LUKAS 7

Ar Yesus nen ap tentara inewe Roma mende ambi ayedoman oba u dek erogo birige wene

(Mat. 8:5-13)

1Ye wene nde wene yemenogo, akuni obogar yoraga lagagerek, Ar Yesus o Kapernaum arar lagage. 2Nen etoma ar ap tentara inewe Roma mende ambi ayedoman iliti kunik mondok ma, Ar yedoman enogo u wataru nggamo mondok mende ambi kunggigerek ma, warek welagage. 3Etegerogon werek ma, Ar tentara inewe enogo Yesus abok mende aruk kolaldiluk, ir ap Yahudi inewai inebe mende negen, ayedoman eti oba u dek ekbi waruwak nen yiluk, Ar Yesus nggino yori lani o, yiluk lakbarige. 4Lakbarigemo Ar Yesus oba wagugwarik, ir nen nggino nggano togon ar yama kowak nen yiluk yogu dogolir, “Ar tentara inewe yi yama kaurak ndak mende arar o.” 5“Nenaluk, ar nen akuni nir mende ninakba kega, nen nir o tamban eku dogomo palogo binanengga eke o.”

6Yorugu nanggugwa, Ar Yesus ir inom arar lagage o. Nen Ar Yesus uma yemenogo arar korok panggo yi lagagemo, ar tentara inewe ernogo, ar ogariyak mende negen inoba, Ar Yesus wene men yori lani o, yiluk lakbaga dogolir, “Aii, Nombae. Kar ikbi akbi ar an numa waru maga o. An numa yoma, Nombae Kar wokaburak an nebe ndak mende arar o. 7Nenaluk, an nenggawerek nen, Nombae Kar kika paga warurak mondok ndak dek arar o. Eterogon ma, An nayedoman yi, u oba dek aruwak nen, wedek kane ar, eta nen yigogo lakbi eme o. 8Nenaluk, ap eyabu nggok mende an apma werek mende nen, wene yonega kalok, an ar apma tebe yiluk erir taga mende o. Nen ir tentara an napma mende nen, an nane yoraga kalok, ir nen, an napma tebek yiluk ekwi o. Nen an nen kwak, ar tentara ambi, ‘Lan o!’ yiluk yorumo, ar nen ligin ar o. Nen ir amberak yoraga dogolir, ‘Noba eme o!’ yiluk yega kalok, ar ogwe an noba warigin ar o. Nen an nayedoman mende ambi, ‘Yegerogon erin!’ yiluk yoga neyalok, ar ogwe erigin ar o,” yiluk yorige.

9Yorigi nanggige, Ar Yesus aruk kolalka lagagerek, ap yi, we, yiluk bi warkige. Tuguluk, Ar ambor medak togon laktaga lagagerek, akuni pakalok mutek lagwi mende yemenogo yoraga dogolir, “Ap yi nobade a. Ar iliti ebebar nggok mende andege ndak-ndak, ir akuni Israel mende iniliti ebebar andarugwa ambi darigi mondok dek arar o!”

10Ir akuni ar ap tentara inewe enogo uma lakbarige mende yemenogo, uma lagugwa mende, ar ap yedoman mende enogo oba u obogar dek agagerek paga lagugwa.

Yesus nen kwe togwe mende ak iluk mendirige wene

11Dogolukdek negen ar, Ar Yesus o Nain etoma lagage. Ar aworomi mutek lektaga mende inom, nen akuni pakalok ambetak inom, Ar mutok inom lagugwa. 12Eta paga, Ar Yesus tuwan kota unggwi tagama bakma panggo yi lagagerek paga, kwe togwe agadak ambiar ma, kota etoma nen, arar wartagigerikmo, e utuk wolok wundi wagugwa. Nen ir akuni o kota etoma mende obogar, kwe enogo mutok inom wundi wagugwa. 13Ar Tuhan Yesus kwe enogo il kalok, akba iliti buru yiluk, yoga dogolir, “Kar de yega puk o, yiluk yorige!” 14Etanogo Ar Yesus akuni warek wolok lagunem inoba korok panggo yi lagagemo, ir akuni o mbedago wolok mende yanogo eta arar puk agugwa. Nen Ar Yesus nen yega dogolir, “Abedak, An nen kiluk arin yiluk yokiri taga o, ma ibar kiluk arin yiluk yorige!” 15Elege lerago obok watagage enogo, iluk agagerek kotatuk, nen ane wene mbalkige. Nen Ar Yesus elege enogo agwiya wogorige.

16Akuni obogar inobade atuk, Ar Allah wi, au, yiluk, wogokdirugwa. Nen ir yugu dogolir, “Nir ninakla Ap nabi nggok mende ambi kenam aga o yiluk, yirugwa. Ma akuni ndilinaburak paga, Ar Allah arar waga o!” yiluk yirugwa.

17Ar Yesus abok mende, o Yudea paga inom, nen ir o kuri eragalu penak-penak mende obogar inaruk kolalkugwa o.

Yohanes Pembaptis aworomi mirogo lakbarige wene

(Mat. 11:2-19)

18Ir ar Yohanes aworomi ar ane mutek nugwi mende nen, wene obogar etagage mende yemenogo, ar Yohanes yori lagugwa. Tuguluk ar Yohanes nen aworomi inebe mbere wai yoralok, 19kir Tuhan Yesus oba lalok, kinok yokno o, “Allah nen Ap ambi warigin yirige etnaga Kar arar a, arte nir akuni wedek mende ambi torkugun a?” yiluk yoralok lakbarige.

20Ir ar Yohanes aworomi inebe mbere ernogo, Ar Yesus oba lagu lagugwarik, wene kinok yogu dogolir, “Yohanes pembaptis nen Ninombae kinok yori lani o, yiluk lakbinani waga o, ma, kar eti Allah Ane amburu akuni ambi warigin yirige mende etnaga, kebe Kar arar a? Arte nir akuni wedek mende ambi torkugun a? yiluk yegemo, Kar yokiri wago o,” yiluk yorugwa.

21O etinem, Ar Yesus nen akuni pakalok u inoba dek erogo baga, nen irimbo inoba werek mende dek eginaka, akuni pakalok ar inil mbuk mende pano erogo baga ekige. 22#Yes. 35:5-6, 61:1Etegerogo ekige amor ar ma, Ar Yesus nen wene onggo yoraga dogolir, “Kiniyok paga lalok, nena mende eka kir kinaruk kolalkop mende, nen kir kinil kogop mende: akuni inil mbuk mende pano atuk inil kugwi, akuni iniyok abodok dek warek mende pano atuk tuan lagwi, akuni u inakdo paga inobade kaurak kunik mende#7:22: Akuni u inakdo inobade kaurak kunik mende inom: Pasal 5:12 bikani. dek agwi, akuni inaruk dogu mende pano atuk kolalkwi, akuni mondok min warek mende iniluk agwi, nen pano wene Ar Allah nen akuni ininggi dek mende inake yirige mende yoraga, eke o, yiluk yori lani o. 23Akuni An ina'ir neyau paga, awene yiduk kau dek mende eti, inakla adeknggen ar dogowak o.”

24Ar Yohanes mende aworomi etanogo obogar lagugwama, Ar Yesus nen ar Yohanes abok mende ir akuni pakalok yemenogo yoraga dogolir, yegerogon yirige, “Kir o ye dekma nde dekma telekma etoma nena mende kuwok nen yiluk lagop? Irikngga ambi wiya waka etoma ka lagop a? 25Kir nena kinil kuwok nen yiluk lagop? Akuni tu pano yugu kau a? Akuni tu pano mende yugu kau inom nen ir akuni erekma waganekma mban dogi taga mende eti inom, ir dogirtagwi o istana #7:25: Istana: Eti ap raja kwak, gubernur kwak, ir werekma uma endaga yugwi eti, indonesia wene paga istana arar.etoma arar o! 26Etiar ma, kir nena kinil kuwok nen yiluk wulkop? Ap nabi mende kinil kuwok nen yiluk wulkop a? Ebebar o, ar eti akuni nabi mende eti kigik anggup idu negen ar o. 27#Mal. 3:1Nenaluk, ar Yohanes yi abok mende ar, Alkitab akla yirige mende yegerogon;

Allah nen yega dogolir, ‘Kar auwan lakbagagik dek kigik,’

‘Alep Pulogo lakburak mende ebe yi arar o,’ ma, ar ndak mirogo alep lakbigin o.

Lakbumo, ar nen Kar Katuan mbililogo yaruwak nen o!”

28Ar Yesus nen ambi inom yoraga dogolir, “Kinakla eberek togon o,” ar Yohanes Pembaptis ndak-ndak, akuni ambi nggok negen welagugwa mondok de arar o. Ogwe ir akuni Allah akburi inakla, akuni bugudak mende ambi eti perak, ar Yohanes Pembaptis eti kigik, ar eti perak nggok negen o.

29 # Mat. 21:32; Luk. 3:12 Ir akuni penagih pajak obogar inom, ar Yesus wene yirige eti kolal diluk; Ar Allah nen akuni inobabur yegerogon dogu yiluk yorarige mende yemenogo ndak-ndak eku lagugwa mende ar ma, ir ar Yohanes nen i paga wukbau wadok karugwa o. 30Ogwe akuni Farisi mende inom nen guru-guru agama inom Allah nen ir inake paga kolkige enogo waganu inair nen dambe karugwa. Yohanes nen i paga wurinabu inair nen dambe karugwa.

31Tuguluk Ar Yesus ambi inom ar yega dogolir, “An ir akuni o yogondak ya agarik mende yi, nen kwak oba inoba lirurak o? Ir inebe nenggerogon mende ndak-ndak? 32Ir inebe eti, o pasar etoma elegedak korek dogitagwi ndak-ndak; dogalek dogolir amberak nen inane amberak yoragu dogolir, ‘Nir nen kir kinake ndai adeknggen mende eko, ogwe kir nen kinuwak danggok eru kina'ir! Nir nen de ndai yogorik ar ogwe kir nen de yigikdek ar ekop.’ 33Ar Yohanes Pembaptis waga lagagerek, ar nen nonggwa mende nau kwanerogo welaga, anggur amburu nau dambe kega nen kir nen, ‘Ar monggar tekman mende akla onggegerek!’ yiluk yogwi. 34Ar Akuni Inakbur wagage eti, Ar i nengga erom nengga eka kalok, kir nen yogu dogolir, ‘Akuni yi kinil bikani! An-an ugunar ner nega nen i iniliti mbalkwa mende nonggwa, akuni ar inom kunik enogo ap pajak kuwak ekwa inom nen maduk mban eri taga mende inom mban kunik o.’ 35Etegerogon ar ogwe, Ar Allah iliti kolek mende eti, ir akuni Ar waganggugwa mende eti inoba nggwe kenam aga o.”

Ar Yesus Simon werekma uma ekige wene

36Ap Farisi mende ambi endaga Simon, ma Ar Yesus dago ar uma nau ayonggo birige. Ayonggo birigemo, Ar Yesus oba lagagerek nen korek latuk imbirak erom narugwa. 37#Mat. 26:7; Mrk. 14:3; Yoh. 12:3Nen o kota etila, kwe ambi omaduk ambik oba werek mende welagage. Nen ar aruk kolalka dogolir, Ar Yesus muk wagarik, ap Farisi mende eti uma erom imbirak netagwi yiluk yirugwa aruk arar kolalkige. Aruk kolalka lagagerek, o minyak wangi endaga pualam eti moli akla todek werek ma, wagangga lagagerek wolok wagage. 38Waga lagagerek, Ar kwe enogo Ar Yesus mendek werek ma amborna nggwe menari waga lagagerek, nen de yega dogolir, ar il amburu paga Ar Yesus iyok kokige. Tuguluk Ar Yesus iyok amburu yemenogo iri paga wodalka lagagarek, ande taduk eka, nen minyak wangi amburu enogo kidirogo bega ekige. 39Ar ap Farisi mende Ar Yesus ayonggo birige etno il kega lagagerek, ar akla paga nen andega dogolir, “Ar ap yi ebebar Nabi mende dogolepma, ar kwe omaduk pakalok mende yi nen An niyok pata taga iluk ilu atep o.”

40Andega agagemo Ar Yesus nen Simon yoga dogolir, “Simon, An wene ambi yokirik o.”

Yiluk yorigemo, Ar Simon nen, “Ere Nombae Guru, wene eti yornirin ar o,” yiluk yorige.

41Yirigemo Ar Yesus nen wene onggo yoga dogolir, “Ir akuni inebe mbere ma, ir imbirak akuni ambi uang pinjam wogoragagerek ma, anomar inoba welagage o. Ma ar ambi anomar eti uang perak mende lima ratus paga, nen ar ambi anomar eti uang perak mende lima puluh paga. 42Ir imbirak dambuk togon, inanomar enogo onggo wogogik dek arar agugwama, ir inomaduk mende yemenogo dek erogo arar barige. Etiar ma, Ir akuni inebe mbere eti, ta nen kwak ar ap anomar inoba welagage enogo iliti nggok mondok ekige?”

43Yirigemo ar Simon nen onggo yoga dogolir, “An nakla nen ap ar mende anomar nggok negen oba welaga mende eti arar o!”

Ar Yesus nen onggo yoga dogolir, “Kar kakla andagen eti mondok ebebar o.” 44Tuguluk Ar Yesus kwe enogo il birkegalagagerek, nen Ar Simon yoga dogolir, “Kar kwe yi kil kegen a? An kar kuma wagarik ogwe, kar An niyok i paga kuru mende i todogo bigikdek etnogogi; Ogwe ar kwe yi il amburu paga An niyok koka, nen iri paga niyok wodalka eke o. 45Kar An wagimo, kande bik paga woknabukdek etnogogi, ogwe ar kwe yi, An wagi kudi niyok ande taduk werok begekdek mondok eri taga o. 46Kar nen An naluak paga minyak amburu kidikbanuk dek, ogwe ar kwe yi nen, An niyok paga minyak amburu pano mende kidirogo bege o. 47We, ebebar o, ar iliti akba mende nggok mondok werek eti paga nen, omaduk nggok mende werek eti, obok arar dek erogo bege o! Nen ir akuni inomaduk bugudagar maga bagun kalok, ir nen inakba mende eti bugudagar erigin o.”

48Yiluk ar kwe enogo yoga dogolir, “Kar komaduk mende obogar dek erogo bagagi o.”

49Ir akuni Ar Yesus erom inom narugwa mende yemenogo, mumun kokop ar ambi yogik eku dogolir, “Ar ap komaduk dek erogo bagagi yege yi, ta kwak kogop?”

50Ogwe Ar Yesus kwe enogo yoga dogolir, “Kar kiliti An noba ebebar andagen eti paga, kar kebe obogar ndil kodagen o. Etiar ma, kiliti pano kadeknggen paga arar, kuma lan o!” yiluk yorige.

Currently Selected:

LUKAS 7: WLW

Highlight

Copy