YOHANES 8

1Ogwe Ar Yesus enogo, o Kur Zaitun paga arar lagage. 2Kubenengge o keyalek, Ar Yesus Tuhan Ai Palek ma arar lagage. Lagagemo, ir akuni pakalok Ar Oba kuwak eri wagugwama, Ar Yesus korek taga lagagerek, ir enogo wene arar emeriragage o. 3Etanogo wene emeriraganem, ir guru-guru agama o, nen ir ap Farisi mende o, ir nen kwe ambi maduk eki nanggige, kwakbiluk pagago wolok Ar oba lagugwarik, kwe enogo odo mendek dogon yiluk yorugwa. 4Yotuk nen Ar Yesus yogu dogolir, “Kar Ninombae Guru wae, kwe yi ap adik mende ambi maduk imbirak eki nangge, nir pagago wolok wago o. 5#Im. 20:10; Ul. 22:22-24Wene Hukum Musa nen diru mbalkige mende paga, kumi inebe yi ndak-ndak dalok, nggir paga ndamuk pamuk warinakwi ar kigik, mondok min arar inarurak yiluk yirige o. Etiar ma, yogondak Kar Kakla nen nggi andagen?” 6Ir wene eti yorugwa eti, wene eti paga yiduk kwagago, Ar ebe wene maduk oba buok nen yiluk yorugwa. Ogwe Ar Yesus inggi tiktik paga, diru agar paga mbalka ur wuragik mban ar puk agage o. 7Nen ir mondok ar tombok kugu nanggugwa, Ar ilka puda yega lagagerek, nen yoraga dogolir, “Kir akuni obogar, kar komaduk mondok dek mende kalok, kar eti nen ndak ar kwe yi kalep nggir yambuk kan o.” 8Yiluk yoraga lagagerek, Ar Yesus tuguluk ur wutatuk, Ar inggi paga diru agar paga mbalka puk agage. 9Ar Yesus wene enogo yigi nanggige, ir akuni yemenogo, ir ap inanggok ndak kudi nen elege ngger lerago obogar, o etanogo dambe kalok, ar ambi nggigik arar kode mbugulkugwa o. Nen irep paga eti, Ar Yesus adigar puk ari wagage o. Ma ar kwe enogo mendek akdipmo etanogo ar welagage. 10Tuguluk Ar Yesus aluak puda yega lagagerek, kwe enogo wene yoga dogolir, “Ir akuni yemenogo inebe nggoma? Kar hukuman koba bu dambek bagaga a?” yiluk yorige.

11Ar kwe enogo nen onggo yoga dogolir, Ai Ambo, togok banengga o.

Ar Yesus nen onggo yoga dogolir, “Kalok pano ar o, An nen ogwe kar hukuman wokirigin dek ar o. Yogo kar kuma lan o, nen yabongga maduk mondok erugup o”] yiluk yorige.

Ar Yesus eti agar paga yoma akbinak mende arar o

12 # Mat. 5:14; Yoh. 9:5 Ar Yesus wene ambi inom ar ir akuni pakalok inoba yoraga dogolir, “Agar paga yoma akbinak mende eti an arar o. Nen ir akuni an mutnarek lugun mende eti, o amum akla lugun dek o, ogwe, ir iniluk dogu mende akbinak eti onde dogogun o,” yiluk yirige.

13 # Yoh. 5:31 Yigi nanggige, ir akuni Farisi mende nen yogu dogolir, “Yogondak Kar kengga werek kabok bagalar tagan o, nen wene Kar bagalken mende eti, ebebar mende dek o,” yiluk yorugwa.

14Tuguluk Ar Yesus nen onggo yoraga dogolir, “An nadik nengga werek nen nabok bagalar taga ogwe, wene An bagalir taga mende eti, ebebar mende arar o; nenaluk An nggoma nen wagagi, nen An nggoma lektaga eti An Nilu o. Nen An nggoma nen wagagi nen nggoma lektaga eti, kir kinungguk dek o. 15Kir akuni inuwak dolinaku dogolir kalok, ir akuni erirtagwi mutok ekwi, ogwe An eti akuni ambiar kwak ogwe inuwak dolinakikdek o. 16Nen we An nen, ir akuni inuwak dolinaka dogolir kalok eti, wene odo ki togon ebebar mende arar mbaligin o. Nenaluk An nadigar nen yega agarik dek o, Nombae An lakbani wagage werek eti nimbirak erir nektaga o. 17Hukum wene ar Musa nen diru mbalkige mende akla, wene diru mbalek yegerogon o: Wene bagalurak kalok eti, akuni inebe mbere nen bugalugun kalok eti, wene ebebar mende arar o, yiluk werek o. 18Etiar ma, wene An nake paga bugali tagwi eti inebe mbere, ambi An, nen ambi An Nombae lakbani wagage werek eti, Nir nimbirak nen arar bagalir tagwi o.”

19Ir onggo yogu dogolir, “Kar Kombae eti ebe ngga werek?”

Ar Yesus nen onggo yega dogolir, “Kir yi, An inom, nen Nombae inom, mondok dik binanenggek dek arar o. Nen kir An kinilu kwak dogolep ma, kir An Nombae eti kinilu mondok arar dogolep o.”

20Wene etoma obogar yoragage eti, Tuhan Ai Palekma akman nggwe, Allah ake bugu dogu yiluk, o ande mbal-mbal erogo bir lagugwama etoma nen, Ar wene emeriraga dogolir yoragage. Ogwe ir akuni ambi nen Ar mondok paktalok dek. Nenaluk eti erumo auwan panggo yi wagak dek ma.

O An ligin mo etoma kir warurak ndak dek yoragage wene

21Ar Yesus wene ambi inom yoraga dogolir, “An nebe lamo, kir nen An kwak nabugun o. Ogwe kir kinomaduk akla arar wartarugun o. Nen o An ligin mo etoma, kir yi laurak ndak dek o.”

22Eti paga, ir ap Yahudi mende inewai nen yugu dogolir, “Yogo puk-puk, Ar engga werek nen inggi ndaluk watak nen yiluk yirtaga kwa, nenaluk Ar nen, ‘An ligin mo etoma kir laurak ndak dek yirtaga,’” yiluk yirugwa.

23Tuguluk Ar Yesus nen yoraga dogolir, “Kir yi wagagup eti, kogona paga nggwe nen wagagup o; ogwe An wagagi eti, tuan ogona paga nggwe nen wagagi o. Kir eti agar paga yoma mende o, nen An eti agar paga yoma mende dek o. 24Eti paga ma, An kir yokerak o, An nebe eti, ‘AN AGARIK yega lagage eti An arar o.’ Ma, kir kiniliti An ebebar andagun dek kalok, kir kinomaduk akla kinom arar wartarugun o.”#8:24: AN AGARIK: Paga kwak etoma Ar Allah nen Ar Engga werek kenam erogo yenggak kowak nen yiluk kalok AN AGARIK yega lagage. (Kel. 3:14).

25Ir wene onggo yogu dogolir, “E puk, Kar yi ta?”

Ar Yesus nen onggo yoraga dogolir, “Nena ake, kir An tuguluk ninom wene ambi yurak!” 26Kir kinake paga, wene yokerau mende inom, nen kinuwak dolu mende inom, pakalok ar agarik o. Ogwe Ar An lakbani wagage werek eti, ki Ar oba ebebar andaurak o. Nen wene Ar nen An yornirige mende, naruk kolkigi mende etoma, agar paga yoma yoraurak o.

27Wene Ninombae abok, Ar yirige mende etoma, yoraga kigik ogwe, ir inakla dik bigikdek welagugwa. 28Eti paga nen Ar Yesus nen wene ir yoraga dogolir, “O ambi paga, kir nen Akuni Inakbur eti wogok bugwi kinalok, An eti Ar AN AGARIK yirige eti ara o, yiluk kir kinilu arigin o. Nen ye wene nde wene An eka lagi mende etoma, An nakla wadok paga dek o, yiluk kir kinilu arigin o. Nen An yokera taga eti, wene nena An Nombae nen emeknirige mende eti mban arar o. 29Nen Ar An lakbani wagage mende eti nimbirak agarik o. Ar nen An werok togon bani tagodek o, nenaluk An nen Ar iliti wadok mende mban erir taga eti paga o.”

30Ar Yesus wene etoma obogar yirigemo, Akuni pakalok ar nen, Ar oba iniliti ebebar andarugwa.

Ar Allah ebebar mende nen kir kede pigalogo binagagin yirige wene

31Tuguluk Ar Yesus nen akuni Yahudi mende, Ar oba iniliti ebebar andarugwa mende inake wene yoraga dogolir, “Kir yi, An wene emerkira taga ndak-ndak mutok mban erugun kalok, kir eti An mutnarek lagwi ebebar mende arar o. 32Nen eti paga perak, kir Ar Allah ebebar mende eti kinil yenggak kugun o, nen kir kinebe kede pigalogo binagagin.”

33 # Mat. 3:9; Luk. 3:8 Ir nen onggo yogu dogolir, “Nir yi ar ap Abraham eti umbuwi wigalek mende arar o. Ma nir yi, akuni ambi kwak inayedoman etagagu mende mondok dek o! Etiar ma, Kar wene ‘Kir kede pigalogo binagagin yegen kwak eti, nena Kakla andalok yoneragen’?”

34Yiluk yorugwama, Ar Yesus nen wene onggo yoraga dogolir, “Wene yi ebebar mende yokeragin o, ir akuni maduk ekwa enogo eti, maduk eti ayedoman arar o. 35Nen ar yedoman mende enogo eti, keluarga paga inakla etoma akdip telek mendago mondok dek o. Nen elege endago mende inake perak, inake inakdip lendago telek aitok mondok dogi taga mende o. 36Wene edo eti paga ma, Ar Elege endago eti nen kir kede pigalogo binagagin kalok, kede ebebar mende mondok ar pigalogo binagagin o. 37Kir yi ar ap Abraham eti umbuwi wigalek eti An nilu ar o. Etiar ogwe nen, we wene An emekira taga mende waganu kina'ir nen, kir An mondok min narurak wadok andar tagwi o. 38An Nombae oba nil karigi mende etiar, An kir yokera taga o. Nen kir eti kinombayelak nen, emekiragetek mutok mban ekwi agoktip o.”

39Ir nen onggo yogu dogolir, “Nir ninombae eti ar Abraham arar o,” yiluk yirugwama. 40“An wene Ar Allah nen ebebar mende yornirige naruk kulkigi mende eti, kir yokeraga ogwe, nen kir An mondok min narurak wadok kugwi o. Ar Abraham nen etegerogon ambi ekige dek arar o! 41Kir ekwi agoktip eti, kir kinombayelak nen ekwi mende mban arar ekwi agoktip o.”

Ir nen onggo yogu dogolir, “Nir yi elege madi mbalek mende endago dek o. Nir ninomba eti omanggi omangga ar, Ar Allah eti adigar o.”

42Tuguluk Ar Yesus nen onggo yoraga dogolir, “Ar Allah eti ebebar kir Kinombae kwak dogolep ma eti, kir nen An kiniliti kunik ernabilep o. Nenaluk, An wagagi eti, Ar Allah nen lakbani wagage o. An nakla wadok paga wagagi mondok dek o, ogwe Ar nen ar An lakbani wagage o. 43Kir an wene yokeragetek mende dikburak eti edo nenaluk? Edo eti, An wene emekira taga etoma, kir kolalurak ndak dek eti nen o. 44Etiar ma, kir kinombae eti ar Iblis eti arar o. Ma kir ar wadok andak taga mutok ekwi agoktip o. O paga kwak etoma nen, ar Iblis eti ap inakwa arar o. Wene ebebar mende oba nggwe dogali tagodek o. Nenaluk ar oba wene ebebar mende eti mondok dek arar o. Nen wene enggal mende yega kalok, eti ar yu ndak-ndak arar o. Nenaluk ar obabur eti etegerogon arar ma o. Ma ar eti enggal yogwa nen inenggal yoga edo ar arar o. 45Ogwe An wene ebebar mende yokera taga o, ma wene eti nen ar, kir An noba ebebar kinakla andaurak ndak dek erkinabi taga o. 46Kar ta nen kwak, An maduk ekigi mende nandekbuk telekma bigin, Nen An wene ebebar mende yokeraga neyalok, kir ebebar yiluk andaurak eti edo nenaluk? 47Ir akuni Ar Allah nen kenam erek kalok, Ar Allah ane kolalkwi o. Ma kir An nane kolalkwi dek kalok eti, kir yi Ar Allah eti nen kenam erek mende dek arar o.”

48Ir akuni Yahudi mende enogo nen onggo yogu dogolir, “Nir nen Kar eti akuni Samaria mende, monggar akla malabek yiluk yokogo enogo ebebar talek a?”

49Ar Yesus nen onggo yega dogolir, “An monggar nakla malabek mende dek o. An eti Nombae alon palirtaga o, ogwe kir nen kwak An wene maduk mende noba bik tagwi o. 50An nadik nake paga wogokbanu yiluk kwatar nektaga dek o. Ar ambi nen an wogokbanurak mende eti kwarogo bik taga o. Nen Ar eti nen ar akuni inandokma waganigin o. 51Wene yi ebebar yigin o, akuni An wene yitaga mende etoma mutok eka dogogin kalok, watagik dek iluk mondok dogogin o.”

52Tuguluk ir akuni Yahudi mende nen Ar Yesus yogu dogolir, “Yogondak kar monggar maduk mende enogo kakla onggege ebebar o, yiluk ninilu aga o! Ar Abraham ogwe watagage ar o, nen ir ap nabi-nabi etoma ogwe watlagugwa mban ar o. Ogwe kar nen yega dogolir, ‘Akuni An wene yitaga mende etoma mutok eka dogogin kalok, watagik dek iluk mondok dogogin o,’ yiluk yegen o. 53Nen Ar Abraham ebe ogwe watagage ar o, nen ir ap nabi-nabi etoma watagugwa ar o, kalok Kar yi kwak ta? Kar kandugi kwak nggok negen lektek kigik, ar nir ninombae Abraham kwak eti we ar o.”

54Ar Yesus nen onggo yoraga dogolir, “An nen nendaga yadek bataurak mende mban kwatar nega kalok, eti ebe enggen mondok dek mende arar o. An wogokbani taga eti, An Nombae kir nen andugu dogolir, nir mende Allah yiluk anda tagwi eti arar o. 55Eti ogwe, kir Ar ebe kinil warek dek o. Ogwe An perak nil warek arar o. Nen An nen wene Ar An nungguk dek yigin kalok eti, An eti nenggal yoga, kir ninom ndak-ndak arar o. An nen Ar Ebe nil warek eti paga, nen Ar Ane yirige mende dikbiluk eka agarik o. 56Kir kinombae Ar Abraham eti, o An mende enam arigin eti il kalok nen perak, akla adeknggen ambik arigin o. Ar obok il karige nen ar akla adeknggen ambik o.”

57Tuguluk ir akuni Yahudi mende nen wene onggo yogu dogolir, “Kar mende umur lima puluh tahun auwan agik dek o, nen Kar ar Abraham eti kil muk karigen o.” #8:57: Kar ar Abraham eti kil muk karigen o: Diru alep kwak amberak paga nen yugu dogolir: Ar Abraham nen Kar il keyarigea? yiluk etegerogon diru mbalek o.

58Ar Yesus nen onggo yoraga dogolir, “Wene An ebebar mende yokeragin o, Ar Abraham endak lagik dek kigik, An obok welagagi o.”

59Yigi nanggige, ir akuni Yahudi mende yemenogo nen, nggir waganggu lagugwarik, Ar waruok nen yiluk ekugwa. Ogwe Ar Yesus arar lambo yega lagagerek, Tuhan Ai Palek ma dambe kalok arar lagage o.

Currently Selected:

YOHANES 8: WLW

Highlight

Copy