YOHANES 9

Ar Yesus nen akuni il mbuk mo pano erogo barige wene

1Ar Yesus laga dogolir, akuni endak laga dogolir, il mbuk endak lagage mende ambi il karige. 2Ma Ar Yesus mutok lagwi mende nen, kinok Ar yogu dogolir, “Ninombae Guru wae, ar akuni yi il mbuk endar tagage eti edo nenaluk? Ar engga werek omaduk ekige paga a, agwiya ombae maduk ekugwa paga a?” 3Yiluk yorugwama, Ar Yesus nen onggo yoraga dogolir, “Ar il mbuk eti, ar omaduk paga inom nen agwiya ombae inomaduk paga inom, obok dek ar o, ogwe ir akuni yoma, Ar Allah obatne eka ir inil kowak nen yiluk arar o. 4O dindaga werek kigik, nir yabu Ar An lakbani wagage mende eti eyabu erurak o. Nen o kukbaga ari warigin eti paga, akuni ambi nen yabu erigin mondok dek arar o. 5#Mat. 5:14; Yoh. 8:12Nen An agar paga yoma werek kigi eti, An yi agar paga yoma akbinak erir taga mende arar o.”

6Ar Yesus etegerogon yega lagagerek, Ar awori agar paga mbo birige, nen awori enogo agar inom dabuk mbabuk eka lagagerek, nen akuni enogo ilimo mbilik mbelok erogo birige o. 7Ekbiluk yoga dogolir, “I enggelek Kolam Siloam akla etoma, kelokte i tobala lan o,” yiluk yorige. (Siloam eti wene enggen ebe ‘Lan yiluk lakbagwi o’.) Yorigemo ar akuni enogo elokte paga arar i tobala lagage. Nen tobalega lagagerek, iyok paga laga kigik, ar il kaurak ndak arar ertagage o.

8Akuni uma inai korok-korok inom dogir tagwi mende o, nen ir akuni amberak ar ande nggino yir nega inil kugu lagugwa mende o, obogar nen yugu dogolir, “E puk, ar yi il mbuk mende, korek ande nggino mban yir taga enogo a?”

9Ir amberak nen yugu dogolir, “Ar arar o.” Ogwe ir amberak nen yugu dogolir, “Ar dek o, yi akuni ar talek o.”

Ogwe ar akuni enogo nen wene yoraga dogolir, “An akuni eti arar o,” yiluk yoragage.

10Ir nen onggo yogu dogolir, “Yogo wene nena etagarik nen, kar kil yoma pano atuk bengge lagan nda.”

11Yiluk yorugwama, Ar nen wene onggo yoraga dogolir, “Ar Akuni endaga Yesus eti nen, biri nilimo mbilik mbelok ekbega lagarik, ‘I Kolam Siloam enggelek ma etoma, kar kelokte i tobala lan o,’ yiluk yonegemo, nen an etegerogon arar eri lagagi o. Nen An nelokte i tobalka neyagik, nil eti arar kaurak ndak atuk pano aga o.”

12Ir akuni yemenogo nen onggo yogu dogolir, “Akuni eti nggoma agarik?” yiluk yorugwa.

Ar nen onggo yoraga dogolir, “An nungguk dek o.”

Ir akuni Farisi mende nen, ap il mbuk pano ekige eti wene edo kwakugwa wene.

13Ar Yesus nen, Awori agar paga wudak wadak erogo, ap il mbuk mende pano aruwak nen yiluk ekige enogo, o Hari Sabat paga o. 14Eti paga ma, ar ap il mbuk mende pano agage enogo, ir ap Farisi mende inoba wolok lagugwa. 15Nen ar ap eti il nenggerogon pano ekige yiluk, obogar kinok yorugwa. Yorugwama ar nen onggo yoraga dogolir, “Ar nen biri an nilimo birigemo, nen an i tobali lagi mende, an nil arar bikau ndak ertagage o.”

16Ir Farisi mende amberak nen yugu dogolir, “Ar akuni wene yi eke yi, Ar Allah imbirak mende nen dek arar o, nenaluk wene Hari Sabat ake diru mbalek mende tagalogo bege o.”

Ogwe ir amberak nen yugu dogolir, “Yogo puk, akuni omaduk werek mende nen, erukbuk mende elalin yi, ta kwak nen erurak kogop?” yiluk yugu lagugwarik, ir-ir aredo nombok akodarugwa o.

17Etegerogon etaga agagemo, ir ap Farisi mende nen ap enogo yogu dogolir, “Yogo Ar kar kil kowak nen yiluk, pano eke mende yi abok ambi yin nda?” yiluk yorugwa.

Mende ar ap enogo nen onggo yega dogolir, “Ar ap eti Nabi mende arar o.”

18Ogwe ir akuni Yahudi mende inewai yemenogo nen, ar ap enogo ebebar il mbuk welagage mende ogwe, yogondak il ketaga yiluk ebebar andau ina'ir karugwa. Andagu lagugwarik, ir nen ar agwiya ombae wai yorarugwa. 19Wai yoragu lagugwarik yoragu dogolir, “Ar yi kir kinak kinakbur endakugup mende ebebar a? Yogondak ar il kaurak ndak eti nenggerogon etaga?” yiluk kinok yorarugwa.

20Ar enogo agwiya ombae nen wene onggo yugu dogolir, “Ar yi ebebar nir ninak ninakbur o; nen ar il mbuk eti, ar endak lagage kudi nen arar o. 21Ogwe yogondak ar il kaurak ndak etaga eti, nir mondok ninungguk dek arar o. Nen ta nen ar il kaurak ndak erogo bege eti ogwe, nir ninungguk dek arar o. Ar mban yokni o, ar ebe obok anggok ar ma, wene onggo ndak ar yigin o,” yiluk yirugwa. 22Ar agwiya ombae nen wene etegerogon yirugwa eti nenaluk, ir akuni Yahudi mende inewai yemenogo, ir inoba inobade nen yirugwa. Nenaluk ir obogar nen inane dambulku dogolir, ir akuni tani nen, Ar Yesus eti Raja akuni Ndilinakwa mende arar o, yiluk yega kalok, ar akuni eti, o tamban eri tagama onggeganem arar o, yiluk yirugwa paga. 23Eti paga nen, ir ar il mbuk mo pano ekige enogo, agwiya ombae nen yugu dogolir, “Ar obok anggok arar; ar mban andekma wokani o, yiluk yirugwa.”

24Tuguluk ir ap il mbuk welagage mende enogo ambi inom ar wai yotuk, yogu dogolir, “Kar wene kenggal mende yigin dek o yiluk, kar kane kuwak mbalan o. Nir ninilu ar ap eti omaduk eke o,” yiluk yorugwa.

25Tuguluk ar ap enogo nen, “Ar eti omaduk eke a, dek a, eti an nungguk dek ar o. Ogwe an nilu kwak eti; pagane an nil mbuk welagagi, nen yogondak nil kau ndak agi eti ar o,” yiluk yirige.

26Tuguluk ir ambi inom ar yogu dogolir, “Ar nen nena ekake? Nen kar kil kowak nen yiluk nenggerogon ekake?” yiluk dagalogo yorugwa.

27Ar akuni enogo nen onggo yega dogolir, “An kir obok yorkeragi etnogogi, ogwe kir kinaruk kolalu kinak ir o. Nenaluk kir kinaruk kolalu ar yiluk, yorniri tagwi? Kir Ar mutok lagwi mende kinom etaru wadok kigik dogu a?” yiluk yirige.

28Tuguluk ir inakla agaga nen mberugu dogolir, men yorugwa, “Kar yi arar, Ar mutok lagwa mende! Nir dek o. Nir yi, ar ap Musa eti mutok lektagwi mende arar o. 29Ar Allah eti, ar Musa imbirak wene mbalkige eti, nir ninilu o. Ogwe wene Ar ap yi abok mende kwak eti, nir mondok ninungguk dek arar o,” yiluk yirugwa.

30Ar akuni enogo nen yega dogolir, “Yogo, kir Ar ai edo ninungguk dek yogop kwak yi, ebe andakbuk mende arar yogop o. Nenaluk an nil kau ndak erogo banengge yi kigik ar ogwe,kir yirtagwi o. 31Nir niniluk eti, Ar Allah eti akuni maduk ekwa mende inane yugwi, Ar aruk kolalir tagodek o, ogwe ir Ar alon palogo, ap ma tebe yiluk dogolir, Ar Akla wadok mende erir taga mende kau mban, inane aruk kolalir taga mende o. 32O mbogor agar yoma kenam ekbirige kudi paga nen, ap ambi il mbuk agwiya akla nen endago mende, il kau ndak erogo birige eti ninaruk kolalkwi dek arar o. 33Nen ar akuni eti, Ar Allah nen lakbi wagage mende dek kwak dogolep ma, ye ekik, ndek ekik, etep dek arar o,” yiluk yirige.

34Ir nen wene onggo yogu dogolir, “Nena yegen? Kar endak lagagen kudi paga nen, ye maduk nde maduk koba ninggir mbadok erek yi, nen nir wene emernirak nen yiluk yegen a? Koba ninggalok,” yiluk yorugwa. Yogo eta kudi paga nen, ar ap enogo o tamban erir tagama etoma ar unggurak mondok dek arar o, yiluk kudi birugwa.

Ir akuni inaguringge paga inil mbuk yiluk yirige wene

35Ar Yesus ap il pano ekige mende etnogo, o tamban erir tagama nen pudulogo wuldega o, yiluk aruk kolalbiluk, kwarir lagagerek, wene yoga dogolir, “Ar Akuni inakbur eti oba kiliti ebebar andagen a?” yiluk yorige.

36Ar ap enogo nen onggo yoga dogolir, “Ae, Ambo, Ap eti ta ogwe? An Ar oba niliti ebebar andak nen yornirin nde?” yiluk yorige.

37Yorigemo Ar Yesus nen onggo yoga dogolir, “Ar ebe kar kil obok kegen arar o. Ar ebe yogondak kimbirak wene mbali tagan yi arar o,” yiluk yorige.

38Ar akuni enogo nen onggo yoga dogolir, “Ae waa, Tuhan enogo Kar arar o, yogo nakla ebebar andagi o,” yiluk yorige.

39Yorigemo Ar Yesus nen onggo yoga dogolir, “An o agar paga yoma wagagi eti, akuni inendokma waganogo inuwak dolinaburak paga arar wagagi o; etiar ma, ir akuni inil kugwi mende eti inil mbuk etagwi, nen ir akuni inil mbuk mende eti, ir inil kau ndak erogo baga, erurak ake paga arar wagagi o.”

40Ir akuni Farisi mende inebe mbere negen korok etanogo dogolir, wene Ar yega inaruk kolalku lagugwarik, onggo yogu dogolir, “Kar Kakla paga nen, nir yi ninil mbugar yiluk andalok yegen kigi,” yiluk yorugwa.

41Yirugwama, Ar Yesus nen onggo yoraga dogolir, “Ebebar kir kinil mbuk dogolep ma, kir kinomaduk kinoba dek dogolep o. Ogwe kir nen, ‘Nir ninil benggelek kugwi mende ar,’ yogop eti kalok, kir kinomaduk kinoba denggelek agarik arar o,” yiluk yorarige.

Currently Selected:

YOHANES 9: WLW

Highlight

Copy