YOHANES 10

Domba o, gembala o, inoba lirkige wene

1“Wene An yigin yi ebebar mende arar o: Ar akuni domba inedabula leger um onggega kalok inom, nen tuan obate paga elo ndalogo onggega kalok inom, ar akuni eti ilimodonggar, o piyalkwa mende arar o. 2Ogwe ar akuni tuan tukande mbalek paga ar onggega kalok, ar eti ir domba eti inagembala mende ebe eti arar o. 3Ar dabula tuam dogik taga mende nen, tu kurdaga, ar enogo nen ir domba-domba inadiktak inendaga kunduk wai yoraga kalok, ar ane yega mutok oba lagwi, ar nen ago mbalogo wogonarek wulka, etegerogon erir taga mende o. 4Arar wogonarek wulka lagatek, ar gembala enogo alep laga kalok, ir domba yemenogo, ar ane inilu mondok ma, ane yega mutok ambotna lektaga mende o. 5Ir akuni adik ambetak mugunarek laurak eti mondok ina'ir o, nen ar akuni eti dambe kalok kode wundugun ar o. Nenaluk ar ane ir inunggukdek ar ma o.”

6Ar Yesus wene oba lirogo eti yoragagerek ar ogwe, wene nena oba lirogo yege yiluk ir inakla andalok dek mondok.

Ar Yesus eti gembala obabur pano mende arar o

7Tuguluk Ar Yesus wene ambi inom ar yega dogolir, “Wene yi ebebar mende yigin o: Ir domba-domba mende tukande eti An arar o. 8Ir obogar An wagik dek nayagik wagugwa mende etoma eti, inimodonggar o piyalkwa mende arar o. Arar ogwe ir domba yemenogo, ir inane kolukdek arar o. 9Tukande eti An arar o. Nen An noba nggweru unggigin kalok, enggawerek ebe ndilkodagin, nen nonggwa mende koda wulka onggega eka dogogin o. 10Ilimodonggar nen watuk ilimodo wagangga, inebe inaka, nen yiduk maduk erogo baurak paga warigin o. Ogwe An wagagi eti, ir akuni iniluk dogorak mende onde ekodagwi, nen ye mende nde mende inoba nen yumbu-yumbu wuka dogowak nen yiluk wagagi o.

11An eti gembala nobabur pano mende arar o. Nen gembala obabur pano eti nen, ar adomba inake paga, nebe naru kalok pano ar o, yiluk enak bata taga mende o. 12Ar ap ambi gembala dek mende, we wedek yabu onggo kau pagago bu mende inom, nen ap ambi adomba onde werek dek ogwe, nen wedek mende nen eku dogolir, tak nggewo anini werek mende waga lak kalok, ir domba yemenogo dambe dalok, ar ebe kode wundir taga mende o. Nen kode wulketek ma, ir domba yemenogo amberak inarogo nengga, nen amberak tidik mbidik erogo baga, erir taga mende o. 13Ar akuni yabu onggo kau erir taga mende enogo, kode wundi taga eti nenaluk, ar eti yabu onggo kau ekwa ma o. Ma ar nen ir domba endoma inaredo ar yiluk, ar akla andar taga mende o. 14An eti ar gembala pano mende eti arar o, An nen ir An mende domba etoma, ir inebe An nilu, nen ir An nil warek mondok o. Tuguluk ir nen An eti ir inilu mondok arar o. 15#Mat. 11:27; Luk. 10:22Eti ndak-ndak, An Nombae nen An nebe ilu mondok, nen An nen ogwe Nombae nilu mondok ar o, nen An nebe ir An mende domba etoma inake naruwak nen yiluk wogoraurak eti ndak arar o. 16Ir domba amberak eti wedek mende ar ogwe, ir etoma inebe eti An mende arar o. Ogwe ir etoma, domba yoma inom inakla mende dek ar o. Nen ir etoma, An nen wogorek laurak o, nen ir An nane inaruk kolalugun ar o. Ir domba yoma inom etoma inom dambulogo balok, ir inagembala eti ambiar dogogin o.

17An Nombae nen, An eti iliti kunik mondok o, nenaluk ir iyok paga wogonabuak nen yiluk, An naruwak nen yiluk yoragin eti paga o. 18Ir inebe akuni ta nen kwak, An ninggimo nen ndilogo wogonabu ndak dek o. Ir inebe An nakla andalok wadok paga mban ar wogorigin o. Ir inebe obogar wogorurak inom, nen inggimo nen obogar wogonaburak inom, An nobatne lektek ndak arar o. An Nombae nen neyabu woknirige mende ebe eti arar o.”

19Ar Yesus wene etegerogon yirige eti paga, ir akuni Yahudi mende aredo wakugwa o. 20Ir akuni pakalok nen yugu dogolir, “Monggar akla onggegerek, iliti mbalkerek yirtaga o! Kir Ar Ane nenaluk kolalkwi agoktip?” yiluk yirugwa.

21Ogwe ir amberak nen yugu dogolir, “Ar akuni monggar akla unggirige mende kwak dogolepma, etegerogon etep dek o! Ar monggar eti nen, akuni inil mbuk mende pano erinaburak ndak a?” yiluk yirugwa.

Ir akuni Yahudi mende Ar Yesus waganu dambe karugwa wene

22O Yerusalem paga etoma, ir akuni nen, hari Tuhan Ai Ngger Palek tu kurkugwa paga eberogo komakwi komarkugwa o. Nen o eti nem eti, togi wundirtagama arar panggo yi wagage amor-amor arar. 23Ar Yesus o Tuhan Ai Palek lambimo endaga Serambi Salomo, etoma nggwe laganen, 24ir akuni Yahudi mende pakalok Ar eragalu kuwak eri wagugwa, wagu lagugwarik yogu dogolir, “Nir niniliti Kar koba ebebar andau ndak dek ninagik, o menda kudi dogowak nen yiluk erogo binanenggen?”

25Ar Yesus nen onggo yoraga dogolir, “Wene an obogar yorkeragi kigik ar ogwe, kir nen ebebar andugwi dek o. Ye yabu nde yabu, An Nombae endaga paga mban An eka agarik o. Nen eka etoma paga, An nebe yi ebebar mende yiluk yokera taga o. 26Kir kiniliti ebebar andaurak ndak dek eti, kir yi eti domba-domba An mende dek o. 27Nenaluk ir domba An mende nen kalok eti, ir An nane kolalek o. Nen An nen ir inebe an nilu ar o, nen ir nen An mutnarek lektagwi o. 28An nen ir iniluk mondok nabedal kabedal eti arar wogoraga, nen ir inebe o aga yogok kudi paga etoma, nuk arugun mondok dek arar o. Ir obogar An ninggi mo nen, ar ambi nen ndilogo wogonabigin dek arar o. 29Ar An Nombae eti nen, ir obogar waganogo ninggimo birige werek eti nggok lektek arar o. Eti ar ma, ar akuni ambi nen An Nombae inggimo nen ndilogo wogonaburak mondok ndak dek arar o. 30An o, nen An Nombae o eti, ninebe ambi ar o.”

31Etanogo yigi nanggige, ir akuni Yahudi mende nen nggir yambuk kuwok nen yiluk waganggugwa. 32Ogwe Ar Yesus nen ir yoraga dogolir, “An nen yabu Ar Nombae nen noba birige mende, pano mende pakalok eki kir kinil obogar kogop o. Ma nen, kir nen An nggir paga naruok nen yiluk ekop kwak yi yabu nggi kwak eki paga?”

33 # Im. 24:16 Ir akuni Yahudi mende yemenogo nen onggo yogu dogolir, “Nir Kar nggir paga karuwok nen yiluk eko eti, Kar yabu pano dombok erir wagan yoma paga dek o, ogwe Kar nen Ar Allah ilka paga maduk erogo begen eti kwak paga o. Nenaluk, Kar akuni mende yi ar ogwe, An eti Allah yiluk erogo batar tagan eti paga o.”

34 # Mzm. 82:6 Tuguluk Ar Yesus nen onggo yoraga dogolir, “Buku Hukum ake kolek kir mende enogo akla etoma nen diru mbalek eti, ‘Ar Allah nen, kir eti alah ninggalok mende arar yokerar taga o’? 35Nir ninilu Alkitab akla diru mbalek mende etoma, o yige ndagalke erir lagwi dogorak mende arar o. Etiar ma, ir akuni Ar Allah Ane waganggwi mende eti yoraga dogolir ‘alah’ wedek mende yoragage o. 36An Ar Allah Akbur yigi eti paga, nenaluk kir Ar Allah elokte paga maduk erogo bigi yonogop? Ebebar mende kwak eti, An Nebe yi, Ar Nombae nen arar pulogo yoma lakbani wagage o. 37Nen An yabu Ar Nombae nen erurak yiluk lakbani wagage mende etoma ekidek kalok, kir An noba ebebar andau mondok maga o. 38Ogwe Ar Nombae nen yabu woknirige mende eki etoma paga, kir kiniliti An ebebar noba andau kina'ir eti kigik ar ogwe, An noba ebebar andani o. Eti erugun paga, wene kir kiniluk aga, nen kir kinakla eber taga erigin eti; Ar Nombae eti ebebar An Nimbirak dambulik ambi ar o, nen An ogwe Ar nimbirak ambiar dambulik o,” yiluk yorarige o.

39Ir Ar Yesus paktawok nen yiluk, elok tekma ya talkbigik ekugwarik ogwe, patalok dek. Ar we ineragalu nggwe tabok togon arar kode wulkige o.

40 # Yoh. 1:28 Ar Yesus enogo tuguluk, o i Yordan aik alibagan nggwe, ar Yohanes akuni ima wukbaga lagagemo etoma ari lagagerek welagage. 41Nen Ar oba akuni pakalok wagugwa. Ir nen Ar Yogu dogolir, “Ar Yohanes nen erukbuk mende elalin eti etuk dek o, ogwe Ar Ap yi awene yirige mende perak, mondok-mondok ebebar o.” 42Yugu lagugwarik, ir akuni etoma mende inebe pakalogar, Ar Yesus oba iniliti ebebar andarugwa o.

Currently Selected:

YOHANES 10: WLW

Highlight

Copy