YOHANES 7
7
Ar Yesus ogariyak inom
1Wene etoma emeriraga lagagerek, Ar Yesus o Galilea paga, idil unggur etoma obogar dagak-dagak ekige. Nen ir ap Yahudi mende inewai nen, Ar warurak paga abok mbalkugwa eti paga, o Yudea paga nggwe etoma laurak, Ar a'ir agage o.
2 #
Im. 23:34; Ul. 16:13 O eti paga, Hari Raya Pondok Daun #7:2: Hari Raya Pondok Daun: eti o kado palogo ya nogo yigik o Mesir nen o Kanaan wundi wagugwa mende oba eberkwi dogolir, komaku lagugwa. Kamus paga bikani. eti arar korok ari wagage o. 3Ma Ar Yesus ogariyak nen yogu dogolir, “Kar o yoma dambe kalok, Yudea paga etoma arar lan o, etoma lamo, ir Kar mukarek lagwi mende nen, yabu Kar eka ambi inil keyawak nen o. 4Ir akuni inendaga telekma anggup ilka dogowak nen yiluk kalok eti, ye wene nde wene ir eketek mende etoma kimagago eri tagodek o,” yiluk yorugwa.
5(Nenaluk ir Ar ogariyak eti iniliti Ar oba ebabar andagikdek ma, etegerogon yirugwa o.) 6Ar Yesus nen onggo yoraga dogolir, “An o etoma laurak eti auwan panggo yi waga dek o, ogwe kir kinake perak, o yige ndagalke dogogun kudi etoma, menda nen laurak kalok eti, ndak mban arar dogogun o. 7Kir o agar paga yoma nen ina'ir kunik erkinabugun dek o. Ogwe An kwak perak ina'ir kunarkwi o, nenaluk An ir inomaduk telekma bagalogo yorartaga eti paga o. 8Kir kinadik ar inakla eberogo, komarkunem etom lani o. An o etoma laurak, auwan panggo yi wagikdek ma, etoma An ligin dek o.” 9Ar Yesus nen ogariyak etegerogon arar yoralok, nen Ar ebe o Galilea paga etoma arar puk agage o.
Ar Yesus Hari Raya Pondok daun ekwi paga ekige wene
10Ar Yesus ogariyak yemenogo, wene Hari Raya Pondok Daun enogo ake komakunem, etoma arar lagugwama, Ar Yesus yabongga lakbi lakbo akuni inil kigik dek lambok togon arar lagage. 11Wene komakwi enogo ekwi kigik, ir ap Yahudi mende inewai yemenogo, Ar aginok waganggu dogolir, “Ar nggoma werek?” yiluk kinok waganir nugu lagugwa.
12Ir akuni pakalok nen, Ar abok inande mun-mun yugu dogolir, “Ar eti obabur pano mondok arar o.” Ogwe ir ambetak nen yugu dogolir, “Dek o! Ar eti akuni pakalok nuk puk erogo bar nertaga o,” yiluk yirugwa. 13Arar ogwe, ir akuni etoma ar ambi kwak nen, wene obade dek ane telekma Ar abok yurak eti, ir inobade mondok welagugwa. Nenaluk Ir ap Yahudi mende inewai yemenogo inomba inobade nen.
14Wene komakwi inakla yemenogo, Ar Yesus Tuhan Ai Palekma onggega lagagerek, wene emerirak nen yiluk eka lagagerek, arar wene emeriragage. 15Ir ap Yahudi mende inewai yemenogo, wau yiluk inagur lalok, ir nen yugu dogolir, “Wee wadigi a, Ar yi sekolah ektudek ar ogwe, Ar wene pakalok ar yege yoma nenggerogon nda?” yiluk bi warkugwa.
16Yugu nanggugwa, Ar Yesus nen onggo yoraga dogolir, “Wene An emekiragi yi, An nawene mende dek o, ogwe Ar An lakbani wagage eti Awene mende emerkiragi o. 17Ir akuni, Ar Allah wadok mende mban eru wadok kalok, wene An emekiragi etoma, Ar Allah nen emerkige mende a, An nen yigi a, eti ir inilu o. 18Ar akuni ambi wene ar akla andalok mban yitaga mende eti, ar engga werek endaga lekartau paga ake mban yitaga mende o. Ogwe Ar akuni, Ar lakbi wagage mende endaga lerkau paga nen yiluk mban kwari taga mende eti, wene enggal mende mondok yitagodek, ebebar mban yitaga mende o. 19Ar Musa nen, Ar Allah Awene Edo diru mbalek mende wokirarige ernogogi? Ogwe kir ya agokip mende amberak nen, wene yirige mende etoma apma tebe yiluk erir taga mende dek arar o. Nen kir An naruwok yiluk erirtagwi eti edo nena paga?”
20Ir akuni pakalok yemenogo nen onggo yogu dogolir, “Kar Kiliti mbal digindik a! Kar karu yege eti ta nen?” yiluk yorugwa.
21Ar Yesus nen onggo yoraga dogolir, “We yabu ambi ar hari Sabat paga eki mende, kir nen wee au yiluk yogop o. 22#Kej. 17:10; Im. 12:3Ar Musa nen, wene ap endago kalok, elege eti sunat erinaku dogorak wene, diru mbalogo wokeragage o. Nen inayo agakdo mbalku dogorak eti, ar Musa nen birige dek o. Ogwe ir ap nir ninumbu ninomba etoma nen birugwa o. Eti paga nen, o Hari Sabat eti kigik ar ogwe, akuni sunat erinakwi o. 23#Yoh. 5:9Kir ar Musa nen sunat eku dogorak mende wene denogo birige eti tagalogo, Hari Sabat kigik ar ekwi o, ma nenaluk kir An akuni u kunik mende, hari Sabat paga dek erinaka kalok wenemuk yugwi agoktip? 24Kinil kertagwi mutok inuwak dolinaki eti, mondok maga o. Arte wene ebebar mende paga mban, inuwak dolinaku dogorak o.”
Ar Yesus Raja Ndilinakwa eti ebebar a?
25Nen ir akuni o Yerusalem mende inebe wenago nggwe negen ar nen, kinok yugu dogolir, “Akuni yi mondok min warurak paga kwarir enogo yi arar a? 26Ar obade dek mondok arar dogolir, akuni pakalok inilka paga wene mbalka ogwe, ap ambiar nen wene onggo ambi yogwi mondok dek yoma dani nda! Ir ap nggaindak yoma, Ar yi Raja ndilinakwa mende enogo ebe yi arar yiluk, inilu agarik kogop a?” 27Ogwe ar Raja Ndilinakwa mende eti warigin kalok, akuni ambiar nen, Ar ap eti ai edo nggoma mende yiluk, ir inunggukdek arar o. Ogwe Ar ap yi ai edo eti, nir ninilu etnogogi.
28Tuguluk Ar Yesus Tuhan Ai Palekma wene emeriraga dogolir, Ar Ane nggok togon paga yoraga dogolir, “Yogo kir An yi ta? Nen nai edo nggoma mende eti, kir kinilu kinagi o? An Nadik nendaga paga naburak watuk dek o. An lakbani wagage eti, Ar An lakbani waru ondewerek nen ar lakbani wagage o. Nen Ar eti oba ebebar inakla andaurak o. Ogwe kir yi Ar ebe eti kir kinungguk dek o. 29Ar eti An niluk o, nenaluk An nedo eti, Ar paga nen ma o. Nen An lakbani wagage eti, Ar Adik mban nen arar o,” yiluk yoragage.
30O etinem, Ar Yesus paktau inakla wadok ebekugwarik ogwe, ar ap ambi nen, inggi Ar oba paktau inobade mondok agugwa. Nenaluk Ar paktaurak mende, o telek dek arar agage paga ma o. 31Nen ir akuni pakalok yemenogo, ir amberak inakla Ar ebebar andagu lagugwarik nen, Ar yugu dogolir, “Ar Raja Ndilinakwa eti warigin kalok, Wene elalin erukbuk mende, Ar ap yi eke mende yoma kigik, Ar eti nen kwak ebiluk nggok negen yuk ar erigin a?” yiluk yirugwa.
Ar Yesus paktau paga ekugwa wene
32Ir ap Farisi mende enogo nen, ir akuni pakalok yemenogo ngguruk pok-pok, Ar Yesus Abok nenggerogon yiluk yirugwa mende, ir inaruk kolalkugwa. Eti paga nen, ir ap imam-imam kepala mende inom, dambuk togon nen, ir ap Tuhan Ai Palekma tuam dogi tagwi mende yemenogo inom, Ar Yesus pakta lani o yiluk lakbarugwa. 33Ar Yesus nen, o Tuhan Ai Palekma yemenogo, ir akuni pakalok yemenogo wene yoraga dogolir, “Kir An Ninom we dudu yogondak ya ar agorik o. Nen An tuguluk, Ar lakbani wagage mende eti oba ligin o. 34Nen kir nen An kwaknabugun o, ogwe An nebe kinom abuk arugun mondok dek o, nenaluk kir An dogogin mo etoma, kir warurak ndak dek o,” yiluk yirige.
35Tuguluk ir ap Yahudi mende inewai nen ar ambi yogik eku dogolir, “Ar akuni yi yogo nggoma nggwe lagaluk nda, kir An kwaknabugun dek yege yi? E puk, kalok Ar ir akuni Yahudi mende amberak, o wedek ma nggwe, akuni Yunani mende inanggedokla dogolir, ir nen diru emerira tagwi yemenogo inoba lak nen yiluk yege a? 36Yogo wene nir Ar kwarugun ogwe, nen nir Ar ninom abuk arugun dek yi kwak, yogo enggen nggi? Nen nir Ar werekma etoma warurak ndak dek yege yi nenggerogon?”
37 #
Im. 23:36
O wene komaku lagugwa enogo irep paga, o ari ambi nggok mende arar ma, Ar Yesus o Tuhan Ai Palekma yemenogo metlaga lagagerek wene yega dogolir, “Ir akuni inagi abu mende eti, inagi nau wadok kalok, An noba warnek o. 38#Yeh. 47:1; Za. 14:8Nen ir akuni An noba iniliti ebebar andagun mende enogo, ir inake paga Alkitab akla nen yirige mende eti yegerogo: ‘Ir eti inilitimo etoma nen, akuni iniluk eginaka dogorak mende, i iliri wundir waga dogogin o,” yiluk yirige werek o. 39Nen Ar Yesus wene Ar Allah mende Roh Allah enogo abok yirige yi, ir akuni iniliti Ar Oba ebebar andagun mende ernogo, yabongga wogoraurak mende paga yirige o. Nenaluk o etinem, Ar Allah mende Roh eti, akuni auwan inoba wogoragik dek ma o. Nenaluk Ar Yesus ebe auwan warlagikdek kigik, endaga yade bigikdek eti paga o.
40Ir akuni pakalok, Ar Yesus wene yega inaruk kolalku lagugwarik, ir amberak nen yugu dogolir, “Ar ap yi Nabi mende arar o!” yiluk yirugwa.
41Ir amberak nen yugu dogolir, “Ar Raja akuni Ndilinakwa ebe yi arar o!” yiluk yirugwa.
Ogwe ir amberak nen yugu dogolir, “Ar Raja akuni Ndilinakwa eti, o Galilea nen waru yogop kwak eti ndak dek o?” yiluk yirugwa. 42#2Sam. 7:12; Mi. 5:1Alkitab paga diru mbalek etoma nen yega dogolir, Ar Raja akuni Ndilinakwa mende eti, Daud umbuwi wigalek mende arar o. Nen Ar eti, o Betlehem ar Daud ai danggop paga nen, warigin yiluk yugu lagugwa o. 43Nen wene irep paga, ir akuni yemenogo Ar Yesus ake paga aredo wakugwa. 44Nen ir amberak nen, Ar Ebe paktawok nen yiluk ekwi ogwe, ar ambi nen kwak paktigikdek mban ekugwa o.
45Tuguluk ir ap Tuhan Ai Palek ma tuam dogi taga mende, Ar Yesus paktau paga lakbarugwa enogo, ir iniyok paga arar lagugwama, ir imam-imam kepala o, nen ir akuni Farisi mende enogo o, ir nen kinok yoragu dogolir, “Kir Ar eti pagago wolok wagop dek, yiluk yorarugwa?”
46Ir ap enogo nen onggo yugu dogolir, “Weh, wene Ar yirtaga ndak-ndak, akuni yoma nen ambi etegerogo yirugwa mondok dek arar o!”
47“E puk, yogo kir inomar nuk puk erogo binagagemo kinane yi wagop a?” yiluk ir akuni Farisi mende nen onggo yirugwa. 48“Ap nggaindak amberak yoma nen a, ir akuni Farisi mende amberak nen a, Ar oba ebebar andagopma kigik dogu a? 49Ogwe ir akuni pakalok yemenogo, Ar Musa awene diru mbalek eti dikbegekdek arar o, nen ir inebe eti, akuni pudulik mende arar o.”
50 #
Yoh. 3:1-2
Ir akuni Farisi mende inakla ambi eti, ar Nikodemus Ar Yesus oba wagage enogo o. Ar eti nen, i akuni Farisi mende amberak yoraga dogolir, 51“Hukum Wene paga nen yega dogolir, ar akuni ambi awene mende mbililogo inaruk kolalkwi, nen wene ar eru mende ebe mbenakwi, auwan ekikdek kigik, wene maduk anggin mende oba burak dek o, yiluk wene mbalek werek ernogogi.”
52Ir nen onggo yogu dogolir, “Yogo kar yi ap Galilea mende ar a? Wene ap Nabi ambi o Galilea nen enam arigin yirige mondok dek etnogogi, ar il katawak nen Alkitab akla etoma birkatani nda!”
Ar kwe ambi maduk ekanem paktarugwa
[ 53Etegerogon eku lagugwarik, ir akuni obogar inuma lagugwa.
Currently Selected:
YOHANES 7: WLW
Highlight
Share
Copy
Want to have your highlights saved across all your devices? Sign up or sign in
