogo birige wene

(Mat. 8:1-4; Mrk. 1:40-45)

12O nanonggal ambi paga, Ar Yesus o kota ambimo werekma, Etomala ap ambi agakdo paga u inobade kaurak mende kunik welagage.#5:12: U agakdo paga inobade kaurak mende kunik: Agama Yahudi mende wene mbalek eti, u eti mende inoba kunik kalok, ir eti Tuhan ai palekma tamban erir tagama etoma unggurak ndakdek o, yiluk wene diru mbalek welagage. Ar il Yesus kega lagagerek, ar ebe tebe yiluk nggino yoga dogolir, “Ai Ambo, Nombae kar wadok kalok, an noba u dek erogo banin o, yiluk yorige!”

13Yorigemo, Ar Yesus nen inggi paktega dogolir, wene men yorige, “An wadok ar o lak, ma koba u yi dek arnek o!” yiluk yoga kigik yanogo ar, ar oba u arar dek agage o. 14#Im. 14:1-32Tuguluk Ar Yesus nen, An u ekaki indi, An nabok akuni mondok yoragup o, yiluk yoga dogolir, “Kebe ir imam mende inoba ibar lano o. Inoba lamo, ir nen koba u obok dek aga a, auwan a, yiluk birkeyawak nen o. Tuguluk ir akuni obogar nen kar koba u ebebar mondok dek arar ertaga o yiluk yenggak keyawak nen yiluk, ar Musa awene diru mbalek ndak-ndak, Ar Allah akekurban#5:14 Kurban eti: Ar Allah ake ye mende nde mende amep werek mende kau sapi, domba, kambing, tewe etegerogon mende warogo bugu lagugwa. ambi wolok bi lano o,” yiluk yorige.

15Ogwe Ar Yesus yabu eka paga, Ar abok obogar ye ai nde ai wigak agan lagige o. Nen akuni ambetak inaruk koldiluk, ambetak u warek mende dek ekbawak nen yiluk, oba wagu lagugwa o. 16Etegerogo eka lagagerek, Ar Yesus akuni dekma etoma tamban erik nen yiluk arar lagage o.

Ar Yesus nen ap ambi iyok abodok dek u warek ma pano ekige wene

(Mat. 9:1-8; Mrk. 2:1-12)

17O ambi paga, Ar Yesus nen wene emeriraga werek ma, ir ap Farisi mende inom nen, ir guru-guru agama inom, inebe we mende negen etoma korek welagugwa. Ir akuni etoma, o Yerusalem nen, nen o kota-kota Galilea paga inom nen Yudea paga inom, etoma nen ari wagugwarik welagugwa. Ma, Ar Tuhan obarne Ar Yesus oba werekma, akuni u warek mende dek erogo baga lagage o. 18O eta paga, ir akuni inebe mende negen nen, ap ambi u inggi iyok min warek mende, ebe tikar paga ndalogo wolok wagugwa. Ir nen ap enogo Ar Yesus ilka paga bi ungguwok nen yiluk ekugwa. 19Ogwe etoma akuni pakalok mondok werek ma, ap enogo etoma wolok unggurak ndak arar agage o. Eteger tarigi nanggige, tuguluk ir nen o tumbuk paga etomadek elo ndalogo, tikar ndalek eneane ar, akuni pakalokma yemenogo, Ar Yesus ilkapaga arar wukdirugwa. 20Ir inakla ebebar nggok mondok andalok ekugwa kwak enogo, Ar Yesus il daga lagagerek, men yirige, “Nogar a, komaduk obok dek ekaki o,” yiluk yorige.

21Etegerogo yoga kalok, ir guru-guru agama inom, nen ir Farisi mende inom, ir nen ar nin yogik eku dogolir, “Ap yi ta kogop, Ar Allah endaga maduk erogo bege yi?” Ar Allah adigar nen akuni inobaduk dek erogo baurak eti ndak o, ogwe akuni mende ta nen kwak erurak ndak kogop?” yiluk yirugwa.

22Etegerogo yugwi, Ar Yesus muk ilu agage o. Ma nen, Ar nen yega dogolir, “Kir kinakla paga nen, wene kinok-kinok yitagwi eti nenaluk? 23Anggin dek pano yorurak kwak nenggerogon, ‘Komaduk obok dek erogo bagagi o, yiluk yorurak a? Ar te we 'Menatuk lan o yiluk yorurak a!’? 24Ogwe yogondak An eka paga, kir nen kinil nabagik o, agar paga yoma, Ar Akuni Inakbur yi, Ar obarne paga, akuni inomaduk dek erogo baurak eti ndak arar o,” yiluk yorarige. Yoraga lagagerek, Ar Yesus nen ap warek enogo yoga dogolir, “Menarin, ketabul kanoge yirta taga mende eti kodalok, ibar kuma lan!” yiluk yorige.

25Akuni obogar yemenogo inilka paga iluk atuk, tuguluk noge yega lagage mende enogo kodalok, Allah nombae wa, yiluk wogokdir arar uma lagage o.

26Ir akuni obogar nen, we au yiluk, Ar Allah wa yiluk wogok dirugwa o. Nen inakla inobade kigik, ir nen yugu dogolir, “Yogondak nir ninil kogo yi, erir tagodek mende arar eke o,” yiluk yirugwa!

Ar Yesus nen ar Lewi wai yorige wene

(Mat. 9:9-13; Mrk. 2:13-17)

27Etegerogo eka lagagerek, Ar Yesus wundi lagage mende, ap pajak nandorkwa mende ambi endaga Lewi eti, ar yabu erir tagama korek il karige o. Il kalok Ar Yesus nen yoga dogolir, “Dage, murnarek ibar eme,” yiluk yorige. 28Yorigemo, ar Lewi enogo arar menaga lagagerek, amindi amende obogar dambe kalok, Ar Yesus arar mutek lagage o.

29Etegerogo eku lagugwarik, ar Lewi nen, an numa Ar Yesus adeknggen erik o yiluk pesta erkanem, ir akuni pajak kuwak ekwa mende inom, nen ir akuni wedek mende amberak inom, inom dambulik arar dago narugwa o. 30#Luk. 15:1-2Ekwi kalok, ir akuni Farisi mende inom, nen ir guru-guru agama inom, ina'ir dalok, tuguluk Ar Yesus aworomi men yorarugwa, “Ir pajak nandorkwa mende inom nen ir akuni maduk mende inom, kinom dago nertagwi eti nenaluk?”

31Tuguluk Ar Yesus nen onggo yoraga dogolir, “Akuni inoba u dek mende nen, dokter oba lektagodek o; ogwe akuni u warek mende mban nen dokter oba lektaga mende o. 32An wagagi eti ir akuni inoba pano welagwi mende eti inake warukdek o, ogwe ir akuni maduk ekwi mende eti, ir maduk ekwi eti dambe kuwak nen yiluk, arar wagagi o.”

Erom ninggikdek tamban eku dogorak yirige wene

(Mat. 9:14-17; Mrk. 2:18-22)

33Akuni yemenogo nen Ar Yesus men yorugwa, “Ir Yohanes aworomi mende o, nen ir Farisi mende inaworomi o, ir nen tamban ye nde ninggikdek kwanerek dogolir ekwi o. Ogwe Kar kaworomi kwak perak, inarom inagi ner nugwi o,” yiluk yorugwa.

34Yorugwama, Ar Yesus nen onggo yoraga dogolir, “Ir akuni kuro kwe yikunem waru mende, ar kwe kodau werek enogo inom kigik, nonggwa mende kwanerek dogu ndak a? Eti ndak dek arar o! 35Ogwe ar kwe kodau werek eti ir inakla nen ndilogo waganu, o telek ambi kenam ari warigin o. O eta paga perak, ir nen tamban ye nde ninggikdek dogolir erurak inom ari warigin.”

36Tuguluk Ar Yesus nen wene oba lirogo ambi yoraga dogolir, “Ir akuni nen, tu kain paga mende likbilik kalok, tu kain ngger mende mbalogo imbirak bugu nggwarurak ndak dek o. Nenaluk, kain ngger mende nen, tu kain eti likbiligin o. Eta eterogon ma, tu kain ngger mende paga, tu paga mende eti imbirak bugu nggwaru ndak dek o. 37Eta eterogon ar, ir akuni nen anggur amburu ngger mende eti, tu agakdo pagane mende yugu akla yagadu ndak dek o. Nenaluk anggur ngger mende eti nen, tu eti arar likbilogo lakbigin o. Eterogon ma anggur amburu eti we elamarogo arar ndiyalarigin o. 38Anggur ngger mende kalok eti, tu ngger mende ar akla yagadurak o. 39Eta eterogon ar ir akuni nen, anggur alep mende amburu nalokma, anggur amburu ngger mende todek eti nau ina'ir o. Nenaluk, ir akuni nen yugu dogolir, Anggur kode mende amburu kwak eti induk pano.”

Currently Selected:

LUKAS 5: WLW

Highlight

Copy